2017թ. ապրիլի 26-ին ԵՊՀ Իջևանի մասնաճյուղում կայացավ Վիլյամ Շեքսպիրի մահվան 401-ամյակին նվիրված դասախոսությունների շարք, որը կազմակերպվել էր «Անգլերեն լեզու և գրականություն» մասնագիտության կրթական ծրագրի պատասխանատու Ա. Սիմոնյանի կողմից:

Դասախոսությունների ընթացքում անգլերենով և հայերենով անդրադարձ կատարվեց այնպիսի թեմաների, ինչպիսիք են Շեքսպիրին վերագրվող ստեղծագործությունների հեղինակային իրավունքների հարցը, նրա երկերի լեզվական և գործաբանական արժեքը, սիրո թեման, Շեքսպիրն ու իր ստեղծագործությունները հայ ժողովրդի ընկալմամբ, շեքսպիրյան թեմաների արդիականության հարցը:

Անգլերեն դասախոսություն կարդացին՝

1. Աստղիկ Սիմոնյանը («Շեքսպիրի հեղինակային իրավունքների հարցը» / “Shakespeare Authorship Question”),

   
   

2. Շուշանիկ Գրիգորյանը («Ազատ բառակապակցությունների գործաբանական կիրառությունը Վ.Շեքսպիրի «Համլետ» ողբերգության մեջ» / “The Pragmatic Effect of the Collocations in W. Shakespeare’s Hamlet”),

   
   

3. Ջեմմա Միլիտոնյանը («Սերը Շեքսպիրի ստեղծագործություններում» / “Love in Shakespeare”): 

Հայերեն դասախոսությամբ հանդես եկան՝

1. Էմմա Թեմրազյանը («Հայերի Շեքսպիրը»),

   
   

2. Նունե Դավթյանը («Շեքսպիրի այժմեականությունը»):

Ներկայացված դասախոսություններում ընդգծվեց այն գաղափարը, որ նույնիսկ չորս դար անց անգլիացի հայտնի բանաստեղծ, դրամատուրգ Վ.Շեքսպիրն ապրում է իր անմահ ստեղծագործություններով:

2017թ. ապրիլի 25-ին ԵՊՀ ԻՄ-ի «Տնտեսագիտության տեսություն» մասնագիտության առաջին կուրսի ուսանողները՝ իրենց դասախոսի՝ Հայոց լեզվի և գրականության ամբիոնի ասիստենտ, բ.գ.թ. Ա.Հասանյանի գլխավորությամբ, կազմակերպել էին Մեծ եղեռնի զոհերի հիշատակին նվիրված միջոցառում:

Այն բացվեց Պարույր Սևակի «Անլռելի զանգակատուն» պոեմից («Ղողանջ եղեռնական» գլխից) մի հատվածով:

Միջոցառման առաջին մասում ներկայացվեց Հայոց ցեղասպանության կազմակերպիչների, երիտթուրքերի վարած երկերեսանի քաղաքականության, եղեռնի իրականացման, գաղթականների, Արևմտյան Հայաստանի մտավորականության զգալի մասի ոչնչացման և հայերի վրեժի մասին տեղեկատվություն:

Հնչեցին Մեծ եղեռնի, մեր կորուսյալ հայրենիքի և ներկա սերնդի անկոտրում կամքի մասին երգեր ու բանաստեղծություններ:

Ուսանողուհիներից մեկը (Մերի Եգանյան) հանդես եկավ հայկական ժողովրդական պարով՝ «Սարերի հովին մեռնեմ» երաժշտության ներքո:

Միջոցառման երկրորդ հատվածում ներկայացվեց Մեծ եղեռնը՝ իր  անդառնալի կորուստներով  և  հետևանքներով: Ուսանողները պատմեցին ցեղասպանությանը զոհ գնացած մեր մեծերի մասին՝  Սիամանթո,  Դանիել Վարուժան,  Գրիգոր Զոհրապ, Կոմիտաս…, որը թեև զոհ չգնաց 1915 թվականին թուրքի յաթաղանին, բայց չկարողացավ ապրել՝ տեսնելով հայի այդչափ մեծ վիշտը,  հոգեկան շեղումներ ստացավ և մահացավ:

Միջոցառման երրորդ մասում խոսվեց միջազգային հանրության, մեծ մարդասերների արձագանքի մասին, որոնք խստորեն դատապարտել են թուրքի անմարդկային արարքը: Նշվեցին այն երկրները, որոնք ճանաչել են  20-րդ դարի մեծագույն ոճիրը  և սատար են կանգնել հայ ժողովրդին:

Ներկայացվեց «Նեմեսիս» (հին հունական վրեժխնդրության  աստվածուհու անունով) գործողությունը, որի նպատակն էր պատժել Հայոց ցեղասպանությունը կազմակերպող և իրականացնող երիտթուրք պարագլուխներն, 1918 թվականի Բաքվի հայկական ջարդի կազմակերպիչներին և թուրքերի հետ համագործակցած հայ դավաճաններին: Ընդգծվեց, որ այս գործողությանը մասնակցել են Արմեն Գարոն (Գարեգին Պատերմաջյան), Շահան Նաթալին, Միսաք Թորլաքյանը, Արշավիր Շիրակյանը, Արամ Երկանյանը, Արտաշես Գևորգյանը, Ստեփան Ծաղիկյանը, Սողոմոն Թեհլերյանը, որն էլ հենց սպանել է Հայոց ցեղասպանության գլխավոր կազմակերպիչներից  Թալեաթ փաշային:

Հայոց մեծ եղեռնի զոհերի հիշատակին նվիրված միջոցառումներ Ա.Հասանյանի կողմից անցկացվել էին ոչ միայն «ՏՏ»-I, այլև «ԻԿՄ»-I, «ՀԼԳ»-II կուրսերում:

2017թ. ապրիլի 25-ին ԵՊՀ Իջևանի մասնաճյուղում կայացավ Հայոց ցեղասպանության 102-րդ տարելիցին նվիրված միջոցառում (անգլերեն լեզվով), որը կազմակերպել էր Անգլերեն լեզվի և գրականության ամբիոնի դասախոս Ջեմմա Միլիտոնյանը:

Միջոցառմանը մասնակցում էին «Անգլերեն լեզու և գրականություն» մասնագիտության առաջին և երկրորդ կուրսերի ուսանողներ (Անի Ասրյանը, Ինեսսա Բաղինյանը, Էլինա Խաչատրյանը, Սյուզի Շահնազարյանը, Հայկուհի Արզումանյանը և ուրիշներ):

Բացման խոսքով հանդես եկավ Ջ.Միլիտոնյանը՝ ներկայացնելով քննարկվելիք թեմայի ուղղվածությունը՝ «Հայոց ցեղասպանությունը և ԱՄՆ-ի  դիրքորոշումը», որին հաջորդեց վավերագրական ֆիլմի դիտումը:

Ուսանողների կողմից ներկայացվեց Թուրքիայի ժխտողական քաղաքականության, այն բոլոր երկրների ու կազմակերպությունների մասին, որորնք ընդունել և դատապարտել են Հայոց ցեղասպանությունը:

Ուշադրություն դարձվեց ԱՄՆ-ի նախագահների՝ տարբեր տարիներին արված ուղերձներին, այդ թվում՝ ԱՄՆ-ի ներկայիս նախագահ Դոնալդ Թրամփի՝ Հայոց ցեղասպանության 102-րդ տարելիցի կապակցությամբ (ապրիլի 24-ին) հղած ուղերձին: Ընդգծվեց, որ դրանցում նախագահները գործածում էին «Կոտորած» (“Massacre”), «Մեծ Եղեռն» (“Mets Yeghern”), վայրագություններ («Atrocities») բառերը` «Ցեղասպանություն» (“Genocide”) իրավաբանական եզրույթի փոխարեն, որը պատասխանատվության կենթարկեր Թուրքիային:

Վերջում հուզիչ ասմունքով հանդես եկավ 2-րդ կուրսի ուսանողուհի Հայկուհի Արզումանյանը՝ ներկայացնելով Պարույր Սևակի «Անլռելի զանգակատուն» պոեմից մի հատված («Ղողանջ եղեռնական»):