2021թ. մայիսի 1-ին ZOOM հարթակում կայացավ լեզվաբանական որոշ հարցերի վերաբերյալ 3 ժամանոց մասնագիտական բանավեճ–քննարկում, որին մասնակցեցին ԵՊՀ եվրոպական լեզուների և հաղորդակցության ֆակուլտետի 3-րդ կուրսի և ԵՊՀ ԻՄ-ի հումանիտար գիտությունների ֆակուլտետի «Հայոց լեզու և գրականություն» մասնագիտության 2-րդ կուրսի 20 ուսանող:

Այն վարեց մայր բուհի և մասնաճյուղի դասախոս, բ.գ.թ., ասիստենտ Սիրանուշ Հովհաննիսյանը:  

Բանավեճ-քննարկման նպատակն էր ապագա մասնագետների մեջ մշակել մասնագիտական համագործակցության տարրական հմտություններ, ինչպես նաև կարծիքների, գիտելիքի ու փորձի փոխանակման էթիկետ:

Քննարկման ընթացքում առաջ էին քաշվել հետևյալ հարցերը.

• Հարց 1. Անահիտ Հարությունյան, ԵՊՀ, ԵԼՀ, 3-րդ կուրսի անունից.

«Ինչպե՞ս է բնութագրվում լեզուն որպես վարք ձեր անձնական տեսանկյունից, և ինչպե՞ս կարելի է վերլուծել «Ես նրան առաջարկեցի, և մենք միասին գնացինք գարեջրատուն, որտեղ նա ճաշակեց իր ցանկացած գարեջուրը» նախադասությունը Բլումֆիլդի՝ լեզուն որպես վարք տեսության համաձայն»:

• Հարց 2. Անուշ Խաչատրյան, ԵՊՀ ԻՄ, ՀԼԳ, 2-րդ կուրսի անունից.

«Ինչո՞վ է պայմանավորված այն, որ որևէ տեքստ ընթերցելիս որոշակի բառերի կամ բառի հնչյունական կազմին հատուկ ուշադրություն չենք դարձնում, թռուցիկ հայացք գցելով` բառը ընկալում ենք ամբողջությամբ, և թեկուզ բառի մեջ լինեն վրիպակներ, միևնույնն է, բառի բովանդակությունը ըմբռնվում է: Արդյո՞ք օտար լեզվով տեքստ կարդալիս առնչվում եք նույն երևույթին»:

• Հարց 3. Լիլիթ Առաքելյան, ԵՊՀ, ԵԼՀ, 3-րդ կուրսի անունից.

«Հնարավո՞ր է արդյոք բանավոր խոսքի ընթացքում ընկալմանը զուգահեռ պատկերացնել նաև նախադասությունների կառուցվածքը՝ պարզ, բարդ և այլն»:

• Հարց 4. Անուշ Խաչատրյան, ԵՊՀ ԻՄ, ՀԼԳ 2-րդ կուրսի անունից.

«Ի՞նչ տեխնիկայով եք մտապահում բառերը  օտար լեզուն սովորելիս: Ինչպե՞ս եք սկսում թարգմանել հայերենից օտար լեզուներ, և ինչու՞ է համարվում մայրենիից օտար լեզու թարգմանելը ավելի դժվար»:

Թարգմանության, խոսքի ձևավորման և օտարման, ձևի ու բովանդակության տարբեր հարցերի քննարկումով հագեցած հանդիպումն ավարտվեց ԵՊՀ օտար լեզուների ուսանողուհիներին դասախոսի տված հանձնարարությամբ՝ թարգմանել Լեոնարդ Բլումֆիլդի “Language” աշխատության մի հատված՝ իրենց իսկ ընտրությամբ, 10 էջի սահմաններում, ներկայացնել մինչև մայիսի 20-ը, իսկ ԵՊՀ ԻՄ-ի ուսանողուհիներին հանձնարարվեց թարգմանվող հայերեն տեքստի խմբագրում-սրբագրումը:

2021թ. ապրիլի 30-ին ZOOM հարթակում կայացավ ԵՊՀ ԻՄ-ի գիտական խորհրդի հերթական առցանց նիստը, որը նախագահում էր Ա. Հ. Մակարյանը:

Նիստի օրակարգում ընդգրկված էին հետևյալ հարցերը.

1. ԵՊՀ ԻՄ-ի հեռակա ուսուցման ձևով մագիստրատուրայի՝ 2021-2022 ուսումնական տարվա ընդունելության կարգի հաստատում (զեկուցող՝ ԵՊՀ ԻՄ-ի ուսումնամեթոդական վարչության պետ Ա․ Ց․ Դավթյան):
2. ԵՊՀ ԻՄ-ի կրթական ծրագրերի մոնիթորինգի և վերանայման կարգի հաստատում (զեկուցող՝ ԵՊՀ ԻՄ-ի կրթական բարեփոխումների և դասախոսների վերապատրաստման բաժնի վարիչ Ն․ Ս. Գրիգորյան):
3. ԵՊՀ ԻՄ-ի էթիկայի հանձնաժողովի կազմը հաստատելու մասին (զեկուցող՝ ԵՊՀ ԻՄ-ի տնօրենի պաշտոնակատար Ա․ Հ․ Մակարյան):

Առաջին հարցի՝ ԵՊՀ ԻՄ-ի հեռակա ուսուցման ձևով մագիստրատուրայի՝ 2021-2022 ուսումնական տարվա ընդունելության կարգը հաստատելու մասին Ուսումնամեթոդական վարչության պետ Ա․Դավթյանը նշեց, որ տվյալ կարգով սահմանված են ԵՊՀ ԻՄ-ի հեռակա ուսուցման մագիստրատուրայի՝ 2021-2022 ուստարվա ընդունելության կարգն ու պայմանները, այդ թվում՝ ընդունելության մրցույթին մասնակցելու համար ներկայացվող փաստաթղթերը:

Մասնավորապես ներկայացված է, որ հեռակա ուսուցման ձևով ԵՊՀ ԻՄ մագիստրատուրայի ընդունելության մրցույթին կարող են մասնակցել ԵՊՀ, ԵՊՀ ԻՄ և այլ պետական և ըստ մասնագիտությունների հավատարմագրված (ինստիտուցիոնալ հավատարմագրում անցած) ոչ պետական բարձրագույն ուսումնական հաստատությունների առկա և հեռակա ուսուցման ձևերի բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտները։

Օտարերկրյա քաղաքացիների ընդունելությունը կկատարվի հարցազրույցով` համաձայն ՀՀ կառավարության՝ 2011թ. ապրիլի 28-ի թիվ 700-Ն որոշմամբ սահմանված կարգի:

Հեռակա ուսուցման ձևով մագիստրատուրայի ընդունելության փաստաթղթերը կընդունվեն առցանց եղանակով՝ ijevan@ysu.am էլեկտրոնային հասցեին, ընթացիկ տարվա սեպտեմբերի 8-ից մինչև հոկտեմբերի 8-ը: Ընդունելության քննությունը կանցկացվի ընթացիկ տարվա հոկտեմբերի 13-ին և 14-ին:

Մագիստրատուրա ընդունված դիմորդները մինչև ընթացիկ տարվա հոկտեմբերի 25-ը պետք է վճարեն ուսման վարձավճարը (1-ին կիսամյակի համար նախատեսված ուսման վարձի առնվազն 25%-ը), որից հետո կկատարվի նրանց հրամանագրումը:

Որոշվեց՝ հաստատել ԵՊՀ ԻՄ-ի հեռակա ուսուցման ձևով մագիստրատուրայի՝ 2021-2022 ուսումնական տարվա ընդունելության կարգը:

Երկրորդ հարցի՝ ԵՊՀ ԻՄ-ի կրթական ծրագրերի մոնիթորինգի և վերանայման կարգը հաստատելու վերաբերյալ ԿԲԴՎ բաժնի վարիչ Ն.Գրիգորյանը նշեց, որ տվյալ կարգով սահմանվում են ԵՊՀ ԻՄ-ի բակալավրի և մագիստրոսի կրթական ծրագրերի ընթացիկ մոնիթորինգի և պարբերական վերանայման գործընթացների նպատակները և խնդիրները, դրանց ներկայացվող հիմնական պահանջները, կիրառվող ընթացակարգերը, հիմնական դերակատարները և համապատասխան ժամանակացույցները: Կրթական ծրագրերի մոնիթորինգը և վերանայումը որակի ներքին ապահովման գործընթացներ են և կրթական ծրագրերի իրականացման փուլում դրանց որակի ապահովման և շարունակական բարելավման հիմնական մեխանիզմներից են:

Ընթացիկ մոնիթորինգի նպատակն է բարելավել կրթական ծրագրերի մատուցման որակը, այն համապատասխանեցնել կրթական ծրագրերի սահմանած նպատակներին ու համապատասխան որակավորումների ոլորտային շրջանակների բնութագրիչներին:

Պարբերական վերանայման նպատակն է արդիականացնել կրթական ծրագրերը՝ դրանք համապատասխանեցնելով աշխատաշուկայի ընթացիկ պահանջներին, բարելավել դրանց մատուցման որակը և ծրագրի իրականացման լրիվ շրջափուլի արդյունքներով հիմնավորել դրանց հետագա իրականացման նպատակահարմարությունը:

Քվեարկության արդյունքներով որոշվեց՝ հաստատել ԵՊՀ ԻՄ-ի կրթական ծրագրերի մոնիթորինգի և վերանայման կարգը:

Երրորդ  հարցի մասին ԵՊՀ ԻՄ-ի տնօրենի պաշտոնակատար Ա․ Հ․ Մակարյանը նշեց, որ ԵՊՀ ԻՄ-ի գիտական խորհրդի N 50/5 որոշմամբ հաստատվել էր ԵՊՀ ԻՄ-ի վարչական, ակադեմիական աշխատակազմերի և ուսանողների համար «Էթիկայի կանոնագիրք»-ը, որի նպատակն է խրախուսել և ապահովել բարոյաէթիկական մշակույթը, մասնավորապես ակադեմիական ազնվության մշակույթը մասնաճյուղի աշխատակիցների և ուսանողների շրջանում, զարգացնել նրանց մեջ բարոյահոգեբանական, գիտամանկավարժական և կազմակերպական հիմունքները, ստեղծել միջանձնային բարենպաստ փոխհարաբերություններ՝ բարձրացնելով դերակատարների հեղինակությունը, պահպանել մասնաճյուղի ամբողջականությունը և բարի համբավը:

Մասնաճյուղի գիտական խորհրդի այս նիստում հաստատման է ներկայացվել ԵՊՀ ԻՄ-ի էթիկայի հանձնաժողովի հետևյալ կազմը.

1. Պավել Նորիկի Ասիլբեկյան՝ Տուրիզմի կառավարման և մշակութաբանության ամբիոնի ասիստենտ,
2. Աիդա Ասիլբեկի Սարհատյան՝ Հայոց լեզվի և գրականության ամբիոնի դոցենտ,
3. Լևոն Երվանդի Լաչիկյան՝ Տուրիզմի կառավարման և մշակութաբանության ամբիոնի ասիստենտ,
4. Ալեքսան Շամիլի Մարգարյան՝ Ընդհանուր մաթեմատիկայի և բնագիտության ամբիոնի ասիստենտ,
5. Ինգա Գառնիկի Ասլանյան՝ «Անգլերեն լեզու և գրականություն» կրթական ծրագրի 2-րդ կուրսի ուսանողուհի,
6. Կարինե Անդրանիկի Մուքաելյան՝ «Անգլերեն լեզու և գրականություն» կրթական ծրագրի 1-ին կուրսի ուսանողուհի:

Որոշվեց՝ հաստատել ԵՊՀ ԻՄ–ի էթիկայի հանձնաժողովի կազմը:

2021թ. ապրիլի 12-29-ը ԵՊՀ ԻՄ-ի կրթական բարեփոխումների և դասախոսների վերապատրաստման բաժինը կազմակերպել  էր առցանց դասընթաց-քննարկումներ, որոնք վարեցին ԵՊՀ ԻՄ-ի օտար լեզուների ամբիոնի դասախոսներ Աստղիկ   Չուբարյանը, Նուարդա   Երնջակյանը  և Գայանե Մուրադյանը:

Դասընթացներին մասնակցեցին ԵՊՀ Իջևանի մասնաճյուղի ավելի քան 2 տասնյակ դասախոսներ և ուսանողներ:

«Կորպուսային  լեզվաբանություն» թեմայով առցանց դասընթաց-քննարկման ժամանակ Օտար լեզուների ամբիոնի պրոֆեսոր, բ.գ.թ. Աստղիկ Չուբարյանը ներկայացրեց կորպուսային լեզվաբանության հիմնական դրույթները, մեթոդաբանությունը, նրա տեղն ու դերը ժամանակակից լեզվաբանական  գիտահետազոտական ուսումնասիրություններում:

Նշվեց, որ կորպուսային լեզվաբանությունը լեզվաբանական գիտելիքի  քննության համեմատաբար նոր ուղղություն է, որը սկիզբ է առել անցյալ դարի 60-ական թվականներին և մեծ առաջընթաց է ապրել 80-ականների վերջից: Լեզվական կորպուսը բազմաթիվ տեքստերի համակարգ է, որը բերված է էլեկտրոնային տեսքի և ունի որոնման համակարգի լայն հնարավորություն:

Ընդգծվեց, որ ներկայումս անհնար է պատկերացնել տեսական և կիրառական լեզվաբանության որևէ ոլորտ՝ առանց կորպուսային լեզվաբանության մեթոդաբանության գործիքակազմի կիրարկման:

«Ինքնության  դրսևորումները պատմալեզվամշակութային համատեքստերում» թեմայով առցանց քննարկման ընթացքում Օտար լեզուների ամբիոնի դոցենտ, բ.գ.թ. Նուարդա Երնջակյանը անդրադարձավ մշակույթ-ինքնություն-լեզու համընդգրկուն կապի դրսևորումներին բազմաբնույթ համատեքստերում:

Ներկայացվեց, որ ժամանակակից ըմբռնմամբ ինքնությունն իր իմաստային հատկանիշներով և կիրառություններով բնութագրվում է երկու՝ նախնական և հիմնարար հասկացություններով՝ նույնականություն և այլականություն (sameness/otherness) երկբաղադրիչ հակադրությամբ և կիրառվում է որպես աշխարհի լեզվական  պատկերն ուսումնասիրող մշակութաբանական առարկաների, տեսությունների ու մեթոդաբանության կարևոր հարացույցներից մեկը: Տվյալ դեպքում այն դիտարկվում է պատմալեզվամշակութային, ազգային, գրական, մարդաբանական, ազգագրական/ազգաբանական և այլ միջգիտակարգային հետազոտություններում:

«Հաղորդակցության դիվանագիտություն» թեմայով առցանց հանդիպում-քննարկման ժամանակ Օտար լեզուների ամբիոնի դոցենտ, բ.գ.դ. Գայանե Մուրադյանը ներկայացրեց դիվանագիտական խոսույթը (դիսկուրսը) որպես հաղորդակցվելու արվեստ, էթիկայի նորմերին համապատասխան վարվեցողություն ցուցաբերելու ռազմավարություն և մշակույթ, որոնց համատեքստում առանձնապես կարևորվում է լեզվական արտահայտումը:

Շեշտվեց, որ այսօր այն հիմնականում ներկայանում է անգլերենով և նպատակ ունի դիվանագիտական բանավոր ու գրավոր խոսքի ճիշտ և արդյունավետ կիրառման միջոցով հաստատել միջպետական, միջմշակութային  և  միջանձնային ներդաշնակ ու արդյունավետ հարաբերություններ: