2017-2018 ուստարվա սկզբին ԵՊՀ ԻՄ-ի ուսանողական խորհրդն ըստ ֆակուլտետների հանդիպումներ ունեցավ առաջին կուրսեցիների հետ:

Հանդիպումների նպատակն էր նորաթուխ համալսարանականներին ներկայացնել բուհի ուսանողական առօրյան, կառույցները, Ուսանողական խորհրդի նպատակները, խնդիրները, գործառույթները:

ՈՒԽ-ի նախագահության անդամները և ակտիվիստ ուսանողները հանդիպումների ընթացքում առաջին կուրսեցիներին հանգամանորեն ներկայացրին կառույցի առջև դրված նպատակները, որոնք են՝

• Պաշտպանել ուսանողների շահերն ու իրավունքները,
• Իրազեկել  ուսանողներին իրենց իրավունքների ու պարտականությունների մասին,
• Բարձրաձայնել ուսանողների խնդիրները, մշակել դրանց լուծման ուղիներ,
• Ապահովել ուսանողների մասնակցությունը համալսարանի կառավարմանը,
• Մասնակցել ուսումնական գործընթացի կազմակերպմանը և ուսուցման արդյունավետության բարձրացմանն ուղղված ծրագրերի մշակմանն ու իրականացմանը,
• միավորել համալսարանի ուսանողական կազմակերպությունների, ակումբների և միությունների ջանքերը՝ ստեղծելով ուսանողական ջերմ միջավայր,
• Աջակցել ուսանողների սոցիալական վիճակի բարելավմանը,
• Կազմակերպել ուսանողների ազատ ժամանցն ու հանգիստը,
• Նպաստել ուսանողների գիտական, կրթական, հոգևոր, ստեղծագործական և ֆիզիկական զարգացմանը,
• Մասնակցել համալսարանի տարածքում ներքին կարգապահության պահպանմանը:

Մատնանշվեցին այն հնարավորությունները, որ տալիս է կառույցն ուսանողին.

• Նոր ընկերներ,
• Ինքնադրսևորվելու հնարավորություն,
• Թիմային աշխատանքներում ընդգրկվելու հմտություն,
• Բազմակողմանի զարգացում,
• Ինքնավստահություն,
• Ապագայի հեռանկարներ,
• իրազեկված լինելու հնարավորություն,
• Պաշտոնական և ընկերական բարեկիրթ հարաբերություններ կառուցելու հմտություններ,
• Առաջնորդ դառնալու փորձ:

Հանդիպումների վերջում ուսանողներն ինքնուրույն ձևավորեցին և ներկայացրին իրենց երազած ուսանողի կերպարը, որն օժտված էր հետևյալ հատկանիշներով.

• Օրինակելի (առաջադիմությամբ, կարգապահությամբ…),
• Իրենց խնդիրներով հետաքրքրված,
• Զարգացած,
• Ուսանողական նախաձեռնություններում ակտիվ,
• Նպատակասլաց,
• Նորարար,
• Միմյանց աջակցող, ինչպես մեկ ընտանիքի անդամները:

Հանդիպումներն անցան հաճելի և անմիջական  մթնոլորտում, վստահություն ներշնչեցին, որ տարին կլինի ուսանողական:

2017թ. սեպտեմբերի 12-ին ԵՊՀ Իջևանի մասնաճյուղում կայացավ  Տնտեսագիտության ֆակուլտետի ուսանողների հետ տնօրեն Ս.Առաքելյանի  հանդիպումը, որին մասնակցում էին ֆակուլտետի դեկան Ն.Խուդավերդյանը, «Տնտեսագիտության տեսություն», «Սերվիս» մասնագիտությունների կրթական ծրագրերի պատասխանատուները:

Հանդիպման ընթացքում քննարկվեցին ուսումնական գործընթացի առավել արդյունավետ կազմակերպմանը վերաբերող խնդիրներ, ուսանողներին առաջադրվեցին հարցեր՝ ակնկալելով նրանց կողմից ուշագրավ ու հետաքրքիր առաջարկներ:

Առաջադրված հարցերը ընդհանուր առմամբ հնարավորություն տվեցին պարզելու, թե որքանով են ուսանողները գոհ՝

• ԵՊՀ ԻՄ-ի ուսումնակազմակերպչական աշխատանքներից՝ վարչական ծառայություններից, ուսումնական  խորհրդատուի  աշխատանքներից,        լրացուցիչ խորհրդատվական պարապմունքներից, պրակտիկայի կազմակերպումից, Ուսանողական խորհրդի, Օրինականության պահպանման և ուսանողների իրավունքների պաշտպանման հանձնաժողովի, Շրջանավարտների և կարիերայի կենտրոնի աշխատանքներից:
• Բուհի տարբեր ստորաբաժանումների գործունեությունից՝ Տնօրենության, Անձնակազմի կառավարման բաժնի, Ուսումնամեթոդական վարչության, Վարչատնտեսական վարչության, Մասնագիտական կրթության որակի ապահովման բաժնի, Հաշվապահության, Գրադարանի, Էլեկտրոնային կայքի:
• Մասնաճյուղի տրամադրած ռեսուրսներից՝ լսարանների կահավորումից և տեխնիկական միջոցներից, մասնագիտական գրականության առկայությունից, ընթերցասրահի հարմարավետությունից, գիտամշակութային կյանքից, ջեռուցումից, բուժկետի ծառայություններից, անվտանգության ապահովման համակարգից, սանիտարահիգիենիկ վիճակից, սննդի և հանգստի պայմաններից և այլն:   
• Ուսանողների գնահատման համակարգից՝ կրթական վերջնարդյունքների գնահատման ձևերից, ուսանողների գնահատման բազմագործոն համակարգի արդյունավետությունից (որքանո°վ է այն բարձրացնում գնահատման օբյեկտիվությունը, ապահովում գնահատման թափանցիկությունը, բացառում գրագողությունը), որքանո°վ է ռոտացիոն համակարգի կիրառումը նպաստում ազնիվ մրցակցությանը և այլն:

Առաջիկայում մյուս ֆակուլտետների ուսանողների հետ ևս կկազմակերպվեն նման հադիպումներ:

 2017թ. սեպտեմբերի 8-ին ԵՊՀ ԻՄ-ի ուսանողների, հատկապես  առաջին կուրսեցիների հետ հանդիպումներ ունեցան բուհի ղեկավարության ներկայացուցիչները՝ տնօրեն Ս.Առաքելյանը, Ուսումնամեթոդական և Վարչատնտեսական վարչությունների պետեր Ա.Դավթյանը և Կ.Այվազյանը, Անձնակազմի կառավարման բաժնի վարիչ, իրավախորհրդատու Ա.Հովհաննիսյանը, ֆակուլտետների դեկանները:

Հանդիպումները նպատակ ունեին ուսանողների հետ անմիջական շփման միջոցով վերհանելու ուսումնական գործընթացին վերաբերող՝ նրանց հուզող խնդիրները, քննարկելու դասավանդման և ուսումնառության արդյունավետ կազմակերպմանն ու իրականացմանն ուղղված հարցեր:

Քննարկված հարցերը մասնավորապես վերաբերում էին նոր ուսումնական տարվա հետ կապված նախապատրաստական աշխատանքներին, դասացուցակներին, դասախոսների կողմից տրամադրված հարցաշարերին, ներկայացված առարկայական փաթեթներին, բուհի ուսումնական պայմաններին և նյութատեխնիկական ռեսուրսներին (լսարանների կահավորում և տեխնիկական միջոցներով հագեցվածություն, մասնագիտական գրականության առկայություն, ընթերցասրահի հարմարավետություն, սանիտարահիգիենիկ վիճակ, սննդի ու հանգստի պայմաններ և այլն):

Այս համատեքստում առանձնապես կարևորվեց ուսումնական խորհրդատուների (կուրատոր/կուրսղեկ) և մասնագիտությունների կրթական ծրագրերի պատասխանատուների արդյունավետ գործունեության դերը: 

 2017թ. սեպտեմբերի 7-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը մասնագիտությունների կրթական ծրագրերի պատասխանատուների հետ:

Հանդիպման ընթացքում քննարկվեցին  մասնագիտությունների կրթական ծրագրերի պատասխանատուների աշխատանքներին, ծրագրերում կատարվելիք փոփոխություններին, ՈԱՇ-ի պահանջներին համապատասխան կրթական վերջնարդյունքներին վերաբերող հարցեր:

Եվս մեկ անգամ ընդգծվեց ՄԿԾ-ների պատասխանատուների գործառութային պարտականությունների արդյունավետ իրականացման դերը ուսումնական գործընթացի շարունակական բարելավման մեջ:

Նշվեց, որ տնօրենի խորհրդական Ա.Մակարյանի հետ առաջիկա հանդիպման ընթացքում առավել մանրամասն կքննարկվեն և կներկայացվեն կրթական ծրագրերի պատասխանատուներին կոնկրետ ժամանակամիջոցում հանձնարարված և ավարտին հասցված աշխատանքները: 

 2017թ. սեպտեմբերի 1-ին` Գիտելիքի և դպրության օրը, ԵՊՀ Իջևանի մասնաճյուղում տոնական միջոցառմամբ մեկնարկեց նոր` 2017-2018 ուսումնական տարին:

Մասնաճյուղը նոր ուստարում դիմավորեց 168 առաջին կուրսեցիների, որոնց համար Ուսանողական խորհրդի կողմից կազմակերպվել էր տոնական միջոցառում:

Ներկա էին ԵՊՀ ԻՄ-ի տնօրեն Սամվել Առաքելյանը, վարչական և պրոֆեսորադասախոսական անձնակազմի անդամները, մարզի տարբեր ոլորտների ներկայացուցիչներ, ուսանողներ, ծնողներ, հյուրեր:

Միջոցառումը բացվեց Տավուշի թեմի առաջնորդ Տ. Բագրատ եպիսկոպոս Գալստանյանի օրհնության խոսքով ու աղոթքով: Նոր ուսումնական տարվա մեկնարկի առթիվ  ողջունելով համալսարանականներին՝  նա մասնավորապես նշեց. «Մեր համալսարանը եզակի հաստատություն է ամբողջ Հայաստանում, որ, մարզային տեղակայում ունենալով, այսքան խանդավառ և ոգով լցված  պրոֆեսորադասախոսական կազմ և ուսանողություն ունի: Ձեզ խավարը լույսի, ծուլությունը կյանքի, խնդիրները հնարավորության վերածելու անդադրում համբերություն եմ մաղթում և ծովացող սեր բոլոր-բոլոր պարագաներում: …Շնորհավորում եմ բոլորիս, օրհնություն և բարի ընթացք…»:

Ապա Գիտելիքի և դպրության օրվա կապակցությամբ ուսանողներին և դասախոսներին շնորհավորեց ԵՊՀ ԻՄ-ի տնօրեն Սամվել Առաքելյանը.

«Սիրելի՛ համալսարանականներ, ես կոչ կանեի, որ մենք բոլորս՝ մեր սրբազանի գլխավորությամբ, մեր ողջույնները հղեինք հանրապետության բոլոր բնակավայրերի այն 40 հազար մանուկներին, որոնք այս տարի բռնելու են դպրոցի ճանապարհը, ցանկանանք, որպեսզի նրանք ունենան ավելի փայլուն ապագա, ավելի հզոր հայրենիք, ավելի բարեկեցիկ կյանք: Դրա համար ընդամենը մի բան է բոլորիս անհրաժեշտ. ես կոչ եմ անում՝ սիրենք մեր հայրենիքը, սիրենք մեր պետությունը, սիրենք մեր օջախը, և մենք կհասնենք մեր երազանքների իրականացմանը:

…Սիրելի՛ ուսանողներ, հիշեք միշտ. Մայր բուհի ուսանող լինելը տիտղոս չէ, Մայր բուհի ուսանող լինելը պատասխանատվություն և պարտականություն է: Ինչպես չկա մեդալ, որը ունենա մեկ երես, այնպես էլ ուսանողի դեպքում է. ուսանողի  համար մեդալի մի երեսին նրա պարտականություններն են, մյուսին՝ նրա իրավունքները: …Մեր բուհի ամենամեծ հաջողությունը կարող է լինել այն, որ մենք համարվենք մի ընտանիք, ընտանիք, որը կարող է ունենալ և՛ ձեռքբերումներ, որոնցով պիտի հպարտանանք բոլորս, և՛ բացթողումներ, որոնք համատեղ հաղթահարելու կամք պիտի ունենանք: Տե՛ր եղեք պետությանը, տե՛ր եղեք մեր համալսարանին, տե՛ր եղեք ձեր օջախներին. միայն տիրոջ գաղափարով կարող ենք մեր խնդիրները լուծել… Բարի գալուստ ձեզ, հատկապես մեր առաջին կուրսեցիներին, շնորհակալ ենք և շնորհավորում ենք ձեզ…»:

Համալսարանականների նոր ուսումնական տարին շնորհավորեց և բարեմաղթանքի խոսքեր հղեց Իջևանի զորամասի հրամանատարի` անձնակազմի հետ տարվող աշխատանքների գծով տեղակալ, փոխգնդապետ Նվեր Մանգասարյանը՝ զորամասի հրամանատարության անունից հայտնելով պատրաստակամություն բուհ-բանակ կապն առավել սերտացնելու գործում:   

Առաջին կուրսեցիներին բարի երթ մաղթեց ԵՊՀ ԻՄ-ի ուսանողական խորհրդի նախագահ Իսկուհի Շաղբաթյանը՝ մասնավորապես նշելով.  «Սիրելի´ համալսարանականներ, եկեք նոր ուսումնական տարվա առաջին իսկ օրվանից սկսենք կերտել մեր համատեղ հաջողությունը` դառնալով գիտակ, պահանջված և հաջողակ, քանզի մեր ուսերին է դրված մեր երկրի ապագան կերտելու պատվավոր գործը։ …Հատկապես առաջին կուրսեցիներին կոչ եմ անում լինել սովորելու մեջ նպատակասլաց, վերաբերմունքով` կիրթ և հարգալից։ Ապագայի հանդեպ լցված մեծ հույսով` ասում ենք ձեզ՝ բարի գալուստ ԵՊՀ ԻՄ։ Թո՛ղ նոր ուսումնական տարին լինի ամենահագեցածն ու գունեղը բոլոր իմաստներով»։

Գիտելիքի բանալին «Անգլերեն լեզու և գրականություն» մասնագիտության չորրորդ կուրսի ուսանողուհի Զառա Վարտանյանը հանձնեց մասնաճյուղի այս տարվա լավագույն դիմորդ, «ֆրանսերեն լեզու և գրականություն» մասնագիտության առաջին կուրսի ուսանողուհի Անի Մարտիրոսյանին, որին հաջորդեց առաջին կուրսեցիների երդման հանդիսավոր արարողությունը:

Նրանք երդվեցին արժանի լինել «Երևանի պետական համալսարան» հիմնադրամի Իջևանի մասնաճյուղի ուսանող լինելու բարձր կոչմանը, լինել օրինավոր քաղաքացիներ, նպաստել երկրի պետականության զարգացմանը:

Տոնական միջոցառումը շարունակվեց ԵՊՀ ԻՄ-ի շնորհալի ուսանողների գեղեցիկ կատարումներով՝ երգ ու պարով, ասմունքով: