2018թ. դեկտեմբերի 1-ին ԵՊՀ ԻՄ–ի գրադարանում կայացավ Հայոց պատմության և հասարակագիտության ամբիոնի դասախոսներ, պ.գ.թ., ասիստենտ Ն.Գրիգորյանի և Ա.Ազատյանի համահեղինակած «ՀԱՅԱՍՏԱՆԻ ԱՌԱՋԻՆ ՀԱՆՐԱՊԵՏՈՒԹՅՈՒՆ. ԴԵՄՔԵՐ, ԴԵՊՔԵՐ» գրքի շնորհանդեսը:

Շնորհանդեսին ներկա էին բուհի վարչական և պրոֆեսորադասախոսական անձնակազմի ներկայացուցիչներ, ուսանողներ, հյուրեր:

Ն.Գրիգորյանի և Ա.Ազատյանի գրքի շնորհանդեսին բացման խոսքով հանդես եկավ գրադարանի վարիչ Վլադիմիր Պողոսյանը՝ ներկայացնելով, որ իր գործընկերների հեղինակած «Հայաստանի առաջին հանրապետություն. դեմքեր, դեպքեր» գիրքն իսկապես պահանջված, ուսանողի գրադարանին անհրաժեշտ հանրամատչելի գիրք է, որտեղ լավագույնս բացահայտված և մատչելի կերպով մատուցված է Հայաստանի առաջին հանրապետության կայացման քաղաքական, սոցիալ-մշակութային կյանքի բոլոր ասպարեզների նվաճումները, քաղաքական գործչի կերպարը: Նա հատկապես կարևորեց քաղաքական գործիչներին վերաբերող հատվածները, որոնցում փորձ է արված ներկայացնելու, ինչու չէ նաև ամրապնդելու պետական, ազգային գործչի կերպարը՝ ի դեմս Հ.Քաջազնունու, Ալ.Խատիսյանի, Սիմոն Վրացյանի և այլոց: Ընդգծվեց այն հանգամանքը, որ Առաջին հանարապետության տարիներին թույլ տրված սխալները մեզ կարող են օգնել այսօր, այս հեղաբեկվող ժամանակաշրջանում, երբ գաղափարներն ու առաջնորդները կարող են մեկ օրում դառնալ ոչ իրական:

Ելույթ ունեցան ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, Հումանիտար գիտությունների ֆակուլտետի դեկանի պաշտոնակատար Կ.Պողոսյանը, Հայոց պատմության և հասարակագիտության ամբիոնի վարիչի պաշտոնակատար Դ.Թինոյանը, ամբիոնի դասախոսներ, մասնավորապես՝ պ.գ.թ., դոցենտ Լ.Մկրտչյանը, Հայոց լեզվի և գրականության ամբիոնի վարիչի պաշտոնակատար Վ.Ավագյանը, ուսանողներ, հյուրեր՝ գրքի վերաբերյալ արժևորման ու գնահատանքի խոսքեր ասելով, գրքի լույսընծայման կապակցությամբ շնորհավորելով գրքի համահեղինակներին, ուսանողներին և բոլոր ներկաներին:

Ապա ելույթ ունեցան գրքի համահեղինակներ Ա.Ազատյանը և Ն.Գրիգորյանը՝ անդրադառնալով գրքի ստեղծման հանգամանքներին, նպատակին, գրքում արծարծված խնդիրներին. «Եթե խորհրդային տարիներին Հայաստանի  Առաջին Հանրապետության պատմության ուսումնասիրությունը գաղափարաքաղաքական նշանակություն ուներ, ապա վիճակը կտրուկ փոխվեց հետխորհրդային շրջանում, երբ մեր պատմաբանները մեծ թափով սկսեցին ուսումնասիրել Հայաստանի Առաջին Հանրապետության պատմությունը: Անկախության շրջանում շատ է գրվել Առաջին հանրապետության պատմության տարբեր հիմնահարցերի վերաբերյալ, այն աստիճան, որ թվում է, թե սպառվել էր այս թեման, և որևէ նոր խոսք չկար ասելու: Մեր նպատակն է եղել այս փոքրիկ գրքույկով հանրամատչելի ձևով ներկայացնել Առաջին հանրապետության կարճատև գոյության ընթացքում արձանագրված ձեռքբերումները և պետականության կայացման, արարման գործում մեծ ներդրում ունեցած հայրենասեր գործիչների գործունեությունը, իսկ այդպիսի գործիչները շատ էին, ովքեր սրտացավ էին հայ ժողովրդի համար: Բավական է հիշել մի օրինակ՝ կապված Հովհաննես Քաջազնունու հետ, երբ վերջինս, մեկնելով Ամերիկա, պետբյուջեից գումար վերցրեց վերարկու գնելու համար, սակայն գործուղումից վերադառնալուց անմիջապես հետո նա վաճառեց այդ վերարկուն և գումարը վերադարձրեց պետբյուջե»:

Եզրափակիչ խոսքով հանդես եկավ գրադարանի վարիչ Վ.Պողոսյանը՝ մասնավորապես նշելով. «Նմանօրինակ միջոցառումներով գրադարանը հնարավորություն է ստանում վերածվելու համընկնումների և հակադրումների, համասեռումների և տարասեռումների միջավայրի, որտեղ մենք փորձում ենք քննարկել, քննադատել, ինչու չէ նաև հակադրվել միմյանց՝ վեր հանելով ճշմարիտն ու արդարը։ Ուստի միմյանց մաղթենք առողջ միտք, անհնարինը հնարավոր դարձնելու մեծ կամք և հիշենք, որ քույր ու եղբայր են չկարողանալն ու չկամենալը, հազարամղոն ճանապարհորդությունն էլ սկսվում է մեկ քայլով: Կրկին շնորհավորում եմ հեղինակներին և ցանկանում ստեղծագործական նորանոր ձեռքբերումներ»:

Վերջում տեղի ունեցավ հյուրասիրություն:

Շնորհանդեսի բոլոր լուսանկարները տե՛ս Պատկերասրահում: 

2018թ. նոյեմբերի 30-ին ԵՊՀ Իջևանի մասնաճյուղի գրադարանում տեղի ունեցավ հանդիպում Հայոց լեզվի և գրականության ամբիոնի դասախոսների, «Հայոց լեզու և գրականություն» մասնագիտության ուսանողների և ժամանակակից գրող, ԵՊՀ ԻՄ-ի շրջանավարտ Նաիրա Փիրումյանի ու գրականագետ, գրաքննադատ Անի Փաշայանի հետ:

Հանդիպման նպատակն էր քննարկել Նաիրա Փիրումյանի «Տերևը» ժողովածուի պատմվածքները:

Բացման խոսքով հանդես եկան ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, Հայոց լեզվի և գրականության ամբիոնի վարիչի պաշտոնակատար Վ. Վ. Ավագյանը:

Զեկուցումներ ներկայացրին, հետաքրքիր և ազդեցիկ ելույթներ ունեցան «ՀԼԳ» մասնագիտության ուսանողները (Լուսինե Մելքումյան, Աննա Դովլաթբեկյան, Մանե Եգանյան, Գոհար Մխիթարյան և ուրիշներ), Հայոց լեզվի և գրականության ամբիոնի դասախոսները:   

«Տերևը» ժողովածուի պատմվածքներից մեկի՝ «30 սմ»-ի մասին ինքնատիպ զեկուցումով հանդես եկավ Հայոց լեզվի և գրականության ամբիոնի դոցենտ, բ.գ.թ. Աիդա Սարհատյանը՝ ընդգծելով պատմվածքում հեղինակի պատկերավոր, պարզ ու հստակ լեզուն՝ փիլիսոփայական խորքերով, անպաճույճ պատմելաձևը, ինքնակենսագրական բնույթը, մարդկային հոգու դրամատիկ հույզերով հագեցվածությունը. «Առաջին զգացումը, որ ապրում է ընթերցողը Նաիրա Փիրումյանի պատմվածքների ժողովածուն  ընթերցելիս, պատկերավոր, պարզ ու հստակ լեզուն է՝ փիլիսոփայական խորքերով… Ինքնակենսագրական բովանդակություն ունի… «30 սմ» պատմվածքը։ …Սահուն է հեղինակի լեզուն, պատմելաձևը՝ անպաճույճ. հիվանդանոցային կյանքի դրվագները լի  սիրով, բնական գույնով. պատմվածքն ասես նովելների մի փունջ է՝ մարդկային հոգու դրամատիկ հույզերով հագեցած. ահա Հորդանանից եկած գեղեցկուհի Սաբահի և պարսկահայ Ռազմիկի սիրո դրաման. կյանքը նրանց չէր կարող միացնել, որովհետև տարբեր էին կրոնները, կամ Կոստյայի և սիրունիկ Դաշայի սերը, որը ընդհատվել էր տղայի ծնողների պահանջով։ Սեղմ, բայց գունագեղ վրձնահարվածներով են կերտվել նաև մյուս հերոսների լիարյուն դիմանկարները… Իսկ ամենահետաքրքիրը աղջկա ցավոտ սիրո պատմությունն է, նրա և Թոդորի սիրո,  որ երանելիության չափ ցանկալի էր, անհնարին ու անհավանական լինելու չափ իրական, իսկ նրանց համբույրները՝ հեղված արցունքներով…»:

Զեկուցումների ընթերցումից հետո ուսանողները գրքի հեղինակ Նաիրա Փիրումյանից և գրականագետ Անի Փաշայանից ստացան գրքի ստեղծագործական պատմությանը, ընդհանրապես ստեղծագործական պրոցեսին, ժամանակակից գրականությանը և գրողներին վերաբերող իրենց հարցերի պատասխանները:   

Բոլոր լուսանկարները տես Պատկերասրահում: 

 2018թ. նոյեմբերի 26-29-ը ԵՊՀ Իջևանի մասնաճյուղում կայացավ «Կարիերայի զարգացում» թեմայով քառօրյա դասընթացը, որը «Տավուշի մարզի ինտեգրված և հավասարակշռված տնտեսական զարգացում» ծրագրի շրջանակներում կազմակերպել էր «Քմյունիթի սենթր ֆոր դիվելոփմենթ» տարածաշրջանային համագործակցության ՀԿ-ն, Եվրոպական Միության և ՀՀ կառավարության համաֆինանսավորմամբ:

Ծրագիրը նպատակաուղղված է ապահովելու Տավուշի մարզի համայնքների միջև առավել համաչափ սոցիալական և տնտեսական զարգացում` ստեղծելով նոր տնտեսական հնարավորություններ և աշխատատեղեր, ինչպես նաև զարգացնելու երիտասարդների կարողությունները:

Մասնաճյուղում կազմակերպված «Կարիերայի զարգացում» թեմայով դասընթացի նպատակն էր աջակցել բուհի ուսանողներին, շրջանավարտներին, գործազուրկ երիտասարդներին հասկանալու իրենց աշխատանքային ինքնությունը, ձևավորելու կարիերայի նպատակ և մշակելու ռազմավարություն/գործողությունների պլան՝ այդ նպատակին հասնելու համար:

Դասընթացին մասնակցում էին ԵՊՀ Իջևանի մասնաճյուղի ավարտական կուրսերի 59 ուսանողներ, շրջանավարտներ և աշխատանք փնտրող անձինք:

Կարիերայի զարգացման դասընթացը վարում էր Մարինա Պողոսյանը՝ MBA, CMC միջազգային որակավորված խորհրդատու և քոուչ, «Մենեջմենթ Սիսթեմս քընսալթինգ» ընկերության տնօրեն: Ավելի քան քսան տարի նա իր ներդրումն է ունեցել Հայաստանի խորհրդատվական շուկայի զարգացման մեջ՝ աշխատելով միջազգային կազմակերպությունների հետ, ինչպիսիք են «Քեմոնիքս Ինտերնաշնլ», «Նատան Ասոշիիտս», «Ջ. Ի. Ոստին Ասոշիիտս»: Մարինան նաև ավագ դասընթացավար է Կանանց ձեռներեցության ծրագրում, որն իրականացնում է Ամերիկյան համալսարանը Հայ կանանց միջազգային ասոցիացիայի ֆինանսավորմամբ: Համագործակցելով Եվրոպական բանկի հետ՝ Մարինան դասընթացներ է վարում տարբեր երկրներում՝ ուսուցանելով կառավարման խորհրդատուներին:

Դասընթացն անցկացվեց գործնական վարժությունների և ինտերակտիվ քննարկումների միջոցով։

Դասընթացի մասնակիցները հնարավորություն ունեցան նաև օգտվելու դասընթացավարի հետ 4 ժամ անհատական խորհրդատվությունից:

«Կարիերայի զարգացում» թեմայով դասընթացի վերջում մասնակիցները`

• Իմացան կարիերա և աշխատանք հասկացությունների հիմնական տարբերությունները:
• Կարողացան ձևավորել կարիերային վերաբերող SMART նպատակ:
• Իմացան կոմպետենցիայի սահմանումը և բացահայտեցին այն կոմպետենցիաները, որոնք առկա են իրենց մեջ, և որոնց հարկավոր է զարգացնել իրենց կարիերայի նպատակին հասնելու համար:
• Զարգացրին հաղորդակցման հմտությունները, որոնք անհրաժեշտ են ինչպես առօրյա կյանքում, այնպես էլ աշխատանք փնտրելիս:
• Բացահայտեցին աշխատանք գտնելու խոչընդոտները և գտան դրանց լուծումները:
• Մշակեցին իրենց կարճ կենսագրությունը (CV) և ուղեկցող/մոտիվացիոն նամակի օրինակ:
• Իմացան հաջողված հարցազրույցի գրավականները:
• Բացահայտեցին աշխատանքի որոնման գործիքները:

  2018թ. նոյեմբերի 29-ին ԵՊՀ Իջևանի մասնաճյուղում տեղի ունեցավ Տավուշի թեմի առաջնորդ գերաշնորհ Բագրատ Սրբազանի հետ ուսանողների հանդիպումը:

ԵՊՀ ԻՄ-ի ուսանողների նախաձեռնությամբ, կամավոր սկզբունքով ձևավորվել է 15 համայնքային խումբ, որոնց նպատակն է ուսանողների աջակցությամբ համայնքներում կատարել կարիքների վերհանում, նախագծերի մշակում, հետաքրքիր և մոտիվացնող դասընթացների կազմակերպում:

Հանդիպման նպատակն էր ծանոթանալ համայնքային խմբերի հետ, լսել նրանց կարծիքները, բարձրաձայնել սեփական գաղափարները, միասին գտնել լուծումներ դրանք իրագործելու համար:

Մի քանի համայնքային խմբեր արդեն ունեին ծրագրեր՝ սպասվող տոներին ընդառաջ:

Տավուշի թեմի առաջնորդ Տ. Բագրատ եպիսկոպոս Գալստանյանն իր աջակցությունը հայտնեց ուսանողներին, և կնքվեց փոխհամագործակցության համաձայնագիր:

 2018թ. հոկտեմբեր և նոյեմբեր ամիսներին ԵՊՀ ԻՄ-ի մասնագիտական կրթության որակի ապահովման (ՄԿՈԱ) բաժնի վարիչ Մարիետա Ճաղարյանը և շրջանավարտների և արտաքին շահակիցների հետ տարվող աշխատանքների համակարգող Էրինե Ղարայանը հանդիպումներ ունեցան ավարտական կուրսերի ուսանողների հետ:

Յուրաքանչյուր բուհ, բացի գիտելիք տալուց, ունի մեկ այլ առաքելություն՝ դաստիարակել և ձևավորել ընդհանրական կարողություններով ժամանակակից անհատ և ստեղծագործ անձ, ով կարող է անվարան մուտք գործել աշխատաշուկա և դիմակայել նրա արդի մարտահրավերներին: Դրա իրագործման համար պահանջվում է համալսարան-ուսանող, ուսանող-գործատու արդյունավետ փոխհամագործակցություն:

Այդ համագործակցության շրջանակներում մասնաճյուղի ՄԿՈԱ բաժնի կազմակերպած հանդիպումները առկա և հեռակա ուսուցման ավարտական կուրսերի ուսանողների հետ նպատակ ունեին նրանց աջակցելու ուսումնառությունից հետո աշխատանքի տեղավորման և կարիերայի ապահովման գործում:

Հանդիպումների ընթացքում Մ.Ճաղարյանը և Է.Ղարայանը ուսանողներին ներկայացրել են հանդիպման նպատակը, մատնանշել համագործակցության շրջանակներում մասնաճյուղի կողմից նրանց  ներկայացվող առաջարկները, այդ համագործակցությունից ուսանողների ձեռքբերումները և բաժնի ակնկալիքները:

Մասնավորապես նշվել է, որ մասնաճյուղն ակտիվ համագործակցում է մարզի գործատու կազմակերպությունների հետ և նրանց հետ հանդիպումների ընթացքում ձեռք է բերվել պայմանավորվածություն՝ թափուր աշխատատեղերի վերաբերյալ մասնաճյուղին իրազեկելու մասին: Դա հնարավորություն կտա, ելնելով գործատուի պահանջներից, շրջանավարտների բազայում գտնել համապատասխան մասնագիտությամբ շրջանավարտներ և նրանց ուղղորդել, ինչպես նաև այդ գործընթացում ներգրավել ավարտական կուրսերի ուսանողների:

Հանդիպումների կազմակերպիչները ներկայացրին շրջանավարտների կարիերայի ապագա զարգացման հետ կապված իրենց պլանները: Նրանք նշեցին, որ մասնաճյուղում գործատուների ներգրավմամբ պարբերաբար կկազմակերպվեն նեղ մասնագիտական դասընթաց-քննարկումներ, ճանաչողական և գործնական պարապմունքներ, կիրականացվեն արտաքին շահակցի պլանով և տեղում անցկացվող նպատակային պրակտիկաներ և այլն: Նման գործընթացները կնպաստեն մասնագիտական կարիերայի նկատմամբ ուսանողների մոտիվացիայի բարձրացմանը, կապահովեն նրանց ակտիվ մասնակցությունը ապագա մասնագիտական կողմնորոշման պլանավորման և իրականացման գործում, ուսանողները կդառնան աշխատաշուկայի և կոնկրետ գործատուների պահանջների մասին իրազեկված անհատներ, կունենան հարթակ իրենց խնդիրների վերաբերյալ ազատ արտահայտվելու և դրանց լուծմանը հետամուտ լինելու համար:

Ուսանողներին ներկայացվեցին գործատուների առաջարկները, որոնցում հիմնական շեշտը դրվում էր հարցազրույցներին և մրցույթներին շրջանավարտների ճիշտ ներկայանալու և ազատ շփվելու ունակությունների վրա։ Նշվեց, որ կկազմակերպվեն համապատասխան սեմինարներ:

Հանդիպումների ժամանակ ուսանողներն ակտիվ մասնակցում էին քննարկումներին, տալիս իրենց հուզող հարցերը և վստահեցնում, որ անպայման կհամագործակցեն բաժնի հետ՝ իրենց ապագան պլանավորելու համար: