2017թ. հոկտեմբերի 28-ին ԵՊՀ Իջևանի մասնաճյուղում կայացավ  Հելոուինի տոնին նվիրված միջոցառում, որը կազմակերպել էր Անգլերեն լեզվի և գրականության ամբիոնը (ամբիոնի վարիչ բ.գ.թ., դոցենտ Ք.Հարությունյանը  և ամբիոնի ասիստենտ, բ.գ.թ. Ն.Գասպարյանը):

Միջոցառմանը մասնակցում էին «Անգլերեն լեզու և գրականութուն» մասնագիտության 1-ին և 3-րդ կուրսերի ուսանողները, ներկա էին Հումանիտար գիտությունների ֆակուլտետի դասախոսներ և ուսանողներ:

Մասնակիցները միջոցառման ընթացքում ներկայացրին “Halloween”-ի (Բոլոր սրբերի երեկո, օր) ծագումը, ավանդույթները, սովորույթները: Նշվեց, որ, ըստ անգլերենի Օքսֆորդյան բառարանի, «Հելոուին» բառն առաջին անգամ հիշատակվել է 16-րդ դարում՝ որպես անգլերեն “All-Hallows-Even” (հայերեն՝ բոլոր սրբերի երեկո): Այն ժամանակ այդպես էին կոչում Բոլոր սրբերի օրվան նախորդող երեկոն։ Թեև “All Hallows” արտահայտությունը հանդիպում է նաև հին անգլերենում (ealra hālgena mæssedæg – հայերեն՝ Բոլոր սրբերի օր), բայց այն մինչև 1556 թվականը չի հանդիպում գրավոր աղբյուրներում։ “Halloween”-ն առաջացել է վաղ քրիստոնեական տոնից, ունի հեթանոսական արմատներ. այն ծագել է կելտական և հռոմեական բերքահավաքին նվիրված տոներից:

Ներկայացվեցին “Halloween”-ի գույները` սևը և նարնջագույնը, որոնք խորհրդանշում են մահը և բերքը, տոնի մյուս խորհրդանիշները, օրինակ, Ջեքի լապտերը կամ ճրագը (անգլ.՝ Jack-o’-lantern): Այն դդում է, որի վրա փորագրված է չար, բայց միևնույն ժամանակ ծիծաղելի դեմք, իսկ դդմի ներսում տեղադրված է վառվող մոմ։ Առաջին անգամ «Ջեքի ճրագը» հայտնվել է Մեծ Բրիտանիայում, բայց սկզբնական շրջանում պատրաստման համար օգտագործվել է շաղգամ կամ ճակնդեղ: Համարվում էր, որ Բոլոր սրբերի օրը տան մոտ դրված այդպիսի բանջարեղենները վանում են չար ուժերին: Երբ Հելոուինի տոնը տարածվեց Ամերիկայում, Ջեքի ճրագը սկսեցին պատրաստել դդմից, որն ավելի հասանելի էր և էժան: Ամերիկայում վրան փորագրված դդումը մինչ Հելոուինի տարածվելը համարվում էր բերքահավաքի խորհրդանիշներից մեկը: 1990 թվականին տոնի ժամանակ նրա օգտագործումն արդեն դարձել էր սովորական։ 

Նշվեց, որ Բոլոր սրբերի տոնը կամ “Halloween”-ը նշվում է հոկտեմբերի վերջին և ամենատարածված տոներից մեկն է ԱՄՆ-ում: Այն Ամերիկայի Միացյալ Նահանգներ են բերել իռլանդացի և շոտլանդացի ներգաղթյալները 19-րդ դարում: Այսօր այն տոնում են նաև ոչ անգլախոս եվրոպական և ԱՊՀ այլ երկրներում ոչ միայն մեծահասակները, այլ երեխաները, որոնց համար այն զվարճանալու մեծ առիթ է: Տարածված սովորույթ է հագնել դիմակահանդեսային հանդերձանք և զարմացնել ընկերներին անսովոր կերպարներով:

 Միջոցառման ժամանակ ներկայացվեցին նաև ուսանողների հորինած սարսափ պատմությունները, որոնցից լավագույնն արժանացավ մրցանակի:

Հնչեցին տոնին նվիրված երգեր և բանաստեղծություններ:  

Վերջում տեղի ունեցավ հյուրասիրություն, որը ներառում էր տոնի ավանդական ճաշատեսակները:

2017թ. հոկտեմբերի 27-ին ԵՊՀ Իջևանի մասնաճյուղում կայացավ Մանկավարժության և հոգեբանության ամբիոնի ընդլայնված նիստը, որին հրավիրված էր Հումանիտար գիտությունների ֆակուլտետի դեկան, պ.գ.դ., պրոֆեսոր Ա.Ներսիսյանը, մասնակցում էին ամբիոնի անդամները՝ ամբիոնի վարիչ, մ.գ.թ., ասիստենտ Լ.Հարությունյանի գլխավորությամբ:

Ընդլայնված նիստում ներկայացվեցին ուսումնական խորհրդատուի (կուրատոր/կուրսղեկ), կրթական ծրագրի պատասխանատուի, ամբիոնի վարիչի հաշվետվությունները՝ 2017-18 ուստարվա առաջին կիսամյակում (սեպտեմբեր-հոկտեմբեր ամիսներին) իրականացված աշխատանքների վերաբերյալ:

Ներկայացվեց, որ հաշվետու ժամանակահատվածում Մանկավարժության և հոգեբանության ամբիոնի դասախոս, ուսումնական խորհրդատու Վ.Մելիքսեթյանի կողմից «ՏՄՄ» մասնագիտության 1 կուրսում իրականացվել են հետևյալ աշխատանքները.

• Ուսումնական տարվա սկզբին առաջին կուրսի ուսանողներին ներկայացվել է ԵՊՀ Իջևանի մասնաճյուղի ընդհանուր կառուցվածքն ու ուսումնական գործընթացի կանոնակարգը, մասնաճյուղի կայքից, դասատախտակից, գրադարանից օգտվելու կարգը:
• Իրականացվել է ուսանողների անձնական տվյալների հավաքագրում:
• Ուսանողներին ներկայացվել են իրենց իրավունքներն ու պարտականությունները, ինչպես նաև ուսումնառության կրեդիտային համակարգի սկզբունքները, կրթագրքից օգտվելու կարգը։
• Ըստ համապատասխան ժամանակացույցի՝ պարբերաբար հանդիպումներ են իրականացվել 1-ին կուրսի ուսանողների հետ։
• Լսարաններում փակցվել է եզրափակիչ գնահատմամբ, առանց եզրափակիչ գնահատման, հանրագումարային և ստուգարքային դասընթացների առարկայական ցանկը՝ ըստ համապատասխան կրեդիտների։
• Ուսանողներին ներկայացվել են դասընթացների գնահատման կարգերը:
• Ուսանողներին տեղեկացվել է ԵՊՀ ԻՄ-ի ուսանողական նպաստների պետական և ներբուհական կրթաթոշակների հատկացման կարգի մասին: Որոշված ժամանակահատվածում հավաքվել են համապատասխան փաստաթղթեր և ներկայացվել ֆակուլտետի մանդատային խորհրդին։
• Ուսանողներին տրամադրվել է համապատասխան խորհրդատվություն և օգնություն՝ ուսումնական գործընթացին առնչվող ցանկացած հարցի վերաբերյալ:
• Ուսանողներին տրամադրվել է ուսումնական գործընթացին առնչվող տեղեկատվական նյութեր:
• Վերահսկվել են ուսանողների հաճախումներն ու կարգապահությունը:
• Յուրաքանչյուր ամիս ամփոփվել են ուսանողների հաճախումները  և ձեռնարկվել համապատասխան քայլեր /դիտողություն, գրավոր նկատողություն/։

Ամբիոնի նիստում «ՏՄՄ» մասնագիտության կրթական ծրագրի պատասխանատու, հոգ. գիտ. թեկն., ասիստնետ Ա.Քամալյանի կողմից ներկայացվեցին հաշվետու ժամանակահատվածում (սեպտեմբեր-հոկտեմբեր ամիսներին)  իրականացված հետևյալ աշխատանքները.

• Կազմակերպվել է հանդիպում «Տարրական մանկավարժություն և մեթոդիկա» մասնագիտության 1 և 2-րդ կուրսի ուսանողների հետ, պարզաբանվել կրթական ծրագրի պատասխանատուի դերը և գործառույթները:
• Ուսումնասիրվել են դասախոսների կողմից ամբիոն ներկայացված առարկայական փաթեթները:
• «Հոգեբանություն» մասնագիտության 3-րդ, «Մանկավարժություն և հոգեբանություն» մասնագիտության 4-րդ կուրսի ուսանողներին հանձնվել են կուրսային և ավարտական աշխատանքների թեմաները:
• Ուսումնական ծրագրի հետ կապված նորությունները ներկայացվել են ամբիոն:
• Կազմվել է 2016-2017 թթ. համար նախատեսված կրթական մասնագիրը:
• Կազմվել է 2017-2018 թթ. համար նախատեսված կրթական տեղեկագիրը:
• Հետևողականորեն վերահսկվում է կուրսային և ավարտական աշխատանքների կատարման ընթացքը, պարբերաբար հադիպումներ են իրականացվում ուսանողների հետ, քննարկվում են նրանց առաջարկությունները և դրանց ընթացք են տրվում:
• Որպես կրթական ծրագրի պատասխանատու՝ մասնակցել է Դ.Սարգսյանի կազմակերպած բաց դասին՝ նվրիված Հոգեկան առողջության համաշխարհային օրվան:

Մանկավարժության և հոգեբանության ամբիոնի վարիչ, մ.գ.թ., ասիստենտ Լ.Հարությունյանը ներկայացրեց 2017-2018 ուստարվա սեպտեմբերի 1-ից մինչև հոկտեմբերի վերջը ամբիոնի կողմից իրականացված ուսումնագիտական և կազմակերպչական հետևյալ աշխատանքները.

• 2017-2018 ուստարվա աշխատանքային պլանի հաստատում:
• Դասախոսների անհատական զարգացման պլանի հաստատում:
• Կուրսղեկի աշխատանքային պլանի հաստատում:
• Ամբիոնի՝ 2017-2018 ուստարվա 1-ին կիսամյակի ժամանակացույցների հաստատում:
• Կուրսային և ավարտական աշխատանքների թեմաների և գրաֆիկների հաստատում:
• Ամփոփիչ ատեստավորման քննությունների հարցաշարերի քննարկում և հաստատում:
• Ավարտական աշխատանքների կատարման ընթացքի մասին գրառումների մատյանի ստեղծում:
• Մասնաճյուղի «Ակունք» և այլ գիտական հանդեսներում հոդվածների հրատարակում:
• Ամբիոնի վարիչ՝ մ.գ.թ Լ.Հարությունյանը, դասախոսներ հ,գ.թ. Ա Քամալյանը, Վ. Մելիքսեթյանը, է.Սիմոնյանը,   հրատարակել են հոդվածներ միջազգային գիտական հանդեսում:
• 1-ին ընթացիկ քննությունների և ստուգումների հարցաշարերի, թեստերի քննարկում և հաստատում:
• Բաց դասի կազմակերպում՝ նվիրված Հոգեկան առողջության միջազգային օրվան (դասը վարել է հոգ. գիտ. թեկն., ասիստենտ Դ.Սարգսյանը):
• Ճանաչողական այց ԵՊՀ՝ Ընդհանուր հոգեբանության ամբիոնի անձի և մասնագիտական գործունեության հոգեբանության գ/հ/ լաբորատորիա և Փորձարարական հոգեբանության լաբորատորիա, ինչպես նաև Սթրեսի և ցավի կառավարման կենտրոն:
• Տարիքային հոգեբանության դասընթացի շրջանակում «Հոգեբանություն» մասնագիտության 3-րդ կուրսի հետ Իջևանի թիվ 1 մանկապարտեզ այցի կազմակերպում՝ նախադպրոցականների տարիքային առանձնահատկությունները և նրանց ուսուցման ու կրթության  մեթոդները ուսումնասիրելու նպատակով (դասախոս՝ Վ.Մելիքսեթյան):
• Դասալսումերի կազմակերպում (Ի.Պոնոմարենկո,Ա.Կոբելյան, Լ.Սարգսյան):
• Տարիքային հոգեբանության դասընթացի շրջանակում այցի կազմակերպում Իջևանի պոլիկլինիկա՝ մարդու պրեննատալ հոգեբանության ուսումնասիրման նպատակով:
• Կրթական ծրագրի պատասխանատուի հաշվետվություն:
• Կուրսղեկի (ուսումնական խորհրդատուի) հաշվետվություն:
• Ամբիոնի վարիչի հաշվետվություն:

2017-18 ուստարվա առաջին կիսամյակում (սեպտեմբեր-հոկտեմբեր ամիսներին) Մանկավարժության և հոգեբանության ամբիոնի կողմից իրականացված աշխատանքները գնահատվեցին լավ:

2017թ. հոկտեմբերի 25-ին ԵՊՀ Իջևանի մասնաճյուղում կայացավ Ֆրանսերեն լեզվի և գրականության ամբիոնի ընդլայնված նիստը, որին հրավիրված էր մասնաճյուղի տնօրեն Ս. Ա. Առաքելյանը, մասնակցում էին ամբիոնի անդամները՝ ամբիոնի վարիչի ԺՊ, ասիստենտ Ա.Մարդանյանի գլխավորությամբ:

Ընդլայնված նիստում ներկայացվեց 2017-18 ուստարվա առաջին կիսամյակում   (սեպտեմբեր-հոկտեմբեր ամիսներին) ամբիոնում իրականացված աշխատանքների վերաբերյալ հաշվետվություն:

Մասնավորապես նշվեց, որ հաշվետու ժամանակահատվածում ամբիոնը գործունեություն է ծավալել ըստ հաստատված աշխատանքային պլանի, որտեղ նախանշված են ամբիոնի անելիքներն ու խնդիրները:

Դեռևս 2017թ. օգոստոս ամսին վերափոխվել կամ կազմվել են դասընթացների փաթեթները՝ բոլոր մասնագիտությունների գծով: Սեպտեմբերի 4-ին ամբիոնի առաջին նիստում քննարկվել, վերանայվել և հաստատվել են առարկայական ծրագրերը առկա և հեռակա ուսուցման համակարգում դասավանդվող առարկաների համար: Նույն նիստում վերանայվել և հաստատվել են ավարտական և կուրսային աշխատանքների թեմաները և ղեկավարները, ամփոփիչ ավարտական քննության հարցաշարերը:

Ուսումնական պլանի համաձայն՝ 3-րդ կուրսի կուրսային աշխատանքները և 4-րդ կուրսի ավարտական աշխատանքների թեմաները լեզվաբանությունից են, իսկ 4-րդ կուրսի կուրսային աշխատանքները  ֆրանսիական գրականությունից: Հստակեցվել են խորհրդատվության օրերը և ժամերը:

Ուսումնական տարվա առաջին շաբաթում ուսանողները ստացել են ընթացիկ և հանրագումարային քննությունների հարցաշարերը: Որոշում է կայացվել ամբողջական թեստային համակարգից անցում կատարել մասնակի թեստային կարգի` ավելի արդարացի և արդյունավետ դարձնելու գնահատումը: Կազմվել են փոխադարձ դասալսումների և անհրաժեշտության դեպքում բացակա դասախոսներին փոխարինելու գրաֆիկները:

Հաշվի առնելով այն հանգամանքը, որ օտար լեզուն, մասնագիտություն լինելուց բացի, դարձել է միջոց այլ մասնագիտությունների համար, խնդիր է դրվել մեծ ուշադրություն դարձնել ոչ մասնագիտական բաժիններում ֆրանսերենի ուսուցման արդյունավետության բարձրացմանը:

Ամբիոնի 3 աշխատակիցներ հոդվածներ են ուղարկել «Ակունքում» տպագրելու համար: Ամբիոնը ավարտին է հասցրել 2018-22 թվականների կրթական չափորոշիչները, 2016-17 թվականների ուսումնական պլանները: Դասախոս Ս.Օհանյանը պատրաստում է «Ֆրանսահայ մեծերը» խորագրով միջոցառում:

Հոկտեմբերի 17-ին ամբիոնը կազմակերպել է հանդիպում ՀՀ արտգործնախարարի` ֆրանկոֆոնիայի հարցերով խորհրդական Վահագն Աթաբեկյանի հետ: Հանդիպմանը մասնակցել են «Ֆրանսերեն լեզու և գրականություն», «Անգլերեն լեզու և գրականություն» մասնագիտությունների տարբեր կուրսերի ուսանողներ, Ֆրանսերեն լեզվի և գրականության ամբիոնի դասախոսները: ՀՀ արտգործնախարարի խորհրդականի հետ հանդիպման նպատակն էր մասնաճյուղի ուսանողներին ծանոթացնել Ֆրանսիա-Հայաստան միջազգային կապերին, Վալանս-Իջևան բարեկամության պատմությանը, ուսանողների փոխանակման ծրագրերին, ինչպես նաև քննարկելու 2018թ. Հայաստանում կայանալիք Ֆրանկոֆոնիայի միջազգային կազմակերպության XVII-րդ գագաթնաժողովին վերաբերող հարցեր: Հանդիպման ընթացքում ուսանողները ցանկություն հայտնեցին որպես կամավորներ աշխատել հաջորդ տարի Երևանում անցկացվելիք գագաթնաժողովի շրջանակներում: Համագործակցությունը խորացնելու նպատակով որոշվել է ԵՊՀ Իջևանի մասնաճյուղում ստեղծել Ֆրանկոֆոնիայի երիտասարդական կենտրոն:

2017-18 ուստարվա առաջին կիսամյակում (սեպտեմբեր-հոկտեմբեր ամիսներին) Ֆրանսերեն լեզվի և գրականության ամբիոնի կողմից իրականացված աշխատանքները գնահատվեցին բավարար:

2017թ. հոկտեմբերի 25-ին ԵՊՀ Իջևանի մասնաճյուղում կայացավ ինտելեկտուալ խաղ, որը կազմակերպել էր Ուսանողական գիտական ընկերությունը:

Ինտելեկտուալ խաղին մասնակցում էին «Ինֆորմատիկա և կիրառական մաթեմատիկա» մասնագիտության 3-րդ, «Քարտեզագրություն և կադաստրային գործ» մասնագիտության 3-րդ, «Ֆինանսներ» 1-ին և «Տնտեսագիտության տեսություն» 2-րդ կուրսերի՝ 4 հոգուց բաղկացած թիմերը:

Խաղը վարում էր ԵՊՀ ԻՄ-ի ՈՒԳԸ նախագահի ԺՊ Հրանտ Ղարագյոզյանը:

Նախաձեռնության նպատակն էր նոյեմբերին կայանալիք թիմային խաղի մասնաճյուղային առաջնությունից առաջ ստուգել երկու ֆակուլտետների ուսանողների պատրաստվածությունը և հետաքրքիր դարձնել ուսանողների առօրյան:

Խաղն ընթացավ թեժ պայքարում:

1 միավորի առավելությամբ հաղթող ճանաչվեց «Քարտեզագրություն և կադաստրային գործ» մասնագիտության 3-րդ կուրսի թիմը:

Հաղթող թիմը ստացավ պատվոգիր և մրցանակ՝ «Այլ կերպ» խաղի տեսքով: