2018թ. նոյեմբերի 14-ին և 22-ին ԵՊՀ ԻՄ-ի մասնագիտական կողմնորոշման և պրակտիկայի կազմակերպման բաժնի մի քանի աշխատակիցներ` Ուսումնամեթոդական վարչության պետ Ա.Դավթ­յանը, ՄԿՊԿ բաժնի վարիչ Լ.Բեգինյանը, ՈՒՄՎ բաժնի աշխատակից Ա.Մանուչարյանը հերթական հանդիպումներն իրականացրին Տավուշի մարզի մի շարք դպրոցներում:

Այս անգամ համալսարանականներն այցելել էին Իջևանի ավագ դպրոց, Այգեհովիտ, Ազատամուտ, Կայանավան գյուղերի միջնակարգ դպրոցներ` նպատակ ունենալով ավարտական դասարանի աշակերտներին իրազեկել մաս­նա­ճյուղի՝ 2019թ. ընդունելության մասնագիտությունների և կրթա­կան ծրագ­րերի վերաբերյալ, իրականացնել մասնագիտական կողմնորոշման աշխատանքներ:

Հանդիպումներին մասնակցում էին թե՛ 12-րդ դասարանի աշակերտները, թե՛ դպրոցների տնօ­րեն­ները և ուսուցիչները:

Այցելությունների ընթացքում ներկայացվեցին ԵՊՀ ԻՄ-ի՝ 2019թ. ընդունելության կրթական ծրագրերը, նոր առաջարկություններն ու հնարավորությունները (խոսքը վերաբերում է առկա ուսուցմամբ «Բնապահ­պանություն և բնօգտա­գործում», «Կիրառական արվեստ» և «Հոգեբա­նություն» կրթական ծրագրերին), քննա­կան առարկաները, ընդունելության քննութ­յուն­ներում կատարված փոփո­խությունները:

Դպրոց-համալսարան կապն ամրապնդելու, դիմորդներին օգտակար լինելու նպատակով առաջարկվեց պարբերաբար իրականացնել ճանաչողական այցեր մասնաճյուղ, ինչպես նաև դպրոցներում կազմակերպել ԵՊՀ ԻՄ-ի դասախոս­ների մասնակցությամբ թեմատիկ և ակնարկային դասա­խոսություններ ու քննարկում­ներ:

Հանդի­պումների ընթացքում աշակերտները ստացան իրենց հետաքրքրող հարցերի պատասխանները, որոնք վերաբերում էին կրթական գործընթացին, ուսման վարձաչափերին, ուսումնառողների համար նախատեսված զեղչերին ու արտոնություններին, ընդունելության քննությունների՝ աստղանիշով առարկաներին:

Այցելությունների վերջում դպրոցների և համալսարանի ներկայացուցիչները պայմանավորվածություն ձեռք բերեցին ավելի սերտացնելու և խորացնելու  փոխհամագործակցությունը:

 2018թ. նոյեմբերի 22-ին Իջևանի քաղաքապետ Վ.Ղալումյանի նախաձեռնությամբ ԵՊՀ Իջևանի մասնաճյուղ այցելեց Եվրոպայի Հայ դատի գրասենյակի ղեկավար պարոն Գասպար Կարապետյանը:

Այցելության նպատակն էր Հայ դատի, Հայոց ցեղասպանության հարցի, Եվրոպայի Հայ դատի գրասենյակի ծավալած գործունեության մասին բուհում դասընթաց-քննարկում իրականացնելը:  

Քննարկմանը ներկա էին Իջևանի քաղաքապետ Վ.Ղալումյանը, այլ պաշտոնյաներ, ԵՊՀ ԻՄ-ի տնօրենի պաշտոնակատար Ա.Ցուցուլյանը, պրոֆեսորադասախոսական և վարչական անձնակազմի այլ ներկայացուցիչներ, գլխավորապես Հումանիտար գիտությունների ֆակուլտետի ուսանողներ:

Դասընթաց-քննարկման ժամանակ պարոն Կարապետյանը ներկայացրեց, թե երբ, որտեղ է հիմնադրվել Եվրոպայի Հայ դատի գրասենյակը, որն է նրա առաքելությունը, որոնք են գործունեության հիմնական ոլորտները, ինչպիսի աշխատանքներ են իրականացվել առ այսօր:

Մասնավորապես նշվեց, որ ՀՅԴ Եվրոպայի Հայ դատի գրասենյակը (European Armenian Federation for Justice and Democracy-EAFJD) հասարակական կազմակերպություն է, որը հիմնադրվել է 2000թ. Փարիզում: 2002 թ.-ից ի վեր EAFJD-ի գրասենյակը տեղափոխվել է Բրյուսել (Բելգիա): Եվրոպայի Հայ դատի գրասենյակը Հայ դատի հանձնախմբերի՝ աշխարհում չորս տարածաշրջանային գրասենյակներից մեկն է: Այն եվրոպական կարևորագույն օրենսդիր հարթակներում և միջազգային կազմակերպությններում ծավալում է հայ դատի պաշտպանությանը, ինչպես նաև հայության արտաքին մարտահրավերների հաղթահարմանն ու շահերի հետապնդմանն ուղղված գործունեություն: Ավանդական քարոզչական գործունեությանը զուգահեռ Եվրոպայի Հայ դատի գրասենյակը կազմակերպում է եվրոպական հանրությանն ուղղված բազմաթիվ իրազեկման միջոցառումներ, այդ թվում համաժողովներ՝ ականավոր միջազգային գիտնականների մասնակցությամբ, քննարկումններ, ֆոտո-ցուցահանդեսներ, կինոդիտումներ:

Եվրոպայի Հայ Դատի գրասենյակը համակարգում է Հայ դատի հանձնախմբերի գործուներությունը եվրոպական 13 երկրում: Հայ դատի հանձնախմբեր են գործում Ավստրիայում, Բելգիայում, Բուլղարիայում, Կիպրոսում, Ֆրանսիայում, Գերմանիայում, Հունաստանում, Նիդերլանդներում, Լեհաստանում, Ռումինիայում, Շվեդիայում, Մեծ Բրիտանիայում և Իսպանիայում:

Ներկայացվեց, որ Եվրոպայի Հայ դատի գրասենյակի գործունեության հիմնական ոլորտներն են`

• Եվրոպական միությունում, ԵՄ անդամ երկրներում և միջազգային կառույցներում Հայոց ցեղասպանության ճանաչում և դատապարտում, ճանաչում և հատուցում Թուրքիայի կողմից:
• Արցախի բնակչության հիմնարար իրավունքների պաշտպանություն և պարտադրված մեկուսացման վերացում, Արցախի ընտրական գործընթացներում միջազգային դիտորդական առաքելությունների համակազմակերպում:
• Հայաստան-ԵՄ հարաբերությունների ամրապնդում և խորացում:
• Մերձավոր Արևելքի հայության խնդիրների բարձրաձայնում:
• Ջավախքի շրջանի հայ բնակչության իրավունքների պաշտպանություն:

Ընդգծվեց, որ Եվրոպայի Հայ դատի գրասենյակի գործունեության կարևոր ճյուղ է Հայաստան-Եվրոպա հարաբերությունների ամրապնդումը և ընդլայնումը: Այս առումով Եվրոպայի Հայ դատի գրասենյակը կարևոր ձեռքբերում է համարում 2017թ. նոյեմբերի 24-ին Հայաստանի և ԵՄ-ի միջև համապարփակ և ընդլայնված գործընկերության համաձայնագրի ստորագրումը:

Եվրոպայի Հայ դատի գրասենյակի և ԵՄ-ում ՀՀ առաքելության համատեղ ջանքերով 2013 թվականին Եվրոպական խորհրդարանում ձևավորվել է ԵՄ-Հայաստան բարեկամական խումբը: 2015թ.՝ Եվրոպական խորհրդարանի ընտրություններից հետո, Հայաստանի հետ բարեկամության խումբը վերակազմավորվել է: Այժմ խումբը բաղկացած է 50-ից ավել պատգամավորից և նպատակ ունի ամրապնդել կողմերի միջև համագործակցությունը:

Ունենալով սերտ կապեր Եվրոպական խորհրդարանում՝ Եվրոպայի Հայ դատի գրասենյակն աջակցում է հայկական պատվիրակություններին Եվրանեսթ և PCC խորհրդարանական ձևաչափերում: Գրասենյակը նաև ակտիվ գործունեություն է ծավալում Եվրոպայի խորհրդի Խորհրդարանական վեհաժողովում՝ համագործակցելով խորհրդարանական վեհաժողովի հայկական պատվիրակության հետ:

Հայաստան-ԵՄ հարաբերությունների խթանմանը ծառայում է նաև Եվրոպայի Հայ դատի գրասենյակի նախաձեռնած «Վահան Հովհաննիսյան ուսուցողական աշխատանքային ծրագիրը», որը մեկնարկել է 2018թ.: Ծրագրի շրջանակներում ընտրական փուլն անցած հայաստանաբնակ երիտասարները հնարավորություն են ստանում գործնական հմտություններ և գիտելիքներ ձեռք բերել Եվրոպայի Հայ դատի գրասենյակում և ծանոթանալ ԵՄ կառույցների՝ հատկապես Եվրոպական խորհրդարանի առօրյա աշխատանքներին:

Դասընթացավարը հավելեց, որ եվրոպահայության ձայնը լսելի դարձնելու նպատակով Եվրոպայի Հայ դատի գրասենյակը չորս տարին մեկ Բելգիայում կազմակերպում է «Եվրոպահայերի համագումար», որը հարթակ է հայ և եվրոպացի քաղաքական գործիչների, դիվանագետների, կրոնական առաջնորդների, ակադեմիական շրջանակների, ոչ կառավարական կազմակերպությունների, հայկական համայնքների ներկայացուցիչների, անհատների համար` քննարկելու ժամանակակից մարտահրավերները և դրանց դիմակայելու ուղիները: Վերջին համագումարը կայացել է 2017թ. հոկտեմբերի 18-19-ը Բրյուսելում: Եվրոպայի Հայ դատի գրասենյակը համագործակցում է նաև Հայ դատի աշխարհասփյուռ գրասենյակների հետ, որոնցից են` Armenian National Committee of America (АNCA), Armenian National Committee of Australia-ն, Մերձավոր Արևելքի Հայ Դատի գրասենյակը, Հարավային Ամերիկայի հայ դատի հանձնախումբը:

Քննարկման ընթացքում ԵՊՀ ԻՄ-ի «Պատմություն» մասնագիտության ուսանողները Եվրոպայի Հայ դատի գրասենյակի ղեկավարին ուղղեցին Հայոց ցեղասպանության ճանաչմանը և Թուրքիայի կողմից հատուցմանը, 2008թ. հայ-թուրքական սահմանի բացմանը, մեր պատմական հայրենիքի՝ Արևմտյան Հայաստանի տարածքային խնդիրներին վերաբերող հարցեր և ստացան պատասխաններ: Հնչեցված հարցերը մեծ մասամբ դեռևս ընթացքի մեջ գտնվող և լուծման ենթակա հարցեր էին, ինչը շեշտեց թե՛ պարոն Կարապետյանը իր եզրափակիչ խոսքում, թե՛ ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը դասընթացավարին ուղղված իր շնորհակալական խոսքում:

 2018թ. նոյեմբերի 21-ին «Սերվիսի մշակույթ» դասընթացի շրջանակներում ԵՊՀ ԻՄ-ի հեռակա ուսուցման «Սերվիս» մասնագիտության 5-րդ կուրսի ուսանողները՝ Տուրիզմի կառավարման և մշակութաբանության ամբիոնի ասիստենտ, ՀՀ ՆՄ անդամ, Հայաստանի ԺՄ անդամ Լևոն Լաչիկյանի ղեկավարությամբ, այցելեցին «ԴԻԼԻՋԱՆ ՀՈԹԵԼ ՌԵԶՈՐԹ ԸՆԴ ՍՊԱ» (“DILIJAN” HOTEL RESORT AND SPA) հյուրանոցային համալիր:

Պարոն Լաչիկյանի խոսքով՝ «Սերվիս» մասնագիտությունն ընտրած ուսանողը (թե՛ առկա, թե՛ հեռակա ուսուցման համակարգի), տեսական գիտելիքներին զուգահեռ, ավելին՝ դրանցից է՛լ ավելի շատ պիտի ձեռք բերի գործնական հմտություններ՝ պարբերաբար այցելելով սպասարկման ոլորտի ամենատարբեր հաստատություններ: Նրա համոզմամբ՝ մի բան է մասնավոր կամ անհատական այցը և մեկ այլ բան՝ այցելությունը խմբով ու մասնագետ-ղեկավարի ուղեկցությամբ:

Ուսանողների մեծ մասն առաջին անգամ էր գտնվում «ԴԻԼԻՋԱՆ ՀՈԹԵԼ ՌԵԶՈՐԹ ԸՆԴ ՍՊԱ» հյուրանոցային համալիրում, և նրանց համար բնականաբար հետաքրքիր էր ծանոթությունն անխտիր բոլոր հարմարություններին՝ սենյակներին (70 սենյակ), խաղասրահին, մարզադահլիճին, բուժական և մերսման սենյակներին, լողավազանին և ճաշասրահին:

Ուղեկցող աշխատակցուհին սիրալիր կերպով տեղեկատվություն հաղորդեց գների, կիրառվող զեղչերի, ընդհանրապես հաճախելիության և առաջիկա ամանորյա օրերին սպասվող մարդկային հոսքերի մասին:

Կոնֆերանս դահլիճում անցկացվեց դասընթացի շրջանակում նախատեսված սեմինար-պարապմունքը, որի ընթացքում ուսանողները իմացան զբոսաշրջիկների հետ տարվող աշխատանքային նրբությունների, հյուրանոցային աշխատողի վարքի կանոնների, կոնֆլիկտների ծագման դեպքում դրանց լուծման եղանակների և նմանօրինակ շատ այլ կարևոր հարցերի մասին:

Այցի վերջում կուրսի ավագ Մելինա Համբարձումյանն իր համակուրսեցիների անունից գոհունակություն հայտնեց համալսարանի ղեկավարությանը՝ ուսումնական պրակտիկաների կազմակերպմանը պատշաճ ուշադրություն դարձնելու համար:

 2018թ. նոյեմբերի 21-ին ԵՊՀ Իջևանի մասնաճյուղում տեղի ունեցավ  Ուսանողների միջազգային օրվան նվիրված միջոցառում, որը կազմակերպվել էր Ուսանողական խորհրդի կողմից:

Միջոցառմանը ներկա էին ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, Տավուշի մարզպետ Վահե Ղալումյանը, Տավուշի թեմի առաջնորդ Տ. Բագրատ եպիսկոպոս Գալստանյանը, բանկերի իջևանյան մասնաճյուղերի կառավարիչներ, բուհի վարչական և պրոֆեսորադասախոսական անձնակազմի ներկայացուցիչներ, առկա և հեռակա ուսուցման համակարգերի ուսանողներ, հյուրեր:

Բացման խոսքով հանդես եկան ԵՊՀ Իջևանի մասնաճյուղի տնօրենի պաշտոնակատար Արտակ Ցուցուլյանը, Տավուշի մարզպետ Վահե Ղալումյանը և Տավուշի թեմի առաջնորդ Գերաշնորհ Բագրատ Սրբազան Գալստանյանը:

Ուսանողների տոնին նվիրված միջոցառման ընթացքում երաժշտական-պարային գեղեցիկ կատարումներով հանդես եկան ԵՊՀ ԻՄ-ի շնորհալի ուսանողները:

Միջոցառումը կրում էր հումորային բնույթ. ներկայացվեցին ուսանողական կյանքին, բուհական միջավայրին վերաբերող մի քանի հետաքրքիր համարներ:

Հնչեցին նաև յուրօրինակ կատարումներ՝ կիթառի և դաշնամուրի ուղեկցությամբ:

Վերջում ուսանողների տոնի առթիվ տեղի ունեցավ հյուրասիրություն:

 2018թ. նոյեմբերի 20-ին Վերին Ծաղկավան գյուղի Հայկ Ղազարյանի անվան միջնակարգ դպրոցում կայացավ «Տիգրան Մեծի քաղաքականությունը և դրա հետևանքները» թեմայով բանավեճ-քննարկում՝ ԵՊՀ ԻՄ-ի «Պատմություն» մասնագիտության մի խումբ ուսանողների և նույն դպրոցի աշակերտների մասնակցությամբ:

Քննարկմանը ներկա էին ԵՊՀ ԻՄ-ի պատմության և հասարակագիտության ամբիոնի դասախոս Վլադիմիր Պողոսյանը, շրջանավարտների և արտաքին շահակիցների հետ տարվող աշխատանքների համակարգող Էրինե Ղարայանը, հասարակայնության հետ կապերի և մամուլի պատասխանատու Հասմիկ Վանյանը, տարբեր մասնագիտությունների («Պատմություն», «ՄՀ», «ՏՄՄ», «ՔԿԳ») ուսանողներ, Վ. Ծաղկավանի դպրոցի ղեկավար և ուսուցչական անձնակազմը, տարբեր դասարանների աշակերտներ, հյուրեր:   

Բացման խոսքով հանդես եկավ Վերին Ծաղկավանի միջնակարգ դպրոցի ուսումնական գծով փոխտնօրեն Սուսաննա Ամիրխանյանը՝ ջերմորեն ողջունելով բանավեճ-քննարկման նպատակով իրենց դպրոցում հյուրընկալվելու համալսարանականների նախաձեռնությունը, ուսումնական գործընթացում կարևորելով դպրոց-համալսարան համագործակցության խորացումը, փոխադարձ այցերն ու համատեղ իրականացվող ծրագրերը:  

Բանավեճ-քննարկման ընթացքում ուսանողները ներկայացրին Տիգրան Մեծի վարած քաղաքականության դրական կողմերը, իսկ աշակերտներն արտահայտեցին նրա քաղաքականության բացասական կողմերի վերաբերյալ սեփական պատկերացումները՝ զուգահեռներ անցկացնելով նոր ժամանակների հետ:

Ներկայացվեց, թե ինչպես է մ.թ.ա. 95 թվականին գահ բարձրանում մեր ամենանշանավոր պատմական դեմքերից մեկը՝ Տիգրան 2-րդը, ում պատմագրության մեջ անվանում են Տիգրան Մեծ: Հոր՝ Տիգրան Առաջինի մահից հետո սահմանակից գավառներից 70 հովիտ պարթևներին զիջելով՝ նա ազատվում է պատանդությունից, վերադառնում Հայաստան և ժառանգում հոր գահը 45 տարեկանում: Տիգրանն արագ վերակազմավորում է հայոց բանակը և ձեռնամուխ լինում հայոց պետության հեղինակության վերականգնմանն ու հզորացմանը: Մ.թ.ա. 94թ. նա գրավում է Ծոփքը՝ դրանով ավարտին հասցնելով հայկական հողերի միավորման գործընթացը:

Հայոց երկրի հյուսիսում նույն ժամանակ հզորանում էր Պոնտոսի թագավորությունը: Նրա հանճարեղ գահակալ Միհրդատ Զ Եվպատորը (մ.թ.ա. 111-63), որ Հռոմի ոխերիմ թշնամին էր, լինելով հմուտ զորավար ու դիվանագետ, անմիջապես հասկանում է Տիգրանի հավակնություններն ու ուժը և նրան դաշինք առաջարկում: Մ.թ.ա. 94թ. կնքվում է հայ-պոնտական դաշինքը, որով երկու թագավորները միմյանց միջև բաժանում են ապագա նվաճումների տարածքները: Դաշինքն ամրապնդելու համար Տիգրան 2-րդը կնության է առնում Միհրդատի երիտասարդ, գեղանի դստերը՝ Կլեոպատրային:

Մ.թ.ա. 87 թ. հայոց երկնակամարում փայլում է Հալլեի գիսաստղը: Դա հաջողակ նշան է համարվում Տիգրանի համար, նա պատերազմ է հայտարարում Պարթևստանին ու նվաճում այդ հզոր երկիրը: Տիգրանը ոչ միայն ազատագրում է պարթևաց պետության տարածքում գտնվող հայոց երկրամասերը, այլև հարկատու է դարձնում պարթևական հզոր թագավորությանն ու պարթև Արշակունիներից խլում արքայից-արքա տիտղոսը: Սրանով Տիգրան Մեծի պետությունը դառնում է Առաջավոր Ասիայի հզորագույն տերությունը: Նա իր սրին է ենթարկում նաև Միկդոնիան, Օսրոենեն, Ատրպատականը, Ադիաբենեն, Կորդուքը… Տիգրանը Մեծը Հայքին է միացնում նաև Հյուսիսային Միջագետքն ու նրա կենտրոն Մծբինում կառավարիչ նշանակում իր կրտսեր եղբայր Գուրասին:

Տիգրան Մեծը մ.թ.ա. 83թ. բազմում է Սելևկյան գահին: Դրանով, փաստորեն, պատմության թատերաբեմից հեռանում է Հին Արևելքի ևս մեկ հզոր պետություն` Սելևկյան թագավորությունը:

Ավարտելով իր նվաճումները` Տիգրան Մեծն իր հսկայական տերության աշխարհագրական կենտրոնում` Մեծ Հայքի Աղձնիք նահանգում, կառուցում է նոր մայրաքաղաք` Տիգրանակերտը: Արտաշատը համարվում էր Տիգրանի տերության հյուսիսային, Անտիոքը` հարավային մայրաքաղաքը: Ժամանակակիցների վկայությամբ` Տիգրանակերտը կարճ ժամանակում դառնում է Հին աշխարհի մեծ, փարթամ ու ճոխ քաղաքներից մեկը:

Տիգրան 2-րդը 25 տարի տևող հաղթական նվաճումների ընթացքում ստեղծում է մի լայնածավալ տերություն, որի սահմանները տարածվում էին Կասպից ծովից մինչև Եգիպտոսի սահմաններն ու Միջերկրական ծովը: Հայաստանը վերածվում է Առաջավոր Ասիայի հզոր տերության:

Բանավեճ-քննարկման ընթացքում տեղի ունեցավ մտքերի ակտիվ և կառուցողական փոխանակում:

Քննարկումն ուղեկցվեց դպրոցի շնորհալի սաների երաժշտական-պարային գեղեցիկ կատարումներով:

Ցուցադրվեց նաև մասնագիտական կողմնորոշման վերաբերյալ պրեզենտացիա:

Եզրափակիչ խոսքով հանդես եկան դպրոցի փոխտնօրեն Ս.Ամիրխանյանն ու մասնաճյուղի դասախոս Վ.Պողոսյանը՝ շնորհակալություն հայտնելով քննարկման կազմակերպիչներին ու մասնակիցներին, նրանց մաղթելով հաջողություններ:

Մասնակիցների հավաստագրերն ու բանավեճի կազմակերպմանն աջակցած անձանց շնորհակալագրերը հանձնեց բանավեճ-քննարկման նախաձեռնող, «Պատմություն» մասնագիտության չորրորդ կուրսի ուսանող Ալիխան Բալդրյանը, ով, ի դեպ, հենց ծաղկավանցի է:

Քննարկումից հետո ուսանողները ծանոթացան դպրոցին, եղան գրադարանում և Տարեգրության թանգարանում:

Հանդիպումն ավարտվեց հյուրասիրությամբ, բուհի և դպրոցի ներկայացուցիչների միջև ծավալված ջերմ ու անմիջական զրույցով, որի ընթացքում կողմերը պայմանավորվեցին համագործակցությունը խորացնել՝ իրականացնելով փոխադարձ այցեր ու համատեղ միջոցառումներ:

Հանդիպման բոլոր լուսանկարները տե՛ս Պատկերասրահում: