2014թ. փետրվարի 24-ին ԵՊՀ Իջևանի մասնաճյուղում բացվեց «Տավուշ» ռազմահայրենասիրական ակումբը, որի նախագահ նշանակվեց Պատմության և քաղաքագիտության ամբիոնի դասախոս, Մասնագիտական կողմնորոշման և պրակտիկայի կազմակերպման բաժնի վարիչ Վահագն Էդիկի Չոբանյանը:

Նպատակը երիտասարդության, ուսանողության շրջանում հայրենասիրական ոգին բարձրացնելը, արցախյան ազատամարտում ընկած հայորդիների հիշատակը վառ պահելն ու ազգային մտածողությամբ երիտասարդներ դաստիարակելն է:

Բացման արարողությանը հրավիրված էին Իջևանում տեղակայված զորամասի հրամանատար, գնդապետ Մ.Մախսուդյանը, Իջևանի զինկոմ, գնդապետ Ա.Հովակիմյանը, Իջևանի զորամասի հրամանատարի տեղակալ, փոխգնդապետ Հ.Սահակյանը:

Ողջույնի խոսքով հանդես եկավ տնօրեն Ս.Առաքելյանը` կարևորելով երիտասարդության շրջանում ռազմահայրենասիրական դաստիարակությունը, որը մեր երկրի անվտանգության, խաղաղության և հզորացման կարևոր երաշխիքն ու գրավականն է:

Ապա ելույթ ունեցան զորամասի հրամանատար, գնդապետ Մ.Մախսուդյանը և Իջևանի զինկոմ, գնդապետ Ա.Հովակիմյանը, փոխգնդապետ Հ.Սահակյանը` շնորհավորելով ակումբի բացման կապակցությամբ և մաղթելով բեղուն գործունեություն:

Ակումբի գործունեությունն ընդգրկելու է մեր ուսանողների կողմից տարբեր տոնական միջոցառումների կազմակերպում, այցեր սահմանային գյուղեր, հանդիպումներ վետերանների, զոհված ազատամարտիկների ընտանիքների հետ, այցելություններ զոհված ազատամարտիկների շիրիմներին և այլն:

Ըստ այդմ` հուշագիր կնքվեց Տավուշի մարզի սահմանային Բերքաբեր գյուղի գյուղապետ Ա.Մադաթյանի հետ:

Այնուհետև մասնակիցները հավաքվեցին Իջևանում գտնվող` զոհված ազատամարտիկների անունը հավերժացնող հուշարձանի մոտ, որտեղ  տեղի ունեցավ երիտասարդ ակումբականների երդման արարողությունը:

Նրանք նախ ծաղիկներ դրեցին ազատամարտիկների անունը հավերժացնող հուշարձանին, ապա երդվեցին սիրել հայրենիքը, հայոց բանակը, ուսման մեջ լինել առաջավոր և ծառայել Հայաստանի Հանրապետությանը:

2014թ. փետրվարի 21-ին ԵՊՀ Իջևանի մասնաճյուղում տեղի ունեցավ Համո Սահյանի ծննդյան 100-ամյակին նվիրված գրական-գեղարվեստական միջոցառում: Այն նախաձեռնել և կազմակերպել էր Հայոց լեզվի և գրականության ամբիոնի դոցենտ Աիդա Սարհատյանը:

Միջոցառմանը ներկա էին Հումանիտար գիտությունների ֆակուլտետի դեկան Վ.Ալեքսանյանը, Հայոց լեզվի և գրականության  ամբիոնի դասախոսները, մասնաճյուղի աշխատակիցներ, ուսանողներ:

Ողջույնի խոսքով հանդես եկավ Ա.Սարհատյանը` մասնավորապես նշելով. «Ընթերցողի առաջ սիրո բազմախորհուրդ ապրումների հարուստ մի աշխարհ է բացում մեր ժամանակների լավագույն քնարերգու Համո Սահյանը: Իր բնաշխարհի կանաչ ու կարմիր, սև ու սպիտակ գույները, արթնացող ամպի տագնապն ու հառաչը, անտառի շուրթի շշուկն ու խորհուրդն ունեն նրա սիրո երգերը: …Մերթ պատանեկան սիրո թրթիռներ են դրանք` նման նոր բողբոջած ոստերի, մերթ սիրո հեքիաթի անրջային պատկերներ են` կանաչ գարնան պես ծաղկափթիթ ու խոստումնալից, մերթ արդեն ապրածի մշուշոտ հուշեր` նման կապտավուն, անձրևաբեր ամպերի…»:

Այնուհետև Հումանիտար գիտությունների ֆակուլտետի շնորհալի ուսանողները հանդես եկան ասմունքով, կատարեցին հայ անվանի բանաստեղծ Համո Սահյանի գողտրիկ բանաստեղծությունների հիման վրա գրված երգեր:

Միջոցառման վերջում իրենց հիացմունքն արտահայտեցին ֆակուլտետի դեկան Վ.Ալեքսանյանը, Հայոց լեզվի և գրականության ամբիոնի ասիստենտ, բ.գ.թ. Ա. Հասանյանը` բարձր մակարդակով կազմակերպված միջոցառման համար հատուկ շնորհակալություն հայտնելով Ա.Սարհատյանին:

2014 թ. փետրվարի 18-ին տեղի ունեցան Երևանի պետական համալսարանի Իջևանի մասնաճյուղի բնական գիտությունների ֆակուլտետի ուսանողական խորհրդի նախագահի ընտրությունները:

Առաջադրվել էին «Կիրառական մաթեմատիկա և ֆիզիկա» մասնագիտության 2-րդ կուրսի ուսանողներ Անդրեյ Սաֆարյանի և Հռիփսիմե Ասատրյանի թեկնածությունները:

Ընտրություններին մասնակցում էին Բնական գիտությունների ֆակուլտետի դեկան Ա.Ցուցուլյանը, ուսումնական խորհրդատու Ք.Օթարյանը, Ուսանողական խորհրդի անդամներ, ֆակուլտետի ուսանողներ:

Թափանցիկ ընտրությունների արդյունքում Անդրեյ Սաֆարյանը ձայների մեծամասնությամբ ընտրվեց Բնական գիտությունների ֆակուլտետի ուսանողական խորհրդի նախագահ:

«Վեբոմետրիքս» վարկանշային համակարգի 2014 թ-ի հունվար ամսվա արդյունքների համաձայն` 22.000 համալսարանների  շարքում ԵՊՀ-ն զբաղեցնում է 2994-րդ տեղը (վեց ամիս առաջ ԵՊՀ-ն զբաղեցնում էր 3152-րդ հորիզոնականը): Առաջին երեք հորիզոնականներում են Հարվարդի համալսարանը, Մասաչուսեթսի տեխնոլոգիական ինստիտուտը և Սթենֆորդի համալսարանը:

ԱՊՀ տարածաշրջանի բուհերից ամենաբարձր դիրքում Մոսկվայի պետական համալսարանն է՝ 113-րդ տեղ: Մեր տարածաշրջանում որոշ ցուցանիշներով առավելություն ունեն վրացական 2 համալսարաններ, իսկ ադրբեջանական բոլոր բուհերը զգալիորեն զիջում են իրենց դիրքերը: 2009 թ-ից մինչ այսօր ԵՊՀ-ն գրանցել է բավականին մեծ առաջընթաց, և մի քանի տարի է` հայաստանյան բուհերի առաջատարն է:

Բուհերի վարկանիշը ձևավորվում է 4 չափորոշիչներով՝ ազդեցությունը (այս չափանիշը այլ ռեսուրսներից դեպի բուհի պաշտոնական կայք կատարված արտաքին հղումների քանակն է), ներկայությունը (վերաբերում է «Google»-ի կողմից համալսարանի պաշտոնական կայքի ինդեքսավորված էջերի քանակին), բացությունը (արտահայտում է կայքում «Adobe Acrobat» (pdf), «Microsoft World» (doc, docx) և «Microsoft Power point» (ppt) ձևաչափերով առկա փաստաթղթերի քանակը՝ ակադեմիական որոնող «Google Scholar» գործիքի տվյալների համաձայն) և գերազանցությունը (արտահայտում է գիտական այն աշխատությունների քանակը, որոնք հրատարակվել են միջազգային հեղինակավոր ամսագրերում):

Աղբյուրը`  www.ysu.am: