2017թ. հոկտեմբերի 16-ին ԵՊՀ ԻՄ-ի «Տնտեսագիտության տեսություն» մասնագիտության IV կուրսի ուսանողները՝ տվյալ մասնագիտության կրթական ծրագրի պատասխանատու, տնտ. գիտ. թեկն., ասիստենտ Գ.Ավետիսյանի նախաձեռնությամբ, նույն ամբիոնի դասախոս Ա.Եգանյանի և հասարակայնության հետ կապերի և մամուլի պատասխանատու Հ.Վանյանի ուղեկցությամբ ճանաչողական այց կատարեցին ՀՀ կենտրոնական բանկի Դիլիջան ուսումնահետազոտական կենտրոն:

Նախ՝ կենտրոնում ուսանողները հանդիպեցին ԿԲ վիճակագրության վարչության պետ Գագիկ Աղաջանյանին և ԵՊՀ ԻՄ-ի ընդհանուր տնտեսագիտության ամբիոնի դասախոս, ԿԲ դրամավարկային և ֆինանսական վիճակագրության  բաժնի պետ Ա.Ղալթախչյանին:

Գ.Աղաջանյանը  ուսանողներին ներկայացրեց ՀՀ ֆինանսական համակարգում ԿԲ-ի ունեցած դերը, գործառույթները, առանձնապես կարևորեց գների կայունացման խնդիրը, որը պետության մակրոտնտեսական կայունացման և տնտեսական աճի հիմքն է: Խոսելով Կենտրոնի վիճակագրական վարչության խնդիրների և իրականացվող գործառույթների մասին՝ Գ.Աղաջանյանն ընդգծեց վիճակագրության կարևորությունը դրամավարկային քաղաքականության իրականացման հարցում:

Այնուհետև «Գիտելիք հանուն զարգացման» կենտրոնի ղեկավարի տեղակալ Գայանե Շիմշիրյանը ուսանողներին ներկայացրեց շինության կառուցվածքը, նրանց հետ շրջեց Գիտահետազոտական կենտրոնի տարբեր բաժիններով՝ ուսանողներին հնարավորություն տալով ծանոթանալու նրանց գործունեությանը:

Ուսանողներն այցելեցին ԿԲ-ի դրամագիտական  թանգարան, որտեղ համակարգող-էքսկուրսավար Շուշաննա Սարատիկյանը նրանց ներկայացրեց դրամի պատմությունը,  թանգարանում առկա դրամագիտական նմուշների ընդարձակ և հարուստ հավաքածուն՝ ընդգծելով  դրանց պատմամշակութային արժեքը,   ԿԲ-ի՝  տարբեր միջազգային մրցույթներում շահած  մրցանակները:

Ա.Ղալթախչյանը ուսանողների հետ խոսեց նրանց ստացած գիտելիքների և տպավորությունների մասին: Նա ընդգծեց ԿԲ-ում աշխատելու առավելությունները, ապագա տնտեսագետներին կոչ արեց դառնալ լավ մասնագետներ՝ հավելելով, որ կադրային քաղաքականության հարցում Կենտրոնական բանկը առաջնային է համարում ոչ այնքան աշխատանքային փորձը, որքան մասնագիտական կարողությունները:

Ճանաչողական այցի ընթացքում մեր ուսանողները տվեցին իրենց հետաքրքրող հարցերը, ստացան սպառիչ պատասխաններ և ամրապնդեցին իրենց գիտելիքները: 

2017թ. հոկտեմբերի 11-12-ին Երևանի Վալերի Բրյուսովի անվան պետական լեզվահասարակագիտական համալսարանում կայացավ «Պլուրիմոբիլ՝ բազմալեզվական և միջմշակութային ուսուցում շարժունության միջոցով» (“Plurimobil: Plurilingual and Multicultural Learning through Mobility”)  վերապատրաստման միջազգային դասընթացը, որը կազմակերպել էին Ժամանակակից լեզուների եվրոպական կենտրոնը և Վ.Բրյուսովի անվան պետական լեզվահասարակագիտական համալսարանը:

Երկօրյա վերապատրաստական դասընթացը վարեցին Ժամանակակից լեզուների եվրոպական կենտրոնի (European Centre for Modern Languages, ECML) ներկայացուցիչներ Քրիստին Բրոգանը (Իռլանդիա) և Անյա Զուրան (Լեհաստան):

Դասընթացին մասնակցում էին ընտրված 30 ուսանողներ և դասախոսներ` Երևանի Վալերի Բրյուսովի անվան պետական լեզվահասարակագիտական համալսարանից, Երևանի պետական համալսարանից, ԵՊՀ Իջևանի մասնաճյուղից, Երևանի Խաչատուր Աբովյանի անվան հայկական պետական մանկավարժական համալսարանից, կամավորներ Իտալիայից և Գերմանիայից:

ԵՊՀ Իջևանի մասնաճյուղից դասընթացին մասնակցեցին Անգլերեն լեզվի և գրականության ամբիոնի վարիչ Ք.Հարությունյանը, մասնագիտության կրթական ծրագրի պատասխանատու Ա.Սիմոնյանը:

Վերապատրաստման դասընթացի նպատակն էր իրազեկել կրթության ոլորտի ներկայացուցիչներին և ուսուցիչներ վերապատրաստողներին ուսանողների ու աշխատակազմի շարժունության հնարավորություննների և դրանց նախապես պատրաստվելու վերաբերյալ:

Դասընթացի առաջին օրը ԺԼԵԿ փորձագետները ուղիղ կապի միջոցով միացան Գերմանիա և մասնակիցներին ներկայացրին դասընթացի նպատակը, խնդիրներն ու ռեսուրսները:

Երկրորդ օրը մասնակիցները բաժանվեցին աշխատանքային խմբերի, փորձեցին փոխանցել իրենց ունեցած դրական փորձը և լուծումներ առաջարկել հնարավոր խնդիրների առաջացման դեպքում, ինչպես նաև ներկայացրին իրենց խմբի կատարած վերլուծական աշխատանքը:

Միջազգային վերապատրաստման դասընթացի վերջում մասնակիցներին տրվեցին հավաստագրեր:

2017թ. հոկտեմբերի 11-ին և 12-ին ԵՊՀ Իջևանի մասնաճյուղի բնական գիտությունների ֆակուլտետում տեղի ունեցավ «ԲԻ, ԲԻ, ՍԻ: ՄԱԹԵՄԱՏԻԿԱՅԻ ՊԱՏՄՈՒԹՅՈՒՆ» չորս մասից բաղկացած փաստագրական ֆիլմի 1-ին և 2-րդ մասերի ցուցադրություն-քննարկումը, որը կազմակերպել էր ֆակուլտետի ուսանողական գիտական ընկերությունը (ՈՒԳԸ):

Ներկա էին ոչ միայն Բնական գիտությունների ֆակուլտետի տարբեր մասնագիտությունների, այլև Տնտեսագիտության ֆակուլտետի ուսանողներ:

Նրանք, ովքեր հնարավորություն չեն ունեցել ներկա գտնվելու ֆիլմի 1-ին և 2-րդ մասերի ցուցադրություններին, ֆիլմը կարող են դիտել այստեղից.

Ֆիլմի 3-րդ և 4-րդ մասերի ցուցադրությունը տեղի կունենա ս.թ. հոկտեմբերի 17-ին` ժամը 14:10-ին, Բնական գիտությունների ֆակուլտետի թիվ 5 լսարանում:

Բոլոր ցանկացողներին սիրով հրավիրում ենք:

2017թ. հոկտեմբերի 12-ին ԵՊՀ Իջևանի մասնաճյուղ այցելեցին ՀՀ-ում Գերմանիայի դեսպանության մշակութային հարցերի կցորդ (պատասխանատու) Աննեմարի Քուլմանը, Գերմանիայի Ակադեմիական փոխանակման ծառայության (DAAD)-ի երևանյան տեղեկատվական կենտրոնի տնօրեն Սիլվիա Շմիդը, կրթաթոշակային ծրագրերի գլխավոր խորհրդատու Մերի Նավասարդյանը, Գյոթե ինստիտուտի հայաստանյան ներկայացուցիչ Դանա Շլուխտմանը: 

Այցելության հիմնական նպատակն էր ԵՊՀ ԻՄ-ի ուսանողներին ներկայացնել Գերմանիայի Ակադեմիական փոխանակման ծառայության (DAAD)-ի կրթական ծրագրերը՝ նախատեսված հայ ուսանողների (բակալավրիատի և մագիստրատուրայի), շրջանավարտների, հետազոտողների ու դասախոսների համար: 

Նախ՝ տեղի ունեցավ մասնաճյուղի տնօրեն Ս. Ա. Առաքելյանի հետ հանդիպում, որին մասնակցեց և Բնական գիտությունների ֆակուլտետի դեկան Մ.Զաքարյանը, ով Հումբոլդ միության անդամ է, արդեն մի քանի տարի ընդգրկված է գերմանական գիտահետազոտական ծրագրերում (2002թ. եղել է DAAD-ի կրթաթոշակառու, 2004-2006 թթ. և 2017թ. (3 ամիս) մասնակցել է Ալեքսանդր ֆոն Հումբոլդ (գերմ.՝ Alexander von Humboldt-Stiftung) հիմնադրամի գիտահետազոտական ծրագրերին: 

Հանդիպման ընթացքում ներկայացվեցին կրթական և գիտամշակութային գործունեություն իրականացնող երկու հաստատությունների (Գյոթե ինստիտուտի և ԵՊՀ Իջևանի մասնաճյուղի) առաքելությունները, հիմնական խնդիրները, գործող ֆակուլտետներն ու մասնագիտությունները:

Քննարկվեցին ուսանողների փոխանակման ծրագրեր իրականացնելու վերաբերյալ մի շարք հարցեր, ուրվագծվեցին երկկողմ համագործակցության եզրերն ու հեռանկարները: Հայ-գերմանական համագործակցությունը սերտացնելու, լեզվամշակութային հաղորդակցությունը խորացնելու նպատակով տնօրենը հյուրերին առաջարկեց ՀՀ-ում Գերմանիայի դեսպանատանը քննարկել մեզ մոտ գերմաներեն լեզվի ուսուցման կենտրոն ստեղծելու մասին հարցը:

Այնուհետև կայացավ ԵՊՀ ԻՄ-ի ուսանողների հետ հանդիպում, որի ընթացքում գերմանական պատվիրակության ներկայացուցիչները շնորհանդեսների ուղեկցությամբ, առանձին զեկուցումներով ներկայացրին Գերմանիայում գործող բակալավրական, մագիստրոսական և ասպիրանտական ուսուցման պայմանները, անվճար ուսուցման հնարավորությունները:

Հյուրերը հանգամանորեն ներկայացրին Գերմանիայի Ակադեմիական փոխանակման ծառայության (DAAD)-ի կրթաթոշակային և դրամաշնորհային ծրագրերը հայերի համար, գործող կայքերի ու էլեկտրոնային գրադարանների հասցեները և այլն:

Ուսանողներին նաև տրվեցին ներկայացված կրթական ծրագրերի վերաբերյալ մանրամասն տեղեկատվություն պարունակող քառալեզու (գերմաներեն, անգլերեն, ռուսերեն, հայերեն) գրքեր, ամսագրեր, բուկլետներ, բրոշյուրներ:

Գերմանական պատվիրակության ներկայացուցիչները ԵՊՀ Իջևանի մասնաճյուղից հեռացան ջերմ տպավորություններով, համագործակցության ծրագրերի և ԵՊՀ ԻՄ-ի ներկայացուցիչների պատասխան այցի ակնկալիքով:

2017թ. հոկտեմբերի 7-ին ԵՊՀ Իջևանի մասնաճյուղում կայացավ Գրադարանավարի օրվան նվիրված միջոցառում, որը կազմակերպվել էր մասնաճյուղի գրադարանի վարիչ Վլադիմիր Պողոսյանի նախաձեռնությամբ և տնօրենության աջակցությամբ:

Միջոցառմանը ներկա էին բուհի տնօրեն Ս. Ա. Առաքելյանը, Հումանիտար գիտությունների ֆակուլտետի դեկան Ա.Ներսիսյանը, Տնտեսագիտության ֆակուլտետի դեկան Ն.Խուդավերդյանը, վարչական անձնակազմի այլ ներկայացուցիչներ, դասախոսներ և ուսանողներ:

Բացման խոսքով հանդես եկավ գրադարանի վարիչ Վ.Պողոսյանը` ներկայացնելով, որ ՀՀ կառավարության որոշմամբ` 2004 թվականից Հայաստանի Հանրապետությունում հոկտեմբերի 7-ը պաշտոնապես նշվում է որպես «Գրադարանավարի օր»: Այդ կապակցությամբ շնորհավորեց բուհի բոլոր գրադարանավարներին, ընդգծեց նրանց դերն ու նշանակությունը սերունդների հոգևոր զարգացման գործում. «Գրադարանները ազգերի, անշուշտ, նաև հայերի հոգևոր կյանքի և մշակույթի զարգացման մեջ կատարել ու այսօր էլ կատարում են անփոխարինելի դեր: Յուրաքանչյուր գրադարան կոչված է իրականացնելու իրեն հատուկ գործառույթները՝ պատմամշակութային, տեղեկատվական, հաղորդակցական, տեխնոլոգիական, մանկավարժական, վիճակագրական, սպասարկման և այլն: Մեր գրադարանի առաջնահերթ խնդիրն է կազմակերպել իր գրականության վերաբերյալ տեղեկատվություն՝ ընթերցողներին լավագույնս սպասարկելու համար: Եվ այս գործում անփոխարինելի է գրադարանավարի դերը, որի հոգածությունը գրքի և ընթերցողի նկատմամբ չափազանց կարևոր է: Շնորհավորում եմ բոլորիս գրադարանավարի օրվա կապակցությամբ` գրադարանի աշխատակազմին մաղթելով  աշխատանքային նվիրում, անհնարինը հնարավոր դարձնելու հաստատուն կամք»:

Տնօրեն Ս.Առաքելյանը, շնորհավորելով գրադարանավարների տոնը, մասնավորապես նշեց. «Խորհրդային ժամանակաշրջանում հասարակության ամենապահանջված, ամենակարևոր անձը գրադարանավարն էր, ով մտավորականի ամենավառ կերպարն էր` իր ապրելակերպով, նախասիրություններով, արժեհամակարգով: Այսօր էլ գրադարանավարի գործառույթը հսկայական է, քանի որ նա պարտավոր է գրքի և ընթերցողի միջև ձևավորել հոգևոր, կայուն կապ, որպեսզի յուրաքանչյուր գրքի հետ ընթերցողին փոխանցվի ավելին իմանալու, գիտության գաղտնիքներին տիրապետելու կամք: Գրադարանը համալսարանական կյանքի, ուսումնագիտական գործընթացի անբաժան մասն է, իսկ գրադարանավարը այդ անխախտ գործընթացն ապահովողը»:

Բարձր գնահատելով մասնաճյուղի երկարամյա անձնվեր գրադարանավարներ Ալվինա Առուստամյանի, Անահիտ Անտոնյանի և Հասմիկ Օհանյանի աշխատանքը` պարոն Առաքելյանը տնօրենության անունից նրանց հանձնեց շնորհակալագրեր և ԵՊՀ-ի լոգոյով գրիչ-հուշանվերներ:

Միջոցառման ընթացքում գրադարանավարներին շնորհավորանքի և երախտիքի խոսքեր ասացին Հումանիտար գիտությունների ֆակուլտետի դեկան Ա.Ներսիսյանը, Հայոց լեզվի և գրականության ամբիոնի դոցենտ Ա.Սահրատյանը և ուսանողներ: