2020թ. սեպտեմբերի 27-ի վաղ առավոտյան ադրբեջանական զինված ուժերը, կոպտագույնս խախտելով միջազգային մարդասիրական իրավունքի գործող նորմերն ու հակամարտության լուծման խաղաղ բանակցային գործընթացի տրամաբանությունը, հրթիռահրետանային և ավիացիոն միջոցների կիրառմամբ հարձակման են անցել արցախա-ադրբեջանական ուժերի շփման գծի ողջ երկայնքով՝ թիրախավորելով պաշտպանության բանակի մարտական դիրքերն ու Արցախի խաղաղ բնակավայրերը:

Արցախի Հանրապետության պաշտպանության բանակը հաստատակամորեն կասեցնում է թշնամու առաջխաղացման փորձերը: Հանդիսանալով Արցախի անվտանգության երաշխավորը՝ Հայաստանի Հանրապետության զինված ուժերը ցուցաբերում են ցանկացած աջակցություն՝ ապահովելու Արցախի բնակչության անվտանգությունը:

Այս վճռական պահին համայն հայությունը համախմբվել, դարձել է բռունցք՝ միասնությամբ հասնելու հերթական հաղթանակին, որի կերտման գործում անչափ կարևոր է յուրաքանչյուրիս, ամենի մի հայի անմնացորդ նվիրումն ու ներդրումը՝ լինի ֆիզիկապես, հոգեպես, թե նյութապես:

Արցախին աջակցելու նպատակով սեպտեմբերի 27-ից սկսվել է «Մենք ենք, մեր սահմանները. բոլորս Արցախի համար» խորագրով համազգային դրամահավաք–արշավը:

 ԵՊՀ Իջևանի մասնաճյուղը ևս միացել է «Մենք ենք, մեր սահմանները. բոլորս Արցախի համար» խորագրով համազգային դրամահավաք–արշավին՝ հատուկ բացված հաշվեհամարին փոխանցելով 1.000.000 ՀՀ դրամ:

 2019թ. նոյեմբերի 8-ին Տավուշի մարզ կատարած աշխատանքային այցի շրջանակներում ՀՀ նախագահ Արմեն Սարգսյանը տիկնոջ՝ Նունե Սարգսյանի հետ այցելեց Երևանի պետական համալսարանի Իջևանի մասնաճյուղ:

ԵՊՀ ԻՄ-ում տեղի ունեցավ բուհի ուսանողության, պրոֆեսորադասախոսական անձնակազմի հետ նախագահ Ա.Սարգսյանի հանդիպումը, որին ներկա էին մասնաճյուղի աշխատակիցները՝ տնօրենի պաշտոնակատար Անուշավան Մակարյանի գլխավորությամբ, Տավուշի թեմի առաջնորդ Տեր Բագրատ եպիսկոպոս Գալստանյանը, Տավուշի մարզպետ Հայկ Չոբանյանը, մարզի տարբեր ոլորտների, ԶԼՄ-ների ներկայացուցիչներ:

Հանդիպման ընթացքում պարոն Ա.Սարգսյանը պատասխանեց ուսանողներին հուզող հարցերին, նրանց հետ զրույցում փորձեց պարզել, թե ինչ հետաքրքրություններ, մտահղացումներ ու կարիքներ ունեն:

Նախագահը նշեց, որ մարզի զարգացման, շրջանավարտների աշխատանքի հարցն առավել արդյունավետ լուծելու համար նպատակահարմար կարող է լինել մասնագիտությունների ներդրումը այնպիսի ոլորտներում, ինչպիսիք են գյուղատնտեսությունը, անասնապահությունը, անասնաբուժությունը, անտառային տնտեսության կառավարումը և այլն:

Պարոն Սարգսյանը ուսանողներին տվեց արժեքավոր խորհուրդներ՝ հայրենիքը ճանաչելու և սիրելու, սկզբունքային լինելու, ժամանակն արդյունավետ օգտագործելու վերաբերյալ:

Դիմելով ուսանողներին՝ նա մասնավորապես նշեց. «Կարևոր է, որ ձեզանից յուրաքանչյուրը լինի բազմակողմանի կրթված: Եթե դուք սովորում եք մաթեմատիկա և որոշեք, որ միայն դա եք սովորելու, լինեք սահմանափակ անձնավորություն, չեք կատարի այն, ինչ մենք՝ որպես ազգ, որպես ժողովուրդ, որպես պետություն, ձեզանից սպասում ենք: Մենք սպասում ենք, որ դուք նախ և առաջ լինեք բազմակողմանի զարգացած և ազնիվ, բարոյական մարդ: Շատ էական է, որ լինեք հայրենասեր, ունենաք պրոֆեսիոնալ բարձր որակներ, որ լավ կրթություն ստանաք: Ձեր կյանքի ամենաթանկ բաներից մեկը ժամանակն է: Ափսոս կլինի, որ գաք համալսարան ու չսովորեք, այդ դեպքում դուք ինքներդ ձեզ կխաբեք: Այդ ժամանակը հետ չի գալու»:

Նախագահը նաև ուսանողներին ներկայացրեց մարզի սահմանամերձ համայնքներից, այնտեղ ապրող տոկուն, ստեղծագործ ու աշխատասեր մարդկանցից իր ստացած ջերմ ու դրական տպավորությունները. «Հայաստանը միայն Երևանը չէ: Շատ էական է, որպեսզի ինքներդ էլ գիտակցեք, որ կարելի է ապրել մեծ քաղաքից դուրս, բայց ապրել ժամանակակից կյանքով: Կարելի է զբաղվել անասնապահությամբ, գյուղատնտեսությամբ, օգտագործել ժամանակակից տեխնոլոգիաները, ստեղծել մրցունակ արտադրանք և ունենալ հոյակապ կյանք՝ այս հոյակապ վայրում: Մեր նպատակը պետք է լինի թե՛ գյուղում, թե՛ քաղաքում կյանքի որակը նույնը դարձնելը, որպեսզի այն, ինչ հնարավոր է ստանալ Երևանում, հնարավոր լինի ստանալ նաև այստեղ»:

Ընդունելով ԵՊՀ ԻՄ-ի տնօրենի պաշտոնակատար Անուշավան Մակարյանի առաջարկը և հետևելով ձևավորված ավանդույթին՝ ՀՀ նախագահը տիկնոջ հետ մասնաճյուղի այգում ծառ տնկեց:

Այնուհետև նախագահ Սարգսյանը, տիկին Նունե Սարգսյանը և հյուրերը դիտեցին ԵՊՀ ԻՄ-ի կիրառական արվեստի ֆակուլտետի ուսանողների և շրջանավարտների բազմաժանր աշխատանքների բացօթյա ցուցադրությունը:

Ա.Մակարյանը տնօրենության անունից ՀՀ նախագահին նվիրեց մասնաճյուղի շրջանավարտների ավարտական աշխատանքներից «Տիրամայրը մանուկի հետ» մանրանկարը (ուսանող՝ Արինա Դավթյան, ղեկավար՝ Լ.Ֆլջյան):

 2019թ. նոյեմբերի 2-ին կայացավ ԵՊՀ Իջևանի մասնաճյուղի 25-ամյակին նվիրված հոբելյանական միջոցառումը, որը կազմակերպվել էր ԵՊՀ մշակույթի կենտրոնի (ի դեմս կենտրոնի տնօրեն Կարինե Դավթյանի) և ԵՊՀ ԻՄ-ի սերտ համագործակցությամբ:

Հանդիսությանը հրավիրված էին Մայր բուհի ռեկտորի պաշտոնակատար պարոն Գ.Գևորգյանը, ԵՊՀ ընդհանուր հարցերի գծով պրոռեկտոր Ա.Մալխասյանը, ԵՊՀ գիտքարտուղար Լ.Հովսեփյանը, պրոֆեսորադասախոսական անձնակազմի ներկայացուցիչներ, մարզի հոգևոր, մարզային ու քաղաքային իշխանությունների ներկայացուցիչներ՝ Տավուշի մարզպետ Հ.Չոբանյանի, Իջևանի համայնքապետ Հ.Ղալումյանի գլխավորությամբ, ԵՊՀ ԻՄ-ի հիմնադիր կազմի անդամներ, մասնավորապես՝ հիմնադիր տնօրեն Հ.Կարայանը, պատվավոր հյուրեր, դպրոցների տնօրեններ և ուսուցիչներ, ԶԼՄ-ների ներկայացուցիչներ, շրջանավարտներ, ուսանողներ, ծնողներ, քաղաքացիներ, արտաքին շահակիցներ:

Հոբելյանական միջոցառմանը նախորդեց ԵՊՀ ԻՄ-ի գիտական խորհրդի հանդիսավոր նիստը, որի ընթացքում տեղի ունեցավ Մայր բուհի 100-ամյակի և մասնաճյուղի 25-ամյակի կապակցությամբ հուշամեդալների և պատվոգրերի հանձնման հանդիսավոր արարողությունը՝ ԵՊՀ ռեկտորի պաշտոնակատար Գ.Գևորգյանի, ԵՊՀ ԻՄ-ի տնօրենի պաշտոնակատար Ա.Մակարյանի մասնակցությամբ:

Համալսարանական կրթության զարգացման գործում ունեցած նշանակալի ավանդի և Երևանի պետական համալսարանի Իջևանի մասնաճյուղի 25-ամյակի կապակցությամբ ԵՊՀ-ի ոսկե մեդալով պարգևատրվեցին ԵՊՀ ԻՄ-ի ընդհանուր մաթեմատիկայի և բնագիտության ամբիոնի դոցենտ, ֆ.մ.գ.թ. Արտակ Վոլոդյայի Ցուցուլյանը և ԵՊՀ ԻՄ-ի տուրիզմի կառավարման և մշակութաբանության ամբիոնի դասախոս Յուրա Իսրայելի Բեկնազարյանը: ԵՊՀ-ի արծաթե մեդալով պարգևատրվեցին ԵՊՀ ԻՄ-ի հայոց լեզվի և գրականության ամբիոնի դոցենտներ, բան. գիտ. թեկնածուներ Ալիսա Զավենի Հասանյանը և Աիդա Ասիլբեկի Սարհատյանը:

ԵՊՀ-ի հիմնադրման 100-ամյակի առթիվ պատվոգիր ստացան ԵՊՀ ԻՄ-ի հայոց պատմության և հասարակագիտության ամբիոնի դոցենտ, պ.գ.թ. Վարդան Արամայիսի Ալեքսանյանը, Հայոց լեզվի և գրականության ամբիոնի ասիստենտ, բ.գ.թ. Մուշեղ Լևոնի Սարուխանյանը, Ընդհանուր տնտեսագիտության ամբիոնի ասիստենտ Անուշ Աղաջանի Սարիբեկյանը, Ընդհանուր մաթեմատիկայի և բնագիտության ամբիոնի դասախոս Գեղամ Վոլոդյայի Գուլակյանը, Ծրագրավորման և ինֆորմացիոն տեխնոլոգիաների ամբիոնի դասախոս Քնար Վլադիմիրի Օթարյանը, ՄԿՊԿ բաժնի տեսուչ Անահիտ Վառլամի Սարիբեկյանը:       

ԵՊՀ ԻՄ-ի 25-ամյակի կապակցությամբ պատվոգրերի արժանացան մասնաճյուղի մի շարք աշխատակիցներ (պարգևատրված աշխատակիցների ամբողջական ցանկը տե՛ս այստեղ):  

Հուշամեդալների և պատվոգրերի հանձնումից հետո տեղի ունեցան հյուրասիրություն և Կիրառական արվեստի ֆակուլտետի դասախոսների և ուսանողների աշխատանքների ցուցադրությունը:

Այնուհետև Տավուշի մարզպետարանում կայացան մասնաճյուղի 25-ամյակին նվիրված պաշտոնական հանդիսությունը և հոբելյանական համերգը:

Հանդիսությունը մեկնարկեց Տերունական աղոթքով ու ՀՀ պետական օրհներգով, ապա ԵՊՀ մշակույթի կենտրոնի սաների կատարմամբ հնչեց ԵՊՀ հիմներգը:

Ելույթ ունեցան ԵՊՀ ռեկտորի պաշտոնակատար Գեղամ Գևորգյանը, ԵՊՀ ԻՄ-ի տնօրենի պաշտոնակատար Անուշավան Մակարյանը, Տավուշի մարզպետ Հայկ Չոբանյանը:

Պարոն Գ.Գևորգյանը, Մայր բուհի հիմնադրման 100-ամյակի և մասնաճյուղի 25-ամյակի կապակցությամբ շնորհավորելով բոլոր համալսարանականներին ու ներկաներին, նշեց, որ հոբելյանական այս միջոցառումը ԵՊՀ 100-ամյակին նվիրված միջոցառումների շղթայի կարևոր օղակներից է, գուցե ամենակարևորը տարածաշրջանի համար: Իր խոսքում ԵՊՀ ռեկտորն ընդգծեց մասնաճյուղի ոչ միայն գոյության, այլև նրա զարգացման անհրաժեշտությունը, շնորհակալություն հայտնեց Երևանից հրավիրված և տեղացի պրոֆեսորադասախոսական կազմին՝ մեծ նվիրումով աշխատելու համար. «Քսանհինգ տարի է, ԵՊՀ Իջևանի մասնաճյուղը կատարում է ոչ միայն կրթական գործառույթներ, այլև սահմանապահի դեր Հայաստանի Հանրապետության համար: Այս բարձրագույն կրթօջախը կարևորվում է նաև այն գործառույթով, որ շենացնում է մի ամբողջ մարզ՝ մեր հայրենիքի մի կարևոր հատված»:

Պարոն Ա.Մակարյանը, շնորհավորելով մայր համալսարանի 100 և նրա մասնաճյուղի 25-ամյակները, մաղթեց, որ նրանք ունենան աննախընթաց վերելք ապրող գիտական հզոր ներուժ, ստեղծագործ ու նախաձեռնող  ուսանողություն. «Ջերմորեն շնորհավորում եմ բոլորիս ԵՊՀ Իջևանի մասնաճյուղի ստեղծման, նրա լինելության  25-ամյա հոբելյանի առթիվ և մաղթում, որ հավերժական լինի նրա երթը պատմության հոլովույթում, նորանոր սերունդներ կրթվեն նրա տված գիտության լույսով ու դառնան մեր ժողովրդի պայծառ ապագայի կերտողները:

Օրեր առաջ էլ նշվեց Մայր բուհի հիմնադրման 100-ամյակը: Թու՛յլ տվեք Իջևանի մասնաճյուղի պրոֆեսորադասախոսական կազմի, ողջ ուսանողության ու Տավուշ աշխարհի հանրության անունից կրկին ջերմորեն շնորհավորել նրա 100-ամյա հոբելյանը և մաղթել, որ հինավուրց մեր ժողովուրդը իր բիբլիական հողում համալսարանի հազարամյակը տոնի, ու հավերժական լինի նրա փառահեղ երթը…»: Ապա տնօրենը հանգամանորեն ներկայացրեց ԵՊՀ ԻՄ-ի տարեգրությունը՝ խոսելով 1991թ. սահմանամերձ մարզում մեծ ջանքերի գնով գիտակրթական օջախ հիմնելու անհրաժեշտության, հիմնադիրների (մասնավորապես՝ հիմնադիր տնօրեն Համլետ Կարայանի) անձնվեր աշխատանքի, բուհի կայացման ու շարունակական զարգացման մասին:       

Պարոն Հ.Չոբանյանը, իր ելույթում շնորհավորելով ԵՊՀ-ի 100-ամյա հոբելյանը և Իջևանի մասնաճյուղի 25-ամյակը, նշեց, որ ԵՊՀ Իջևանի մասնաճյուղը պետք է լինի Տավուշի մայր բուհը: «Եթե գրվի համալսարանի պատմության մասին, չգիտեմ, թե քանի հատորներ են պետք: Դա էլի բավարար չի լինի ներկայացնելու համար այն ուժը, նվիրումը, ստեղծագործական, գիտական նվաճումները, որ ունեցել է համալսարանը: Այս ամենի հիմքում, – նշեց Հ.Չոբանյանը, – եղել է հայ մարդը, քաղաքացին, երիտասարդը, նվիրյալը, ուսուցիչը, մանկավարժը»:

Միջոցառումը շարունակվեց ԵՊՀ Իջևանի մասնաճյուղի 25-ամյակին նվիրված  հոբելյանական համերգով, որի ընթացքում կատարողական մեծ վարպետությամբ հանդես եկան ԵՊՀ մշակույթի կենտրոնի սաները և ԵՊՀ Իջևանի մասնաճյուղի ուսանողները:

Բոլոր լուսանկարները տե՛ս Պատկերասրահում:

 2019թ. հուլիսի 10-ին ԵՊՀ Իջևանի մասնաճյուղում տեղի ունեցավ 2018-19 ուստարվա 377 (առկա ուսուցման 154 և հեռակա ուսուցման 223) շրջանավարտների դիպլոմների հանձնման հանդիսավոր արարողությունը՝ սպասված տոն, որին մասնակցում էին պատվավոր հյուրեր, հանրապետության և մարզի տարբեր ոլորտների ներկայացուցիչներ, համալսարանականներ՝ վարչական և պրոֆեսորադասախոսական անձնակազմի անդամներ, ուսանողներ, շրջանավարտներ, ծնողներ, ԶԼՄ-ների ներկայացուցիչներ, արտաքին շահակիցներ:  

Տոնական միջոցառումն ուղեկցվեց ԵՊՀ ԻՄ-ի բակում Կիրառական արվեստի ֆակուլտետի շրջանավարտների ինքնատիպ աշխատանքների ցուցահանդեսով: 

Դիպլոմների հանձնման հանդիսավոր արարողությունը մեկնարկեց ՀՀ պետական օրհներգով:

2019թ. շրջանավարտներին շնորհավորեց ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը՝ մասնավորապես նշելով.

«Գերաշնո՛րհ Սրբազան Հայր, զորամասի հրամանատարական հարգարժան կազմ՝ հրամանատարի գլխավորությամբ, Երևանի պետական համալսարանի ներկայացուցիչներ, հարգարժան հյուրեր, տնօրեններ, ուսանողներ, համալսարանականներ, ծնողներ, ողջունում եմ բոլորիդ: Մենք՝ համալսարանականներս, այս տարի առանձնակի հպարտություն ենք ապրում, որովհետև, բոլորդ գիտեք, որ այս տարի նշվում է Երևանի պետական համալսարանի հիմնադրման 100-ամյա հոբելյանը: Շուտով կլրանա նաև մասնաճյուղի՝ նրա միակ մասնաճյուղի հիմնադրման 25-ամյա հոբելյանը: Երևանի պետական համալսարանի Իջևանի մասնաճյուղը աշխատել և աշխատում է կրթության որակի բարձրացման վրա և շարունակելու է աշխատել՝ տալով անհրաժեշտ գիտելիքներ, աշխարհայացք, մտահորիզոն, ապրելու և արարելու ձև իր բոլոր շրջանավարտներին:

Սիրելի՛ շրջանավարտներ, ԵՊՀ ԻՄ-ում դուք ստացել եք բազային անհրաժեշտ գիտելիքներ, և այս կրթության հիման վրա, որտեղ որ դուք ունեք տեսական և գործնական հմտություններ, ես վստահ եմ, որ դուք հաջողելու եք, դրա համար ես ձեզ մաղթում եմ եռանդ, կամք և կորով: Եվ կուզեմ, որ կյանքում դուք ունենաք մեծագույն հաջողություններ, որովհետև այլևս դուք Երևանի պետական համալսարանի գաղափարախոսության, լույսի կրողներն եք մեր հասարակության մեջ: Ես կուզեմ, որ ձեր կրթությունը օգնի ձեզ բարեկեցիկ կյանք կառուցելու ասպարեզում, և դրանով է՛լ ավելի բարձրացնեք Երևանի պետական համալսարանի և նրա միակ մասնաճյուղի հեղինակությունը: Մենք միասին չորս-հինգ տարի աշխատել ենք, այդ ճանապարհին եղել են հաջողություններ, կորուստներ, վշտեր, անարդարություններ, բայց ես կուզեմ, որ մեր բոլոր շրջանավարտները մեկ-երկու դրվագները չհիշեն և գեներացնեն: Ես կուզեմ, որ նրանք հիշեն այն հրաշալի ապրումները, այն գիտելիքը, այն լույսը, որը ստացել են Երևանի պետական համալսարանի Իջևանի մասնաճյուղում և հեռացնեն, վանեն իրենցից այն վատը, ինչ որ կա մեր շրջապատում: Հետագան ձերն է լինելու, և դուք հետագա արարողն եք լինելու. այն, ինչ լավն եք տեսել ԵՊՀ ԻՄ-ում, եղեք նրա շարունակողը, զարգացնողը, կրողը, իսկ այն, ինչ կգտնեք, որ անարդար ու վատ է, փորձեք ձեր շրջապատում այլևս չունենալ: Ես ձեզ հաջողություն և բարի երթ եմ մաղթում, սիրելի՛ շրջանավարտներ: Շատ ուրախ եմ ձեզ շնորհավորելու և հատկապես ձեր ծնողներին, որոնք ամեն ինչ արել են, որ դուք ստանաք այս անհրաժեշտ կրթությունը: Շնորհավո՜ր, սիրելի՛ շրջանավարտներ»:

Օրհնության խոսքով ու Տերունական աղոթքով հանդես եկավ Տավուշի թեմի առաջնորդ Տեր Բագրատ եպիսկոպոս Գալստանյանը: Նա մասնավորապես նշեց. «…Մեծ սրտով և ուրախությամբ ուզում եմ շնորհավորել մեր համալսարանին, որովհետև, ինչպես մշտապես ասել եմ, սա մի ամրոց է և դարբնոց է մեր տարածաշրջանում, ինչպես Տավուշ աշխարհը հայրենիքի, մեր պետականության դարպասն է, այնպես էլ այս համալսարանը, գտնվելով խորհրդանշական այս չքնաղ վայրում՝ մեր աշխարհում, նաև մեր կրթության, մեր ազատագրության, մեր հոգևոր-մշակութային մարդակերտումի կարևորագույն դարպասն ու ամրոցն է: Ես շնորհավորում եմ բոլոր ավարտողներին, պարոն Ցուցուլյանն ասաց, որ մոտ 380 հոգի է այսօր կյանք մեկնում: Հուսամ, որ 380 ուղղություններով դուք մեծապես ներդրում կունենաք մեր ժողովրդի կյանքում (դա կլինի Տավուշում, թե թունելից այն կողմ), ներդրում ունենալով՝ կփոխեք կյանքը, ձեր հմտություններով, ձեր վաստակած գիտելիքներով, ձեր ներկայությամբ, ձեր մարդկային տեսակով և որակներով կյանքին նոր որակ և համ կփոխանցեք: Շնորհավորում եմ մեր համալսարանի տեսչությանը, պարո՛ն Ցուցուլյան, Ձեզ և Ձեր շուրջը գտնվող բոլոր գործակիցներին, շնորհավորում եմ մեր ողջ ժողովրդին, շնորհավորում եմ վերստին մեր ավարտողներին և ձեր ծնողներին, ընտանիքներին և բոլորիս: Աստված օրհնի ձեր ընթացքը: Կեցցե՛ մեր համալսարանը, կեցցե՛ Իջևանի (ինչպես միշտ ասում եմ՝ անձնականացված ԻՄ) մասնաճյուղը, մեր ժողովուրդը, Տավուշ աշխարհը, և կեցցե՛ Հայաստանի Հանրապետությունը: Շնորհավո՛ր բոլորիդ»:

Ապա հնչեց սիրելի Մայր բուհի՝ Երևանի պետական համալսարանի հիմնը, որին հաջորդեց Տավուշի հիմնը (խոսքը և երաժշտությունը՝ Տեր Բագրատ եպիսկոպոս Գալստանյանի)՝ Տավուշի թեմի երգչախմբի կատարմամբ:

ԵՊՀ ԻՄ-ի շրջանավարտներին շնորհավորեց և բարեմաղթանքներ հղեց ԵՊՀ գիտքարտուղար Լևոն Հովսեփյանը. «Սիրելի՛ շրջանավարտներ, այսօր, հիրավի, չափազանց կարևոր և հիշարժան օր է ձեր կյանքում. դուք կատարեցիք ձեր կյանքի կարևոր քայլերից մեկը՝ արդեն իսկ դառնալով, հանդիսանալով համալսարանական: Համալսարանական լինելը, համալսարանականի կոչումը կրելը ոչ միայն պատիվ է, այլև պատասխանատվություն, պատասխանատվություն ձեր շրջապատի առջև, մեր ժողովրդի և հանրության, մեր պետության առջև, ուստի ձեր հետագա աշխատանքային, մասնագիտական գործունեության մեջ դուք պետք է ձգտեք անել առավելագույնը մեր պետության զարգացման, բարօրության համար: … Մենք հուսով ենք, որ դեռևս ձեր կարևոր հաջողությունների, ձեռքբերումներ և նվաճումների ականատեսը կլինենք և առիթներ կունենանք ձեզ շնորհավորելու և մաղթանքներ հղելու: Երևանի պետական համալսարանի 100-ամյա հոբելյանական տարեդարձի շրջանակում դուք ստանում եք ձեր ավարտական վկայագրերը. սա չափազանց կարևոր, հիշարժան և խորհրդանշական է… ԵՊՀ-ի ղեկավարության` ռեկտորատի անունից շնորհավորում եմ այս կարևոր և հիշարժան օրվա կապակցությամբ՝ մաղթելով ձեզ բարի երթ, կարևոր ձեռքբերումներ, նվաճումներ և հաղթանակներ՝ ի շահ մեր ժողովրդի և մեր պետության»:

Շնորհավորական խոսքով հանդես եկան Իջևանի քաղաքապետարանի մշակույթի բաժնի վարիչ Լիլիթ Ղալումյանը, «Տավուշ» հայրենակցական միության նախագահ, մ.գ.թ., պրոֆեսոր Լավրենտի Միրզոյանը, գրող, հրապարակախոս Խաչիկ Մանուկյանը, Իջևանի զորամասի հրամանատարի` անձնակազմի հետ տարվող աշխատանքների գծով տեղակալ, փոխգնդապետ Նվեր Մանգասարյանը, հայ անվանի հուշարձանագետ, պատմաբան, բանահավաք, Հայկական ճարտարապետությունն ուսումնասիրող հիմնադրամի երևանյան գրասենյակի նախագահ Սամվել Կարապետյանը, ԵՊՀ Իջևանի մասնաճյուղի այս տարվա շրջանավարտ, «ԵՊՀ լավագույն ուսանող-2019» մրցույթի հաղթող Սյուզաննա Շահնազարյանը և ուրիշներ:

Ելույթներն ընդմիջարկվեցին մասնաճյուղի ուսանողների երաժշտական գեղեցիկ կատարումներով:

Այնուհետև ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը մասնաճյուղի` 2018-2019 ուստարվա գործունեությանը մեծապես աջակցելու, բուհում տարբեր թեմաներով հետաքրքիր և ուսանելի դասընթացներ վարելու համար շնորհակալագրեր հանձնեց ՀՀ և Տավուշի մարզի տարբեր ոլորտների մի շարք ներկայացուցիչների:

Շնորհակալագրերից հետո տեղի ունեցավ 2019թ. շրջանավարտների դիպլոմների հանդիսավոր հանձնումը:

Նախ գերազանց առաջադիմությամբ շրջանավարտներին պարոն Ցուցուլյանը հանձնեց կարմիր դիպլոմները, ապա բուհի համապատասխան ստորաբաժանումների ներկայացուցիչները, ըստ ֆակուլտետների և մասնագիտությունների, դիպլոմները հանձնեցին առկա և հեռակա ուսուցման մյուս շրջանավարտներին:

Տոնական միջոցառումը շարունակվեց Տավշո գեղատեսիլ բնության գրկում՝ Ենոքավանի «Ապագա տուր» հյուրանոցային համալիրի տարածքում կազմակերպված երաժշտական-պարային երեկույթով և հյուրասիրությամբ:

 2018թ. հոկտեմբերին «Դյուցազնագիրք» դյուցազունների ասոցացիայի կողմից «Դյուցազնագիր» է տրվել Նվեր Ղարիբյանին առ այն, որ նա յուրաքանչյուր ձեռքում բռնած 9.800 կգ կցագնդերով կախ դրությունից մինչև ուսագոտի միաժամանակ բարձրացրել է 45 անգամ 30 վայրկյանում. նույն վարժությունը մեկընդմեջ կատարել է 102 անգամ 40 վայրկյանում: Այդ ռեկորդը գրանցվել է ՀՀ «Դյուցազնագիրք» ռեկորդների ժողովածուում:

Այդ կապակցությամբ հարցազրույց ունեցանք ԵՊՀ ԻՄ-ի արտակարգ իրավիճակների, մարմնակրթության և սպորտի ամբիոնի դասախոս, աշխարհի գավաթի 2-րդ մրցանակակիր (2016), Եվրոպայի եռակի չեմպիոն (2016, 2017, 2018), աշխարհի չեմպիոն (2018), «Դյուցազնագրքի» ռեկորդակիր (2018), ՀՀ միջազգային կարգի սպորտի վարպետ Նվեր Ղարիբյանի հետ.

– Պարո՛ն Ղարիբյան, ԵՊՀ ԻՄ-ի ղեկավարության և ամբողջ անձակազմի անունից Ձեզ սրտանց շնորհավորում ենք հերթական հաղթանակի առթիվ՝ մաղթելով նոր բարձունքներ Ձեր մարզական ու մարզչական կարիերայում, հաղթանակի բերկրանքը վայելելու բազում առիթներ և շնորհակալություն ենք հայտնում հարցազրույցին մասնակցելու համար:
– Ե՞րբ, ո՞ր մարզաձևում եք դիմում ներկայացրել ռեկորդը պաշտոնապես ձևակերպելու համար, և ե՞րբ է տրվել ռեկորդը հավաստիացնող վկայականը՝ «Դյուցազնագիրը», պարո՛ն Ղարիբյան:
– 2018թ. սեպտեմբերի 16-ին «Դյուցազնագիրք» դյուցազունների ասոցացիայի նախագահ Վարդան Թովմասյանի գլխավորած հանձնաժողովի կողմից գրանցվել է համապատասխան ռեկորդը (ուժային վարժությունից) և հոկտեմբերի 10-ին տրվել է հավաստագիրը:

– Որքա՞ն ժամանակ եք նախապատրաստվել այս ռեկորդին հասնելու համար. հերթական հաղթանակը հե՞շտ տրվեց արդյոք աշխարհի գավաթի 2-րդ մրցանակակիր, Եվրոպայի եռակի և աշխարհի չեմպիոն, ՀՀ միջազգային կարգի սպորտի վարպետ Նվեր Ղարիբյանին:
– Այս ռեկորդին հասնելու համար նախապատրաստվել եմ շուրջ երկու տարի: Շատ բարդ էր, քանի որ վարժությունը արագաուժային է, պահանջեց մեծ ջանք ու եռանդ, երկարատև մարզումներ:

– Որպես հաղթական պատվանդանին բազմիցս կանգնած մարզիկ՝ համաձա՞յն եք այն մտքի հետ, թե որքան դժվար է հաղթանակի ուղին, այնքան քաղցր է հաղթանակի բերկրանքը: Ձեր ունեցած բազմաթիվ հաղթանակներից ու ձեռքբերումներից ո՞րն է Ձեզ համար ավելի քաղցր:
– Այո՛, համամիտ եմ, թանկ է այն, ինչը դժվար է ձեռք բերվում, և բարձր արդյունքների հասնելու համար երկարատև ջանքեր են պահանջվում, քրտնաջան աշխատանք, հետևողական մարզումներ: Այդ իսկ պատճառով ցանկացած հաղթանակ թանկ է ինձ համար, քանի որ այդ հաղթանակներին հասնելու համար անցել եմ երկար ու դժվարին ուղի: Ինձ համար շատ կարևոր և սկզբունքային էր ուժային եռամարտի Եվրոպայի առաջնությանը իմ երկրորդ մասնակցությունը (2017թ.). առաջին անգամ Եվրոպայի առաջնությանը մասնակցեցի 2016 թվականին և անձական քաշով զիջեցի մրցակցիս: Ես խնդիր ունեի ապացուցելու, որ ի զորու եմ հաղթելու, և հաղթեցի՝ դառնալով ուժային եռամարտի՝ Եվրոպայի 2017թ. առաջնության չեմպիոն:

– Մարզական ու մարզչական աշխատանքի հետ կապված՝ ի՞նչ ծրագրեր ունեք առաջիկայում, մարզական ի՞նչ նոր բարձունքներ կան, որոնք կցանկանայիք նվաճել:
– Ցանկացած մարզիկի համար պատիվ է իր մարզական կարիերայի ընթացքում մասնակցել Օլիմպիական խաղերին, սակայն իմ մարզաձևը (ուժային եռամարտ՝ փաուերլիֆտինգ) դեռևս օլիմպիական մրցաձև չէ: Ես մինչև օրս, կարծում եմ, նվաճել եմ բոլոր տիտղոսները (աշխարհի չեմպիոն, Եվրոպայի եռակի չեմպիոն), և չկա այնպիսի մի առաջնություն, որին մեծ ձգտումով կցանկանայի մասնակցել: Մարզչական գործունեության ընթացքում իմ մարզիկները բազմաթիվ մրցաշարերում նվաճել են հաղթողի կոչումը, ունեմ երեք ՀՀ միջազգային կարգի սպորտի վարպետ, երկու ՀՀ սպորտի վարպետ սան, իմ երեք սաները սովորում են Հայաստանի ֆիզիկական կուլտուրայի և սպորտի պետական ինստիտուտում: Մոտ ժամանակներս (2018թ. նոյեմբերի 16-18-ին) իմ մարզիկներից չորսը Հայաստանի ազգային հավաքականի կազմում կմասնակցի Թբիլիսիում կայանալիք ուժային եռամարտի Եվրոպայի առաջնությանը:

– Ձեր այս նոր ձեռքբերումը («Դյուցազնագրքի» ռեկորդակիր դառնալը), պարո՛ն Ղարիբյան, ոչ միայն նշանակալի իրադարձություն է մասնաճյուղի ու մարզաշխարհի համար, այլև ոգեշնչման աղբյուր` մեր ուսանողների ու մարզի երիտասարդների համար: Դարձյալ շնորհավորում ենք, մաղթում նոր հաղթանակներ և հարցազրույցին մասնակցելու համար շնորհակալություն հայտնում Ձեզ:

Հարցազրույցը վարեց ԵՊՀ ԻՄ-ի հասարակայնության հետ
կապերի և մամուլի պատասխանատու Հասմիկ Վանյանը: