2016թ. դեկտեմբերի 13-ին ԵՊՀ ԻՄ-ի մասնագիտական կողմնորոշման և պրակտիկայի կազմակերպման (ՄԿՊԿ) բաժինը հանդիպումներ է կազմակերպել Ճամբարակի տարածաշրջանի մի շարք դպրոցներում (Ճամբարակի ավագ, Թթուջրի, Մարտունու, Գետիկի, Այգուտի, Դպրաբակի միջնակարգ դպրոցներ): 

Հանդիպումներին մասնակցում էին ԵՊՀ ԻՄ-ի ուսումնամեթոդական վարչության պետ Ա.Դավթյանը, ՄԿՊԿ բաժնի վարիչ Վ.Աղաբաբյանը, դպրոցների տնօրեններ, ուսուցիչներ:

Հանդիպումների նպատակն էր աշակերտներին տալ մասնագիտական կողմնորոշում, ԵՊՀ ԻՄ-ում գործող մասնագիտությունների վերաբերյալ տեղեկատվություն, ամրապնդել դպրոց-համալսարան կապը:

Ողջունելով դպրոցականներին` ՄԿՊԿ բաժնի վարիչը ընդհանուր գծերով ներկայացրեց ԵՊՀ Իջևանի մասնաճյուղի ֆակուլտետները, ամբիոնները, մասնագիտությունները, անդրադարձավ ԵՊՀ ԻՄ-ի՝ 2017թ. բակալավրի կրթական ծրագրով մասնագիտություններին, աշխատաշուկայում դրանց ունեցած պահանջարկին, կատարված փոփոխություններին:

Քննարկվեցին ընդունելության քննությունների, շտեմարանների, օլիմպիադաների անցկացման և բաց դռների օրերի հետ կապված մի շարք հարցեր:

Հանդիպումներն ընթացան հարց ու պատասխանով: Աշակերտներին հետաքրքրող հարցերը վերաբերում էին կրթական գործընթացին, ուսման վարձաչափերին, հատկապես սահմանամերձ բնակավայրերի ուսանողների համար նախատեսված զեղչերին ու արտոնություններին, ընդունելության քննությունների` մեկ և երկու աստղանիշով առարկաների ընտրությանը:

Մասնակիցները գոհունակություն արտահայտեցին ԵՊՀ ԻՄ-ի նման նախաձեռնության համար` ակնկալելով, որ համագործակցությունը կլինի շարունակական:

 2016թ. դեկտեմբերի 11-ին ԵՊՀ ԻՄ-ի «Անգլերեն լեզու և գրականություն», «Ֆրանսերեն լեզու և գրականություն» մասնագիտությունների 3-րդ կուրսերի ուսանողները հանդես եկան համերգային ծրագրով (օտար լեզուներով), որը նախաձեռնել էր մ.գ.թ., դոցենտ Վ.Բրուտյանը:

Ներկա էին մասնաճյուղի տնօրեն Ս. Ա. Առաքելյանը, վարչական և պրոֆեսորադասախոսական անձնակազմի ներկայացուցիչներ, Հումանիտար գիտությունների ֆակուլտետի ուսանողներ:

Ծրագիրը կրում էր «Հայկ, Զառա և ընկերներ» խորագիրը և նպատակ ուներ ոչ միայն վերհանելու, հանդիսատեսին ներկայացնելու մասնաճյուղի շնորհալի սաներին, այլև հաճելին համատեղելով օգտակարի հետ՝ ամրապնդելու մեր ուսանողների մասնագիտական կարողությունները:

Համերգային ծրագրում մեծ մասամբ ընդգրկված էին համաշխարհային հիթեր (“Let it be”, “Cup song”, “Ne me quitte pas”, “I will survive”, “Goodbye my lover”, “Shape of my heart”, “Let it snow”, “Champes – Elysées”, “We are the world”):

Միջոցառման մասնակիցները օտար լեզուներով ներկայացրին անհատական և խմբակային երգեր, նվագեցին քանոն:

Իրենց զգացմունքային, անկեղծ կատարումներով աչքի ընկան հատկապես  «ԱԼԳ» մասնագիտության 3-րդ կուրսի ուսանողներ Հայկ Դանիելյանը և Զարուհի Վարտանյանը:

Վերջում ելույթ ունեցան Վ.Բրուտյանը, Օտար լեզուների ամբիոնի դասախոսները, ուսանողներ՝ մասնակիցներին հայտնելով իրենց երախտագիտությունն ու հիացմունքը, գեղեցիկ միջոցառման վերաբերյալ տպավորությունները:

2016թ. դեկտեմբերի 9-ին ԵՊՀ Իջևանի մասնաճյուղում կայացավ Դասավանդման առաջավոր փորձի փոխանցման և երիտասարդ դասախոսների աջակցման կենտրոնի կողմից կազմակերպված դաս-քննարկումը, որը վարեց Հայոց պատմության և հասարակագիտության  ամբիոնի ասիստենտ Գ. Գ. Անանյանը:

Փորձառու դասախոսը երիտասարդներին փոխանցեց դասախոսությունների և սեմինարների կազմակերպման ու անցկացման իր փորձն ու մեթոդները:

Նա ներկայացրեց  երեք բաղադրիչների (դասախոսություն, սեմինար և զեկուցում) հիման վրա դասը կազմակերպելու առավելությունները, հիմնավորեց դրանցից յուրաքանչյուրի կարևորությունը արդյունավետ դասավանդման և ուսումնառության գործընթացում: Ըստ Գ. Անանյանի, կիրառվող մեթոդը ուսանողին դարձնում է ավելի ինքնավստահ, բանիմաց և համարձակ: 

Գ.Անանյանը շեշտեց, որ ուսուցման գործընթացի արդյունավետ իրականացումը դասավանդողից մշտապես պա­հանջում է գիտելիքների և մասնագիտական կարողությունների  կատարելա­գոր­ծում:

Դրանք առաջին հերթին պետք է ուղղորդվեն դեպի պրակտիկ գործունեություն, ընդգրկեն գործնական այնպիսի պարապ­մունքներ, քննար­կումներ ու սեմինարներ, որոնք կնպաստեն ուսանողների գործ­նական հմտությունների ու կարողությունների զարգացմանը:

Վերջում ծավալվեց քննարկում, մասնակիցները ստացան իրենց հետաքրքրող հարցերի պատասխանները:

2016թ. դեկտեմբերի 9-ին ԵՊՀ ԻՄ-ի հումանիտար գիտությունների ֆակուլտետում տեղի ունեցավ ականավոր լեզվաբան Հրաչյա Աճառյանի ծննդյան 140-ամյակին նվիրված միջոցառում, որը կազմակերպել էր Հայոց լեզվի և գրականության ամբիոնը:

Միջոցառմանը ներկա էին ֆակուլտետի դեկան, պ.գ.դ., պրոֆեսոր Ա. Ա. Ներսիսյանը, վարչական և պրոֆեսորադասախոսական անձնակազմի ներկայացուցիչներ, ուսանողներ:

Բացման խոսքով հանդես եկավ «Հայոց լեզու և գրականություն» մասնագիտության կրթական ծրագրի պատասխանատու, բ.գ.թ., դոցենտ Աիդա Սարհատյանը` ընդհանրակի ներկայացնելով միջոցառման նպատակը, խնդիրները,   արժևորելով անվանի լեզվաբանին, նրա պատկառելի գիտական վաստակը.

«Մեր միջոցառումը երախտագիտության տուրք է մեծագույն լեզվաբանին՝ իր տիեզերածավալ երախտիքի համար:

75 տարի – 250 աշխատություն, 32 000 էջ, մի քանի տասնյակ ձեռագիր աշխատություն, 18 լեզուների տիրապետում. «Լիակատար քերականություն հայոց լեզվի՝ համեմատությամբ 562 լեզուների», 15 000 էջ, «Հայերէն արմատական բառարան». 40 տարվա տքնաջան աշխատանք, 4 հատոր, 27 000 էջ, 11 000 ստուգաբանված արմատ, որոնցից 1600-ը՝ իր ստուգաբանությամբ, 35 բարբառների բառագանձի մշակում…

Հրաչյա Աճառյանը նաև բանաստեղծ էր, արձակագիր, գրականագետ, թարգմանիչ, բժիշկ,  դերասան, երաժշտության մեծ սիրահար, սիրված դասախոս, սիրող որդի, ամուսին և հայր…»:

Միջոցառման ընթացքում Հրաչյա Աճառյանը բացահայտվեց ոչ միայն որպես գիտնական, այլև մարդ՝ իր բնավորության ազնիվ գծերով (մայրապաշտություն, աշխատասիրություն, հաստատակամություն, ճշտապահություն և այլն):

Հայոց լեզվի և գրականության ամբիոնի ասիստենտ, բ.գ.թ. Լ.Թումանյանը հանդես եկավ «Աճառյանը բարբառագետ և փորձառական հնչյունաբանության հիմնադիր» զեկուցումով:

Միջոցառմանը մասնակցող «ՀԼԳ» մասնագիտության տարբեր կուրսերի ուսանողները ներկայացրին լեզվաբանի կյանքի ուշագրավ դրվագները, կրթությունը, դեգերումներն ու սերը, խորին խորհուրդներն ու հումորը, կատարեցին նրա սիրած երգերը (գլխավորապես Կոմիտասի ստեղծագործություններից):

 «Հրաչյա Աճառյանի «Հայոց գրերը» աշխատությունը» թեմայով զեկուցում կարդաց  Հայոց լեզվի և գրականության ամբիոնի ասիստենտ, բ.գ.թ. Կ.Պողոսյանը:

 Բարձր մակարդակով կազմակերպված միջոցառման վերաբերյալ իրենց շնորհակալությունն ու տպավորություններն արտահայտեցին Հումանիտար գիտությունների ֆակուլտետի դեկան Ա.Ներսիսյանը, ամբիոնի վարիչ Վ.Ավագյանը և ուրիշներ:

2016թ. դեկտեմբերի 9-ին ԵՊՀ ԻՄ-ի ուսանողական խորհրդի նախաձեռնությամբ տեղի ունեցավ մասնաճյուղի ուսանողական կառույցների համատեղ հանդիպումը տնօրեն Ս. Ա. Առաքելյանի հետ:

Հանդիպման ընթացքում քննարկվեցին ուսանողական կառույցների՝ ՈՒԽ-ի և ՈՒԳԸ-ի արդյունավետ գործունեության, ուսանողների պրակտիկաների անցկացման, ուսանողական տոմսերի հատկացման վերաբերյալ տարաբնույթ հարցեր:

Ուսանողները տնօրենին ներկայացրին իրենց հուզող խնդիրները, կատարեցին ուսումնական գործընթացին վերաբերող առաջարկություններ:

Պարոն Առաքելյանը ուսանողական կառույցներին կոչ արեց լինել առավել ակտիվ, նախաձեռնող, նպատակասլաց, ուսանողների նկատմամբ ուշադիր և հոգատար: