2016թ. նոյեմբերի 22-ին ԵՊՀ Իջևանի մասնաճյուղում կայացավ Հոգեբանի օրվան նվիրված միջոցառում, որը կազմակերպվել էր Մանկավարժության և հոգեբանության ամբիոնի կողմից:

Միջոցառումը մեկնարկեց ԵՊՀ ԻՄ-ի բակում, որտեղ մասնակիցները ուսանողներին բաժանեցին թխվածքաբլիթներ և փուչիկներ հոգեբանության սիմվոլով՝ Ψ տառով («փսի» տառը, ենթադրվում է, որ խորհրդանշում է հունական դիցաբանության մեջ ծովի աստված Պոսեյդոնի եռաժանին, որը ցույց է տալիս աշխարհի տարանջատումը երեք՝ երկրային, երկնային ու հոգևոր ոլորտների և կրում բնության տարերքներից երեքի՝ օդի, ջրի և հողի միասնության խորհուրդը), ապա այն շարունակվեց լսարանում:

Ներկա էին մասնաճյուղի տնօրեն, պ.գ.թ., դոցենտ Ս.Առաքելյանը, Հումանիտար գիտությունների ֆակուլտետի դեկան պ.գ.դ, պրոֆեսոր Ա.Ներսիսյանը, Մանկավարժության և հոգեբանության ամբիոնի վարիչ, մ.գ.թ., ասիստենտ Լ.Հարությունյանը,  Ընդհանուր մաթեմատիկայի և բնագիտության ամբիոնի վարիչ, ֆ.մ.գ.թ., դոցենտ Ա.Ցուցուլյանը, դասախոսներ, ուսանողներ:

Ողջույնի խոսք ասաց տնօրենը՝ Հոգեբանի օրվա առթիվ շնորհավորելով մասնագետներին, ուսանողներին, բոլոր ներկաներին,  ընդգծելով հոգեբանի մասնագիտության պատասխանատվությունն ու կարևորությունը մարդու կյանքում, խրախուսելով նման միջոցառումների կազմակերպումը մասնաճյուղում:

Ապա միջոցառման մասնակիցները`  «Մանկավարժություն և հոգեբանություն» մասնագիտության տարբեր կուրսերի ուսանողները, ներկայացրին հոգեբանության պատմության հոգեբանական ծառը, բացատրեցին նրա խորհուրդը. ծառի արմատները խորհրդանշում են անտիկ հոգեբանությունը, որից ձևավորվել է հոգեբանական միտքը, բունը խորհրդանշում է հոգեբանական մտքի զարգացման միջնադարյան և վերածննդյան շրջանները, իսկ ծառի ճյուղերը ցույց են տալիս հոգեբանության զարգացման արդի շրջանը և հոգեբանության ուղղությունները:

Հոգեբանական ծառի արմատները ներկայացրին երկրորդ կուրսի ուսանողուհիներ Լիլիթ Հայրապետյանը և Արմենուհի Զաքարյանը: Նրանք անդրադարձան հոգու մասին անտիկ շրջանում առաջացած 2 ուսմունքներին՝ անիմիզմին և հիլոզոիզմին, հոգու վերաբերյալ Արիստոտելի, Պլատոնի, Հիպոկրատի, Դեմոկրիտի և Սոկրատեսի   գաղափարներին:

Հոգեբանական ծառի բունը ներկայացրին 3-րդ կուրսի ուսանողուհիներ Արուսյակ Գասպարյանը, Մինավարդ Մելիքբեկյանը, Շարմաղ Սարիբեկյանը: Նրանք անդրադարձան միջնադարում առաջ եկած դեիզմի, սենսուալիստական և նոմինալիստական ուսմունքներին, արաբալեզու մտածողների՝ Իբն-Սինայի, Իբն-Ռուշդի գաղափարներին, հոգու մասին հայկական (Հովնան Որոտնեցու, Գրիգոր Նարեկացու) պատկերացումներին:

Հոգեբանական ծառի ճյուղերը ներկայացրին 4-րդ կուրսի ուսանողուհիներ Մարիամ Ղազարյանը և Անի Արզումանյանը` շեշտը դնելով հոգեբանության ժամանակակից ուղղությունների (հոգեվերլուծություն, հումանիստական հոգեբանություն, բիհևիորզմ, գեշտալտ հոգեբանություն, կոգնիտիվ հոգեբանություն) վրա: Նրանք ներկայացրին  Զիգմունդ Ֆրոյդի ասույթները, հումանիստական գաղափարախոսությունը, գեշտալտ թերապիայի աղոթքը և տարբեր ուղղությունների դրույթները:

Շնորհավորական ուղերձով և իր հեղինակային («Հոգին») բանաստեղծությամբ  հանդես եկավ «Տարրական մանկավարժություն և մեթոդիկա» մասնագիտության 1-ին կուրսի ուսանողուհի Աննա Դավթյանը:

«ՄՀ» 3-րդ կուրսի ուսանողուհի Նարինե Ափինյանը ներկայացրեց հոգեբանության մեջ չկայացված և չհաջողված գիտափորձերը:

Նույն մասնագիտության 3-րդ կուրսի ուսանող Ալբերտ Զուրաբյանը հումորային շնորհանդեսի և մասնագիտությանն առնչվող փոքրիկ տեսաֆիլմի ուղեկցությամբ ներկայացրեց հոգեբանի մասնագիտությունը, նրա դերը մարդու կյանքում:

Միջոցառման վերջում ելույթ ունեցավ Հումանիտար գիտությունների ֆակուլտետի դեկան Ա. Ներսիսյանը՝ մասնակիցներին առաջադրելով մարդու հոգուն և հոգեբանությանը վերաբերող հարցեր, արտահայտելով իր սեփական,  ուշագրավ ու վիճահարույց տեսակետները, միջոցառման վերաբերյալ իր տպավորությունները:

Պարոն Ներսիսյանի ելույթին հաջորդեց բավականին աշխույժ ու հետաքրքիր բանավեճ-քննարկում` ընդգրկելով բոլոր ներկաներին:

Իր արտահայտած հետաքրքիր տեսակետներով առանձնացավ Ընդհանուր մաթեմատիկայի և բնագիտության ամբիոնի վարիչ Ա.Ցուցուլյանի պատասխան ելույթը:

2016թ. նոյեմբերի 22-ին ԵՊՀ-ի մեծ դահլիճում տեղի ունեցավ Արցախյան ազատամարտի հերոս Լեոնիդ Ազգալդյանի ծննդյան 74-րդ և նրա անունը կրող ԵՊՀ մարտական պատրաստության ակումբի հիմնադրման 1-ին տարեդարձին նվիրված, հայրենասիրական երգ ու պարով ողողված համերգ-միջոցառում։

Միջոցառմանը հրավիրված էին ապրիլյան պատերազմի մասնակիցներ, մարտական խաչ 2-րդ աստիճանի շքանշանակակիրներ, ԵՊՀ պրոֆեսորադասախոսական անձնակազմի ներկայացուցիչներ, ուսանողներ:

Միջոցառմանը մասնակցեցին և ԵՊՀ ԻՄ-ի ուսանողներից, ովքեր հուլիսի 12-19 ԼՂՀ-ում մասնակցել էին «Ուսանողական ռազմական բանակում 2016»-ին։

Միջոցառման ընթացքում նախ ցուցադրվեց Լեոնիդ Ազգալդյանին նվիրված ֆիլմ, որը ներկայացնում էր նրա անցած հերոսական ուղին:

«Զինվորին չի կարելի հենց այնպես զոհաբերել, ինչ է թե հողակտոր ես ազատագրում: Բոլոր նախագծերը, հարձակումները, պաշտպանությունները կառուցեք այնպես, որ հնարավորինս զոհ չլինի». – ֆիզիկոս, ռազմական գործիչ, Արցախյան ազատամարտի հերոս Լեոնիդ Ռուբենի Ազգալդյանի գաղափարական համոզմունքն էր սա՝ ամրագրված իր կյանքի փորձով:

Ղարաբաղյան շարժման սկզբնավորման օրից Լ.Ազգալդյանը՝ որպես ռազմական առաջատար գործիչ, մասնակցել է ազգային–ազատագրական պայքարին, գործուն դեր ունեցել ազգի սրբազան իղձերն ու արժանապատվությունը ամեն տեսակի ոտնձգություններից զենքը ձեռքին պաշտպանելու տոգորումներում։ 1990թ. փետրվարից վարել է «Անկախության բանակի» հրամանատարությունը, կազմակերպել մի շարք շրջանների և հատկապես Վարդենիսի ինքնապաշտպանությունը, մասնակցել ազատագրական մարտերի, այդ թվում՝ Նյուվադիի առաջին գրոհին, իսկ մայիսի 27-ի կայարանի և Սովետաշենի արյունալի սադրանքից հետո ծրագրավորել և իրականացրել խորհրդային պատժիչ զորքերի Երևան ներթափանցման խոչընդոտումը։

Լ. Ռ. Ազգալդյանը հետագայում իր ճակատագիրն ամբողջությամբ և վերջնականապես կապել է Արցախի ազատամարտի հետ՝ սկզբում գործելով Գետաշենի և Շահումյանի, այնուհետև Մարտակերտի շրջաններում։ Արցախի ազատամարտին նոր թափ հաղորդելու նպատակով էլ 1991թ. հունիսին նա ստեղծել է «Ազատագրական բանակ» ռազմական կազմակերպությունը, որը հատկապես Հայաստան–Արցախ–Սփյուոք ճիգերի համադրման իմաստով կարևոր նշանակություն ուներ հայ ժողովրդի գոյամարտին ծառայագրված շարժումների շղթայում, և որի գլխավոր հրամանատարը մնաց մինչև իր կյանքի վերջը։

Զինվորների համար Լեոնիդը հեղինակություն էր և յուրօրինակ հրամանատար, ով միշտ կանգնած էր իր ջոկատի կողքին ու ոգևորում էր տղաներին: Նրա համար ամենամեծ հարստությունը կամավոր զինվորն է, որից ավելի մեծ արժեք երկիրը չունի:

Լեոնիդի հրամանատարությամբ Արցախում 27 բնակավայր է ազատագրվել: Այդ ընթացքում վեց մարդ է միայն զոհվել, յոթերորդն ինքն էր: Մահվանից 12 օր առաջ զոհվել էր տեղակալը՝ Վլադիմիր Բալայանը: Այդ օրը ջոկատի տղաները հրամանատարի աչքերում առաջին անգամ արցունքներ տեսան:

Ինքն էլ զոհվեց 1992 թվականի հունիսի 21-ին Մարտակերտի շրջանի Տոնաշեն գյուղի մոտ՝ թշնամու դավադիր կրակոցներից:

Լեոնիդ Ազգալդյանը հետմահու պարգևատրվել է ՀՀ «Մարտական խաչ» առաջին աստիճանի շքանշանով:

Միջոցառման հաջորդ հատվածում անդրադարձ կատարվեց ակումբի մեկամյա գործունեությանը: Ներկայացվեց, որ Լեոնիդ Ազգալդյանի անվան ԵՊՀ մարտական պատրաստության ակումբը ՀՀ և ԼՂՀ պաշտպանության նախարարությունների հետ համատեղ իր գործունեության մեկ տարվա ընթացքում իրականացրել է մի շարք ծրագրեր՝ այց սահմանային դիրքեր, դասախոսություններ, որոնց նպատակն է զարգացնել ուսանողների մարտական պատրաստության վիճակը, ռազմաքաղաքական գիտելիքները, աջակցել ուսանողների ռազմահայրենասիրական դաստիարակությանը, ինչպես նաև նպաստել բանակ-հասարակություն կապի ամրապնդմանն ու զարգացմանը:

2016թ. նոյեմբերի 18-19-ը «ՀՈՒԱԱ (ANSA) կրթական ավտոբուս» ծրագրի ներկայացուցիչները (ՀՈՒԱԱ Գիտակրթական հարցերով հանձնաժողովի ղեկավար Էրիկ Վարդանյան, ՀՈՒԱԱ փոխնախագահ Սարգիս Ասատրյանց, միջազգային կապերի պատասխանատու Գոհար Հովհաննիսյան, լրատվության հետ կապերի և PR-ի պատասխանատու Լարիսա Ալավերդյան) ԵՊՀ Իջևանի մասնաճյուղի ուսանողների համար անցկացրին երկօրյա թրեյնինգ:

Ծրագիրն իրականացվում է Հայաստանի ուսանողական ազգային ասոցացիայի նախաձեռնությամբ, ԵԱՀԿ գրասենյակի ֆինանսավորմամբ և ԿԳ նախարարության աջակցությամբ:

«ՀՈՒԱԱ կրթական ավտոբուս»-ը շրջում է երևանյան և մարզային բուհերում՝ ուսանողների համար իրականացնելով թրեյնինգ-դասընթացներ Բոլոնիայի գործընթացի, Հայաստանում դրա իրականացման և դրանում ուսանողների դերի ու կարևորության մասին:

ԵՊՀ Իջևանի մասնաճյուղում ծրագրին մասնակցեցին, «Կրթական ավտոբուս»-ում իրենց տեղն ամրագրեցին բուհի ոչ միայն առկա, այլև հեռակա ուսուցման ուսանողներ:

Երկօրյա թրեյնինգի ընթացքում ուսանողներին ներկայացվեցին բոլոնյան համակարգի հիմնական ուղղությունների՝ մասնավորապես բարձրագույն կրթության որակի ապահովման առանձնահատկությունները, նրանց հետ իրականացվեցին խմբային աշխատանքներ:

Դասընթացներն ուղեկցվեցին ուսանողների  կողմից ակտիվ քննարկումներով ու բանավեճերով:

Վերջում ուսանողները, ըստ բոլոնյան համակարգի չափորոշիչների, ստեղծեցին իրենց պատկերացրած իդեալական բուհի մոդելը:

2016թ. նոյեմբերի 19-ին  ԵՊՀ ԻՄ-ի տնօրեն Ս. Ա. Առաքելյանը մասնաճյուղի մի խումբ վարչական աշխատակիցների հետ անցկացրեց խորհրդակցություն:

Ներկա էին տնօրենի խորհրդականները, Ուսումնամեթոդական վարչության պետը, գիտական քարտուղարը, ֆակուլտետների դեկանները, Հեռակա ուսուցման բաժնի վարիչը, ՄԿՈԱ բաժնի վարիչը, կրթական ծրագրերի պատասխանատուներ: 

Խորհրդակցության ընթացքում քննարկվեցին բուհի կրթական ծրագրերի կազմման, ժամանակակից պահանջներին համապատասխանեցման գործընթացին վերաբերող հարցեր:

Որոշվեց ըստ մասնագիտությունների մասնաճյուղում կազմել կրթական ծրագրեր մշակող աշխատանքային խումբ և ենթախմբեր:

Ստեղծվեց աշխատանքային խումբ` հետևյալ կազմով.

1. Բրուտյան Վաչիկ – խմբի նախագահ, մասնաճյուղի տնօրենի խորհրդական,

2. Դավթյան Արկադի – խմբի անդամ, Ուսումնամեթոդական վարչության պետ,
3. Ճաղարյան Մարիետա – խմբի անդամ, ՄԿՈԱ բաժնի վարիչի ԺՊ,
4. Սարհատյան Աիդա – խմբի անդամ, Հայոց լեզվի և գրականության ամբիոնի դոցենտ,
5. Զուրաբյան Ալբերտ – խմբի անդամ, մասնաճյուղի ՈՒԳԸ-ի նախագահ:

Ըստ մասնագիտությունների՝ ենթախմբերը ստեղծվեցին հետևյալ կազմերով. 

1.  «Սոցիալական աշխատանք» մասնագիտության աշխատանքային ենթախումբ.

1. Բրուտյան Վաչիկ – մասնաճյուղի տնօրենի խորհրդական, կրթական ծրագրի պատասխանատու,

2. Սահակյան Անահիտ – ԵՊՀ-ի սոցիոլոգիայի ֆակուլտետի դեկանի տեղակալ,
3. Կյուրեղյան Էդիկ – ՄԿՈԱ բաժնի մասնագետ,
4. Սիրադեղյան Սուսաննա – «ՀԷՑ ՓԲԸ»-ի իրավաբան,

5. Մարտիրոսյան Անուշ – «Հույսի կամուրջ» ՀԿ Իջևանի երեխայի զարգացման և սոցիալական աջակցության ցերեկային կենտրոնի փոխտնօրեն,

6. Մարդանյան Մարիաննա – Իջևանի թիվ 1 միջնակարգ դպրոցի հոգեբան:

2. «Զբոսաշրջություն» մասնագիտության աշխատանքային ենթախումբ.

1. Հովհաննիսյան Գուրգեն – Տուրիզմի կառավարման և մշակութաբանության ամբիոնի վարիչի ԺՊ, դոցենտ,

2. Մարզպանյան Հարություն – Ընդհանուր տնտեսագիտության ամբիոնի վարիչ, պրոֆեսոր,
3. Ասիլբեկյան Պավել – Տուրիզմի կառավարման և մշակութաբանության ամբիոնի վարիչի տեղակալ, կրթական ծրագրի պատասխանատու,
4. Գրիգորյան Վահագն – Տուրիզմի կառավարման և մշակութաբանության ամբիոնի դոցենտ
5. Ազիզյան Հռիփսիմե – Տուրիզմի կառավարման և մշակութաբանության ամբիոնի ասիստենտ,
6. Չատյան Նարեկ – «Ապագա  տուր» ՍՊԸ-ի  մենեջեր:

 3. «Ֆինանսներ» մասնագիտության աշխատանքային ենթախումբ.

1. Խուդավերդյան Նելլի – Տնտեսագիտության ֆակուլտետի դեկան,

2. Ասատրյան Բագրատ – ԵՊՀ-ի ֆինանսահաշվային ամբիոնի դոցենտ,
3. Մելիքջանյան Լևոն – «Արդշինբանկ»-ի Իջևանի մասնաճյուղի տնօրեն,
4. Պետրոսյան Գառնիկ – Իջևանի ՏՀՏ հարկային հսկողության բաժնի գլխավոր հարկային տեսուչ,
5. Գալստյան Հասմիկ – Ընդհանուր տնտեսագիտության ամբիոնի դոցենտ,
6. Ավետիսյան Գայանե – Ընդհանուր տնտեսագիտության ամբիոնի ասիստենտ, կրթական ծրագրի պատասխանատու,
7. Սիրոյան Գարիկ – Ընդհանուր տնտեսագիտության ամբիոնի ասիստենտ,
8. Եգանյան Արփինե – «Արարատ» բանկի Իջևանի մասնաճյուղի աշխատակից:

4. Դիզայն» մասնագիտության աշխատանքային ենթախումբ.

1. Մարգարյան Ալեքսան – Կիրառական արվեստի ֆակուլտետի դեկան,

2. Ասատրյան Համլետ – Գծանկարի, գունանկարի և քանդակի ամբիոնի դոցենտ,
3. Հարությունյան Մարտին – Դեկորատիվ կիրառական արվեստի և դիզայնի ամբիոնի ԺՊ,
4. Չիբուխչյան Անուշ – Դեկորատիվ կիրառական արվեստի և դիզայնի ամբիոնի ասիստենտ, կրթական ծրագրի պատասխանատու,
5. Բագամյան Տիգրան – Գծանկարի, գունանկարի և քանդակի ամբիոնի ասիստենտ,
6. Մելքումյան Միսակ – Տավուշի մարզի գլխավոր ճարտարապետ, արտաքին շահակից:

Կրթական ծրագրերի մշակման վերջնաժամկետ սահմանվեց 2017 թվականի փետրվարի 1-ը:

2016թ. նոյեմբերի 17-ին ԵՊՀ Իջևանի մասնաճյուղում կայացավ Կիրառական արվեստի ֆակուլտետի ուսանողների ավարտական, կուրսային և կիսամյակային աշխատանքների ցուցահանդեսը՝ նվիրված Ուսանողների միջազգային օրվան:

Ցուցահանդեսի հանդիսավոր բացմանը մասնակցում էին ԵՊՀ ԻՄ-ի տնօրեն   Ս. Ա. Առաքելյանը, մասնաճյուղի վարչական և պրոֆեսորադասախոսական անձնակազմի ներկայացուցիչներ, առկա և հեռակա ուսուցման համակարգերի ուսանողներ, հյուրեր:

Բացման խոսքով հանդես եկավ ԵՊՀ Իջևանի մասնաճյուղի տնօրեն Սամվել Առաքելյանը՝ ողջունելով ուսանողներին, ցուցահանդեսի բոլոր մասնակիցներին, կազմակերպիչներին, շնորհավորեց ուսանողների տոնը, նրանց հղեց բարեմաղթանքներ՝ ուսման մեջ բարձր առաջադիմություն, նպատակասլացություն, դժվարությունները հաղթահարելու անկոտրում կամք, լավատեսություն, արժանապատիվ կյանք ու պայծառ ապագա:    

Ցուցահանդեսին ներկայացված էին բազմաոճ ու բազմաժանր աշխատանքներ՝ մանրանկարչություն, գոբելեն, վիտրաժ, կոլաժ, մետաքսանկարչություն, ֆլորիստիկա, խեցեգործություն, գեղանկար, բոլորաքանդակ և այլն:   

Կիրառական արվեստի ֆակուլտետի դասախոսների խոսքով՝ մեր ուսանողների աշխատանքները լիովին համապատասխանում են ժամանակակից արվեստի պահանջներին, և դրանցում տարեցտարի նկատվում է որակական աճ ու զարգացում: Ասվածի վկայությունն է նոր ժանրերի գործերի ստեղծումը, Հայ նկարիչների միությունում դրանց ցուցադրությունն ու ՀՆՄ գեղարվեստական խորհրդի կողմից բարձր գնահատանքի արժանացումը:

Նորույթներից հատկանշական են կոլաժը, մանրանկարչությունը, ֆլորիստիկան, հագուստի գեղարվեստական ձևավորումը, խառը տեխնիկայով (կերամիկական ու գործվածքային, մետաղական ու վիտրաժային) աշխատանքները: 

Բարձր մակարդակով կազմակերպված ցուցահանդեսը տպավորեց ու գեղագիտական հաճույք պատճառեց առկա և հեռակա ուսուցման համակարգերի ուսանողներին ու բոլոր այցելուներին: