2014թ. մայիսի 8-ին` Երկրապահի օրվա առթիվ, ԵՊՀ ԻՄ-ի «Տավուշ» ռազմահայրենասիրական ակումբի անդամները և պատասխանատուները այցելեցին Ազատության հրապարակում գտնվող հուշարձան՝ իրենց հարգանքի տուրքը մատուցելու զոհված ազատամարտիկներին, հարգելու նրանց հիշատակը:

Երիտասարդ ակումբականները ծաղիկներ դրեցին, գլուխ խոնարհեցին քաջ երկրապահների անունը հավերժացնող հուշարձանի առջև:

«Տավուշ» ռազմահայրենասիրական ակումբի անդամները շատ ոգեշնչված էին երկրապահների խիզախությամբ և հայրենասիրությամբ: Այժմ էլ իրենք` մատաղ սերնդի ներկայացուցիչներն են իրենց ուսերի վրա կրում հայրենիքը պաշտպանելու և զորացնելու մեծ պատասխանատվությունը:

Նախորդ օրը` մայիսի 7-ին, «Տավուշ» ռազմահայրենասիրական ակումբի անդամները դիտել էին Շուշիի ազատագրման մասին փաստավավերագրական ֆիլմ, որն ավելի էր բարձրացրել նրանց հայրենասիրական ոգին:

2014թ. մայիսի 8-ին Հումանիտար գիտությունների ֆակուլտետում տեղի ունեցավ մայիսյան հերոսամարտերին նվիրված միջոցառում, որը կազմակերպել էր մասնաճյուղի ուսանողական գիտական ընկերությունը:

Միջոցառմանը ներկա էին Հումանիտար գիտությունների ֆակուլտետի դեկանը, պրոֆեսորադասախոսական անձնակազմի ներկայացուցիչներ, ՈՒԳԸ-ի անդամներ, ուսանողներ:

Զեկուցումներով, բանաստեղծություններով ու երգերով հանդես եկան նույն ֆակուլտետի շնորհալի ուսանողները: Զեկուցումներ ներկայացրին «Պատմություն» մասնագիտության 1-ին կուրսի ուսանող Գարիկ Նազարյանը, «Մանկավարժություն և հոգեբանություն» մասնագիտության 1-ին կուրսի ուսանողուհի Մարիամ Ղազարյանը, «Հայոց լեզու և գրականություն» մասնագիտության 2-րդ կուրսի ուսանողուհիներ Սիրանուշ Իսկանդարյանը, Օֆելյա Ոսկանյանը, «Անգլերեն լեզու և գրականություն» մասնագիտության 1-ին կուրսի ուսանողուհի Մարիամ Զուրաբյանը, «Ֆրանսերեն լեզու և գրականություն» մասնագիտության 1-ին կուրսի ուսանողուհիներ Անահիտ Տեր-Գևորգյանը և Իրինա Աղաբեկյանը:

Վերջում միջոցառման կապակցությամբ իրենց գոհունակությունն արտահայտեցին Հումանիտար գիտությունների ֆակուլտետի դեկան Վ.Ալեքսանյանը, Հայոց լեզվի և գրականության ամբիոնի վարիչ Վ.Ավագյանը` խրախուսելով ուսանողների գովելի նախաձեռնությունը:

2014թ. մայիսի 3-ին ԵՊՀ Իջևանի մասնաճյուղի մարզադահլիճում տեղի ունեցավ վոլեյբոլի բաց առաջնություն, որը կազմակերպել էր ԵՊՀ ԻՄ-ի արտակարգ իրավիճակների, մարմնակրթության և սպորտի ամբիոնը:

Առաջնությանը մասնակցում էին ԵՊՀ ԻՄ-ի աշխատակիցների, Իջևան քաղաքի և մարզադպրոցի, «ԻԿՄ»-«Սերվիս», «ՏՏ1» թիմերը:

Խաղերն անցկացվեցին օլիմպիական կարգով:

Եզրափակիչ դուրս եկան ԵՊՀ ԻՄ-ի աշխատակիցների և «ԻԿՄ»-«Սերվիս» թիմերը:

Համառ պայքարում 2:1 հաշվով հաղթեց ԵՊՀ ԻՄ-ի աշխատակիցների թիմը, որը պարգևատրվեց պատվոգրով և հուշանվերով:

2014թ. ապրիլի 28-ին միջբուհական համագործակցության շրջանակներում ԵՊՀ ԻՄ-ի «Մանկավարժություն և հոգեբանություն» մասնագիտության ուսանողները հրավիրվել էին Մ.Նալբանդյանի անվան Գյումրու պետական մանկավարժական ինստիտուտ:

  Ներկաներին ողջունեց ԳՊՄԻ-ի ռեկտոր Վարդևան Գրիգորյանը` կարևորելով միջբուհական համագործակցությունը: Ելույթ ունեցավ ԵՊՀ ԻՄ-ի մանկավարժության և հոգեբանության ամբիոնի վարիչ, մ.գ.թ., դոցենտ Վ. Բրուտյանը` ընդգծելով մանկավարժի մասնագիտության կարևորությունը և նրա առաքելությունը գլոբալացման պայմաններում:

ԳՊՄԻ-ի մանկավարժության և սոցիալական աշխատանքի ամբիոնի կողմից տրվեց պրակտիկայի ցուցադրական ներկայացում:

Կազմակերպվեց «Սոցիալական գովազդ» խորագրով վիկտորինա, որին մասնակցեցին ԵՊՀ ԻՄ-ի, ԳՊՄԻ-ի և ՎՊՄԻ-ի ուսանողները:

Վիկտորինայի ընթացքում ուսանողները մեծ տեղ էին հատկացրել ընտանիքի թեմային` շեշտելով նրա դերը առողջ հասարակություն ունենալու գործում:

Այնուհետև ԳՊՄԻ-ի մանկավարժական ֆակուլտետի դասախոսները հյուրերին ուղեկցեցին Գյումրիում տեղակայված «Նադին Բասմաջյան» ցերեկային խնամքի կենտրոն, «Երեխաների տուն», Հովհ. Շիրազի և Մ. Մկրտչյանի տուն-թանգարաններ, Գյումրի Սուրբ Աստվածածին եկեղեցի: