Երևանի պետական համալսարանի Իջևանի մասնաճյուղ

Monthly Archives: February 2021

ՆՈՐԱՐԱՐԱԿԱՆ ԳԻՏԵԼԻՔԻ ՀԱՆԳՈՒՅՑԻ (ՀԱԲ) ԱՇԽԱՏԱՆՔՆԵՐԸ ՀԱՄԱԿԱՐԳՈՂԻ ԹԱՓՈՒՐ ՊԱՇՏՈՆԻ ՄԱՍԻՆ ՀԱՅՏԱՐԱՐՈՒԹՅՈՒՆ

ԵՊՀ ԻՄ-ում աշխատանքի հայտ. նկար

Աշխատանքի նկարագրություն

«Երևանի պետական համալսարան» հիմնադրամի Իջևանի մասնաճյուղն աշխատանքի է հրավիրում մինչև 29 տարեկան իգական սեռի ներկայացուցչի՝ Նորարարական Գիտելիքի Հանգույցի (ՀԱԲ) աշխատանքները համակարգողի պաշտոնը զբաղեցնելու համար:

 

Աշխատանքային պարտականություններ.

  • կազմակերպել և համակարգել ՀԱԲ-ի աշխատանքները,
  • համակարգել իրականացվելիք դասընթացները և դրանց կազմակերպչական աշխատանքները,
  • կազմել ՀԱԲ-ի գործունեության աշխատանքային պլան և հետևել դրանով նախատեսված գործողությունների իրականացմանը սահմանված ժամկետում,
  • իրականացնել ՀԱԲ-ի փաստաթղթաշրջանառությունը,
  • կազմակերպել ՀԱԲ-ի զարգացմանը միտված տարատեսակ միջոցառումներ,
  • կապեր հաստատել գործընկեր կազմակերպությունների և հանրապետությունում գործող այլ ՀԱԲ-երի հետ,
  • ապահովել միջազգային դոնոր կազմակերպությունների հետ համագործակցության, հանդիպումների կազմակերպման, բանակցությունների վարման, համաձայնագրերի նախագծերի պատրաստման, ընթացիկ նամակագրության ապահովման աշխատանքները։

Անհրաժեշտ հմտություններ և կարողություններ.

  • բարձրագույն կրթություն,
  • առնվազն 1 տարվա աշխատանքային փորձ (նախընտրելի է հասարակական աշխատանքի ոլորտում),
  • թիմում աշխատելու կարողություն,
  • սահմանված ժամկետները պահպանելու ունակություն,
  • ժամանակի կառավարման հմտություն,
  • պատասխանատվության բարձր զգացում,
  • համակարգչային տեխնիկայի, հեռահաղորդակցման և կապի միջոցների շահագործման կանոնների իմացություն,
  • MS office ծրագրային փաթեթի իմացություն,
  • հայերենի գերազանց իմացություն,
  • օտար լեզուների իմացություն:

Լրացուցիչ տեղեկություն

Դիմել կարելի է մինչև ս.թ. մարտի 5-ը ijevan@ysu.am էլեկտրոնային հասցեին Ձեր համառոտ ինքնակենսագրությունը (CV) ուղարկելու միջոցով՝ վերնագրում նշելով՝ «Համակարգող»: Նշված ժամկետից ուշ կամ առանց վերնագրի ուղարկված նամակները չեն դիտարկվելու:

 

Շնորհակալություն ենք հայտնում բոլոր դիմողներին հետաքրքրվածության համար և տեղեկացնում, որ հարցազրույցի կհրավիրվեն նախնական ընտրության փուլն անցած թեկնածուները:

ՄՐՑՈՒԹԱՅԻՆ ԿԱՐԳՈՎ «ԱՄԵՐԻԿՅԱՆ ՀԵՏԱԶՈՏՈՒԹՅՈՒՆՆԵՐ» (AMERICAN STUDIES) ԴՐԱՄԱՇՆՈՐՀԱՅԻՆ ԾՐԱԳՐՈՒՄ ՀԵՏԱԶՈՏՈՂ ՆԵՐԳՐԱՎԵԼՈՒ ՄԱՍԻՆ ՀԱՅՏԱՐԱՐՈՒԹՅՈՒՆ

Հետազոտողի մրցույթի հայտ. նկար

Երևանի պետական համալսարանը, ՀՀ-ում ԱՄՆ դեսպանատան կողմից ֆինանսավորվող «Ամերիկյան հետազոտություններ» (American Studies) դրամաշնորհային ծրագրի շրջանակում հայտարարում է ԵՊՀ Ամերիկյան հետազոտությունների կենտրոնի հետազոտողների մրցույթ:

 

Մրցույթի նպատակներն են՝

  • Համախմբել ամերիկագիտության կամ հարակից բնագավառների գիտահետազոտական ներուժը,
  • Ձևավորել ու զարգացնել համապատասխան գիտական միջավայր և խթանել ամերիկագիտության ոլորտում գիտահետազոտական աշխատանքների իրականացումը:

Մրցույթին մասնակցելու համար հրավիրվում են ամերիկագիտության կամ հարակից ակադեմիական գիտակարգերի բնագավառում գիտահետազոտական հետաքրքրություններ և փորձ ունեցող անձինք:

 

Մրցույթի մասնակիցներին ներկայացվող պահանջներն են.

  • Առնվազն հինգ տարվա գիտահետազոտական փորձառություն՝ ամերիկագիտության կամ հարակից բնագավառներում,
  • Գիտական աստիճան՝ հասարակական գիտությունների ոլորտում,
  • Միջազգային ակադեմիական հետազոտական փորձառությունը կդիտվի որպես առավելություն:

Մրցույթին մասնակցելու համար անհրաժեշտ է ներկայացնել`      

  • ինքնակենսագրական (CV),
  • գիտական հետաքրքրությունների շրջանակի (Statement of Interests) նկարագրություն՝ 2-3 էջի սահմանում,
  • ամերիկագիտության կամ հարակից ակադեմիական գիտակարգերի բնագավառին վերաբերող գիտական մեկ հոդվածի (կամ համապատասխան տեքստային հատվածի) օրինակ,
  • հետազոտական առաջարկ (Research Proposal)` առավելագույնը 1500 բառի սահմաններում`առաջարկված թեմատիկաներից որևէ մեկի վերաբերյալ (անգլերեն լեզվով).
  1. ԱՄՆ տարածաշրջանային քաղաքականությունը և գործընթացները/ U.S. Regional Policies and Processes/
  2. ՀՀ-ԱՄՆ. hամագործակցության ռազմավարությունները, ձևաչափերը և հայկական սփյուռքի դերը / United States and Armenia: Cooperation Frameworks, Strategies and the Role of Armenian Diaspora/
  3. ԱՄՆ քաղաքականությունը Հարավային Կովկասում / U.S. Policies in the South Caucasus/
  4. Թուրքիա – ԱՄՆ հարաբերություններ / United States -Turkey Relations/
  5. ԱՄՆ էներգետիկ քաղաքականությունը. տարածաշրջանային մոտեցումներ /U.S. Energy Policies: Regional Dimensions/
  6. ԱՄՆ միգրացիոն քաղաքականությունը. Միտումներ և առանձնահատկություններ /U.S. Immigration Policy: Policy Trends and Specifics/:

ԵՊՀ Ամերիկյան հետազոտությունների կենտրոնի թեմատիկ հետազոտողներից ակնկալվող աշխատանքային արդյունքները, ի թիվս այլնի, ներառելու է գրախոսվող ակադեմիական հրապարակում՝ հոդվածներ միջազգային պարբերականներում և «Բանբեր Երևանի Համալսարանի» գիտական հանդեսում: Միաժամանակ հետազոտողները պայմանագրի գործողության ժամկետում հանդես կգան սեմինար-ներկայացումների շարքով:

 

Մրցութային ընտրությունն իրականացվելու է ներկայացված փաստաթղթերի ուսումնասիրության արդյունքում: Ըստ անհրաժեշտության՝ կարող է անցկացվել նաև հարցազրույց:

 

Մրցույթի արդյունքում ընտրված դիմորդների հետ կնքվելու է պայմանագիր` վեց ամիս ժամկետով (երկարաձգման հնարավորությամբ):

 

Մրցույթին մասնակցելու դիմում-հայտերն անհրաժեշտ է ուղարկել էլեկտրոնային եղանակով՝ «Ամերիկյան հետազոտություններ» ծրագրի ղեկավար, պրոֆ. Ալ. Մարգարովի՝ amarkarov@ysu.am, և «Ամերիկյան հետազոտություններ» ծրագրի համակարգող, ԵՊՀ Ամերիկյան հետազոտությունների կենտրոնի տնօրեն, դոցենտ Վ.Ագլյանի՝ aglyan@gmail.com էլեկտրոնային փոստի հասցեներին:

 

 Մրցույթին մասնակցելու դիմումների ընդունման վերջնաժամկետը 2021թ. մարտի 22-ն է:

Կայացավ տնօրենության հերթական նիստը

1. գլխավոր - տնօր. նիստի նկար

2021թ. փետրվարի 16-ին տեղի ունեցավ ԵՊՀ ԻՄ-ի տնօրենության հերթական նիստը, որը նախագահում էր Ա.Մակարյանը:

Նիստում քննարկվեցին օրակարգով նախատեսված հետևյալ հարցերը.

  1. 2020-2021 ուստարվա առաջին կիսամյակի առկա քննաշրջանի ամփոփում:
  2. Հաղորդում ավարտական աշխատանքների կատարման ընթացքի մասին:
  3. 2021թ. բակալավրի կրթական ծրագրով առկա և հեռակա ուսուցման ամփոփիչ ատեստավորման հանձնաժողովների նախագահների թեկնածությունների հարցի քննարկում:
  4. Անվանական կրթաթոշակի ներկայացվող ուսանողների հարցի քննարկում:
  5. Ընթացիկ հարցեր.

5.1. ԵՊՀ  ԻՄ-ի  2021թ. բակալավրի կրթական ծրագրերի վերանայման ընթացքի մասին:

5.2. Առկա և հեռակա ուսուցման համակարգերում ուսանողների իրավունքների վերականգնման ընթացքի մասին:

5․3. ԵՊՀ ԻՄ-ի ստորաբաժանումների աշխատանքային պլանների կազմման ընթացքի մասին:

Առաջին հարցի վերաբերյալ զեկուցեց Ուսումնամեթոդական վարչության պետ Ա.Դավթյանը՝ մասնավորապես նշելով, որ 2020-2021 ուստարվա 1-ին կիսամյակի առկա ուսուցման քննաշրջանն իրականացվել է ըստ նախատեսված ժամանակացույցի՝ հունվարի 11-30-ը, ուսանողների կողմից քննությունների արդյունքների բողոքարկումներ չեն եղել: 1-ին քննաշրջանի արդյունքում ամենաբարձր առաջադիմություն ցուցաբերել են հումանիտար գիտությունների ֆակուլտետի ուսանողները (82,2%), իսկ ամենացածրը՝ բնագիտական ֆակուլտետի ուսանողները (46,6%)։ Միջին առաջադիմությունը մասնաճյուղում կազմել է 76.7%:

Որոշվեց 2020-2021 ուստարվա առաջին կիսամյակի առկա քննաշրջանի ամփոփման մասին ԵՊՀ ԻՄ-ի ՈՒՄՎ պետ Ա.Դավթյանի հաղորդումն ընդունել ի գիտություն:

Երկրորդ հարցի վերաբերյալ զեկուցեցին ֆակուլտետների դեկանները և Հեռակա ուսուցման բաժնի վարիչը: Նրանք մասնավորապես նշեցին, որ բոլոր ուսանողներն արդեն ընտրել են ավարտական աշխատանքների թեմաները, հիմնական մասը ղեկավարներից ստացել է գրականության ցանկը և աշխատանքի պլանը:

Պարոն Մակարյանը նշեց, որ միայն Բնական գիտությունների ֆակուլտետում են կազմվել ավարտական աշխատանքների անոտացիաներ, որտեղ նկարագրվում են ուսանողի առջև դրվող խնդիրները և աշխատանքի ավարտին սպասվող արդյունքները: Հետագայում մյուս ֆակուլտետները ևս պետք է ներդնեն այդ դրական փորձը, քանի որ անոտացիաները թույլ են տալիս բովանդակային առումով հետևել ավարտական աշխատանքների կատարմանը: Տնօրենը նշեց, որ դեկանները պարբերաբար կապի մեջ լինեն ամբիոնների վարիչների հետ, ամբիոններից ստանան ավարտական աշխատանքների իրականացման մասին տեղեկատվություն և հետևեն դրանց ընթացքին:

Որոշվեց.

  1. Հանձնարարել ֆակուլտետների դեկաններին հետևելու ավարտական աշխատանքների կատարման ընթացքին՝ առաջնորդվելով «ԵՊՀ Իջևանի մասնաճյուղում բակալավրի ավարտական աշխատանքի պատրաստման և գնահատման կարգ»-ով (25.12.2020թ., 48/6 նիստի որոշում):
  2. Հանձնարարել Հեռակա ուսուցման բաժնի վարիչին մինչև 2021թ. փետրվարի 20-ը ՈՒՄՎ և տնօրենին ներկայացնել ամփոփ տեղեկատվություն հեռակա ուսուցման համակարգի ավարտական աշխատանքների կատարման ընթացքի մասին:

Երրորդ հարցի վերաբերյալ զեկուցեց ԵՊՀ ԻՄ-ի տնօրենի պաշտոնակատար Ա.Մակարյանը: Նա մասնավորապես նշեց, որ «Բակալավրի կրթական ծրագրով առկա և հեռակա ուսուցման 2020-2021 ուստարվա երկրորդ կիսամյակի ուսումնական գործընթացների կազմակերպման ժամանակացույց»-ի համաձայն՝ մինչև փետրվարի 23-ը պետք է ներկայացնել ամփոփիչ ատեստավորման նախագահների թեկնածությունները: Ա.Մակարյանը շեշտեց, որ այս հարցում առաջնորդվելու ենք «ՀՀ բարձրագույն մասնագիտական կրթական ծրագրեր իրականացնող հաստատությունների շրջանավարտների ամփոփիչ ատեստավորման կարգ»-ով, որի 3.7 դրույթի համաձայն՝ ամփոփիչ ատեստավորման նախագահ կարող է լինել համապատասխան ոլորտի (բնագավառի) գործընկեր կազմակերպությունների, գերատեսչությունների, ակադեմիական հաստատությունների գիտական աստիճան և / կամ կոչում ունեցող մասնագետներից, ովքեր տվյալ հաստատության աշխատողներ չեն և նախորդող երեք տարիների ընթացքում չեն եղել ամփոփիչ ատեստավորման հանձնաժողովի նախագահ:

Դեկանները նշեցին, որ ամբիոնների վարիչներն արդեն ունեն հանձնաժողովների նախագահների թեկնածուներ և բանակցություններ են վարում նրանց հետ:

Որոշվեց հանձնարարել դեկաններին մինչև փետրվարի 23-ը տնօրենին ներկայացնել 2021թ. ամփոփիչ ատեստավորման հանձնաժողովների նախագահների թեկնածությունները:

Չորրորդ հարցի վերաբերյալ զեկուցեց Ուսումնամեթոդական վարչության պետ Ա.Դավթյանը: Նա նախ ներկայացրեց ՀՀ ՊՆ կողմից հատկացվող «Վազգեն Սարգսյան» և «Մոնթե Մելքոնյան» անվանական կրթաթոշակներին հավակնող ուսանողներին, ովքեր աչքի են ընկնում բարձր առաջադիմությամբ և  հասարակական ակտիվ գործունեությամբ.

  1. Մետաքսե Սարգսի Մելյան – «Դիզայն» մասանգիտության 3-րդ կուրս («Վազգեն Սարգսյան» անվանական կրթաթոշակ),
  2. Արայիկ Գառնիկի Շահնազարյան – «Ինֆորմատիկա և կիրառական մաթեմատիկա» 4-րդ կուրս («Մոնթե Մելքոնյան» անվանական կրթաթոշակ):

2020-2021 ուստարվա երկրորդ կիսամյակում անվանական կրթաթոշակ
 ստացող ուսանողների վերբերյալ Ա.Դավթյանը նշեց, որ ֆակուլտետները ներկայացրել են բարձր առաջադիմություն ունեցող ուսանողների ցանկը, իսկ ԵՊՀ անվանական կրթաթոշակի համար առաջադրվել էր երեք ուսանող՝ Լաուրա Խաժակի Ուլիխանյանը («Զբոսաշրջություն», 3-րդ կուրս), Տիգրան Սերյոժայի Գասպարյանը («Քարտեզագրություն և կադաստրային գործ», 4-րդ կուրս), Լիլիթ Շաքարի Դավթյանը («Տարրական մանկավարժություն և մեթոդիկա», 4-րդ կուրս), որոնցից ընտրվեց ամենաբարձր առաջադիմությունն ունեցող Տիգրան Սերյոժայի Գասպարյանը (կիսամյակային ՄՈԳ-ը՝ 20, ընթացիկ ՄՈԳ-ը՝ 19.48):

Որոշվեց.

  1. Հաստատել ՀՀ ՊՆ կողմից հատկացվող «Վազգեն Սարգսյան» և «Մոնթե Մելքոնյան» անվանական կրթաթոշակների հավակնորդների թեկնածությունները:
  2. Անվանական կրթաթոշակների ներկայացված մյուս ուսանողների ցանկը ներկայացնել ԵՊՀ ԻՄ-ի գիտական խորհրդի հաստատմանը:

Ընթացիկ հարցերը 3-ն էին, որոնցից 1-ինի վերաբերյալ զեկուցեց ԵՊՀ ԻՄ-ի կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը: Նա մասնավորապես նշեց, որ ըստ հրամանի ձևավորված աշխատանքային խմբերը փետրվարի 1-ից սկսել են 2021թ. կրթական ծրագրերի վերանայման աշխատանքները: ԵՊՀ ԻՄ-ի 2020թ. կրթական ծրագրերը տեղադրված են պաշտոնական կայքէջում: Որոշ խնդիրներ են առկա Կիրառական արվեստի ֆակուլտետում, սակայն մինչև փետրվարի 20-ը դրանք կշտկվեն: Հեռակա ուսուցման մագիստրատուրայի «Դպրոցական մանկավարժություն և մեթոդիկա» կրթական ծրագրի մշակումը դեռևս ընթացքի մեջ է:

Որոշվեց.

  1. Հանձնարարել ԿԲԴՎ, ՄԿՈԱ բաժիններին և ֆակուլտետների դեկաններին հետևել կրթական ծրագրերի վերանայման ժամանակացույցների կատարմանը:
  2. Հանձնարարել Հեռակա ուսուցման մագիստրատուրայի «Դպրոցական մանկավարժություն և մեթոդիկա» կրթական ծրագրի համակարգող Ա.Մարգարյանին ձևավորել աշխատանքային խումբ՝ մագիստրատուրայի կրթական ծրագիրը վերանայելու համար:

Ընթացիկ 2-րդ հարցի վերաբերյալ զեկուցեց Ուսումնամեթոդական վարչության պետ Ա.Դավթյանը: Նա մասնավորապես նշեց, որ ԵՊՀ ԻՄ-ի հեռակա ուսուցման համակարգի 6 ուսանող դիմել է 2020-2021 ուստարվա 2-րդ կիսամյակում, իսկ 1 ուսանող՝ 2021-2022 ուտարվա 1-ին կիսամյակում համապատասխան մասնագիտություններով իրենց ուսանողական իրավունքները վերականգնելու համար: ՈՒՄՎ կողմից ստուգվել է ուսանողների ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման կարգ»-ին (17.12.2018, N1676 -Ն), և դրանք բավարարում են վերոնշյալ կարգի III մասի կետերին: Ա.Դավթյանը հավելեց, որ հեռակա ուսուցման համակարգի «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանող Տիգրան Աշոտի Բադալյանը չի հանձնել ուսումնական պլանով առաջացած առարկայական տարբերությունները և չի վճարել ուսման վճարը:

Որոշվեց.

  1. «ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգ»-ի III մասի կետերին համապատասխան՝ վերականգնել ԵՊՀ ԻՄ-ի հեռակա ուսուցման համակարգի ներկայացված ուսանողների ուսանողական իրավունքները 2020-2021 ուստարվա 2-րդ և 2021-2022 ուստավա 1-ին կիսամյակներում:
  2. «ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգ»-ի 17 կետի համաձայն՝ Տիգրան Աշոտի Բադալյանին հեռացնել մասնաճյուղից:

Ընթացիկ 3-րդ հարցի վերաբերյալ զեկուցեց Մասնագիտական կրթության որակի ապահովման բաժնի վարիչ Մ.Ճաղարյանը: Նա նշեց, որ ԵՊՀ ԻՄ-ի ստորաբաժանումներին է ներկայացվել մասնաճյուղի ռազմավարական ծրագրի այն խնդիրների ցանկը, որոնք տնօրենի հետ քննարկումների արդյունքում որոշվել է դնել ստորաբաժանումների 2021թ․ աշխատանքային պլանների հիմքում։ Ըստ Մ.Ճաղարյանի՝ աշխատանքային պլանները գրեթե ամբողջությամբ պատրաստ են:

Ա.Մակարյանը հանձնարարեց, որ ՄԿՈԱ բաժինը հետևողական լինի աշխատանքային պլանների վերջնական կազմման հարցում:

Որոշվեց հանձնարարել ստորաբաժանումների վարիչներին, որ մինչև 2021թ. փետրվարի 20-ը աշխատանքային պլանները ներկայացնեն տնօրենի հաստատմանը:

2-րդը՝ ներսում՝ տեքստի ներքևում

ՀՀ պաշտպանության նախարարությունը կազմակերպում է մեկամյա սպայական դասընթացներ 2021թ. համար

1. հայտ. նկար

ՀՀ պաշտպանության նախարարությունը 2021թ. սեպտեմբերի 1-ից ՀՀ ՊՆ Վ.Սարգսյանի անվան ռազմական համալսարանում և մարշալ Ա.Խանփերյանցի անվան ռազմական ավիացիոն համալսարանում կազմակերպում է մեկամյա սպայական դասընթացներ:

 

Դասընթացներին կարող են մասնակցել բուհում ուսանող՝ պարտադիր զինվորական ծառայության 2021թ. ամառային զորակոչին ենթակա, ինչպես նաև ավարտական կուրսի իգական սեռի քաղաքացիները:  

 

Դասընթացները կազմակերպվելու են հետևյալ կրթական ծրագրերով.

 

  1. ՀՀ ՊՆ Վ.Սարգսյանի անվան ռազմական համալսարանում՝

– մոտոհրաձգային ստորաբաժանումների կառավարում,

– հրետանային ստորաբաժանումների կառավարում:

 

  1. ՀՀ ՊՆ մարշալ Ա.Խանփերյանցի անվան ռազմական ավիացիոն համալսարանում՝

– Ռազմական կապի տեխնիկա,

– ՀՕՊ ռադիոլոկացիոն համալիրներ,

– ՀՕՊ միջին և փոքր հեռահարության զենիթային համալիրներ,

– ՀՕՊ մոտակա գործողության զենիթային համալիրներ:

 

Դասընթացներին մասնակցելու ցանկություն հայտնած՝ 2021թ. ամառային զորակոչին ենթակա քաղաքացիները պետք է դիմեն ՀՀ ՊՆ զորակոչային և զորահավաքային համալրման ծառայության տարածքային ստորաբաժանումներ, իսկ իգական սեռի քաղաքացիները՝ համապատասխան ռազմաուսումնական հաստատություններ:

 

Զորակոչիկները 2021թ. ամառային զորակոչի ընթացքում սահմանված կարգով կզորակոչվեն ՀՀ զինված ուժեր և ՀՀ ՊՆ զորակոչային և զորահավաքային համալրման ծառայության տարածքային ստորաբաժանումների միջոցով կներկայացվեն հանրապետական հավաքակայան: Առողջական վիճակի վերաբերյալ դրական եզրակացության դեպքում համապատասխան մասնագետները հարցազրույցի միջոցով կստուգեն նրանց մասնագիտական գիտելիքները: Դրական որոշման դեպքում նրանք կուղարկվեն վերոնշյալ՝ համապատասխան Համալսարաններ:

 

Իգական սեռի քաղաքացիները մինչև 2021թ. հուլիսի 25-ը պետք է ներկայանան համապատասխան ՌՈՒՀ-եր՝ բժշկական հետազոտություն անցնելու, ինչպես նաև մասնագիտական գիտելիքներն ստուգելու նպատակով հարցազրույցի մասնակցելու համար:  Դրական որոշման դեպքում, իրենց դիմումի համաձայն, նրանք կընդունվեն պայմանագրային զինվորական ծառայության՝ կնքելով «Պայմանագրային զինվորական ծառայություն անցնելու մասին» պայմանագիր: 

 

Համալսարաններում զորակոչիկների և իգական սեռի քաղաքացիների հետ կանցկացվի «Նորակոչիկների պատրաստության ծրագրով» դասընթաց, որի ավարտից հետո կկայանա զինվորական երդման հանդիսավոր արարողությունը: Նրանց հետ կկնքվի «Սպայական դասընթացին մասնակցելու մասին» պայմանագիր:

 

Դասընթացներին մասնակցելու ժամանակահատվածում նրանք համարվելու են համալսարանների կուրսանտներ (Զինծառայող):  

 

Իր զեկուցագրի համաձայն՝ ուսումնառությունից հրաժարվելու, կա՛մ անբավարար առաջադիմության, կա՛մ անկարգապահության պատճառով դասընթացից հեռացվելու դեպքում դասընթացում ուսումնառության ժամանակահատվածը չի հաշվարկվում  Զինծառայողների պարտադիր զինվորական ծառայության ժամկետում, և վերջիններս՝ բացառությամբ իգական սեռի քաղաքացիների, սահմանված կարգով ուղարկվում են շարունակելու հետագա պարտադիր զինվորական ծառայությունը:

 

Դասընթացն ավարտելուց հետո Պաշտպանության նախարարության հետ պայմանագրային զինվորական ծառայություն անցնելու մասին պայմանագիր կնքելուց կամ հետուսումնական երկու տարվա ընթացքում իր զեկուցագրի համաձայն պայմանագրային զինվորական ծառայությունից հրաժարվելու դեպքերում ևս դասընթացին մասնակցության և պայմանագրային զինվորական ծառայության ժամանակահատվածը չի հաշվարկվում Զինծառայողների՝ բացառությամբ իգական սեռի քաղաքացիների, պարտադիր զինվորական ծառայության ժամկետում:

 

Ուսումնառության և հետուսումնական ծառայության ընթացքում Զինծառայողները կօգտվեն ՀՀ օրենսդրությամբ նախատեսված սոցիալական բոլոր արտոնություններից և դրամական բավարարումներից:

 

Ուսումնառությունն ավարտելուց հետո զինծառայողներին կշնորհվի առաջին սպայական «լեյտենանտ» զինվորական կոչում, և վիճակահանության կարգով նրանք կնշանակվեն դասակի հրամանատարի պաշտոններում՝ երկու տարի ժամկետով զինծառայություն անցնելու համար:

 

Վիճակահանության ընթացքում արտոնություն կտրվի բուհը և ռուհը գերազանցությամբ ավարտածներին, զոհված և պատերազմի ժամանակ վիրավորված ու հետագայում ստացած վերքերից մահացած ազատամարտիկների զավակներին:

 

Լրացուցիչ տեղեկությունների համար կարող եք զանգահարել հետևյալ հեռախոսահամարներով՝  010-29-45-84,  094-19-90-60,  098-77-18-03:

Հարգանքի տուրք մատուցվեց Ա. Ս. Պուշկինի հիշատակի և Դիվանագիտական աշխատողի օրվա առթիվ

1. գլխավոր

2021թ. փետրվարի 10-ին՝ Դիվանագիտական աշխատողի օրվա և Ա. Ս. Պուշկինի հիշատակի օրվա առթիվ, Գյումրիում Ռուսաստանի գիտության և մշակույթի կենտրոնի նախաձեռնությամբ ծաղիկներ դրվեցին Պուշկինի լեռնանցքի մոտ գտնվող աղբյուր-հուշարձանին (Լոռու մարզ, գյուղ Գարգառ), որտեղ 1829թ. էրզրում ճանապարհորդելիս Ա. Ս. Պուշկինը հանդիպել էր Ա. Ս. Գրիբոյեդովի աճյունը Իրանից Թբիլիսի տեղափոխողներին: Ալեքսանդր Գրիբոյեդովը (1795-1829) ռուս մեծ գրողներից առաջինն է, ով իր դիվանագիտական ծառայության և պատմական իրադարձությունների բերումով այցելեց Հայաստան, հաղորդակցվեց նրա հնագույն պատմությանը և մշակույթին, մոտիկից ծանոթացավ ժողովրդի կենդանի կյանքին:

 

Միջոցառմանը ներկա էին Գյումրիում Ռուսաստանի գլխավոր հյուպատոս Ռուսլան Կանդաուրովը, Գյումրիում Ռուսաստանի գիտության և մշակույթի կենտրոնի աշխատակիցները՝ տնօրեն Հարություն Համբարձումյանի գլխավորությամբ, հասարակական կազմակերպությունների անդամներ, Վանաձորի պետական համալսարանի, ԵՊՀ Իջևանի մասնաճյուղի ներկայացուցիչներ, մասնավորապես՝ Ռուսաց լեզվի և գրականության սեկցիայի դոցենտ, բ.գ.թ. Մ.Զուրաբյանը, նույն մասնագիտության ուսանողներ:

 

Իր ելույթում հյուպատոս Ռուսլան Կանդաուրովը նշեց, որ 2002թ. հոկտեմբերի 31-ին ՌԴ նախագահի հրամանագրով փետրվարի 10-ը սահմանվել է որպես Դիվանագիտական աշխատողի օր: «Այժմ բավականին բարդ իրավիճակ է ստեղծվել շատ երկրներում, և դրանցում դիվանագետներ են մահանում: Դժբախտաբար, Ալեքսանդր Սերգեևիչ Գրիբոյեդովը մահացավ հենց Իրանում իր ծառայության ընթացքում: Թուրքիայում Ռուսաստանի դեսպան Անդրեյ Կառլովը մահացավ Ստամբուլում», – ասաց Գյումրիում ՌԴ գլխավոր հյուպատոսը` անդրադառնալով դիվանագետների բարդ աշխատանքին՝ պետությունների և ժողովուրդների միջև խաղաղության կամ ըմբռնման կամուրջներ կառուցելու ուղղությամբ:

 

Գյումրիում Ռուսաստանի գիտության և մշակույթի կենտրոնի տնօրեն Հարություն Համբարձումյանը ներկայացրեց հուշարձանի պատմությունը, որը վերակառուցվել է 2005 թվականին և Պուշկինի լեռնանցքի գագաթից տեղափոխվել է Վանաձոր-Ստեփանավան ճանապարհի հասանելիության համար: Հայաստանում աղբյուր-հուշարձանը կանգնեցվել է 1937 թվականին՝ Պուշկինի հիշատակի հարյուրամյակին, Բեզոբդալ լեռան գագաթին՝ Ստեփանավան քաղաքը Կիրովականի հետ կապող չսալարկված ճանապարհի եզրին: Հուշարձանի հեղինակներն են քանդակագործ Սմբատ Սարգսյանը և ճարտարապետ Գեորգի Մուրզան: Պուշկինի լեռնանցքը (Բեզոբդալի, Բզովդալի, Դվալի լեռնանցք) գտնվում է Լոռու մարզում՝ Բազումի լեռնաշղթայի արևելյան մասում: Լեռնանցքը կոչվել է ռուս բանաստեղծ Ա. Ս. Պուշկինի անունով, քանի որ 1829 թվականի հունիսի 11-ին Ալեքսանդր Պուշկինը, իր իսկ խոսքով, լեռնանցքից ոչ հեռու՝ հայկական փոքրիկ Գարգառ (այժմ ՝ Պուշկինո) գյուղի մոտ, հանդիպեց մի սայլի, որով Թբիլիսի էին տեղափոխում Թեհրանում սպանված Գրիբոյեդովի մարմինը:

 

Միջոցառման մանրամասներին կարող եք ծանոթանալ այստեղ:

 

1234

Հայտարարություն

Նորություններ