2018թ. ապրիլի 20-ին ԵՊՀ Իջևանի մասնաճյուղում կայացավ ուսանողների հետ ՀՀ ԱԱԾ մի քանի ներկայացուցիչների հանդիպումը, որին ներկա էին ԵՊՀ ԻՄ-ի տնօրեն Ս. Ա. Առաքելյանը, Շրջանավարտների և կարիերայի կենտրոնի համակարգող Ա.Եգանյանը, ՈՒԳԸ համակարգող Ս.Ալավերդյանը, հասարակայնության հետ կապերի և մամուլի պատասխանատու Հ.Վանյանը:

Նախ մասնաճյուղի տնօրեն Սամվել Առաքելյանը ուսանողներին ներկայացրեց հանդիպման բուն նպատակը, այն է՝ ՀՀ ԱԱԾ սահմանապահ զորքերի «Բագրատաշեն» սահմանային վերահսկողության բաժնում աշխատանքի հնարավորության մասին իրազեկումը մեր ուսանողներին ու շրջանավարտներին, քննարկվելիք հարցերը:

Այնուհետև ԱԱԾ աշխատակիցները ներկայացրին ազգային անվտանգության ծառայության համակարգի վերաբերյալ ընդհանուր տեղեկատվություն, աշխատանքի բնույթը, գործառույթները, դիմելու կարգը, պատասխանեցին ուսանողների հարցերին։

Ընդգծվեց, որ ՀՀ ԱԾ սահմանապահ զորքերում ծառայության անցնելու համար կարող են դիմել Հայաստանի Հանրապետության՝ մինչև 30 տարեկան արական և իգական սեռի այն քաղաքացիները, ովքեր՝

1. անցել են պարտադիր զինվորական ծառայություն (բացառությամբ իգական սեռի քաղաքացիների),
2. ունեն բարձրագույն կամ միջին մասնագիտական կրթություն,
3. տիրապետում են հայերեն և որևէ օտար լեզվի,
4. ֆիզիկական պատրաստականությամբ, մասնագիտական որակներով, առողջական վիճակով, գործնական, անձնական և բարոյական հատկանիշներով համապատասխանում են ազգային անվտանգության ծառայողին ներկայացվող պահանջներին:

Հանդիպման ընթացքում ուսանողները ստացան իրենց հետաքրքող հարցերի պատասխանները:

Վերջում մասնաճյուղի տնօրեն Ս.Առաքելյանը շնորհակալություն հայտնեց աշխատանքի լավ առաջարկությամբ մասնաճյուղ այցելած ԱԱԾ ներկայացուցիչներին, ևս մեկ անգամ խոսեց առաջարկվող աշխատանքի պատվաբեր լինելու և մեծ պատասխանատվության մասին՝ ընդգծելով, որ մեր անվտանգության երաշխավորն է սահմանում կանգնած մարդը:

Ներկայացվեց, որ մասնաճյուղի առկա և հեռակա ուսուցման համակարգերի այն ուսանողներն ու  շրջանավարտները, ովքեր ցանկություն ունեն աշխատանքի անցնելու ԱԱԾ սահմանապահ զորքերի «Բագրատաշեն» սահմանային վերահսկողության բաժնում, կարող են դիմել ԵՊՀ ԻՄ-ի շրջանավարտների և կարիերայի կենտրոնի համակարգող Արփինե Եգանյանին  (հեռ.՝ 077 03 10 65, էլ.հասցե՝ yeganyanarpine@gmail.com):

2018թ.  ապրիլի 19-ին՝  Ֆրանկոֆոն  պետությունների  և  կառավարությունների ղեկավարների 17-րդ գագաթնաժողովի   միջոցառումներին ընդառաջ, ԵՊՀ  ռոմանագերմանական բանասիրության ֆակուլտետի ֆրանսիական  բանասիրության ամբիոնը կազմակերպել էր «Ֆրանսերենը  միջմշակութային հաղորդակցության համտեքստում» թեմայով միջազգային գիտաժողով։ 

Գիտաժողովին մասնակցում էին  մի շարք գիտական հաստատությունների  ներկայացուցիչներ Հայաստանից, Ֆրանսիայից և Վրաստանից։ 

ԵՊՀ Իջևանի մասնաճյուղից գիտաժողովին մասնակցում էին Ֆրանսերեն լեզվի և գրականության ամբիոնի դասախոսներ Մանե Աղբալյանը և Թինա Ամիրաղյանը:

Մանե Աղբալյանը հանդես եկավ «Միջմշակութային գործոնի դերը օտար լեզվի դասավանդման մեջ» թեմայով զեկուցմամբ:

Թինա Ամիրաղյանը ներկայացրեց «Մեղմասացությունների  զուգորդական դաշտերը ֆրանսերենում և հայերենում» թեմայով զեկուցում:

Միջազգային գիտաժողովի մասնակիցներն  իրենց զեկուցումներով  փորձեցին լուսաբանել   ֆրանսերենի դերը  միջմշակութային համտեքստում։

Գիտաժողովին ներկայացված զեկուցումների թեմաները բավականին  հետաքրքիր էին և արդիական:

Ծավալվեց ակտիվ քննարկում, որի ընթացքում գիտաժողովի բոլոր մասնակիցները զեկուցողներից ստացան իրենց հետաքրքրող հարցերի պատասխանները, արտահայտեցին իրենց տեսակետները:

Վերջում ԵՊՀ ռոմանագերմանական  բանասիրության  ֆակուլտետի  ֆրանսիական բանասիրության ամբիոնի կողմից մասնակիցներին տրվեցին հավաստագրեր, հյուրերին նաև նվերներ:

2018թ. ապրիլի 16-ին ԵՊՀ Իջևանի մասնաճյուղ այցելեց բանաստեղծ, արձակագիր, հրապարակագիր, «Խոսնակ» ամսագրի խմբագիր Համբիկ Մարտիրոսյանը՝ «Մուղնի» հրատարակչության տնօրեն Ռուզան Պետրոսյանի և սփյուռքագետ, պաշտոնաթող դիվանագետ Ռոմեն Կոզմոյանի ուղեկցությամբ: 

Այցելության հիմնական նպատակը ԵՊՀ ԻՄ-ի ուսանողների համար ակնարկային դասախոսություն կարդալն էր:   

Նախ հյուրերը հանդիպեցին մասնաճյուղի տնօրեն Ս. Ա. Առաքելյանի հետ և քննարկեցին մի շարք հարցեր:

Ապա տեղի ունեցավ բուհի ուսանողության հետ նրանց հանդիպումը, որին ներկա էին ԵՊՀ ԻՄ-ի վարչական և պրոֆեսորադասախոսական անձնակազմի ներկայացուցիչներ, տարբեր մասնագիտությունների (մեծ մասամբ հումանիտար ուղղվածության) ուսանողներ:

Պարոն Ս.Առաքելյանը ընդհանուր գծերով հյուրերին ներկայացրեց ուսանողներին՝ այցելության համար նրանց հայտնելով շնորհակալություն, համոզմունք արտահայտելով, որ նրանց հետ հանդիպումը ուսանողների համար կլինի ամենալավ դասը, որ վերջին ամիսներին նրանք կարող էին ստանալ: Այնուհետև Ս. Ա. Առաքելյանը խոսքը փոխանցեց Հումանիտար գիտությունների ֆակուլտետի դեկան, պ.գ.դ., պրոֆեսոր Աշոտ Ներսիսյանին, ով եղել է Լիբանանում և անձնապես ծանոթ է այն մեծ գործունեությանը, որ իրականացվել է «Խոսնակ» թերթի միջոցով և պարոն Մարտիրոսյանի գլխավորությամբ:

Ա.Ներսիսյանը խոսեց Համբիկ Մարտիրոսյանի հրապարակախոսական, խմբագրական մեծածավալ գործունեության, 1957 թվականից Բեյրութում լույս տեսնող «Խոսնակ» («Խօսնակ») գրական, հասարակական և տեղեկատու ամսագրի մասին, որը ՀԲԸՄ Լիբանանի շրջանային հանձնաժողովի և Հայ երիտասարդաց ընկերության (ՀԵԸ) կենտրոնական վարչության օրգանն է: Հ.Մարտիրոսյանի գրական ժառանգությունից նա մասնավորապես անդրադարձավ «Ես և դուն»  (1981), «Սպիտակ երգ» (2003), «Մարդ մարդացիր, կ՛աղաջեմ» (2004) գրքերին, շնորհակալություն հայտնեց հյուրերին՝ իրենց այցելությամբ մասնաճյուղը պատվելու համար:

Ոգեշնչող դասախոսությամբ հանդես եկավ պարոն Հ.Մարտիրոսյանը, ով, դիմելով ուսանողներին, այսպես սկսեց իր ելույթը. «Արևմտահայ քերթողության իշխան Վահան Թեքեյան տեղ մը կ՚ըսե. «Հետայսու սփյուռքահայ պայմաններու մեջ հայը գոյատևելու համար պետք ունի օդի, ջուրի, հացի նման հպարտության»: Ես այսօր կապրիմ այդ հպարտությունը. այդ հպարտությունը դու՛ք եք՝ երիտասարդներդ: Իտալացիք կ՚ըսեն. «Երիտասարդությու՜ն, երիտասարդությու՜ն, երջանկության գարունն ես դուն»: Բնականաբար, մեր լույսը, մեր հույսը, մեր ապավենը, մեր գալիքը դուք եք, սիրելի՛ երիտասարդներ…»:

Հ.Մարտիրոսյանը մի քանի խոսքով անդրադարձավ իր կյանքի կարևոր իրադարձություններին, ծավալած գործունեությանը, ընթերցեց բանաստեղծություններ  իր «Հայերգութիւն», «Երկու ափ», «Ես և դուն» բանաստեղծությունների ժողովածուներից և հատված «Սպիտակ երգ» պոեմից («Օտարախօս Հայերուն», «Իրավունք չունի», «Ուշացած ժամադրություն» և այլն):

Դասախոսությունից հետո տեղի ունեցավ քննարկում. ուսանողները («Պատմություն» մասնագիտության 3-րդ, 2-րդ և 1-ին կուրսի ուսանողներ Ալիխան Բալդրյանը, Մհեր Ղալումյանը, Մարգարիտ Թամրազյանը) Հ.Մարտիրոսյանից ստացան իրենց հետաքրքող հարցերի պատասխանները:

Եզրափակիչ ելույթ ունեցավ պարոն Ռ.Կոզմոյանը՝ կայացած  բովանդակալից ու ջերմ հանդիպման համար շնորհակալություն հայտնելով թե՛ պարոն Մարտիրոսյանին և թե՛ համալսարանականներին:

Վերջում շնորհակալական խոսքով հանդես եկավ Հայոց լեզվի և գրականության ամբիոնի դոցենտ, բ.գ.թ. Ա.Սարհատյանը՝ հանդիպման բոլոր մասնակիցների անունից իր մեծ գոհունակությունն ու երախտագիտությունն արտահայտելով հյուրերին և մասնավորապես պարոն Մարտիրոսյանին՝ նման ուսանելի, հայրենաշունչ և հայաշունչ դասախոսության համար:

Հանդիպումից հետո ԵՊՀ ԻՄ-ի տնօրենության կողմից հյուրերին նվիրվեցին Կիրառական արվեստի ֆակուլտետի ուսանողների աշխատանքներից:  

2018թ. ապրիլի 12-13-ին ԵՊՀ ԻՄ-ի անգլերեն լեզվի և գրականության ամբիոնի վարիչ Ք.Հարությունյանը Եվրասիա միջազգային համալսարանում մասնացեց «Կրթակարգի մշակում այլ առարկաների բովանդակության և լեզվի միջոցով» թեմայով միջազգային աշխատաժողովին (աշխատանքային լեզուն անգլերենն էր):

Այն կազմակերպվել էր Եվրոպայի խորհրդի ժամանակակից լեզուների եվրոպական կենտրոնի (ԺԼԵԿ) և Եվրասիա միջազգային համալսարանի հետ համատեղ:

Աշխատաժողովին մասնակցում էին ՀՀ բարձրագույն և հանրակրթական ուսումնական հաստատությունների անգլերեն լեզվի մասնագետներ:

Վերապատրաստման երկօրյա դասընթացը վարեցին ԺԼԵԿ փորձագետներ Ֆրեդերիկ Տավոն և Դունյա Չամբերլայնը Ժնևի Միջազգային դպրոցից։

Աշխատաժողովին բացման խոսքով հանդես եկավ ԵՄՀ ռեկտոր Սուրեն Օհանյանը, ով արժևորեց լեզուների իմացությունը և դրա կիրառելիությունը դասավանդման գործընթացում:

ԺԼԵԿ-ի կառավարման խորհրդի կոմիտեի անդամ Լուսինե Ֆլջյանն առաջինը ներկայացրեց իր զեկուցումը՝ ընդգծելով երկօրյա վերապատրաստումների ընթացքում ստացած գիտելիքներն ու հմտությունները ուսանողներին և աշակերտներին փոխանցելու կարևորությունը: Նա նաև ներկայացրեց ԺԼԵԿ-ի ստեղծման պատմությունը, վերջինիս նպատակներն ու հեռանկարները:

Այնուհետև Ֆրեդերիկ Տավոն և Դունյա Չամբերլայնը երկու օր շարունակ իրականացրին հագեցած և բովանդակալից վերապատրաստում:

2018թ. ապրիլի 13-ին ԵՊՀ ԻՄ-ի գրադարանում կայացավ մասնաճյուղի տնօրեն, պ.գ.թ., դոցենտ Սամվել Առաքելյանի,  ՄԿՈԱ բաժնի մասնագետ, փ.գ.թ., դոցենտ Էդիկ Կյուրեղյանի, նույն բաժնի վարիչ, ասիստենտ Մարիետա Ճաղարյանի համահեղինակությամբ և բ.գ.թ., ասիստենտ Հասմիկ Վանյանի  խմբագրությամբ հրատարակված «ԵՊՀ Իջևանի մասնաճյուղը հասարակական կարծիքի համապատկերում»  գրքի շնորհանդեսը:

Շնորհանդեսին ներկա էին բուհի վարչական և պրոֆեսորադասախոսական անձնակազմի ներկայացուցիչներ, ուսանողներ, հյուրեր:

Բացման խոսքով հանդես եկավ գրադարանի վարիչ Վլադիմիր Պողոսյանը՝ ներկայացնելով, որ «ԵՊՀ Իջևանի մասնաճյուղը հասարակական կարծիքի համապատկերում» գրքում ընդգրկված են վերջին 5 տարիներին բուհում անցկացված հասարակական կարծիքի հարցումների արդյունքներն ու դրանց վերլուծությունը: ԵՊՀ ԻՄ-ի վերաբերյալ նոր լույս տեսած գրքի առթիվ նա շնորհավորեց բոլոր  համալսարանականներին, գրքին մաղթեց բարի երթ, որ այն ծառայի իր բուն նպատակին և օգտակար լինի առաջին հերթին այն ընթերցող հանրությանը, որի համար նախատեսված է՝ մասնաճյուղի անձնակազմին, ուսանողներին ու շրջանավարտներին, արտաքին շահակիցներին, ընդհանրապես կրթօջախի գործունեությամբ և «հասարակական կարծիք» երևույթով հետաքրքրվողներին:

Ելույթ ունեցավ գրքի համահեղինակ, մասնաճյուղի տնօրեն Սամվել Առաքելյանը՝ ներկայացնելով գրքի հիմնական նպատակը, առաջադրված խնդիրները, շնորհակալություն հայտնելով գրքի ստեղծման գործում ներդրում ունեցած և աջակցած բոլոր մարդկանց ու ստորաբաժանումներին՝ բուհի ամբողջ անձնակազմին, իր խորհրդական Անուշավան Մակարյանին, ՄԿՈԱ բաժնի բոլոր աշխատակիցներին, ուսանողներին ու շրջանավարտներին, արտաքին շահակիցներին:

Ընդգծվեց, որ ժամանակի հրամայականն է, որ սոցիոլոգիական հարցումները դառնան օրախնդիր հասարակական կյանքի կառավարման բոլոր ոլորտներում, այդ թվում՝ բուհական համակարգում: Դրանք բուհի կառավարման ու ինքնակառավարման արդյունավետ տարր են դառնում այնքանով, որքանով ղեկավարությունն ու աշխատակազմը կարևորում են դրա դերը՝ խնդիրների  սուբյեկտիվ, բուհի առաջընթացին խոչընդոտող մեկնաբանություններին հակադրելով գիտականորեն հիմնավորված եզրահանգումները: Այդ ամենը քաջ գիտակցելով՝ ԵՊՀ ԻՄ-ի ղեկավարությունը շատ է կարևորում հարցումների դերը՝ դրանց արդյունքների ճիշտ օգտագործումը համարելով բուհի գործունեության բարելավմանը նպաստող կարևոր միջոց:

Ապա ելույթ ունեցավ գրքի համահեղինակ, փ.գ.թ., դոցենտ, ՀՀ ԳԱԱ փիլիսոփայության, իրավունքի և սոցիոլոգիայի ինստիտուտի ավագ գիտաշխատող Էդիկ Կյուրեղյանը՝ նշելով, որ գրքի հեղինակների նպատակը մեկն է՝ բարելավել սովորողների և աշխատակիցների սոցիոլոգիական մշակույթը, դրանով իսկ մեծացնել հասարակական կարծիքի հավաստիությունը և, այդպիսով, մասնաճյուղի ղեկավարությանն օժանդակել կրթօջախի ուսումնակազմակերպչական խնդիրների բացահայտման, դրանց լուծման տարբերակների առաջադրման և մասնագիտական կրթության պատշաճ որակի  ապահովման հարցերում: Պարոն Կյուրեղյանն ընդգծեց, որ ԵՊՀ ԻՄ-ի ղեկավարությունը, մեծապես կարևորելով կիրառական սոցիոլոգիայի և սոցիալական հոգեբանության դերը բուհի կառավարման գործում, ամենայն պատասխանատվությամբ ու հետևողականությամբ է վերաբերվում հարցումների գործընթացին:

Աշխատության համահեղինակ, ՄԿՈԱ բաժնի վարիչ, Ծրագրավորման և ինֆորմացիոն տեխնոլոգիաների ամբիոնի ասիստենտ Մարիետա Ճաղարյանը, անդրադառնալով գրքի ստեղծման հանգամանքներին, նշեց, որ ԵՊՀ ԻՄ-ում հատկապես վերջին 5 տարիներին առանձնակի նշանակություն է տրվում մասնաճյուղից, դասախոսական կազմից, բուհում իրականացվող ուսումնառությունից ներքին և արտաքին շահակիցների բավարարվածության հարցում­ներին, որոնց արդյունքները թույլ են տալիս ժամանակին ու պատշաճորեն արձա­գանքել աշխատաշուկայի պա­հանջ­ներին: Տիկին Ճաղարյանը իր երախտագիտությունը հայտնեց մասնաճյուղի տնօրենությանը, որը հարցումների գլխավոր պատվիրատուն է, բոլոր այն աշխատակիցներին, ուսանողներին, արտաքին շահակիցներին, որոնք այս կամ այն կերպ առնչվել են հարցումների հետ, օժանդակել դրանց իրականացմանն ու արդյունքների մշակմանը:

Շնորհակալական խոսքում հատուկ շեշտվեցին ՄԿՈԱ բաժնի նախկին և ներկայիս անդամների, մասնաճյուղի կրթության որակի ապահովման գործում իրենց ներդրումն ունեցած աշխատակիցների (Ա.Մակարյան, Ա.Մարգարյան, Ա.Ցուցուլյան, Մ.Ճաղարյան, Ա.Խաչատրյան, Ն.Գրիգորյան, Գ.Ավետիսյան, Յու. Բեկնազարյան, Վ.Աղաբաբյան, Լ.Բեգինյան, Է.Կյուրեղյան, Ա.Եգանյան և ուրիշներ) անունները:

Գրքի վերաբերյալ արժևորման խոսք ասաց Հումանիտար գիտությունների ֆակուլտետի դեկան, պ.գ.դ., պրոֆեսոր Աշոտ Ներսիսյանը՝ ընդգծելով գրքի ճանաչողական-գործնական նշանակությունը, արծարծված խնդիրների, հասարակական կարծիքի կարևորությունը բուհական համակարգում: Պարոն Ներսիսյանը շեշտեց, որ նման բնույթի աշխատանքները հանրապետությունում շատ չեն, և այդ իմաստով ԵՊՀ մասնաճյուղն առաջիններից մեկն է: Նա ողջունեց և այն փաստը, որ մասնաճյուղում ձևավորվում է գրքի շնորհանդեսի մշակույթը: