2018թ. դեկտեմբերի 6-ին Իջևանի քաղաքացիական երիտասարդական կենտրոնում կայացավ «Կարծրատիպեր, նախապաշարմունքներ, խտրականություն, դրա տեսակները, միջազգային կարգավորումներ» թեմայով դասընթաց, որը կազմակերպել էր Իջևանի քաղացիական երիտասարդական կենտրոնի համակարգող Արփինե Երիցյանը:

Դասընթացին մասնակցում էին «Երևանի պետական համալսարան» հիմնադրամի Իջևանի մասնաճյուղի 17 ուսանողներ:

Այն վարեց փաստաբան Անահիտ Չիլինգարյանը։

Դասընթացի նպատակն էր մասնակիցներին  ներկայացնել, թե ինչ է կարծրատիպը, հավասարությունը, խտրականությունը, նախապաշարմունքը, հավասար, տարբերակված և խտրական վերաբերմունքը:

«Կարծրատիպեր, նախապաշարմունքներ, խտրականություն, դրա տեսակները, միջազգային կարգավորումներ» թեմայով դասընթացի ժամանակ ներկայացվեցին խտրականության տեսակները, հավասարության իրավունքները: Ընդգծվեց, որ խտրականությունը երբեք չի կարող համարվել դրական:

Դասընթացն անցկացվեց գործնական խաղ-վարժությունների, բանավեճ-քննարկումների միջոցով, որին ակտիվորեն մասնակցեցին ուսանողները:

 2018թ. դեկտեմբերի 6-ին ԵՊՀ ԻՄ-ի հումանիտար գիտությունների ֆակուլտետի ՈՒԳԸ և Հայոց պատմության և հասարակագիտության ամբիոնի համագործակցությամբ տեղի ունեցավ «Հայոց պետականության կերտումը, հիմնական փուլերն ու բնութագրական գծերը (1918-1920 թթ.)» թեմայով բանավեճ-քննարկում՝ նվիրված Պատմաբանի օրվան:

Քննարկմանը մասնակցում էին Հայոց պատմության և հասարակագիտության ամբիոնի դասախոսներ Ա.Ազատյանը, Վ.Պողոսյանը, պ.գ.թ., ասիստենտ Ն.Գրիգորյանը, Տուրիզմի կառավարման և մշակութաբանության ամբիոնի ասիստենտ, պ.գ.թ. Լ.Բեգինյանը, «Պատմություն» մասնագիտության տարբեր կուրսերի ուսանողներ:

Ա.Ազատյանը խոսեց պետականության կերտման դժվարությունների, այդ գործում մեծ ավանդ ունեցած գործիչների կատարած հայրենանվեր գործունեության, հանրապետության կարճատև շրջանի փուլավորման և դրանց առանձնահատկությունների մասին՝ նշելով, որ դեռևս ժամանակին վարչապետ Ս.Վրացյանը Հայաստանի առաջին հանրապետության պատմությունը բաժանել էր երկու փուլի՝ գոյատևման և ստեղծագործական գործունեության շրջանների:

«Հայաստաը փոքր, աղքատ երկիր էր՝ սովյալներով ու գաղթականներով լեցուն, երկրում տարածված խոլերիային աշնանը գումարվեց նաև բծավոր տիֆը, ուստի առաջնահերթ խնդիր էր դառնում ամեն ինչ անել ժողովրդին համաճարակից ու սովից փրկելու համար: Նման պայմաններում Հ.Քաջազնունու գլխավորությամբ մի պատվիրակություն է մեկնում ԱՄՆ՝ օգնություն ստանալու: 1919թ. մայիսին ամերիկյան օգնությունը հասավ Հայաստան, որը մեզ համար փրկություն էր: Չնայած աղքատ, սոված, երեք կողմից շրջափակված լինելուն՝ ՀՀ կառավարությունն այնուամենայնիվ կարողացավ քայլեր իրականացնել, որոնք միտված էին նոր ստեղծված պետությանը ժամանակի քաղաքակրթական արժեքներին մոտ դարձնելուն, – ընդգծեց Ազատյանը:

Ներկայացվեց, որ խորհրդային շրջանում բավականին ժամանակ Առաջին հանրապետությունում ստեղծված շատ իրողություններ վերագրվում էին խորհրդային պետությանը: Օրինակ՝ ԵՊՀ-ի ստեղծումը, պարտադիր կրթությունը: Այնպիսի տպավորություն էր, որ կարծես բոլշևիկները Հայաստանում մտցրին պարտադիր կրթություն:

Անվիճարկելի համարվեց այն, որ անգրագիտության վերացումը նախկին ռուսական կայսրության տարածքի մեծ մասում կապված էր խորհրդային իշխանության հետ, սակայն, նշվեց, որ դա չէր  վերաբերում հայ իրականությանը, որովհետև մեր մեջ ի սկզբանե եղել է կրթություն ստանալու ձգտումը: Խորհրդային շրջանում անտեսվում էր այն հանգամանքը, որ Հայաստանում պարտադիր տարրական կրթությունը մտցվել է Առաջին հանրապետության շրջանում: Այդ ամենի հետ միասին պետությունն ուներ բանակ, որբեր պահելու խնդիր, ուստի շատ դպրոցներ դառնում էին զորանոցներ, որբանոցներ, հիվանդանոցներ, որովհետև պատրաստի շինություններ չկային: Եվ նման դժվարին պայմանների առկայության պայմաններում ևս կրթական գործի կազմակերպումը չանտեսվեց:

Այնուհետև դասախոսների և ուսանողների (մասնավորապես՝ Մհեր Ղալումյանի, Լարիդա Ղազումյանի և Շիրակ Գասպարյանի) մասնակցությամբ բուռն քննարկում-բանավեճ ծավալվեց ժողովրդավարության և խորհրդարանական համակարգի արդյունավետության խնդիրների շուրջ: Համեմատություններ անցկացվեցին Առաջին և Երրորդ հանրապետությունների վարած քաղաքականությունների միջև:

2018թ. դեկտեմբերի 3-ին ԵՊՀ Իջևանի մասնաճյուղում կայացավ «Վորլդ Վիժն Հայաստան» (ՎՎՀ) Տավուշի մարզի երիտասարդական ծրագրերի համակարգող Արարատ Ալիխանյանի հանդիպումը ուսանողների հետ:

Հանդիպման ընթացքում Ա.Ալիխանյանն ուսանողներին ներկայացրեց «Երիտասարդը ՏԻՄ-ի գործընկեր» նոր ծրագիրը, որն իրականացնում է «Վորլդ Վիժն Հայաստան» միջազգային բարեգործական կազմակերպության Իջևանի գրասենյակը՝ Իջևանի համայնքապետարանի հետ համագործակցությամբ: Նշվեց, որ նախագիծը հնարավոր է դարձել «ԵՄ-ն հանուն երիտասարդության՝ հմտություններ ապագայի համար» տարածաշրջանային ծրագրի (2018-2020 թթ.) շնորհիվ, որն իրականացվում է Եվրոպական Միության ֆինանսավորմամբ Հայաստանում, Վրաստանում և Ուկրաինայում:

Ներկայացվեց, որ ծրագրի շրջանակներում կհզորացվեն մոտ 15 երիտասարդների կարողություններ և գիտելիքներ շահերի պաշտպանության, կարիքների վերհանման ու հարցումների անցկացման, համայնքային ծրագրերի նախագծման ու իրականացման, որոշումների կայացման գործընթացում դերակատարների համագործակցության կայացման մեխանիզմների ոլորտներում:

Նշվեց, որ ՏԻՄ որոշումների կայացման գործընթացում  երիտասարդների մասնակցությունը ցածր է, որը փաստվել է նաև “Facebook” սոցիալական ցանցում օնլայն հարցման արդյունքներով: Հարցվածների  41.3%-ի կարծիքով երիտասարդը չի մասնակցում և չի կարևորում իր դերը որոշումների կայացմանը համայնքային մակարդակում, քանի որ տեղեկացված չէ ՏԻՄ-երի գործունեության մասին: Հարցվածների 29.3%-ն էլ կարծում է, որ երիտասարդությունը չունի կարողություններ և անհրաժեշտ գիտելիքներ ՏԻՄ-երի հետ համագործակցաբար աշխատելու և քաղաքացիական նախաձեռնություններ իրականացնելու նպատակով: Հիմնական խնդիրը ՏԻՄ-երի աշխատանքի վերաբերյալ  երիտասարդների  անտեղյակությունն է:

Ա.Ալիխանյանն ընդգծեց, որ ծրագրի մասնակիցները կստանան համայնքային-քաղաքացիական խնդիրների բացահայտման և խնդիրների լուծման ռազմավարությունների մշակման վերաբերյալ անհրաժեշտ հմտություններ և գիտելիքներ, կաշխատեն ավագանու հետ և կմշակեն Իջևանի համայնքապետարանին ներկայացվող առաջարկությունների փաթեթ՝ Իջևան համայնքի բյուջեով  երիտասարդական նախաձեռնությունների ֆինանսավորման նպատակով: Ծրագիրը նաև համապատասխանում է ՀՀ երիտասարդական պետական  քաղաքականության ռազմավարությանը, որը հասարակական-քաղաքացիական և այլ մակարդակներում երիտասարդների մասնակցության գործոնը ամրագրում է որպես  գերակայություն:

ՎՎՀ Տավուշի մարզի երիտասարդական ծրագրերի համակարգողը հավելեց, որ ծրագիրը համահունչ է նաև Իջևան համայնքի զարգացման 2017-2021 թթ. հնգամյա ծրագրին, որի հիմնական նպատակներից են սահմանված տեղական ինքնակառավարմանը բնակիչների մասնակցության ակտիվացումը՝  մասնակցության նոր մեթոդների ու ձևերի ներդրման և աստիճանական զարգացման միջոցով:

Նոր ձևավորվող խմբի համար առաջիկայում կսկսվեն կարողությունների զարգացման վերապատրաստումները:

 2018թ. դեկտեմբերի 3-ին ԵՊՀ ԻՄ-ի գրադարանի վարիչ Վ.Պողոսյանի ու Հայոց պատմության և հասարակագիտության ամբիոնի դոցենտ, պ.գ.թ. Գ.Բալասանյանի նախաձեռնությամբ տեղի ունեցավ «Հայաստանի Հանրապետության ներքին և արտաքին քաղաքականության առաջնահերթությունները» խորագրով կլոր սեղան-քննարկում։

Քննարկմանը մասնակցում էին Հայոց պատմության և հասարակագիտության ամբիոնի դասախոսները, բուհի վարչական և պրոֆեսորադասախոսական անձնակազմի այլ անդամներ, «Պատմություն» մասնագիտության առկա և հեռակա ուսուցման համակարգերի ուսանողներ։

Բանախոս Գ.Բալասանյանը քննարկման ընթացքում անդրադարձավ Հայաստանի Հանրապետության ներքին և արտաքին քաղաքականության, միջազգային հարաբերությունների ոլորտում ՀՀ դերակատարմանը և քաղաքական օրակարգի հիմնախնդիրներին։ Նա մասնակիցների ուշադրությունը հրավիրեց հայ-ադրբեջանական և արցախա-ադրբեջանական սահմանային խնդիրների, լարվածության հնարավոր զարգացման, ինչպես նաև Ադրբեջանի ռազմական ձեռքբերումների վրա։

Կարևորվեց ստատուս-քվոյի  պահպանման և վերանայման նկատմամբ տերությունների և հատկապես Մինսկի խմբի համանախագահ երկրների դիրքորոշումը՝ կապված հակամարտության լուծման և խաղաղության հաստատման հետ։ Բանախոսի կարծիքով՝ հատկապես վտանգաշատ են Ադրբեջանի զինված ուժերի վերազինման աշխարհագրությունը և օրերս Ֆրանսիայից հակաօդային պաշտպանության նորագույն միջոցների գնման գործընթացը, որը կարող է որոշակիորեն խախտել զինված ուժերի բալանսը։

Անդրադառնալով ներքին տնտեսական քաղաքականությանը՝ ընդգծվեց, որ պետք է պետությունը անմիջական վերահսկողություն սահմանի տնտեսական իրադրության նկատմամբ, ստեղծի հավասար պայմաններ առողջ մրցակցության համար և արտահանմանը միտված գործիքակազմ կիրառի։

Քննարկման ընթացքում ուսանողներն ու դասախոսներն արտահայտեցին գաղափարներ, որոնք կարող են նպաստել Տավուշի մարզի տնտեսական զարգացմանը։ Մասնավորապես նշվեց, որ խորհրդային տարիների արտադրական հսկաների գործարկումը կամ տեխնոլոգիական վերաթարմացումը կնպաստի մարզի մարդկային և աշխատանքային ռեսուրսների աճին ու զարգացմանը։

Գրադարանի վարիչ Վ.Պողոսյանը պատրաստակամություն հայտնեց պարբերաբար կազմակերպելու նմանատիպ հանդիպումներ, որոնց ընթացքում ուսանողները կարող են քննարկել այնպիսի թեմաներ, որոնք կզարգացնեն նրանց ինքնուրույն մտածողությունը և կընդլայնեն նրանց աշխարհընկալումը:

 2018թ. դեկտեմբերի 1-3-ը ՀՀ սպորտի և երիտասարդության հարցերի նախարարության տրամադրած դրամաշնորհի շրջանակներում ՀՀ երիտասարդական մայրաքաղաք Իջևանում տեղի ունեցավ «Հռետորական հմտությունների զարգացում» թեմայով դասընթաց, որն իրականացրեց «Հարմոնիա» հոգեբանության հանրային զարգացման կենտրոնը:

Դասընթացին մասնակցում էին Տավուշի մարզի 3 տասնյակ երիտասարդներ, որոնց մեծամասնությունը ԵՊՀ ԻՄ-ի ուսանողներ և շրջանավարտներ էին:

Հռետորական հմտությունների զարգացման դասընթացի նպատակն էր նպաստել երիտասարդների հաղորդակցման և հանրային խոսքի հմտությունների զարգացմանը: Երեք օր տևած ինտենսիվ դասընթացի ընթացքում երիտասարդները ծանոթացան հռետորական արվեստի նրբություններին՝ խոսքի զարգացման հնարքներից մինչև հուզմունքի ու վախի հաղթահարման մեթոդներ:

Սեմինարները վարեցին «Հարմոնիա» ՀՀԶԿ-ի նախագահ, ԵՊՀ ԻՄ-ի մանկավարժության և հոգեբանության ամբիոնի դասախոս Աշխեն Մկոյանը, հոգեբան, բազմաթիվ գրքերի հեղինակ Հրաչյա Ամիրյանը և “Mkoyan and Partners Law Firm” իրավաբանական ընկերության կառավարիչ գործընկեր, փորձագետ Սամվել Մկոյանը:

Դասընթացն իրականացվում էր ինտերակտիվ մեթոդներով, յուրաքանչյուր թեմայի ժամանակ մասնակիցները պրակտիկ վարժությունների միջոցով ամրապնդում էին ստացած գիտելիքները: Սեմինարավարներն աշխատում էին մասնակիցներին հնարավորինս շատ և օգտակար գիտելիքներ փոխանցել, որոնք իսկապես կնպաստեն մասնակիցների հմտությունների զարգացմանը։

Մասնակցիները մեծ ոգևորությամբ էին լսում բոլոր խոսնակներին, ներկայացնում էին իրենց տեսակետները և կարծիքները, խոսում էին իրենց ստացած տպավորությունների և գիտելիքների մասին։

Երրորդ օրը մասնակիցները հանդես եկան ելույթներով և տեղում ցուցադրեցին այն բոլոր հմտությունները, որոնք ստացել էին դասընթացի շրջանակում:

«Հարմոնիա» ՀՀԶԿ-ի նախագահ, ծրագրի պատասխանատու Աշխեն Մկոյանը ծրագիրն ամփոփեց հետևյալ խոսքերով. «Դասընթացն ունեցավ ավելի մեծ արձագանքներ, քան մենք սպասում էինք, ինչի համար անչափ ուրախ եմ։ Երիտասարդների զարգանալու անհագ ձգտումը և ոգևորությունը տեսնելով՝ կրկին համոզվեցինք, որ նման ծրագրերը պետք է հաճախակի բնույթ կրեն։ Շնորհավորում եմ մեզ և բոլոր մասնակիցներին՝ կայացած ծրագրի համար»:

Վերջում մասնակիցները ստացան հավաստագրեր:

Ծրագրի ինֆորմացիոն գործընկերներն էին ԵՊՀ ԻՄ-ի ուսանողական կառույցները, ՀԵՀ Տավուշի մարզի երիտասարդական կենտրոնը, «Հաջողակ կին» երիտասարդական ՀԿ-ն և «Ստեղծամիտ երիտասարդների միություն» ՀԿ-ն։