2016թ. ապրիլի 2-ին ԵՊՀ Իջևանի մասնաճյուղում տեղի ունեցավ Գիտական խորհրդի նիստ, որը նախագահում էր մասնաճյուղի տնօրեն, Գիտական խորհրդի նախագահ Ս.Առաքելյանը:

Գիտխորհրդի նիստում քննարկվեցին 2016-2017 ուստարվա՝ ԵՊՀ ԻՄ-ի բակալավրիատի ուսման վարձավճարների չափերը, նույն ուստարվա հեռակա ուսուցման ընդունելության մասնագիտությունների և կրթական ծրագրերի ցանկին, 2016-2017 ուսումնական տարվա առկա ուսուցմամբ մագիստրատուրայի ընդունելության կանոնակարգին, ԵՊՀ ԻՄ-ի ուսանողական գիտական ընկերության՝ 2014-15 ուստարվա գործունեությանը վերաբերող և մի շարք ընթացիկ հարցեր:    

Նիստի ընթացքում հավանություն տրվեցին 2016-2017 ուստարվա՝ ԵՊՀ ԻՄ-ի բակալավրիատի ուսման վարձավճարների չափերի, 2016-2017 ուստարվա՝ հեռակա ուսուցման ընդունելության մասնագիտությունների և կրթական ծրագրերի ցանկերին, և որոշվեց դրանք ուղարկել ԵՊՀ-ի հաստատմանը:

Որոշվեց նաև 2016-2017 ուսումնական տարում առկա ուսուցմամբ մագիստրատուրայի ընդունելություն չկազմակերպել:

2016թ. ապրիլի 1-ին ԵՊՀ Իջևանի մասնաճյուղում տեղի ունեցավ հանդիպում  ավարտական կուրսերի այն ուսանողների հետ, ովքեր պատրաստվում են իրենց ուսումը շարունակելու մագիստրատուրայում:

Հանդիպման նպատակն էր իրականացնելու «Բակալավրական և մագիստրոսական կրթությունն իմ աչքերով» թեմայով քննարկում:

Այն կազմակերպվել էր ՄԿՈԱ բաժնի մասնագետ, սոցիոլոգ Է.Կյուրեղյանի, հասարակայնության հետ կապերի և մամուլի պատասխանատու Հ.Վանյանի կողմից:

Նախ ելույթ ունեցավ պարոն Կյուրեղյանը՝ մասնագիտական դիտանկյունից ներկայացնելով քննարկման մասնակիցների կարծիքների ու առաջարկությունների կարևորությունը, ընդգծելով, որ նրանք լավ տեղեկացված են մանաճյուղի գործունեության տարբեր կողմերին և ի վիճակի են օգտակար, գործնականորեն կիրառելի առաջարկներ ներկայացնել ուսման որակի բարելավման ուղղությամբ:

Հանդիպման ընթացքում հիմնականում քննարկվեցին հետևյալ հարցերը.

• Ընդունվելիս ի՞նչ ակնկալիքներ ու սպասելիքներ ունեիք ԵՊՀ Իջևանի մասնաճյուղից, և որքանով արդարացան դրանք:
• Բակալավրական կրթության շրջանակներում, ըստ Ձեզ, մասնաճյուղը կարողացավ տալ բավարար գիտելիքներ ու հմտություններ՝ Ձեր մասնագիտությամբ աշխատելու համար:
• Գործող գնահատման համակարգը, Ձեր կարծիքով, կարողացա՞վ լիարժեք բացահայտել Ձեր գիտելիքները, հմտություններն ու կարողությունները:
• Որո՞նք են այն շարժառիթները, որ Ձեզ մղում են ուսումը շարունակելու մագիստրատուրայում:
• Ընդհանրապես ի՞նչ պատկերացում ունեք մագիստրոսական կրթության, նրա նպատակների ու հնարավորությունների մասին:
• Ցանկություն ունե՞ք հետագայում զբաղվելու ուսումնագիտական գործունեությամբ:

Քննարկման մասնակիցներն անկեղծ ու անկաշկանդ կերպով արտահայտեցին իրենց կարծիքներն ու առաջարկությունները, որի շնորհիվ ծավալվեց աշխույժ ու հետաքրքիր քննարկում:   

Արտահայտվեցին բոլոր մասնակիցները, իսկ պատասխանների ընդհանրացված գնահատականներում իշխում էր այն համոզմունքը, որ մասնաճյուղում ստացած բակալավրական ուսուցումից իրենց սպասելիքները հիմնականում արդարացել են, ըստ էության ունեն բավարար մասնագիտական գիտելիքներ, հմտություններ և կարղություններ ու պատրաստ են իրենց մասնագիտությամբ աշխատելու:

Միաժամանակ շեշտեցին, որ իրենց գիտելիքներն ավելի խորացնելու և հետագա հնարավոր ուսումնագիտական գործունեություն ծավալելու համար գիտակցում են մագիստրոսական կրթություն ստանալու անհրաժեշտությունը:

Բուհում  ուսումնական գործընթացի շարունակական բարելավման ուղղությամբ մեր ուսանողները նաև հանդես եկան ուշագրավ առաջարկներով, որոնք հիմնականում վերաբերում էին մասնաճյուղում գործնական հմտությունների ձեռքբերման մեխանիզմների արդյունավետությունը բարձրացնելուն, մասնավորապես պրակտիկաների տևողությունը մեծացնելուն, գնահատման համակարգը բնագիտական և հումանիտար ուղղվածությամբ մասնագիտությունների յուրահատկություններին հարմարեցնելուն:

2016թ. մարտ ամսվա ընթացքում ԵՊՀ ԻՄ-ի ուսումնամեթոդական վարչության մինչհամալսարանական կրթության և պրակտիկայի կազմակերպման (ՄԿՊԿ) բաժինը հանդիպումներ է կազմակերպել Բերդի տարածաշրջանի մի շարք ուսումնական հաստատություններում (Բերդի ավագ դպրոց, Բերդի վարժարան, Բերդի պետական քոլեջ, Վերին Ծաղկավան, Պառավաքար, Կարմիրաղբյուր (Ներքին և Վերին), Տավուշ, Չինչին, Չորաթան, Մովսեսգեղ, Վարագավան գյուղերի միջնակարգ դպրոցներ): 

Մասնակցում էին Ուսումնամեթոդական վարչության պետ Ա.Դավթյանը, ՄԿՊԿ բաժնի վարիչ Վ.Աղաբաբյանը, կրթական հաստատությունների տնօրեններ, ուսուցիչներ:

Հանդիպումների նպատակն էր աշակերտներին տալ մասնագիտական կողմնորոշում, ԵՊՀ ԻՄ-ում գործող մասնագիտությունների վերաբերյալ տեղեկատվություն, ամրապնդել դպրոց-համալսարան կապը:

Հանդիպումների ընթացքում ընդհանուր գծերով ներկայացվել են ԵՊՀ Իջևանի մասնաճյուղի ֆակուլտետները, ամբիոնները, մասնագիտությունները:

Նշվել է, որ 2016թ. ԵՊՀ Իջևանի մասնաճյուղը, գործող մասնագիտություններից բացի, ընդունելություն է իրականացնելու նոր` «Տարրական մանկավարժություն և մեթոդիկա», «Համակարգչային գրաֆիկա» մասնագիտություններով:

Յուրաքանչյուր մասնագիտության համար ներկայացվել է ընդունելության քննությունների ցանկը: Շեշտվել է, որ 2016-2017 ուստարվա համար ԵՊՀ Իջևանի մասնաճյուղում օտար լեզուների հետ կապված կատարվել են փոփոխություններ («Անգլերեն լեզու և գրականություն» մասնագիտության ուսանողները հավասար ժամաքանակով կանցնեն ֆրանսերեն և հակառակը), որոնց արդյունքում մասնաճյուղը կտա 2 օտար լեզվի համահավասար իմացությամբ շրջանավարտներ:

Բերդի պետական քոլեջի շրջանավարտների հետ քննարկվել են շարունակական կրթության հնարավորություններն ու առանձնահատկությունները: Նշվել է, որ բարձր առաջադիմությամբ քոլեջն ավարտած շրջանավարտները կարող են մասնաճյուղում հեռակա ուսուցմամբ կրթությունը  շարունակել  2-րդ կուրսից:

Քննարկվել են ընդունելության քննությունների, շտեմարանների, օրեր առաջ մասնաճյուղում կազմակերպված օլիմպիադաների և բաց դռների օրերի հետ կապված մի շարք հարցեր:

Հանդիպումների ընթացքում աշակերտներին հետաքրքրել են գլխավորապես կրթական գործընթացին, ուսման վարձաչափերին, սահմանամերձ բնակավայրերի ուսանողների համար նախատեսված զեղչերին ու արտոնություններին, ընդունելության քննությունների՝ մեկ և երկու աստղանիշով առարկաների ընտրությանը, հանրակացարանից օգտվելու հնարավորությանը վերաբերող հարցեր:

2016թ. մարտի 29-ին ԵՊՀ Իջևանի մասնաճյուղում կայացավ Ուսանողական խորհրդի նախագահի ընտրություն:

Մասնակցում էին Ուսանողական խորհրդի գործող նախագահ Ռազմիկ Հովսեփյանը, Ուսանողական գիտական ընկերության նախագահ Ալբերտ Զուրաբյանը, ուսանողական խորհրդի անդամներ, կուրսերի ավագներ:

Ընտրական հանձնաժողովի կազմում ընդգրկված էին տնօրենության անդամներ, գիտական քարտուղար Մ.Աթոյանը, տնօրենի օգնական Ն.Գրիգորյանը, Հումանիտար գիտությունների ֆակուլտետի ՈՒԽ-ի նախագահ Զարուհի Վարտանյանը, ՈՒԽ-ի մշակույթի հանձնաժողովի նախագահ Մելինե Իսկանդարյանը, ՏՆտեսագիտության ֆակուլտետի ՈՒԽ-ի նախագահ Հասմիկ Քարտաշյանը, Բնական գիտությունների ֆակուլտետի ՈՒԽ-ի նախագահ Արտյոմ Վարդանյանը, ՈՒԳԸ-ի նախագահ Ալբերտ Զուրաբյանը:

Ընտրությանը հայտագրված էր 27 ուսանող, որոնցից ներկա էին 22-ը:

Առաջադրվել էր 1 թեկնածու՝ «Հայոց լեզու և գրականություն» մասնագիտության երկրորդ կուրսի ուսանողուհի Իսկուհի Շաղբաթյանը, ով Ուսանողական խորհրդի պատասխանատու քարտուղարն էր և ՈՒԽ-ի նախագահի տեղակալը:

Ընտրությունների արդյունքում Իսկուհի Շաղբաթյանը 20 կողմ, 1 դեմ և 1 անվավեր  ձայների հարաբերակցությամբ ընտրվեց  ԵՊՀ Իջևանի մասնաճյուղի ուսանողական խորհրդի նախագահ:

Մասնաճյուղը սիրով շնորհավորում է ՈՒԽ-ի նորընտիր նախագահին՝ մաղթելով նրան նոր ու հետաքրքիր մտահղացումներով և նախաձեռնություններով լի, ստեղծագործական ու կազմակերպչական  բուռն գործունեություն:

Հայաստանում ֆրանկոֆոնիայի երկամսյակի շրջանակում 2016թ. մարտի 26-ին ԵՊՀ Իջևանի մասնաճյուղում տեղի ունեցավ  միջոցառում՝ նվիրված ֆրանկոֆոն ժողովուրդներին:

Միջոցառմանը ներկա էին Օտար լեզուների ամբիոնի դասախոսներ, ուսանողներ, ֆրանսիացի կամավոր Ժուլիեն Լըկուտուղիեն, մասնաճյուղի հասարակայնության հետ կապերի և մամուլի պատասխանատու Հասմիկ Վանյանը:

Բացման խոսքով հանդես եկավ  երրորդ կուրսի ուսանողուհի Իրինա Աղաբեկյանը՝ ներկայացնելով, որ Իջևանը երկար տարիներ համարվում է ֆրանսախոս քաղաք, ինչի մասին է վկայում նրա և Վալանսի՝ քույր քաղաքներ լինելու հանգամանքը: Ուսանողուհին ընդգծեց, որ պարբերաբար կազմակերպվող միջոցառումները և ուսանողների  փոխանակման ծրագիրը նպաստում են ֆրանսերեն լեզվի ուսումնասիրմանն ու տարածմանը:

Այնուհետև ֆրանսիացի կամավոր  Ժուլիեն Լըկուտուղիեն համապատասխան շնորհանդեսի ուղեկցությամբ, ուշագրավ փաստերով ներկայացրեց ֆրանկոֆոնիանիան ամբողջ աշխարհում, ֆրանսերեն լեզվի պատմությունը, նրա դերն ու կարևորությունը մեր օրերում:

Ապա ելույթ ունեցավ Օտար լեզուների ամբիոնի ասիստենտ Աիդա Մարդանյանը: Նա խոսեց հայ-ֆրանսիական դարավոր բարեկամության մասին, ներկայացրեց այն բոլոր միջոցառումները, որոնք կազմակերպվել են ուսանողության շրջանում ֆրանսերենը բարձր մակարդակի հասցնելու համար: Երախտագիտությամբ հիշվեցին այն բարերարների անունները, որոնց շնորհիվ կահավորվել է ֆրանսերենի լսարանը:

Խոսվեց «Հայ-ֆրանսիական բարեկամություն» կազմակերպության մասին, որը 2012 թվականից մեր ուսանողների կողքին է՝ կրթության ոլորտին վերաբերող իր ծրագրով: Այն ներառում է մի շարք դրույթներ` ուսանողների վերապատրաստում, վճարների փոխանցում, դպրոց-համալսարան կապի ամրապնդում, դասընթացների ու դասալսումների կազմակերպում, համապատասխան գրականության տրամադրում և այլն:

Նշվեց, որ 2012-2013թթ. «Հայ-ֆրանսիական բարեկամություն» կազմակերպությունը կրթաթոշակ է տրամադրել ԵՊՀ Իջևանի մասնաճյուղի «Ֆրանսերեն լեզու և գրականություն» մասնագիտության 10 ուսանողների, իսկ 2014թ.` 13 ուսանողների:

Հայաստանն արդեն երկար  տարիներ  է, ինչ համալրել է ֆրանսախոս երկրների շարքը, և մեզանում մեծ թափ է ստացել ֆրանկոֆոնիային նվիրված միջոցառումների կազմակերպումը: Հայաստանում ֆրանսերենի ուսուցումն ավելի կամրացնի Հայաստան-Ֆրանսիա ավանդական կապը:

 Այս միջոցառման շնորհիվ ևս մեկ անգամ կարևորվեց ֆրանսերեն լեզուն, վերհանվեց նրա հմայքն ու նրբությունը: