2016թ. մայիսի 21-ին «Արմենիա»  հեռուստաընկերությամբ կայացած «Ամենախելացին» ինտելեկտուալ խաղի երրորդ եթերաշրջանի երկրորդ  կիսաեզրափակիչ փուլի հաղթող է ճանաչվել ԵՊՀ Իջևանի մասնաճյուղի բնական գիտությունների ֆակուլտետի «Քարտեզագրություն և կադաստրային գործ» մասնագիտության առաջին կուրսի ուսանողուհի Անգին Ծատուրյանը: 

Անգինի հետ ունեցած հարցազրույցում նա այսպես է արտահայտվել նախագծին իր մասնակցության վերաբերյալ.

 -Անգի՛ն, ի՞նչ է Ձեզ սովորեցրել «Ամենախելացին». և ի՞նչ դեռ կսովորեցնի:

-«Ամենախելացին» նախագիծն ինձ սովորեցրել է փորձել և չզղջալ, հավատալ սեփական գիտելիքներին և չընկճվել: Կսովորեցնի` ձգտել լինել ավելին:

 –Ի՞նչն է Ձեր բնավորության մեջ օգնում և խանգարում  այս խաղում .

-Օգնում է հուսախաբ չանելու վախը և համառությունը, իսկ խանգարում է դանդաղ մտածելը և հուզմունքը:

–Ինչպե՞ս կբնորոշեք Ձեր կյանքի այս փուլը:

–Թեև այն հագեցած էր  և հուզառատ, այնուամենայնիվ  ես  չեմ զղջացել մասնակցության համար: Ես հասկացել եմ, թե ինչ եմ ուզում, ինչպիսին եմ ուզում դառնալ և անկախ նրանից՝ կհաղթեմ, թե ոչ, ես ամեն ինչ կանեմ, որպեսզի դառնամ ավելին, քան ես կամ, իսկ հաղթանակը՝ կյանքը ցույց կտա… Թո՛ղ հաղթի նա, ով ամենաշատը կհավատա իր հաղթանակին, և ում այն ամենաշատն է պետք:

«Ամենախելացին» նախագիծն աշխարհահռչակ “SONY Pictures” ընկերության “The Brainiest” ինտելեկտուալ խաղի հայկական տարբերակն է, որը Հայաստանում իրականացնում է “Armenia TV”-ն:

 «Ամենախելացին» հեռուստանախագծի երրորդ եթերաշրջանին մասնակցել են  Հայաստանի և Արցախի բուհերում սովորող բակալավրիատի առաջին և երկրորդ կուրսերի ուսանողները:

Հայտագրման փուլն ավարտվելուց հետո ուսանողները հրավիրվել են գրավոր քննության, մասնակցել անհատական թեստի լրացմանը և 20 րոպեում պատասխանել 40 հարցի: 

Անհատական թեստի արդյունքների հիման վրա անցկացվել է բանավոր տեսանկարահանվող քաստինգ, որի ժամանակ ուսանողներն իրենց նախընտրած մեկ թեմայի շրջանակներում մեկ րոպեի ընթացքում պատասխանել են հնարավորինս շատ հարցերի:

Այս փուլերին մասնակցելուց հետո հեռուստախաղի խմբագրական և պրոդյուսերական աձնակազմը տվել է իր գնահատականը, և իրենց ունակություններով խաղի բոլոր պահանջներին բավարարած ուսանողները դարձել են «Ամենախելացին» հեռուստախաղի երրորդ եթերաշրջանի մասնակիցը:

Հարցերը և թեմաներն ուսանողներին նախապես չեն տրամադրվել, նրանք հարցերին պատասխանել են իրենց ունեցած գիտելիքներով: Ընդգրկված են եղել նաև ուսանողների ընդհանուր զարգացվածության մակարդակը բացահայտող հարցեր: 

Այս փուլի հաղթանակի առթիվ ԵՊՀ Իջևանի մասնաճյուղը սիրով շնորհավորում է իր ուսանողուհի Անգին Ծատուրյանին՝ մաղթելով նրան հաղթանակ խաղի եզրափակիչ փուլում և կյանքի բոլոր բնագավառներում:

2016թ. մայիսի 14-29-ը ԵՊՀ Իջևանի մասնաճյուղում ընթանում է 2015-2016 ուստարվա առկա ուսուցման ամփոփիչ ատեստավորումը` ինը մասնագիտությունների ամփոփիչ ատեստավորման քննություններն ու ավարտական աշխատանքների պաշտպանությունը:

Ամփոփիիչ ատեստավորման քննություններն անցկացվում են սահմանված կարգով, ըստ հաստատված ժամանակացույցների, թե՛ ամփոփիչ ատեստավորման հանձնաժողովները և թե՛ ուսանողները քննություններին ու ավարտական աշխատանքների պաշտպանություններին մոտենում են ամենայն պատասխանատվությամբ ու լրջությամբ:

2016թ. մայիսի 14-ին և 15-ին տեղի ունեցան «Պատմություն» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում էր ՀՀ ԳԱԱ պատմության ինստիտուտի ավագ մասնագետ, պատմ. գիտ. դոկտոր, պրոֆեսոր Կլիմենտ Ամասիայի Հարությունյանը:

Մայիսի 20-ին և 21-ին տեղի ունեցան «Մանկավարժություն և հոգեբանություն» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում էր Գյումրիի Մ.Նալբանդյանի անվան պետական մանկավարժական ինստիտուտի պրոռեկտոր, մանկ. գիտ. դոկտոր, պրոֆեսոր Սպարտակ Սերյոժայի Սողոյանը:

Մայիսի 20-ին և 21-ին տեղի ունեցան «Կիրառական մաթեմատիկա և ֆիզիկա» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում էր ՀՀ ԿԳՆ Գիտության պետական կոմիտեի աշխատակազմի ղեկավար, ֆիզմաթ. գիտ. դոկտոր, պրոֆեսոր Լևոն Գրիշի Մարդոյանը:

Մայիսի 21-ին և 22-ին տեղի կունենան «Հայոց լեզու և գրականություն» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում է ՀՀ պետական կառավարման ակադեմիայի դոցենտ, բան. գիտ. թեկնածու Լավրենտի Աշոտի Միրզոյանը:

Մայիսի 23-ին և 24-ին տեղի կունենան «Կիրառական արվեստ» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում է ՀՀ նկարիչների միության նախագահի տեղակալ-քարտուղար, պրոֆեսոր Խաչատուր Սուրենի Ազիզյանը:

Մայիսի 23-ին և 25-ին տեղի կունենան «Ֆրանսերեն լեզու և գրականություն» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում է Երևանի Վ.Բրյուսովի անվան պետական լեզվահասարակագիտական համալսարանի ֆրանսերեն լեզվի ամբիոնի դոցենտ, բ.գ.թ. Մելանյա Սմբատի Ղազարյանը:

Մայիսի 27-ին և 28-ին տեղի կունենան «Անգլերեն լեզու և գրականություն» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում է Երևանի Վ.Բրյուսովի անվան պետական լեզվահասարակագիտական համալսարանի անգլերեն լեզվի բառագիտության և ոճաբանության ամբիոնի ասիստենտ, բ.գ.թ. Լիլիթ Ասատուրի Բադալյանը: 

Մայիսի 27-ին և 28-ին տեղի կունենան «Սերվիս» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում է ՀՀ էկոնոմիկայի նախարարության զբոսաշրջության վարչության պետ Մեխակ Վեմիրի Ապրեսյանը:

Մայիսի 28-ին և 29-ին տեղի կունենան «Տնտեսագիտության տեսություն» մասնագիտության ամփոփիչ քննությունը և ավարտական աշխատանքների պաշտպանությունը:

Հանձնաժողովը գլխավորում է Խ.Աբովյանի անվան հայկական պետական մանկավարժական համալսարանի տնտեսագիտության և կառավարման ամբիոնի պրոֆեսոր, տնտ. դոկտոր Մաքսիմ Տիգրանի Սարգսյանը:

2016թ. մայիսի 18-ին ԵՊՀ Իջևանի մասնաճյուղում կայացավ տնօրեն Ս.Առաքելյանի հանդիպումը ուսանողների՝ կուրսերի ավագների, ուսանողական կառույցների ներկայացուցիչների հետ:

Հանդիպմանը ներկա էին նաև իրավախորհրդատու, Ուսանողների իրավունքների պաշտպանության հանձնաժողովի նախագահ Ա.Հովհաննիսյանը, Հասարակայնության հետ կապերի և մամուլի պատասխանատու Հ.Վանյանը:

Հանդիպման ընթացքում քննարկվեցին ուսումնական գործընթացին, քննաշրջանի մեկնարկին,  ռոտացիային, ուսանողներին հուզող տարբեր խնդիրներին վերաբերող հարցեր:

Ուսանողական խորհրդի անդամները ներկայացրին առաջարկներ՝ իրենց աշխատանքները արդյունավետ կազմակերպելու, համակարգելու նպատակով սեմինար-քննարկումներ իրականացնելու վերաբերյալ:

Տնօրենը շեշտեց, որ ուսանողական կառույցները (Ուսանողական խորհուրդ, Ուսանողական գիտական ընկերություն, «Տավուշ» ռազմահայրենասիրական ակումբ) լավագույն հարթակն են ուսանողների ինքնադրսևորման համար:

Նրանց դարձյալ կոչ արեց լինել ակտիվ, հաճախակի կազմակերպել գիտաժողովներ, բանավեճեր, ինտելեկտուալ խաղեր, տարաբնույթ միջոցառումներ, որոնք կնպաստեն օրինավոր մարդ և քաղաքացի, հասարակության լիարժեք անդամ ձևավորելուն:

2016թ. մայիսի 17-ին ԵՊՀ ԻՄ-ի բնական գիտությունների ֆակուլտետ ճանաչողական այցով հյուրընկալվեցին Կայանի Հինդլյանի անվան դպրոցի բարձր դասարանի աշակերտները:

Նրանց ընդունեցին ֆակուլտետի դեկան, ֆ.մ.գ.թ., դոցենտ Մ.Զաքարյանը և պրոֆեսորադասախոսական անձնակազմի ներկայացուցիչները: Պարոն Զաքարյանը հանդես եկավ ողջույնի խոսքով:

Ծրագրավորման և ինֆորմացիոն տեխնոլոգիաների ամբիոնի ասիստենտ, տեխն.գ.թ. Ա.Սիմոնյանը աշակերտներին ծանոթացրեց համակարգչից օգտվելու հմտությունների ծրագրերին, տեղում գրվեցին համակարգչային ծրագրեր՝ աշակերտների ալգորիթմական մտածողությունը զարգացնելու, ծրագրավորման հիմունքներին ծանոթացնելու նպատակով:

Աշակերտներն այնքան ոգևորված էին, որ ցանկություն հայտնեցին իրենց գիտելիքները խորացնել հենց ծրագրավորման և ինֆորմացիոն տեխնոլոգիաների ոլորտում:

Տուրիզմի կառավարման և մշակութաբանության ամբիոնի ասիստենտ Լևոն Լաչիկյանը, ով պատշաճ մակարդակով կազմակերպել էր այցը, հույս հայտնեց ապահովել աշակերտների շարունակական այցելությունը մեր բուհ, նրանց հետաքրքող թեմաներով կազմակերպել դասեր, որոնք կնպաստեն նրանց մասնագիտական կողմնորոշմանը: