2021թ. ապրիլի 8-ին Երևանի պետական համալսարանի Իջևանի մասնաճյուղի (ի դեմս տնօրենի պաշտոնակատար Անուշավան Մակարյանի) և Հայաստանյայց Առաքելական Սուրբ Եկեղեցու Տավուշի թեմի (ի դեմս առաջնորդ Տեր Բագրատ  եպիսկոպոս Գալստանյանի) միջև կնքվեց համագործակցության հուշագիր:

Հուշագրի կնքումը, որի նպատակը երկու կողմերի միջև գործընկերային հարաբերությունների հաստատումն է և համագործակցության ծրագրերի իրականացումը, նախաձեռնել է ԵՊՀ ԻՄ-ի արտաքին կապերի բաժինը:

ԵՊՀ Իջևանի մասնաճյուղի և Հայաստանյայց Առաքելական Սուրբ Եկեղեցու Տավուշի թեմի համագործակցության հիմնական ուղղություններն են.

1. Ուսանողական աշխատանքային խմբի ձևավորում՝ Առաջնորդարան-մասնաճյուղ կապ հաստատելու համար,
2. Ուսանողների և հոգևոր դասի ներկայացուցիչների միջև պարբերաբար հանդիպումների կազմակերպում,
3. Ուխտագնացությունների միջոցով գիտաճանաչողական համատեղ արշավների կազմակերպում,
4. Ազգային երգի և պարի դասընթացների կազմակերպում,
5. Ուսանողական խորհրդի և Ուսանողական գիտական ընկերության ակումբների նախաձեռնած դասընթացների կազմակերպում Առաջնորդարանում,
6. Մասնաճյուղի երիտասարդ կամավորական ներուժի օգտագործում,
7. ՀՀ Տավուշի մարզի միայնակ, առավել խոցելի տարեցների, երեխաների ու երիտասարդների, անհայտ կորածների ընտանիքների, անապահով ընտանիքների, խոցելի համայնքների այցերի իրականացում,
8. Սույն Հուշագրի շրջանակներում այլ գործողությունների իրականացում:

Կողմերի համագործակցության հիմնական սկզբունքներն են.

• փոխադարձ վստահություն,
• պատասխանատվություն,
• պարտաճանաչություն,
• որակի վերահսկում,
• փոխըմբռնում և փոխզիջում,
• թափանցիկություն,
• համագործակցություն:

2021թ. ապրիլի 6-ին Երևանի պետական համալսարանի Իջևանի մասնաճյուղը (ի դեմս տնօրենի պաշտոնակատար Անուշավան Մակարյանի) և «Վիքիմեդիա Հայաստան» գիտակրթական հասարակական կազմակերպությունը (ի դեմս ՀԿ նախագահ Սուսաննա Մկրտչյանի) կնքեցին համագործակցության հուշագիր՝

• կարևորելով Հայաստանի Հանրապետությունում կրթության ոլորտում 21-րդ դարի հմտությունների ներդրումն ու տարածումը,
• խթանելով դասախոսների և ուսանողների շրջանում ազատ և արդի գիտելիքի և դրա ստեղծման հանդեպ հետաքրքրության բարձրացումը,
• գիտակցելով, որ համագործակցությունը հնարավորություն կընձեռի կրթության ոլորտում ներմուծել ժամանակակից մոտեցումներ և կհարստացնի վիքի հարթակներում որակյալ բովանդակության ստեղծումն ու տարածումը,
• նպատակ ունենալով ուսանողներին հնարավորություն տալ տեսական գիտելիքներին զուգահեռ ձեռք բերել նաև գործնական հմտություններ:

Կնքված հուշագրով կողմերը պարտավորվեցին՝

1. համագործակցել Հայաստանում Վիքիմեդիա նախագծերում բովանդակության ստեղծման և զարգացման գործում,
2. ապահովել Վիքիմեդիա բովանդակությունից օգտվելու և Վիքի գործիքները կրթական գործընթացում ներդնելու գործում:

Համագործակցության շրջանակներում կողմերի պատասխանատվությամբ կիրականացվեն մի շարք աշխատանքներ:

Մասնավորապես ԵՊՀ Իջևանի մասնաճյուղը պարտավոր է՝      

1. Աջակցել հայերենով որակյալ բովանդակության ստեղծմանն ու ազատ գիտելիքի տարածմանը համացանցում:
2. Խրախուսել վիքինախագծերի ներդրումն ուսումնական պրոցեսում և դասախոսների ու ուսանողների ակտիվ մասնակցությունը Վիքիմեդիա Հայաստանի կողմից իրականացվող ծրագրերին:
3. Ուսումնական գործընթացի ազդեցության գնահատման մեջ օգտագործել վիքիմեդիա նախագծերում ուսանողների արձանագրած արդյունքների վերաբերյալ Վիքիմեդիա Հայաստանի վիճակագրական տվյալները:
4. Վիքիպեդիան ու մյուս նախագծերը ուսումնական գործընթացում կիրառելը ներառել դասախոսների գնահատման կարգի մեջ:
5. Ուսանողների ուսումնական պրակտիկան կազմակերպել նաև Վիքիմեդիա Հայաստան կազմակերպությունում:
6. Տարածել Վիքիմեդիա Հայաստանի կողմից իրականացվող միջոցառումների մասին տեղեկատվություն համալսարանի ուսանողների և շրջանավարտների շրջանում:
7. Վիքիմեդիա Հայաստանի ներկայացուցիչներին հրավիրել մասնակցելու համալսարանի կողմից իրականացվող այն նախաձեռնություններին, որոնք կօգնեն տարածել ագատ գիտելիքի գաղափարն ու Վիքիմեդիա նախագծերում խմբագրելու սկզբունքները:

Վիքիմեդիա Հայաստանը պարտավոր է՝

1. Պարբերաբար և ըստ անհրաժեշտության կազմակերպել դասախոսների վերապատրաստում Վիքիմեդիա նախագծերը ուսումնական գործընթացում կիրառելու վերաբերյալ և հընթացս տրամադրել խորհրդատվություն:
2. Աջակցել դասավանդման գործընթացում Վիքիմեդիա նախագծերի և գործիքների օգնությամբ ուսումնական առաջադրանքների մշակմանը:
3. Պարբերաբար կազմակերպել ուսանողների՝ վիքիխմբագրման գործիքների վերապատրաստում և, ըստ անհրաժեշտության, տրամադրել մասնագիտական աջակցություն:
4. Համալսարանի դասախոսների հետ համատեղ կազմել մասնագիտական տարբեր ոլորտներից խմբագրման ենթակա հոդվածների ցանկը:
5. Համալսարանի կողմից իրականացվող մասնագիտական կողմնորոշման դասընթացներում ներառել Վիքիմեդիա շարժման և վիքիխմբագրման մասին բաղադրիչ և աջակցել դրա ներկայացմանը աշակերտների հետ հանդիպումների ժամանակ:
6. Համալսարանի ուսանողներին ընձեռել Վիքիմեդիա Հայաստանում վերապատրաստվելու և ուսումնական պրակտիկա անցնելու հնարավորություն:
7. Համալսարանին տրամադրել Վիքիմեդիա նախագծերում ուսանողների կատարած աշխատանքների ծավալի վերաբերյալ վիճակագրական մանրամասն տվյալներ:

«Երևանի պետական համալսարան» հիմնադրամի Իջևանի մասնաճյուղի (ի դեմս տնօրենի պաշտոնակատար Անուշավան Մակարյանի) և «Նաիրի ինշուրանս» ապահովագրական ընկերության (ի դեմս տնօրեն Մանե Մարտիրոսյանի) միջև 2021թ. մարտի 11-ին կնքված պայմանագրի համաձայն՝ ԵՊՀ ԻՄ–ի հիմնական աշխատակիցները կարող են օգտվել առողջության ապահովագրությունից: 

Պայմանագիրը գործում է մինչև 2021թ. դեկտեմբերի 30-ը, և այդ ժամանակահատվածում մասնաճյուղի աշխատակիցները կարող են օգտվել մի շարք անվճար բժշկական ծառայություններից: 

Նախօրոք զանգահարելով «Նաիրի ինշուրանս» ընկերություն (հեռ. 098 277 277, 098 277 288, 060 50 00 60)՝ ընկերության աշխատակցի կողմից նրանք կստանան անհրաժեշտ ուղղորդում, թե որ բուժհաստատություն կարելի է դիմել համապատասխան բժշկական ծառայությունից օգտվելու համար: Որոշ ծառայությունների իրականացումը կհամակարգվի ԵՊՀ ԻՄ-ի տնօրենության կողմից, որոնց մասին աշխատակիցները կտեղեկացվեն առանձին:

Պայմանագրով նախատեսված են հետևյալ բժշկական ծառայությունները.

1. Տարեկան պարտադիր հետազոտություններ՝մասնաճյուղի կողմից ընտրված բժշկական հաստատությունում մեկանգամյա ֆլյուրոգրաֆիա և թերապևտիկ զննում:
2. Տարեկան կանխարգելիչ հետազոտություն՝մասնաճյուղի կողմից ընտրված բժշկական հաստատությունում (առնվազն 4 բժշկական կենտրոններում)՝

• PAP թեստ 35-ից բարձր տարիքի կանանց համար,
• Կրծքագեղձի ուլտրաձայնային հետազոտություն, բժշկի նշանակման դեպքում մամոգրաֆիական հետազոտություն 35-ից բարձր տարիքի կանանց համար,
• PSA թեստ 45-ից բարձր տարիքի տղամարդկանց համար,
• Որովայնի խոռոչի, փոքր կոնքի օրգանների և վահանաձև գեղձի ուլտրաձայնային հետազոտություն,
• Էլեկտրասրտագրություն (ԷՍԳ),
• Տեսողության ստուգում,
• Արյան ընդհանուր քննություն լեյկոբանաձևով,
• Կանանց համար գինեկոլոգի խորհրդատվություն կամ տղամարդկանց համար ուռոլոգի խորհրդատվություն:

3. Շտապ և անհետաձգելի բուժօգնություն.

• Շտապօգնության խմբի այց, այդ թվում՝ մասնագիտացված,
• Անհետաձգելի ախտորոշիչ-բուժական միջոցառումների իրականացում,
• Անհետաձգելի բուժման դեղորայքի ապահովում:

4. Ամբուլատոր բուժօգնություն.

• Թերապևտի և նեղ-մասնագետների խորհրդատվություն, բուժման նշանակում,
• Թերապևտիկ և վիրաբուժական հիվանդությունների բուժում ամբուլատոր պայմաններում,
• Լաբորատոր ախտորոշում՝ ըստ բժշկի նշանակման,
• Գործիքային ախտորոշում՝ ըստ բժշկի նշանակման:

5. Ստացիոնար բժշկական օգնություն.

• Դժբախտ պատահարների հետևանքով հոսպիտալացում և բուժում,
• Թերապևտիկ և վիրաբուժական հիվանդությունների բուժում,
• Ստացիոնար պայմաններում բուժում պահանջող հիվանդությունների բուժում (այրվածք, վնասվածք, թունավորու մ և այլն),
• Ինտենսիվ թերապիա և ռեանիմացիոն միջոցառումներ պահանջող անհետաձգելի վիճակների բուժում,
• Լաբորատոր և գործիքային ախտորոշիչ հետազոտությունների իրականացում: Անգիոգրաֆիկ հետազոտությունները, այդ թվում` կորոնարոգրաֆիա հետազոտության, հատուցում նույնիսկ այն դեպքում, երբ այդ հետազոտությանը չի հաջորդում ծրագրով նախատեսված վիրահատական միջամտություն,
• Վիրահատությունների ժամանակ կիրառվող մետաղական կոնստրուկցիաների հատուցում,
• Սրտանոթային վիրահատություններ և միջամտություններ,
• Անոթային և նյարդավիրաբուժական վիրահատություններ և միջամտություններ,
• Չարորակ ուռուցքային հիվանդությունների վիրահատական բուժում,
• Անհատական հիվանդասենյակի արժեքի հատուցում օրական 10,000 (տասը հազար) ՀՀ դրամ՝ անկախ օրերի քանակից:

6. Քրոնիկ հիվանդությունների բուժում.

• Ամբուլատոր բուժում պահանջող յուրաքանչյուր քրոնիկ հիվանդության սրացման անսահմանափակ քանակի բուժում,
• Ստացիոնար բուժում պահանջող յուրաքանչյուր քրոնիկ հիվանդության սրացման սահմանակ բուժում,
• Պլանային բուժում պահանջող հիվանդությունների վիրաբուժություն և/կամ միջամտություն:

7. Հղիության հսկողություն:
8. Ակնաբուժություն.

• Ախտորոշում,
• Աչքի տարատեսակ վնասվածքների և հիվանդությունների բուժում թերապևտիկ և վիրաբուժական եղանակներով:

9. Դեղորայք.

• Նշանակված ղեղորայքի ձեռքբերման ծախսերի հատուցում,
• Համագործակցող դեղատներից նշանակված դեղորայքը անվճար/ուղեգրով ձեռք բերելու հնարավորություն:

10. Պլանային վիրաբուժություն՝ պլանային բուժում պահանջող հիվանդությունների վիրաբուժություն և/կամ միջամտություն:

Պայմանագրի ներքո կարող են ապահովագրվել միայն ԵՊՀ ԻՄ-ի հիմնական աշխատողները և պայմանագրով ապահովագրված աշխատողների ընտանիքի անմիջական անդամները` մինչև 65 տարեկան ամուսին/կին, մինչև 18 տարեկան զավակ: Ընտանիքի անդամների համար, ըստ տարիքային խմբերի (0-17, 18-40, 41-65), սահմանված են ապահովագրավճարներ:

Յուրաքանչյուր ապահովագրված անձի համար որպես ապահովագրական գումար է սահմանվում 6,000,000 (վեց միլիոն) ՀՀ դրամը:

Ոչ պայմանական չփոխհատուցվող գումար չի կիրառվում:

Ապահովագրված անձ-աշխատողների նկատմամբ տարիքային սահմանափակում չի կիրառվում:

Ապահովագրությունը գործում է Հայաստանի Հանրապետության և Լեռնային Ղարաբաղի Հանրապետության տարածքում:

Նշանակված դեղորայքը կամ ախտորոշիչ հետազոտությունները հատուցվում են միայն այն հիվանդությունների կապակցությամբ, որոնք ներառված են ծրագրում:

Այլ մանրամասներ կարող եք ձեռք բերել «Նաիրի ինշուրանս» ընկերության աշխատակիցներից:

2021թ. մարտի 5-ին Երևանի պետական համալսարանի Իջևանի մասնաճյուղի (ի դեմս տնօրենի պաշտոնակատար Անուշավան Մակարյանի) և «Հույսի կամուրջ» հաշմանդամություն ունեցող երեխաների և երիտասարդների իրավունքների պաշտպանության հասարակական կազմակերպության (ի դեմս «Հույսի կամուրջ» ՀԿ ԻՄ-ի տնօրեն Արմինե Ներսիսյանի) միջև կնքվեց փոխըմբռնման հուշագիր:

Կնքված հուշագրով ամրագրվեց կողմերի պատրաստակամությունը օժանդակելու Տավուշի մարզում համընդհանուր ներառական կրթության զարգացմանը կրթության բոլոր մակարդակներում և ստեղծելու ընդհանուր հարթակ ուսանողների համար մանկավարժական և հոգեբանական տեսական գիտելիքներ ձեռքբերելու և դրանք «Հույսի կամուրջ» ՀԿ Իջևանի կենտրոնում գործնականում կիրառելու համար:

Հուշագիրը նպատակաուղղված է բարձրացնելու քաղաքացիական հասարակության, այդ թվում՝ ուսանողների իրազեկվածությունը ներառական սկզբունքների (հավասար հնարավորություններ, միջավայրային մատչելիություն, կրթության հասանելիություն) վերաբերյալ:

Համագործակցության շրջանակներում կողմերի պատասխանատվությամբ կիրականացվեն մի շարք աշխատանքներ:

Մասնավորապես «Հույսի կամուրջ»-ը պատասխանատու է՝

1. մշակել և անցկացնել լրացուցիչ 5-օրյա դասընթաց մանկավարժի որակավորում ստացող ուսանողների համար՝ «Ներառական կրթության տեսություն և պրակտիկա» թեմայով,
2. համալրել ԵՊՀ ԻՄ-ի գրադարանը ներառական կրթության և մանկավարժահոգեբանական աջակցության տրամադրման վերաբերյալ գրքերով և ձեռնարկներով,
3. «Հույսի կամուրջ» ՀԿ Իջևանի կենտրոնում ստեղծել հարթակ, որը կարող է գործել նաև առցանց՝ ապահովելու ներառական կրթության և կրթության առանձնահատուկ պայմանների կարիք ունեցող երեխաներին տրամադրվող մանկավարժահոգեբանական աջակցության ծառայությունների մատուցման վերաբերյալ գործնական պարապմունքների, կլոր-սեղան քննարկումների, փորձի փոխանակման միջոցառումներ,
4. Համագործակցելով ԵՊՀ ԻՄ-ի ուսանողական խորհրդի հետ՝ խթանել «Հույսի կամուրջ» ՀԿ-ի ներառական դպրոցների և համալսարանի միջև սերտ համագործակցություն՝ համատեղ քարոզարշավների, սեմինարների և հանրային միջոցառումների միջոցով:

ԵՊՀ Իջևանի մասնաճյուղը պատասխանատու է՝

1. Ապահովել արդյունավետ համագործակցությունը ԵՊՀ ԻՄ-ի և «Հույսի կամուրջ» հասարակական կազմակերպության միջև,
2. Մանկավարժի որակավորում ստացող ուսանողների համար նրանց համաձայնությամբ թույլատրել իրականացնել «Ներառական կրթության տեսություն և պրակտիկա» լրացուցիչ դասընթացը,
3. Որոշել ԵՊՀ ԻՄ-ում պատասխանատու անձ, ով սերտ կհամագործակցի «Հույսի կամուրջ» հասարակական կազմակերպության աշխատակիցների հետ հուշագրի շրջանակներում:

ԵՊՀ Իջևանի մասնաճյուղի և «Հույսի կամուրջ» հասարակական կազմակերպության միջև կնքված փոխըմբռնման հուշագիրը տե՛ս այստեղ:

2021թ. փետրվարի 27-28-ը «Դինամո» մարզադահլիճում կայացավ սամբոյի Հայաստանի պատանեկան առաջնությունը, որին մասնակցում էին ՀՀ մարզերի, Արցախի, Երևանի լավագույն մարզիկները:

+98 կգ քաշային կարգում հանդես եկավ ԵՊՀ ԻՄ-ի «Պատմություն» մասնագիտության 1-ին կուրսի ուսանող Գրիգոր Բեկնազարյանը և դարձավ առաջնության հաղթող՝ նվաճելով Եվրոպայի և աշխարհի առաջնություններին մասնակցելու ուղեգիր և պարգևատրվելով ոսկե մեդալով ու պատվոգրով:

Մինչև ՀՀ սամբոյի պատանեկան առաջնության չեմպիոն դառնալը Գրիգոր Բեկնազարյանը 2019թ. դեկտեմբերի 5-8-ը մասնակցել է դպրոցականների՝ Եվրոպայի սամբոյի առաջնությանը՝ 11 հոգանոց խմբում գրավելով 5-րդ տեղը:

2020թ. ՀՀ սամբոյի պատանիների առաջնությունում 87+ կգ քաշային կարգում    գրավել է առաջին տեղը՝ դառնալով ՀՀ չեմպիոն:

2020թ. ապրիլի 7-ին ՀՀ սամբոյի պատանիների հավաքականը պիտի մեկներ Բուլղարիա, սակայն կորոնավիրուսով պայմանավորված՝ մեկնումը չեղարկվեց:

Նույն թվականի նոյեմբերի 5-ին Սերբիայում կայացավ սամբոյի աշխարհի առաջնությունը, որին Հայաստանի թիմը Արցախյան երկրորդ պատերազմի պատճառով չմասնակցեց:

2021թ. մարտի կեսից կկայանան ՀՀ սամբոյի հավաքականի մարզումները Ծաղկաձորում, իսկ ապրիլի 10-15-ը Գրիգոր Բեկնազարյանը հավաքականի կազմում Կիպրոսում կմասնակցի Եվրոպայի առաջնությանը:

ԵՊՀ Իջևանի մասնաճյուղի ամբողջ անձնակազմի անունից սիրով շնորհավորում ենք մեր ուսանողին՝ ՀՀ սամբոյի պատանեկան առաջնության չեմպիոնական տիտղոսը նվաճելու առթիվ,  և առաջիկա առաջնություններում մաղթում ենք փայլուն հաղթանակներ: