2019թ. ապրիլի 16-ին հարցազրույց ունեցանք ԵՊՀ Իջևանի մասնաճյուղի՝ 2008թ. շրջանավարտ, «Արարատբանկ» ԲԲԸ «Իջևան» մասնաճյուղի կառավարիչ Թագվոր Արայիկի Մանթաշյանի հետ:

– Խնդրում եմ՝ նշեք Ձեր ծննդյան թիվը և վայրը:

– Ծնվել եմ 1987 թվականին Իջևան քաղաքում:  

– Պատմեք, խնդրում եմ, Ձեր ընտանիքի մասին:

– Ծնողներս մասնագիտությամբ ճարտարագետներն են, հայրս՝ էլեկտրաարդյունաբերության, մայրս՝ սննդի արդյունաբերության ոլորտներում: Եղբայրս՝ Վաղինակ Մանթաշյանը, ավարտել է ԵՊՀ ԻՄ-ի բնական գիտությունների ֆակուլտետի «Կիրառական մաթեմատիկա և ֆիզիկա» մասնագիտության բակալավրիատը, այժմ աշխատում է որպես ճարտարագետ:

– Փոքր հասակում ի՞նչ եք երազել դառնալ:

– Նախադպրոցական տարիքում երազում էի դառնալ կռունկավար, ավելի ուշ՝ օդաչու:

– Ի՞նչ կրթություն եք ստացել:

– Ավարտել եմ Իջևանի թիվ 5 միջնակարգ դպրոցը: 2008 թվականին ավարտել եմ ԵՊՀ ԻՄ-ի բնական գիտությունների ֆակուլտետը և ստացել բակալավրի աստիճան: 2010 թ.-ին ավարտել եմ ԵՊՀ ֆիզիկայի ֆակուլտետը՝ ստանալով մագիստրոսի աստիճան:

– Ի՞նչ դեր է խաղացել ԵՊՀ ԻՄ–ում ստացած կրթությունը Ձեր կյանքում:

– ԵՊՀ ԻՄ-ում ստացած կրթությունը իմ գիտելիքների և հմտությունների հիմքն է: Մասնավորապես ճշգրիտ գիտությունների ուսումնասիրությունը տվեց մտքի ճկունություն, արագ կողմնորոշվելու ունակություն և ռացիոնալ մտածողություն:

– Ի՞նչ աշխատանքային փորձ ունեք:

– Աշխատանքային փորձս սկսվել է «Արարատբանկ» ԲԲԸ «Իջևան» մասնաճյուղում՝ նախ որպես վարկային մասնագետ, ապա կառավարչի տեղակալ և այժմ որպես կառավարիչ: 

– Ո՞րն է Ձեր ամենասիրելի գիրքը:

– Հանս Վերներ Ռիխտերի «Մի սպանաներ» վեպն է, որը ես կարդացի զինվորական ծառայության ժամանակ: 

– Ո՞րն է Ձեր կարդացած վերջին գիրքը:

– Եթե չնշեմ մասնագիտական գրականությունը, ապա Բուկեր Վաշինգտոնի “Up from Slavery” գիրքն է:

– Ի՞նչ երաժշտություն եք նախընտրում, և ո՞րն է Ձեր սիրած երգը:

– Երաժշտության նախընտրելի ոճ չունեմ: Սիրելի երգերի ցանկը բազմազան է: Կառանձնացնեմ ուկրաինական և լեհական ժողովրդական երգերը, որոնք վերջին շրջանում սկսել եմ լսել մեծ հաճույքով:

– Ո՞րն է Ձեր սիրած ֆիլմը:

– ԽՍՀՄ ֆիլմերից կառանձնացնեմ «Հարսնացուն հյուսիսից», «Մենք ենք, մեր սարերը» ֆիլմերը, իսկ ժամանակակից ֆիլմերից՝ «Իններորդ վաշտ», «Փախուստ Շոուշենկից», «Հրով և սրով» ֆիլմերը:

– Ունե՞ք նախընտրելի մարզաձև:

– Նախընտրում եմ ֆուտբոլ:

– Ո՞րն է Ձեր սիրած վայրը Հայաստանում և արտերկրում:

– Հայաստանում՝ Լաստիվերը, Դադիվանքը, Տաք ջուրը՝ Իստիսուն (Արցախն էլ է Հայաստան): Արտերկրում շատ չեմ եղել: Այցելածս վայրերից կնշեմ Մցխեթան, Մոսկվան, Տուապսեն: Կցանկանայի տեսնել Հռոմը, Յելոուսթոուն պարկը:

– Ո՞ր հատկանիշներն եք գնահատում մարդկանց մեջ:

– Ազնվությունը, հայրենասիրությունը, պարկեշտությունը:

– Ունե՞ք նախընտրած ասույթ կամ կարգախոս, որով առաջնորդվում եք:

– Կարգախոսներով չեմ առաջնորդվում:

– Ի՞նչ երբեք չեք անի:

– Երբեք չես իմանա, թե որ իրավիճակում ինչպես կվարվես:

– Ինչի՞ց եք վախենում:

– Վախերի մասին չեմ մտածել:

– Ինչի՞ համար եք ափսոսում:

– Չեմ ափսոսում:

– Ի՞նչն է օգնում Ձեզ որոշում կայացնել դժվարին իրավիճակներում:

– Խնդրին բազմակողմանի և խորը նայելը, փորձն ու նախադեպը, ռիսկերի ճիշտ գնահատումը:  

– Ի՞նչն եք համարում Ձեր կյանքի ամենամեծ ձեռքբերումը:

– Ընտանիքս, հարազատներս և ընկերներս:

– Ո՞րն է  հաջողության հասնելու Ձեր բանաձևը:

– Աշխատասիրությունը, նպատակասլացությունը, ինքնակրթությամբ զբաղվելը, դժվարություններից չվախենալը:

– Ո՞րն է Ձեր ստացած ամենաթանկ խորհուրդը:

– Խորհուրդներ շատ եմ ստացել: Դժվարանում եմ առանձնացնել մեկը: Յուրաքանչյուրից մի օգտակար բան եմ քաղել:

– Ո՞րն է այն հիմնական խորհուրդ–պատգամը, որ Դուք կտաք երիտասարդներին (մասնավորապես՝ ԵՊՀ ԻՄ-ի ուսանողներին):

– Երիտասարդներին՝ մասնավորապես ԵՊՀ ԻՄ-ի ուսանողներին, խորհուրդ կտամ օգտագործել ամեն մի պահ՝ նոր բան սովորելու համար, դասապրոցեսից քաղել առավելագույնը: Սրընթաց փոխվող աշխարհում գիտելիքն ու ինֆորմացիան առաջնային են, ուստի անհրաժեշտ է անընդհատ ինքնակրթվել: Սիրելի՛ ուսանողներ, մի՛ վախեցեք սխալվել, քանի որ չի սխալվում նա, ով ոչինչ չի անում:   

– Շատ շնորհակալ ենք հարցազրույցի համար:

Հարցազրույցը վարեց ԵՊՀ ԻՄ–ի հասարակայնության հետ

կապերի և մամուլի պատասխանատու Հասմիկ Վանյանը:

 2019թ. ապրիլի 15-ին ԵՊՀ իջևանի մասնաճյուղի գրադարանում տեղի ունեցավ ամերիկաբնակ գրող Վարդգես Դավթյանի՝ վերրջին տարիներին հրատարակած գրքերի շնորհանդեսը, որը կազմակերպվել էր Տավուշի մարզային և ԵՊՀ Իջևանի մասնաճյուղի գրադարանների համատեղ նախաձեռնությամբ:

Ներկա էին Տավուշի մարզային գրադարանի աշխատակիցները, ԵՊՀ ԻՄ-ի վարչական և պրոֆեսորադասախոսական անձնակազմի անդամներ, ուսանողներ, հյուրեր:

Շնորհանդեսի բացման խոսքով հանդես եկավ ԵՊՀ Իջևանի մասնաճյուղի գրարանի վարիչ Վլադիմիր Պողոսյանը. «Այսօր հեռահայաց փորձ կատարենք հաղորդակցվել, անդրադառնալ գրող, հրապարակախոս, հոգեբույժ Վարդգես Դավթյանի գրական վաստակին: Վարդգես Դավթյանը, լինելով մասնագիտությամբ բժիշկ, հոգեբույժ, փորձ կատարեց իր մասնագիտական հայացքներին տալ գեղարվեստական կերպավորում և հանձնել թղթին: Գրող Վարդգես Դավթյանը տպագրվում է 1988 թվականից («Անդրանիկ Մեհրաբյան, Երևան, 1988, «Հոգեբույժը հրավիրում է զրույցի», Երևան, 1992, «Մտավորականը և նևրոզը», Երևան, 1994, «Ինչու խելագարվեց Անուշը», Երևան, 1994 և այլն): Հատկապես ուշագրավ են Վարդգես Դավթյանի ամերիկյան շրջանի ստեծագործություններն ու գրքերը («Կանգնեցեք աշխարհ, ես ուզում եմ իջնել», Լոս Անջելես, 2002, «Ամերիկահայ տղամարդկանց պերճանքն ու թշվառությունը», Լոս Անջելես, 2004, «Լեգիտիմ կատակներ լրջանալու պահին», Լոս Անջելես, 2012, «Հեքիաթներ Ամերիկայի մասին», Լոս Անջելես, 2017, «Մտորումներ թամբի վրա», Երևան, 2016, «Կնքամայրը», Լոս Անջելես, 2017)»:

Տավուշի մարզային գրադարանի տնօրեն Ա.Ղուկասյանը իր խոսքում կարևորեց Վարդգես Դավթյան գրողի և ընթերցողի կապի անհրաժեշտությունը՝ նշելով, որ ընթերցողը Վարդգես Դավթյանի ստեղծագործությունների միջոցով հայտնվում է Ամերիկայի հայ իրականության մեջ, գիտակցում հայապահպանության և ազգային արժեքների կորստյան վտանգը:

Վարդգես Դավթյանի «Հեքիաթներ Ամերիկայի մասին» աշխատությունը գրականագիտական վերլուծության ենթարկեց ԵՊՀ ԻՄ-ի հայոց լեզվի և գրականության ամբիոնի դոցենտ Աիդա Սարհատյանը. «Վարդգես Դավթյան արձակագիրը նոր անուն է մեր  գրականության մեջ. նա իր ստեղծագործությունների ժողովածուներով ընթերցողի առաջ նոր գույներով ու բովանդակությամբ է ներկայացնում օվկիանոսից այն կողմ գտնվող մի երկիր, որ շատերի համար երկիր դրախտավայր է, խորհրդանիշն ազատության ու հարստացման, ոմանց համար հուսախաբությամբ  ու հուսալքությամբ, նաև   կարոտաբաղձությամբ լեցուն  օտար մի աշխարհ,  ոմանց համար էլ մայր հայրենիքում ծայր աղքատության մեջ թողած ընտանիքը  ոտքի կանգնեցնելու  միջոց,  սոցիալական ծանրագույն վիճակից դուրս բերող  հույսի ու հավատի ճառագայթ…

Ահա «Հեքիաթներ Ամերիկայի մասին» հոգեբանական ճեպանովելները, որոնք ճանաչողական ու դաստիարակչական արժեք են ներկայացնում… Պայծառ չեն գույները, պատկերներից լույս չի ճառագում… բարին չի հաղթում չարին, անիրական ու հնարովի  դեպքեր ու դեմքեր  չկան: Հերոսներին  կյանքը նետել է  Ամերիկա, ու  թեև հիվանդ ու միայնակ, բայց  ապրում են  նրանք լավ ապրելու հեռանկարով՝  կարոտ մարդկային սիրո ու ջերմության…»:

«Մտորումներ թամբի վրա» աշխատությանն անդրադարձավ ԵՊՀ ԻՄ-ի հայոց լեզվի և գրականության ամբիոնի դոցենտ Ալիսա Հասանյանը՝ իր խոսքում շեշտելով. «Ինձ համար շատ հետաքրքիր է ճեպանովելի ժանրը: Հեղինակն իր ապրածը, զգացածը, տարիների նստվածքը հետաքրքիր կերպով վերարտադրել է իր փոքրիկ ակնարկ-զրույցներում, որոնք ավանդականի, գեղեցիկի, մարդկային նուրբ արդյունքների ինքնատիպ հյուսվածք են: Ակնառու է այն ուժեղ հոգեվերլուծությունը, որով նա բացահայտում է իր հերոսներին, նրանց ներաշխարհը: Հեղինակի հոգում յուրովի են բեկվում մեր ժամանակների հասարակական-քաղաքական իրողությունները, որոնք գեղարվեստական վերարտադրությամբ յուրօրինակ ակնարկներն են: Օրերի և տարածության հեռվից նա հոգով իր բնաշխարհի հետ է ու պահպանում  է հոգու մեջ եղած հայկականն ու ավանդականը: Լավ է, որ «Երկիր դրախտավայր»-ի բնակչին «Ապակե գազանանոցը» չի կլանել… Ասում են՝ հիշողությունը սրտի երգ է, որի ձայնը չի լսվում. երգում ես ինքդ քեզ համար. Դավթյանի գրքերում լսում ես այդ երգը…»:

Վերջին՝ «Կնքամայրը» գրքին անդրադարձավ Տավուշի մարզային գրադարանի աշխատակից, ԵՊՀ ԻՄ-ի շրջանավարտ Լիանա Բազինյանը:

 2019թ. ապրիլի 3-12-ը ԵՊՀ ԻՄ-ի ուսումնամեթոդական վարչության աշխատակիցները և տարբեր ամբիոնների դասախոսներ մասնագիտական կողմնորոշման զրույցներ ունեցան Իջևանի շրջանի 4 գյուղերի, Այրում խոշորացված համայնքի, Բերդի տարածաշրջանի 3 գյուղերի, Գեղարքունիքի մարզի Ծովագյուղի միջնակարգ դպրոցների և Դիլիջանի ավագ դպրոցի 11-րդ և 12-րդ դասարանների աշակերտների հետ:

Սարիգյուղի և Խաշթառակի միջնակարգ դպրոցներում զրույցներ վարեց Տուրիզմի կառավարման և մշակութաբանության ամբիոնի ասիստենտ Պավել Ասիլբեկյանը:

Այրումի, Արճիսի, Պտղավանի և Բագրատաշենի միջնակարգ դպրոցներում հանդիպումներ ունեցան Մասնագիտական կողմնորոշման և պրակտիկայի կազմակերպման բաժնի վարիչ, պ.գ.թ, ասիստենտ Լիաննա Բեգինյանը և նույն բաժնի տեսուչ, Ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը:

Ծովագյուղի միջնակարգ և Դիլիջանի ավագ դպրոցների աշակերտների, Դիլիջանի պետական և Դիլիջանի պետական բժշկական քոլեջների ուսանողների հետ հանդիպումներ ունեցան Ուսումնամեթոդական վարչության պետ Արկադի Դավթյանը և ՄԿՊԿ բաժնի վարիչ Լիաննա Բեգինյանը:

Վազաշենի, Պառավաքարի և Վ.Ծաղկավանի միջնակարգ դպրոցներում հանդիպումներ ունեցան Հայոց լեզվի և գրականության ամբիոնի դոցենտ, բ.գ.թ. Ալիսա Հասանյանը ու Հայոց պատմության և հասարակագիտության ամբիոնի դասախոս Վլադիմիր Պողոսյանը:

ՄԿՊԿ բաժնի տեսուչ, Ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը, ով ներկա էր վերոնշյալ դպրոցների մեծ մասում կայացած հանդիպումներին, նաև հանդիպումներ ունեցավ Ն.Ծաղկավանի և Տավուշի միջնակարգ դպրոցներում:

Հանդիպումների ժամանակ ԵՊՀ ԻՄ-ի աշխատակիցները ներկայացրին բուհում գործող մասնագիտությունները և դրանց ընձեռած հնարավորությունները, բաժանեցին բուկլետներ և տեղեկատվական թերթիկներ, պատասխանեցին աշակերտների հարցերին: