2016թ. հոկտեմբերի 1-ից 14-ը ԵՊՀ ԻՄ-ի մինչհամալսարանական կրթության և պրակտիկայի կազմակերպման (ՄԿՊԿ) բաժինը հանդիպումներ է կազմակերպել Իջևանի տարածաշրջանի մի շարք դպրոցներում (Իջևանի ավագ, Իջևանի վարժարան, Վազաշենի, Այգեհովտի, Կայանի, Ազատամուտի, Խաշթառակի, Աչաջրի, Սարիգյուղի, Սևքարի, Ն.Ծաղկավանի, Գանձաքարի, Գետահովտի միջնակարգ դպրոցներ): 

Հանդիպումների նպատակն էր աշակերտներին տալ մասնագիտական կողմնորոշում, ԵՊՀ ԻՄ-ում գործող մասնագիտությունների վերաբերյալ տեղեկատվություն, ամրապնդել դպրոց-համալսարան կապը:

Հանդիպումներին մասնակցում էին մասնաճյուղի տնօրեն Ս.Առաքելյանը, ՄԿՊԿ բաժնի վարիչ Վ.Աղաբաբյանը, դպրոցների տնօրեններ, դասախոսներ, ուսուցիչներ:

Մասնաճյուղի տնօրեն Ս.Առաքելյանը նախ ողջունեց աշակերտներին, ընդգծեց մասնագիտությունների ճիշտ ընտրության կարևորությունը մարդու կյանքում, ներկայացրեց ԵՊՀ Իջևանի մասնաճյուղի՝ 2016-2017 ուստարվա բակալավրի կրթական ծրագրով մասնագիտությունները, անդրադարձավ դրանց առանձնահատկություններին և աշխատաշուկայում ունեցած պահանջարկին: 

Նա նշեց, որ, հաշվի առնելով մասնագետների, արտաքին շահակիցների, մարզի կրթության ոլորտի պատասխանատուների կարծիքները տարածաշրջանի աշխատաշուկայում մասնագիտությունների ունեցած պահանջարկի վերաբերյալ, իրականացվել են մի շարք փոփոխություններ:

Մասնավորապես՝ «Պատմություն» մասնագիտության մեջ Ընդհանուր պատմության (գր.) կամ Օտար լեզվի (գր.)  քննությունները մրցութայինից դարձել են ոչ մրցութային, «Անգլերեն լեզու և գրականություն», «Ֆրանսերեն լեզու և գրականություն» մասնագիտություններում ոչ մրցութային է դարձել «Հայոց լեզու և գրականություն» (գր.) մրցութային առարկան: «Դիզայն» մասնագիտության ընդունելության քննություններից հանվել է «Գունանկար» առարկան:

2016-2017 ուստարվա բակալավրի կրթական ծրագրով ավելացվել են «Ֆինանսներ», «Սոցիալական աշխատանք», «Զբոսաշրջություն» մասնագիտությունները:

Հանվել են «Համակարգչային գրաֆիկա», «Տնտեսագիտություն», «Հոգեբանություն» մասնագիտությունների կրթական ծրագրերը:

Յուրաքանչյուր մասնագիտության համար ներկայացվեց ընդունելության քննությունների ցանկը: Ընդգծվեց, որ 2016-2017 ուստարվա համար ԵՊՀ Իջևանի մասնաճյուղում կատարվել են օտար լեզուների հետ կապված փոփոխություններ («Անգլերեն լեզու և գրականություն» մասնագիտության ուսանողները հավասար ժամաքանակով կանցնեն ֆրանսերեն և հակառակը), որոնց արդյունքում մասնաճյուղը կտա 2 օտար լեզվի համահավասար իմացությամբ շրջանավարտներ:

Քննարկվեցին ընդունելության քննությունների, շտեմարանների, օլիմպիադաների անցկացման և բաց դռների օրերի հետ կապված մի շարք հարցեր:

Հանդիպումներն ընթացան հարց ու պատասխանով: Աշակերտներին հետաքրքրեցին կրթական գործընթացին, ուսման վարձաչափերին, հատկապես սահմանամերձ բնակավայրերի ուսանողների համար նախատեսված զեղչերին ու արտոնություններին, ընդունելության քննությունների մեկ և երկու աստղանիշով առարկաների ընտրությանը վերաբերող տարբեր հարցեր:

Մասնակիցները գոհունակություն արտահայտեցին մասնաճյուղի նման նախաձեռնության համար` ակնկալելով, որ համագործակցությունը կլինի շարունակական:

2016թ. հոկտեմբեր ամսին ԵՊՀ ԻՄ-ի տնտեսագիտության ֆակուլտետի երրորդ և չորրորդ կուրսի ուսանողները՝ «Տնտեսագիտության տեսություն» մասնագիտության կրթական ծրագրի պատասխանատու, տնտ. գիտ. թեկն., ասիստենտ Գ.Ավետիսյանի ղեկավարությամբ,  ճանաչողական այց կատարեցին Պռոշյանի կոնյակի գործարան և  ՀՀ կենտրոնական բանկ:

Պռոշյանի կոնյակի գործարանում նրանք ներկա գտնվեցին շշալցման գործընթացին, որը կատարվում էր միջազգային ստանդարտներին համապատասխան:

Մասնագետի կողմից ուսանողներին ներկայացվեց ընկերության մարքեթինգային գործունեությունը, կոնյակների ստեղծման, անվանակոչման («Վարդան Մամիկոնյան», «Եղիշե Չարենց», «Շիրազ», «Շերամ» և այլն), արտահանման պատմությունը: Նշվեց, որ կոնյակի տուփի մեջ զետեղվում են հայ գրողների երկերի ժողովածուների եռալեզու տարբերակները՝ արտահանվող երկրներում  հայ մշակույթը է՛լ ավելի հայտնի ու սիրված դարձնելու նպատակով:

Ուսանողները եղան  նաև գինու պահպանման և կոնյակի հնեցման մառաններում, տեղեկացան, որ գործարանում պատրաստվում են նաև պահածոներ, լիկյորներ ու գինու տարբեր տեսակներ:

Գործարանի ներկայացուցիչները ԵՊՀ ԻՄ-ի հետ համագործակցելու պատրաստակամություն հայտնեցին ուսանողական պրակտիկաների անցկացման և դիպլոմային աշխատանքների համար տեղեկատվության տրամադրման գործում:

ՀՀ կենտրոնական բանկի այցելուների կենտրոնում ուսանողներին ներկայացվեցին ԿԲ-ի հիմնական գործառույթները, դրամի պատմությունը, դրամավարկային քաղաքականության իրականացման հետևանքները, «ԿԲ-Առևտրային բանկեր» փոխկապվածությունը, տրվեց մանրամասն տեղեկատվություն գնաճի ու դրա հետևանքների մասին:

Ուսանողնեը ծանոթացան տարբեր ժամանակների (Տիգրան Մեծի, Կիլիկյան Հայաստանի, Պարսկաստանի, Ցարական Ռուսաստանի տիրապետության տակ գտնվելու ժամանակաշրջանների) դրամներին:

Ներկայացվեց դրամի կեղծ լինելը ստուգելու գործընթացը, որն իրականացվում է երեք տարբեր սարքավորումների օգնությամբ և անզեն աչքով ստուգելու համար դրամի առանձնահատկություններն ու պաշտպանիչ շերտերի առկայությունը:

Ճանաչողական այցերի ընթացքում մեր ուսանողներն ամրապնդեցին իրենց տեսական գիտելիքները, ձեռք բերեցին գործնական հմտություններ: