2024 թ. մայիսի 9-ին լրանում է Հայրենական մեծ պատերազմում ֆաշիստական Գերմանիայի զավթիչների դեմ Խորհրդային Միության ժողովուրդների մղած ծանրագույն պատերազմում անասելի զրկանքների ու կորուստների գնով տարած Հաղթանակի 79-ամյակը:

Այդ հաղթանակի կերտման գործում անհերքելի է հայ ժողովրդի ունեցած ներդրումը: Երկրորդ համաշխարհային պատերազմին, ընդունված տվյալների համաձայն, ԽՍՀՄ-ից մասնակցել է շուրջ 600 հազար հայ, ընդ որում՝ մոտ 300 հազարը՝ Հայկական ԽՍՀ-ից, որը մեր հանրապետության այն ժամանակվա բնակչության 22 տոկոսն էր կազմում: Պատերազմին մասնակցած հայորդիների գրեթե կեսն էլ կյանքի գնով է կռել հաղթանակը:

Երկրորդ աշխարհամարտի ժամանակ տարբեր ճակատներում կռվել են հայկական 6 և գլխավորապես հայերից կազմված 7 դիվիզիաներ: Այդ պատերազմում հայ ժողովուրդը տվել է 4 մարշալ՝ Հովհաննես Բաղրամյան, Համազասպ Բաբաջանյան, Սերգեյ Խուդյակով, Սերգեյ Ագանով, և 1 ծովակալ՝ Հովհաննես Իսակով: Մոտ 70 հայ գեներալներ ղեկավարել են դիվիզիաներ և ավելի մեծ միավորումներ:

104 (այլ տվյալների համաձայն՝ 106) հայ և ՀԽՍՀ ներկայացուցիչ ստացել է ԽՍՀՄ հերոսի կոչում (Հովհաննես Բաղրամյանը և Նելսոն Ստեփանյանը՝ կրկնակի հերոսի կոչում), 27-ը դարձել է «Փառքի շքանշանի» լրիվ ասպետ (հավասարազոր է Հերոսի կոչմանը), իսկ շքանշաններով ու մեդալներով պարգևատրվել է շուրջ 80.000 հայ մարտիկ:

Գեներալներ, դիվիզիաների, գնդերի, մարտական խոշոր ստորաբաժանումների հրամանատարներ, մարտական սպաներ, ռազմական օդաչուներ ու հարյուր հազարավոր մարտիկներ, այլ խոսքով՝ հայ ժողովրդի զավակներ, սերմնացաններ, որոնք չվերադարձան տուն…

Հայկական 6 դիվիզիաներից միայն մեկն էր մնացել հանրապետությունում՝ սովետա–թուրքական սահմանի պահպանության և Հիտլերի դաշնակից Թուրքիայի ենթադրվող ագրեսիային դիմագրավելու համար:

Մյուս հայկական դիվիզիաները, որոնցից ամենահայտնին համարվում է 89-րդ Թամանյանը, լիարժեք մասնակցել են ՀՄՊ ընթացքին` Կովկասից հասնելով մինչև Բեռլին, Կուրլանդիա, Ավստրիա, մասնակցել Ստալինգրադի, Կուրսկի ճակատամարտերին, ազատագրական գործողություններին:

Հայ ժողովրդի բազմաթիվ ներկայացուցիչներ եվրոպական երկրներում՝ Ֆրանսիայում, Բուլղարիայում, այլուր, ԽՍՀՄ օկուպացված հատվածում ակտիվ մասնակցել են պարտիզանական պայքարին, դիմադրության շարժմանը, դարձել այդ երկրների ազգային հերոսներ:

ԱՄՆ-ում այդ շրջանում հաստատված մոտ 200 հազար հայերից շուրջ 20 հազարը արդեն ամերիկյան զորքերի կազմում հերոսաբար պայքարել է Երկրորդ աշխարհամարտի մարտադաշտերում՝ Պերլ Հարբորում, Իտալիայի ազատագրման համար մղված ճակատամարտերում:

Հայրենական մեծ պատերազմում տարած հաղթանակը, ըստ էության, ԽՍՀՄ բոլոր ժողովուրդների, դաշնակից պետությունների, մեր բոլորի հաղթանակն է:

Փառք ու պատիվ մեր հին ու նոր հաղթանակների կերտողներին, մեր բոլոր հերոսներին…   

Այս օրերին Երևանի «Թեքեյան» մշակութային կենտրոնի ցուցասրահում ընթանում է ԵՊՀ ԻՄ տուրիզմի կառավարման և մշակութաբանության ամբիոնի դոցենտ, արվեստաբան-գծանկարիչ Լևոն Լաճիկյանի (Լաչիկյանի) 18-րդ անհատական ցուցահանդեսը, որ կրում է «Գյումրի և ավելին» խորագիրը: Ներկայացված են շուրջ 7 տասնյակ գծանկարներ, որոնց առանցքը կազմում է  հեղինակի Գյումրիապատումը: Նա նուրբ գծերով և զուսպ գուներագներով է իր սերը փոխանցում առ հարազատ ծննդավայրը՝ պատկերելով նրա բանաստեղծական անկյուններն ու հրապարակները: Եվ այդ սերն ակամա փոխանցվում է դիտողին:

Ցուցահանդեսում ներկայացված են նաև քաղաքային տեսարաններ Փարիզից, Մարսելից, Վենետիկից, Վիեննայից, Պրահայից, Կոստանդնուպոլսից և այլ գեղեցկագույն քաղաքներից, որտեղ գործի բերումով եղել է արվեստաբան-գծանկարիչը:

 «Գյումրի և ավելին» ցուցահանդեսի մաս է կազմում նաև Լաճիկյանի գրաֆիկական եկեղեցապատումը: Արվեստասերին ներկայացված են եկեղեցիներ ու վանքեր Հայաստանից, Արցախ աշխարհից և արտերկրից: Այստեղ կարելի է տեսնել թե՛ Սինգապուրի Սուրբ Գրիգոր Լուսավորիչ հայկական եկեղեցին և թե՛ Ոսկեպարի Սուրբ Աստվածածինը:

Ինչպես մեր զրույցում նշեց Լևոն Լաճիկյանը, այս խառն ու անհանգիստ օրերին բացելով նման ցուցահանդես՝ ինքը ցանկացել է հույսի ու հպարտության ուղերձ հղել իր հայրենակիցներին և ապագայի լուսավոր հաղթանակների հավատով լցնել նրանց սրտերը:

Ավելացնենք, որ թե՛ ապրիլի 26-ին տեղի ունեցած ցուցահանդեսի բացման հանդիսավոր արարողությանը և թե՛ հետագա օրերին ներկա էին ԵՊՀ Իջևանի մասնաճյուղի պրոֆեսորադասախոսական կազմի շատ ներկայացուցիչներ:

ԵՊՀ Իջևանի մասնաճյուղում կայացավ Գիտական խորհրդի նիստ՝ Ա. Հ. Մակարյանի նախագահությամբ: Գիտխորհրդի նիստում առաջարկված փոփոխություններով հաստատվեցին ԵՊՀ Իջևանի մասնաճյուղի ուսանողական գիտական ընկերության կանոնակարգը, Հեռակա ուսուցմամբ մագիստրատուրայի ընդունելության կարգը և ԵՊՀ ԻՄ ներքին կարգապահական կանոնները:

Ներկայացվեցին ԵՊՀ ԻՄ-ում պրակտիկաների կազմակերպումից և իրականացումից ուսանողների բավարարվածության ուսումնասիրության արդյունքները:

ԵՊՀ ԻՄ ուսանողական գիտական ընկերության կանոնակարգի հաստատման հարցը զեկուցեց գիտական քարտուղար Մ. Աթոյանը՝ համեմատելով նախկին ու նոր փաստաթղթերը, ընդգծելով էական փոփոխությունները: Մասնավորապես նշվեց, որ փոփոխություն է կատարվել 1.1. կետում. ՈՒԳԸ-ն «ուսանողներին միավորող ներկայացուցչական մարմին է» ձևակերպումը փոխարինվել է «բակալավրիատի ու մագիստրատուրայի ուսանողներին, ասպիրանտներին, հայցորդներին միավորող համալսարանական ստորաբաժանում է» ձևակերպմամբ: 1.3. կետում («Ընկերության կանոնակարգն ու նրանում կատարվող փոփոխությունները հաստատվում են ԵՊՀ ԻՄ գիտական խորհրդի կողմից») ավելացվել է «տնօրենի նախաձեռնությամբ», «Ուսանողների հետ տարվող աշխատանքների պատասխանատուի ներկայացմամբ»: Հաջորդիվ ավելացվել է 1 կետ («1.4. Ընկերությունը սահմանված կարգով կարող է ունենալ կլոր կնիք, անկյունային դրոշմ, պաշտոնաթուղթ»): Ներկայացվեցին նաև կանոնակարգում իրականացված աննշան որոշ փոփոխություններ:

ԵՊՀ ԻՄ հեռակա ուսուցմամբ մագիստրատուրայի ընդունելության կարգում կատարված փոփոխությունների վերաբերյալ զեկուցեց Ուսումնամեթոդական վարչության պետ Ա. Դավթյանը: Գիտխորհրդի անդամների կողմից քննարկվեց մասնավորապես կարգի 3-րդ դրույթը («Մագիստրոսական կրթական ծրագիրը իրականացվում է, եթե առաջին կուրս ընդունված ուսանողների թիվը 10-ից պակաս չէ»), որը մնաց անփոփոխ:

ԵՊՀ ԻՄ ներքին կարգապահական կանոնների հարցի մասին զեկուցեց ԵՊՀ ԻՄ գիտական խորհրդի նախագահ, տնօրենի պաշտոնակատար Ա. Մակարյանը՝ անդրադառնալով աշխատողների ու սովորողների հիմնական իրավունքներին և պարտականություններին, խրախուսելուն և կարգապահական տույժի ենթարկելուն, աշխատողների աշխատաժամանակին առնչվող հարցերի:

Աշխատաժամանակի կապակցությամբ ներկայացվեցին 23-25-րդ դրույթներում կատարված փոփոխությունները: Մասնավորապես նշվեց, որ ԵՊՀ ԻՄ-ում աշխատանքները կազմակերպվում են շաբաթվա երեքշաբթիից շաբաթ օրերին՝ ժամը 9.00-19.00-ն ընկած ժամանակահատվածում: ԵՊՀ ԻՄ պրոֆեսորադասախոսական կազմի (ամբիոնի վարիչ, պրոֆեսոր, դոցենտ, ասիստենտ ու դասախոս) և գիտական աշխատողների համար սահմանվում է հնգօրյա աշխատանքային շաբաթ՝ երեսուն ժամ ընդհանուր տևողությամբ: Բուհի մյուս աշխատողների համար սահմանվում է հնգօրյա աշխատանքային շաբաթ՝ երեսունվեց ժամ ընդհանուր տևողությամբ:

ԵՊՀ Իջևանի մասնաճյուղի պրոֆեսորադասախոսական կազմի և գիտական աշխատողների աշխատաժամանակը սահմանվում է 9.15-19.00-ն ընկած ժամանակահատվածում՝ պահպանելով օրվա ծանրաբեռնվածությունը: Մասնաճյուղի մյուս աշխատողների աշխատանքային օրվա սկիզբը երեքշաբթիից ուրբաթ օրերին սահմանվում է 9.00-ին, ավարտը՝ 16.45-ին, իսկ շաբաթ օրվա սկիզբը սահմանվում է 9.00-ին, ավարտը՝ 16.30-ին:

ԵՊՀ ԻՄ-ում պրակտիկաների կազմակերպումից և իրականացումից ուսանողների բավարարվածության ուսումնասիրության արդյունքների վերաբերյալ զեկուցեց Մասնագիտական կրթության որակի ապահովման բաժնի վարիչ Մ. Ճաղարյանը: Զեկուցողը մասնավորապես նշեց, որ բաժինն իրականացրել է 2023-2024 ուստարվա 2-րդ կիսամյակի սկզբում մասնագիտական պրակտիկա անցած ուսանողների հարցում: Այն նպատակ ուներ պարզելու ուսանողների բավարարվածությունը պրակտիկայի կազմակերպումից և իրականացումից, անցկացման վայրից, ժամանակահատվածից, տևողությունից, պրակտիկայի ծրագրից, ընդունող կազմակերպության աջակցությունից, պրակտիկայի ղեկավարի աշխատանքից, վերհանելու պրակտիկայի հետ կապված խնդիրները, հավաքագրելու ուսանողների կարծիքները և առաջարկությունները:

Հարցմանը մասնակցել է պրակտիկա անցած առկա ուսուցման 12 կրթական ծրագրերի 4-րդ կուրսերի 170 ուսանողներից 155-ը (91.2%-ը), որը շատ բարձր ցուցանիշ է: Արդյունքները ՄԿՈԱ բաժնում ամփոփվել և վերլուծվել են ըստ կրթական ծրագրերի և ֆակուլտետների:

Վերջին տարիներին բարելավման ուղղությամբ ձեռնարկված քայլերի և միջոցառումների շնորհիվ էապես բարձրացել է պրակտիկաներից ուսանողների բավարարվածության մակարդակը: Ըստ դիտարկված գրեթե բոլոր հարցերի՝ միջին միավորները գերազանցել են 4.5 միավորը, բաց հարցերում գերակշռել են դրական կարծիքները, և անհաղթահարելի խնդիրներ (ըստ ուսանողների) չեն եղել:

Ամփոփելով հարցման արդյունքները՝ Մ. Ճաղարյանը նշեց, որ պրակտիկայի կազմակերպման և իրականացման գործընթացը մասնաճյուղում հաջողված է, որի մասին է վկայում նաև ուսանողների ընդհանրական կարծիքը: Ուսանողները փաստում են, որ պրակտիկան իսկապես կատարել է իր դերը, նպաստել է իրենց մասնագիտական և անձնային որակների զարգացմանը, բարձրացրել է վստահությունը մասնագիտական կարողությունների նկատմամբ, մեծացրել է մասնագիտության նկատմամբ սերը և հետաքրքրությունը:

Դիտարկելով ուսանողների բարձրաձայնած խնդիրները՝ կրթական ծրագրերի ղեկավարներին, ամբիոնների վարիչներին և ֆակուլտետների ղեկավարներին բաժնի կողմից առաջարկվեց՝

• քննարկել ուսանողների բարձրաձայնած նեղ մասնագիտական խնդիրները և առաջարկները, ավելի խորությամբ անդրադառնալ պրակտիկաների ծրագրերին և դրանց իրականացմանը, տալ հնարավոր լուծումներ,
• կրթական ծրագրերի վերանայման ժամանակ հաշվի առնել ուսանողների կարծիքները և պրակտիկայի անցկացման վայրի, ժամանակահատվածի ու տևողության հետ կապված խնդիրներին լուծումներ տալ հնարավորության սահմաններում,
• ուշադրություն դարձնել «Անգլերեն լեզու և գրականություն», «Ֆրանսերեն լեզու և գրականություն» կրթական ծրագրերի ուսանողների թարգմանչական պրակտիկ կարողությունների զարգացման վրա,
• «Տարրական մանկավարժություն և մեթոդիկա», «Ռուսաց լեզու և գրականություն» կրթական ծրագրերի ուսանողների հետ իրականացնել հոգեբանական աշխատանք, որպեսզի նրանք կարողանան արդյունավետ աշխատել նաև խնդիրներ ունեցող աշակերտների հետ:

ԵՊՀ ԻՄ-ում պրակտիկաների կազմակերպումից և իրականացումից ուսանողների բավարարվածության ուսումնասիրության արդյունքների մասին Մ. Ճաղարյանի հաղորդումն ընդունվեց ի գիտություն, ՄԿՈԱ բաժնին հանձնարարվեց վերհանված խնդիրներն ու կարծիքներն ուղարկել համապատասխան ստորաբաժանումների ղեկավարներին՝ խնդիրների լուծման վերաբերյալ առաջարկություններ ստանալու և դրանց հնարավոր լուծումներ տալու նպատակով:

Հուշագրի ստորագրմանը մասնակցում էին ԵՊՀ Իջևանի մասնաճյուղի տնօրենի պաշտոնակատար Անուշավան Մակարյանը, ԵՊՀ ԻՄ հայոց պատմության և հասարակագիտության ամբիոնի դոցենտ, պ.գ.թ., «Պատմություն» կրթական ծրագրի ղեկավար Նաթելլա Գրիգորյանը, նույն ամբիոնի դասախոս Վլադիմիր Պողոսյանը, ԵՊՀ մշակութաբանության ամբիոնի ասիստենտ, պ.գ.թ. Հայկուհի Մուրադյանը, ՀՀ ԳԱԱ հնագիտության և ազգագրության ինստիտուտի գիտաշխատող Համազասպ Աբրահամյանը:

Համագործակցության հուշագրի նպատակը կրթական և գիտահետազոտական ոլորտներում կողմերի միջև գործընկերային հարաբերությունների հաստատումն էր, համագործակցության ծրագրերի իրականացումը՝ նախատեսված մի շարք ուղղություններով:

Մասնավորապես՝ ստորագրված հուշագրով կողմերն ամրագրեցին իրենց պատրաստակամությունը՝

• մասնակցելու հուշագրի շրջանակներում ծավալվող միջոցառումներին (աշնանային և ամառային դպրոցներ, թրեյնինգներ, սեմինարներ, խորհրդակցություններ, կլոր-սեղան քննարկումներ, վերապատրաստումներ, գիտաժողովներ և այլն),
• աջակցելու նորագույն տեխնոլոգիաների ու մեթոդների ներդրմանը և դրանց միջոցով ուսումնառողների տեսական և գործնական գիտելիքների ամրապնդմանն ու խորացմանը,
• աջակցելու կրթական շարունակականությանն ուղղված ծրագրերի մշակմանն ու իրականացմանը:
• կազմակերպելու հանդիպում-քննարկումներ կողմերի առաջատար մասնագետների մասնակցությամբ՝ ապահովելով մասնագիտական կրթության ոլորտին առնչվող տեղեկության պարբերաբար փոխանակում,
• իրականացնելու փոխադարձ այց-հանդիպումներ՝ բենչմարքինգ անցկացնելու նպատակով,
• համագործակցելու ուսումնական պլանների և առարկայական ծրագրերի փոխհամաձայնեցման և բարելավման աշխատանքների շուրջ, դասագրքերի, ուղեցույցների և այլ գրականության հրատարակման հարցերում,
• համատեղ կազմակերպելու և անցկացնելու գիտական և գործնական, ինչպես նաև գիտական և մեթոդաբանական գիտաժողովներ,
• ապահովելու ուսանողների և դասախոսների շարժունությունը սույն հուշագրի շրջանակներում ծավալվող միջոցառումներին,
• իրականացնելու համատեղ հետազոտական նախագծեր,
• կազմակերպելու կողմերի ուսանողների գիտահետազոտական, գիտամանկավարժական, ուսումնական, արտադրական պրակտիկաներ և այլն:

Հուշագրի ստորագրման ընթացքում քննարկվեցին փոխհամագործակցությանը վերաբերող այլ հարցեր և մանրամասներ, անդրադարձ կատարվեց ս.թ. սեպտեմբերին ԵՊՀ ԻՄ ուսանողների համար անցկացվելիք միջազգային աշնանային դպրոցին: Մասնավորապես նշվեց, որ Զալցբուրգի համալսարանի (Ավստրիա), ՀՀ ԳԱԱ հնագիտության և ազգագրության ինստիտուտի և ԵՊՀ Իջևանի մասնաճյուղի միջև համագործակցության շրջանակներում ՀՀ ԳԱԱ ՀԱԻ «Հայ մշակութային ժառանգության միջգիտակարգային ուսումնասիրություններ» հեռավար լաբորատորիան 2024 թ. սեպտեմբերի 19-23-ը մասնաճյուղի ուսանողների համար կիրականացնի աշնանային դպրոց, որը կընդգրկի դասախոսություններ և դաշտային գիտահետազոտական աշխատանքներ:

ԵՊՀ ԻՄ պրակտիկայի կազմակերպման և շահակիցների հետ համագործակցության բաժինը 2024 թ. ապրիլին Տավուշի մարզի 21 հանրակրթական դպրոցներում (Բերդի, Դիլիջանի և Իջևանի տարածաշրջաններ) կազմակերպել էր հանդիպումների շարք, որը ներառում էր թեմատիկ դասախոսություններ, մասնաճյուղի կրթական ծրագրերի ներկայացում և մասնագիտական կողմնորոշման թեստավորման աշխատանքներ:
Հանդիպումներին մասնակցել են ԵՊՀ ԻՄ տնօրենի պաշտոնակատար Ա. Մակարյանը, փոխտնօրեն Մ․ Օթարյանը, Ուսումնամեթոդական վարչության պետ Ա. Դավթյանը, Պրակտիկայի կազմակերպման և շահակիցների հետ համագործակցության բաժնի վարիչ Լ. Բեգինյանը, Տնտեսագիտության ֆակուլտետի դեկանի պաշտոնակատար Ա. Մարգարյանը, Բնական գիտությունների ֆակուլտետի դեկանի պաշտոնակատար Մ․ Զաքարյանը, Կիրառական արվեստի ֆակուլտետի դեկանի պաշտոնակատար Վ. Աղաբաբյանը, Հայոց լեզվի և գրականության ամբիոնի վարիչի պաշտոնակատար, բ․գ․թ․, դոցենտ Վ․ Ավագյանը, Օտար լեզուների ամբիոնի վարիչի պաշտոնակատար, բ․գ․թ․, դոցենտ Ք․ Հարությունյանը, «Հոգեբանություն» կրթական ծրագրի ղեկավար, հ.գ.դ., պրոֆեսոր Ռ․ Աղուզումցյանը, «Պատմություն» կրթական ծրագրի ղեկավար, պ․գ․թ․, դոցենտ Ն․ Գրիգորյանը, բ․գ․թ․, դոցենտներ Ա․ Սարհատյանը և Ա․ Հասանյանը, ֆ.մ.գ.թ., դոցենտ Կ․ Հովսեփյանը:
Հանդիպումների ընթացքում մասնաճյուղի դասախոսները 7-12-րդ դասարանի աշակերտների համար դասախոսություններ են իրականացրել «Հայոց լեզու», «Գրականություն», «Մաթեմատիկա», «Ֆիզիկա», «Անգլերեն», «Հայոց պատմություն» և «Արվեստ» առարկաների շրջանակներում: Դասախոսությունների համար ընտրվել են ծրագրային և արդիական, դպրոցականների համար հետաքրքրություն ու մոտիվացիա առաջացնող մի շարք թեմաներ՝ նպատակ ունենալով լրացնելու կամ ընդլայնելու նրանց ունեցած գիտելիքները: Դասախոսությունների որոշ մասն էլ իրականացվել է՝ կարևորելով դպրոցների կողմից առաջարկվող թեմաները: Այդ կերպ «Տարիքային հոգեբանություն» թեմայով դասախոսություն է իրականացվել նաև Աչաջուր գյուղի միջնակարգ դպրոցի ուսուցիչների համար, քննարկվել են գործընթացներ և վարքագիծ՝ կապված ուսուցման և տարիքային առանձնահատկությունների հետ:
Դասախոսների այցը դպրոցներ ոգևորիչ էր աշակերտների և ուսուցիչների համար, քանի որ դպրոցականներին օգնում էր ընդհանրացնելու նախկինում ձեռք բերված գիտելիքները, յուրացնելու նորերը, հասկանալու որոշ խնդիրների տեսական և գործառնական նշանակությունները, իսկ ուսուցիչների համար հնարավորություն էր երկխոսության մեջ մտնելու համալսարանական գործընկերների հետ:
Միաժամանակ ԵՊՀ ԻՄ աշխատակիցները 11-րդ դասարանցիներին ներկայացրել են մասնաճյուղի գործունեությունը, քննարկել և տեղեկատվություն տրամադրել մասնագիտությունների, կրթական ծրագրերի և դրանց առանձնահատկությունների վերաբերյալ, կատարել մտքերի փոխանակում, պատասխանել աշակերտներին հետաքրքրող հարցերին:
Այս հանդիպումների ընթացքում բուհի կողմից առաջին անգամ իրականացվել են մասնագիտական կողմնորոշման ուսումնասիրություններ: ԵՊՀ ԻՄ «Հոգեբանություն» կրթական ծրագրի 2-րդ կուրսի ուսանողները Բերդի և Դիլիջանի ավագ դպրոցների, Իջևանի վարժարանի, Հաղարծնի և Ազատամուտի միջնակարգ դպրոցների 2024 թ. շրջանավարտների շրջանում կատարել են մասնագիտական կողմնորոշման թեստավորման աշխատանքներ՝ նպատակ ունենալով նախ պարզել աշակերտների հետաքրքրությունների շրջանակը, կարողությունների զարգացման մակարդակը, անհատական հատկանիշները, իսկ արդյունքների քննարկմամբ նաև ընտրված մասնագիտության համապատասխանությունը, ապա, հաշվի առնելով աշակերտների անհատական առանձնահատկությունները և աշխատաշուկայի սոցիալ-տնտեսական իրավիճակը, օգնել երիտասարդներին՝ ապագա մասնագիտություն ընտրելու և աշխատանքի նկատմամբ գիտակցված վերաբերմունք ձևավորելու:
ԵՊՀ Իջևանի մասնաճյուղի և դպրոցների միջև մշտական շփում ապահովելու և դպրոց-համալսարան կապն ամրապնդելու նպատակով աշակերտներին առաջարկվել է ճանաչողական այց կատարել մասնաճյուղ: