2016թ. մայիսի 13-ին Նոյեմբերյանում տեղի ունեցավ վոլեյբոլի հուշամրցաշար՝  նվիրված զոհված ոստիկաններին:

Մրցաշարին մասնակցում էր յոթ թիմ՝ ԵՊՀ ԻՄ-ի, Տավուշի մարզի առաջին ատյանի ընդհանուր իրավասության դատարանի, Գանձաքարի, Նոյեմբերյանի, Պտղավանի, Դովեղի, Արճիսի թիմերը:

Խաղերն ընթացան երկու ենթախմբերով:

Առաջին ենթախմբում ԵՊՀ Իջևանի մասնաճյուղի թիմը մրցեց Պտղավանի, դատարանի և Դովեղի թիմերի հետ: Կիսաեզրափակիչում Պտղավանի թիմը հաղթեց մասնաճյուղի թիմին:

Երկրորդ ենթախմբում հանդիպեցին Նոյեմբերյանի և Գանձաքարի թիմերը: Հաղթեց Գանձաքարի թիմը՝ դուրս գալով եզրափակիչ:

Առաջին տեղի համար մրցեցին Պտղավանի և Գանձաքարի թիմերը:

Հաղթեց Գանձաքարի թիմը, որը պարգևատրվեց փոխանցիկ գավաթով, մեդալով և պատվոգրով:

Երրորդ տեղի համար ԵՊՀ ԻՄ-ի թիմը մրցեց Նոյեմբերյանի թիմի հետ և հաղթեց՝ պարգևատրվելով մեդալով, պատվոգրով և հուշանվերով:

2016թ. մայիսի 12-ին՝ մայիսյան հաղթանակների առիթով, ԵՊՀ ԻՄ-ի «Տավուշ» ռազմահայրենասիրական ակումբի անդամները, ավանդույթի համաձայն,  կազմակերպել էին հանդիպում Իջևանի N զորամասի զինվորների հետ։

Հանդիպման սկզբում ակումբականները զինվորական անձնակազմի հետ ունեցան հայրենասիրական թեմաների շուրջ զրույց-քննարկում:

Այնուհետև «Տավուշ» ակումբը զինվորների համար ներկայացրեց փոքրիկ, բայց ոգեշունչ միջոցառում, որի ընթացքում մեր ուսանողները հանդես եկան ազգային-հայրենասիրական երգ ու պարով, ասմունքով:

Ուսանողներին միացան մեր շնորհալի զինվորները՝ ստեղծելով ջերմ ու անմիջական մթնոլորտ:

Վերջում «Տավուշ» ռազմահայրենասիրական ակումբի նախագահ Լազր Ափինյանը զինվորներին հանձնեց Երկրապահ կամավորականների միության կողմից մեր քաջարի զինվորների համար նախատեսված հուշանվերներ։

Ակումբականները խոստացան, որ նմանատիպ հանդիպումները կլինեն շարունակական, իսկ զինվորական անձնակազմը նրանց ճանապարհեց ջերմ ու սրտաբուխ խոսքերով։

2016թ. մայիսի 12-ին ԵՊՀ ԻՄ-ի հումանիտար գիտությունների ֆակուլտետի «Հայոց լեզու և գրականություն» մասնագիտության 2-րդ կուրսի ուսանողները «Բարբառագիտության հիմունքներ» դասընթացի գործնական դասն անցկացրին Գանձաքար գյուղում:

Նրանք այցելել էին գյուղի տարեց բնակիչներին, ովքեր բնիկ գյուղացիներ էին և այդ գյուղի բարբառակիրները՝

1. Սեդա Ներկարարյան (1932թ.),
2. Հրաչիկ Ներկարարյան (1935թ.),
3. Մանյա Ներկարարյան (1937թ.),
4. Բախշի Ստեփանյան (1952թ.):

Բարբառախոսների հետ ունեցած զրույցների հիման վրա ուսանողները հավաքեցին «Բարբառագիտության հիմունքներ» դասընթացի շրջանակներում իրենց հետաքրքրող և անհրաժեշտ նյութերը:

Նախատեսվում է հավաքած բարբառագիտական նյութերը ենթարկել առավել խոր ուսումնասիրության և հրատարակել որպես հոդված: