ՀՀ ԿԳՆ ԳՊԿ նախագահի՝ 2016թ. դեկտեմբերի 19-ի N71-Ա հրամանով հաստատվել է «Երիտասարդ գիտաշխատողների հետազոտությունների աջակցության ծրագիր-2016» մրցույթի արդյունքում ֆինանսավորման երաշխավորված գիտական թեմաների ցանկը   (http://scs.am/am/875857e0ea32afa539873012):

«Երիտասարդ գիտաշխատողների հետազոտությունների աջակցության ծրագիր-2016» մրցույթի արդյունքում ֆինանսավորման է երաշխավորվել նաև ԵՊՀ ԻՄ-ի կիրառական արվեստի ֆակուլտետի դեկորատիվ կիրառական արվեստի և դիզայնի ամբիոնի վարիչի ԺՊ, արվեստագիտության թեկնածու Մարտին Հարությունյանի՝ «Երևանի փողոցների ու դրանց հարակից կառույցների նախագծման,  կոմպոզիցիայի, դիզայնի ու արտաքին ձևավորման խնդիրներն ու բարելավման հնարավորությունները» գիտական թեման:

2016 թվականը Մ.Հարությունյանի համար հաջողակ էր մեկ այլ գիտական ձեռքբերման՝ մենագրության հրատարակման առումով:

ՀՀ ԳԱԱ գիտահրատարակչական խորհրդի, ՀՀ ԳԱԱ արվեստի ինստիտուտի գիտական խորհրդի որոշումներով և ՀՀ նախագահի հովանու ներքո իրականացվող Երիտասարդ գիտնականների աջակցության ծրագրի շրջանակներում՝ Հայաստանի երիտասարդական հիմնադրամի ֆինանսավորմամբ՝ 2016թ. լույս տեսավ Մարտին Հարությունյանի «Բեմական նորագույն տեխնոլոգիաների հնարավոր կիրառումը Հայաստանի դիտադահլիճային շինությունների վերակառուցումներում» վերնագրով մենագրությունը (Երևան, «Անտարես» հրատարակչություն, 2016, 168 էջ + 24 էջ ներդիր, ISBN 978-9939-51-945-6):

Հեղինակն ընթերցողին է ներկայացնում Հայաստանում այն առաջին գիտական հետազոտությունը, որը քննարկում և ուսումնասիրում է հայկական և արտերկրյա մի շարք դիտադահլիճային շինություններ և առաջարկում է հնարավոր նորագույն մեթոդների կիրառմամբ արդիականացնել Հայաստանի դիտադահլիճային շինությունների դահլիճներն ու դրանց բեմական մասերը:

Հետազոտության կարևոր նպատակն է Խորհրդային Հայաստանի ժամանակաշրջանից ժառանգած դիտադահլիճային շինությունների դահլիճների ու դրանց բեմական հատվածների ուսումնասիրությունն ու այդ շինությունների արդիականացման հնարավոր ուղիների ու տարբերակների առաջարկումը:

Հեղինակն ամենայն մանրամասնությամբ հետազոտել և քննարկել է դիզայնի մեթոդիկան ու հիմունքները` ՀՀ դիտադահլիճային կառույցները բեմական տեխնոլոգիաների հնարավոր և ճիշտ կիրառմամբ արդիականացնելու ակնկալիքով:

Գիրքը հասցեագրված է դիզայներներին, ճարտարապետներին, բեմարվեստի մասնագետներին և արվեստասեր հանրությանը:

ԵՊՀ ԻՄ-ի դեկորատիվ կիրառական արվեստի և դիզայնի ամբիոնի վարիչի մենագրությունն առկա է նաև մասնաճյուղի կիրառական արվեստի ֆակուլտետի գրադարանում:

2016թ. նոյեմբերի 16-ին՝ ուսանողների տոնի նախօրեին,  Գոշավանքում տեղի ունեցավ ԵՊՀ ԻՄ-ի առկա և հեռակա ուսուցման «Տարրական մանկավարժություն և մեթոդիկա» մասնագիտության առաջին կուրսեցիների՝ Ուսուցչի երդման հանդիսավոր արարողությունը:

Երդման արարողությանը մասնակցում էին Տավուշի մարզի հոգևոր դասի, ԵՊՀ Իջևանի մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ, ուսուցիչներ, առաջին դասարանցիներ, լրագրողներ, հյուրեր:

Ներկաները նախ մոմ վառեցին 12-13-րդ դդ. Գետիկ գետի ափին կառուցված հայոց հոգևոր և կրթամշակութային նշանավոր կենտրոնում, ապա հայր Սամվել Մխիթարյանի աղոթքով սկսվեց երդման արարողությունը:

Ուսանողները՝ գիտելիքի և դպրության մեր գալիք սերմնացանները, հանդիսավոր երդվեցին պատվով կրել  Ուսուցչի բարձր և վեհ կոչումը, իրենց ստացած գիտելիքները, ստեղծագործական ներուժն ու հոգու  ջերմությունն ամբողջությամբ նվիրել երեխաների կրթության և դաստիարակության պատվաբեր և չափազանց պատասխանատու գործին, լինել  արդարամիտ, բարի, նվիրյալ ուսուցիչներ և այդպիսին էլ դաստիարակել իրենց աշակերտներին, ամեն ինչ անել, որպեսզի նրանք մեծ կյանք մտնեն սեփական ժողովրդի և հայրենիքի հանդեպ պատասխանատվության մեծ զգացումով, երկրի համար դաստիարակել բարեկիրթ, հայրենասեր, սեփական ուժերին վստահ  քաղաքացիներ, բարձր պահել հայ դպրոցի սուրբ անունը:

Հաղարծնի դպրոցի փոքրիկ սաներն էլ մայրենին սիրելու, այն անաղարտ պահելու հաստատուն երդում տվեցին և հանդես եկան Մաշտոցի սուրբ աջով հայրաբար ծնված հայոց նշանագրերի՝ հայ հոգու սահմանները օտար մտազավթիչներից դարեր ի վեր պահպանող այդ  երեսունվեց անխոնջ ու զգոն զինվորների մասին գողտրիկ ելույթով:

ԵՊՀ ԻՄ-ի շնորհալի ուսանողները ներկայացրին հոգևոր երգեր:

Ուսանողներին ու աշակերտներին իր օրհնության  փառահեղ խոսքն ասաց Տավուշի թեմի առաջնորդ  Տ. Բագրատ եպիսկոպոս Գալստանյանը. «Անչափ ուրախ եմ այս առավոտի համար և ուզում եմ Աստծուն գոհություն հայտնելուց հետո մեր մեծագույն գնահատանքը, օրհնությունն ու շնորհակալությունը հայտնել ԻՄ համալսարանին, նրա ղեկավարությանն ու պրոֆեսորադասախոսական կազմին, ուսուցիչներին՝ այս ամբողջ առաքելությունը իրականացնելու և նաև այսօրվա նախաձեռնության համար:

Մեր շա՛տ սիրելի ուսանողներ, դուք մեծ առաքելության կոչված մարդիկ եք՝ այնպիսի անձինք դառնալու, որի համար այսօր ուխտեցիք և երդվեցիք այս սուրբ խորանի առջև՝ Մխիթար Գոշի հիշատակի դիմաց, որ գիտակցաբար ընտրել եք ուսուցչության ճանապարհը և այն էլ այպիսի տարիքի՝ նախակրթական կամ տարրական, որը ես միշտ համեմատում եմ Աստծո արարչագործության հետ: Աստված երբ մարդուն կավից ստեղծում էր, իր պատկերով ու նմանությամբ ստեղծեց. դուք նույն գործն եք անում կամ անելու եք. ստեղծելու եք կավից, և այդ երեխաները լինելու են ձեր պատկերով և նմանությամբ, ինչպիսին ձեր պատկերը կլինի, այնպիսին նրանք կժառանգեն, հետևաբար այդ մեծ պատասխանատվությունն է մղում ուսուցչի ձեռքը համբուրել, և ես երազում եմ ու համոզված եմ, որ ձեր այսօրվա քայլով ունենալու եք շատ աշակերտներ, ովքեր ձեր ձեռքերը կհամբուրեն: Վստահաբար դուք ուսուցչության ճանապարհի մեջ ունենալու եք չափազանց մեծ դժվարություններ, բայց ձեր մեծագույն առաքելությունը լինելու է Մարդը: Շատ եմ խնդրում ձեզ՝ մարդուն արժեք տվեք, գնահատեք նրանց, ովքեր գալու են ձեր ձեռքից հոգևոր և կրթական խնամք ստանալու, մեծացրեք նրանց և ամակարևորը՝ սիրեք նրանց…»:

Ելույթ ունեցավ ԵՊՀ Իջևանի մասնաճյուղի տնօրեն Ս. Ա. Առաքելյանը՝ Ուսուցչի երդման կապակցությամբ շնորհավորելով «Տարրական մանկավարժություն և մեթոդիկա» մասնագիտությամբ մեր առաջին ուսանողներին, ընդգծեց կրթության բնագավառի ներկայացուցիչների ամենօրյա տքնաջան ու պատասխանատու աշխատանքի կարևորությունը, նրանց  ունեցած անգնահատելի դերն ու ավանդը սերունդների կյանքում,  ապագա ուսուցիչներին պատգամեց գիտելիքներից բացի իրենց սաների մեջ սերմանել ազգային, բարոյական ու համամարդկային արժեքներ՝ ազնիվ հայրենասիրություն ու մարդասիրություն, բարեկրթություն, անկոտրում կամք ու լավատեսություն:

Նախաձեռնության առաքելությունն ու նպատակն ամփոփեց ԵՊՀ ԻՄ-ի կրթական ծրագրերի գծով տնօրենի խորհրդական, մ.գ.թ., դոցենտ Վ.Բրուտյանը, ով և կազմակերպել էր այս միջոցառումը: Պարոն Բրուտյանը նշեց, որ եթե մեր ուսանողները այսօր երդվեցին անմնացորդ նվիրաբերվելու մատաղ սերնդի կրթության և դաստիարակության գործին, դառնալու մեր հայրենիքի հզորացման, մեր պետականության ամրապնդման ամենամեծ ջատագովներն ու նվիրյալները, ապա ինքն էլ ուսանողների առջև երդվում է շուրջ 40-ամյա մանկավարժական ու գիտական իր փորձառությամբ և գիտելիքներով նրանց համար բացել դեպի մանկավարժության գաղտնիքները տանող բոլոր փակ դռները:

Նման միջոցառումները ասես մեկ անգամ ևս փաստում են, որ մենք այն մեծ ծառի ճյուղերն ենք, որի արմատները հաստատված են Իմաստության վրա և սնվում են Հավերժության ակունքներից, և պատգամում են, որ պետք է պտղաբերենք` այդ արմատներին արժանի մնալով: 

Երդման արարողությունից հետո ԵՊՀ ԻՄ-ի կիրառական արվեստի ֆակուլտետի կողմից «ՏՄՄ» առաջին կուրսի ուսանողներին նվիրվեց «Մեսրոպ Մաշտոց» նկարը,  որպեսզի  ուսումնառության ընթացքում լսարանում էլ Մաշտոցի սուրբ հայացքն ուղեկցի նրանց:

Վերջում Տավուշի թեմի առաջնորդի և ԵՊՀ ԻՄ-ի ղեկավարության կողմից ձեռք բերվեց պայմանավորվածություն 2016-17 ուստարվա ավարտին՝ Սուրբ թագմանչաց տոնին ուսանողների հետ այցելելու Օշական` հարգանքի տուրք մատուցելու Հայոց մեծ ուսուցիչ ս. Մեսրոպ Մաշտոցի գերեզմանին:

2016թ. հուլիսի 9-ին ԵՊՀ Իջևանի մասնաճյուղում կայացավ 2015-16 ուստարվա առկա և հեռակա ուսուցման շրջանավարտների դիպլոմների հանձնման հանդիսավոր արարողությունը:

Այս տարի շրջանավարտների դիպլոմների հանձնումը կազմակերպվել էր առանձնահատուկ շուքով:

Հանդիսավոր արարողությանը ներկա էին ԵՊՀ-ի ռեկտոր Ա. Հ. Սիմոնյանը, ԵՊՀ-ի ուսումնական աշխատանքների գծով պրոռեկտոր Ա.Գրիգորյանը, ուսումնամեթոդական վարչության պետ Հ.Ժամհարյանը, ուսանողների, շրջանավարտների և հասարակայնության հետ կապերի գծով պրոռեկտոր Ռ.Մարկոսյանը, ռեկտորի աշխատակազմի ղեկավար Ա.Ղարիբյանը, մասնաճյուղի վարչական և պրոֆեսորադասախոսական անձնակազմի ներկայացուցիչները` տնօրեն Ս. Ա. Առաքելյանի գլխավորությամբ, Տավուշի մարզի փոխմարզպետ Լ.Սարգսյանը, ԱԺ պատգամավոր Հ.Հակոբյանը, ՀՀ ԱԱԾ Տավուշի մարզային վարչության պետ Ա.Չոբանյանը, ՀՀ ոստիկանության Տավուշի մարզային վարչության պետ Ա.Գևորգյանը, մարզի տարբեր ոլորտների ներկայացուցիչներ, ծնողներ, ուսանողներ, հյուրեր:

Արարողությունը բացվեց Իջևանի զորամասի նվագախմբի կատարմամբ հնչող ՀՀ օրհներգով և Հայր Սամվել Մխիթարյանի օրհնության խոսքով ու աղոթքով:

Ապա շրջանավարտներին իրենց շորհավորանքներն ու բարեմաղթանքները հղեցին Մայր բուհի ռեկտոր Ա.Սիմոնյանը, մասնաճյուղի տնօրեն Ս.Առաքելյանը, փոխմարզպետ Լ.Սարգսյանը, Իջևանի զորամասի հրամանատարի դաստիարակչական աշխատանքների գծով տեղակալ, փոխգնդապետ Հ.Սահակյանը և ուրիշներ:

Պարոն Ա.Սիմոնյանն իր շնորհավորական խոսքում մասնավորապես նշեց. «Այսօր ուրախալի, լուսավոր օր է Իջևանում, որովհետև Երևանի պետական համալսարանի տարածաշրջանային մասնաճյուղի շրջանավարտները այսօր պետք է ստանան իրենց հասունությունը հավաստող դիպլոմները, և նրանց առջև կբացվի հասուն կյանք մտնելու դժվարին, բայց միևնույն ժամանակ հետաքրքիր ուղին:  

Սիրելի՛ շրջանավարտներ, մենք անչափ ուրախ ենք այսօր ձեզ շնորհավորելու այս շատ կարևոր, ձեր կյանքում նշանակալի երևույթի առթիվ: Ուզում եմ ասել, որ մեծագույն պատիվ է լինել ԵՊՀ-ի շրջանավարտ, դուք ուշիմ, խելոք, գիտակից սերունդ եք, մեր ժողովրդի, մեր հասարակության, մեր երկրի այսօրվա և վաղվա հույսը: Եվ ինչպիսին կլինի մեր երկիրը, ինչքան կլինի մեր ժողովրդի գոյության տենչը, ինչքան նա կլինի երջանիկ, կախված է ձեզանից, ձեր գործունեությունից:

Ես սրտանց ուզում եմ շնորհավորել ձեզ բոլորիդ, ձեր ծնողներին, ձեր դասախոսներին, ձեր ուսուցիչներին, մարդկանց, որոնք կրթել, դաստիարակել են ձեզ… Եվ ուզում եմ հույս հայտնել ԵՊՀ-ի ղեկավարության և նրա ողջ կոլեկտիվի անունից, որ ձեր ամբողջ կյանքի ընթացքում բարձր կպահեք համալսարանականի պատիվը: …Եվ երբեք ձեր սրտերում թո՛ղ չմարի գիտելիք ստանալու, նոր բան սովորելու, նոր բարձունքներ նվաճելու տենչը. մարդն իր ամբողջ կյանքի ընթացքում սովորում է:

Ես ձեզ ցանկանում եմ անձնական երջանկություն, աղջիկներին՝ բարի բախտ…  Անպայման ուզում եմ, որ մի 5-6 տարի հետո մենք լսենք ձեր հաջողությունների մասին և ուրախանանք սրտանց, որովհետև այդ հաջողությունը մեր բոլորիս հաջողությունն է լինելու»:

ԵՊՀ Իջևանի մասնաճյուղի տնօրեն Ս.Առաքելյանը, շնորհավորելով 2015-16 ուստարվա շրջանավարտներին, համոզմունք արտահայտեց, որ  այս դիպլոմները շրջանավարտների համար մեծ կյանքում լավագույնս դրսևորվելու, իրենց տեղը գտնելու երաշխիքը կլինեն: Նրանց մաղթեց բարի երթ, մեծ հաջողություններ կյանքում և աշխատանքում, շնորհավորանքներ ու բարեմաղթանքներ հղեց նրանց ընտանիքներին, ծնողներին, հարազատներին:

 Իր խոսքում տնօրենն ընդգծեց, որ այսպիսով բուհի և շրջանավարտների միջև կապը չի խզվի. մասնաճյուղը այսուհետև էլ պատրաստ է համագործակցելու իր շրջանավարտների հետ, ցանկացած հարցում աջակցելու նրանց:

Իր ընկերներին շնորհավորեց և մասնաճյուղի անձնակազմին  շնորհակալական խոսք ասաց Տնտեսագիտության ֆակուլտետի շրջանավարտ, ՈՒԽ-ի նախկին նախագահ Ռազմիկ Հովսեփյանը:

Այնուհետև տեղի ունեցավ դիպլոմների հանձնումը. նախ` ռեկտորի կողմից գերազանց առաջադիմությամբ շրջանավարտներին  տրվեցին կարմիր դիպլոմները, ապա, ըստ ֆակուլտետների, պատվավոր հյուրերը դիպլոմները հանձնեցին շրջանավարտներին:

Տոնական միջոցառումն ուղեկցվում էր ԵՊՀ ԻՄ-ի կիրառական արվեստի ֆակուլտետի շրջանավարտների հետաքրքիր աշխատանքների ցուցահանդեսով և համապատասխան համերգային ծրագրով:

2016թ. հունիսի 29-ին  ԵՊՀ Իջևանի մասնաճյուղում տեղի ունեցավ հանդիպում «Հայ-ֆրանսիական բարեկամություն» կազմակերպության կամավոր Ժուլիեն Լըկուտուղիեի հետ:

Ներկա էին օտար լեզուների ամբիոնի դասախոսներ, «Ֆրանսերեն լեզու և գրականություն» մասնագիտության ուսանողներ:

Հանդիպման նպատակն էր նշված մասնագիտության ուսանողներին կրթաթոշակներ հանձնելը:

Ժուլիեն Լըկուտուղիեն հանձնեց «Ֆրանսերեն լեզու և գրականություն» մասնագիտության չորրորդ կուրսի ուսանողների երկրորդ կիսամյակի կրթաթոշակները և դրամական պարգևներ նույն մասնագիտության՝ անվճար հիմունքներով սովորող երկրորդ, երրորդ և չորրորդ կուրսի ուսանողուհիներ Ժաննա Ղալթախչյանին, Իրինա Աղաբեկյանին, Հեղինե Մխիթարյանին, Սերինե Մատինյանին և Մերի Գասպարյանին:

Հանդիպման  վերջում  երիտասարդ  կամավորն  ամփոփեց  իր  մեկ  տարվա կատարած աշխատանքը ԵՊՀ Իջևանի մասնաճյուղում և Անժելա Վանեսյանի անվան ֆրանկոֆոնիայի կենտրոնում:

Հնչեց շնորհակալական խոսք ուսանողների և դասախոսների կողմից:   

2016թ. ապրիլի 29-ին ԵՊՀ Իջևանի մասնաճյուղ այցելեցին Ռուսաստանի Դաշնության Գժելի պետական համալսարանի պատվիրակության ներկայացուցիչները՝ Սերվիսի և տուրիզմի ամբիոնի վարիչ, մանկ. գիտ. թեկն., դոցենտ Տատյանա Լիսիցինան (պատվիրակության ղեկավար), նույն ամբիոնի դոցենտ, Ռուսաստանի Դաշնության վաստակավոր նկարիչ, ՌԳՄ անդամ, մանկ. գիտ. թեկն. Իրինա Կորշունովան, մշակութաբան. թեկն., դոցենտ, զբոսավար Ալլա Կորժանովան:

Այցելության հիմնական նպատակը  ԵՊՀ Իջևանի մասնաճյուղի հետ համագործակցության պայմանագիր կնքելը, համատեղ ծրագրեր իրականացնելն էր:

Նախ՝ տեղի ունեցավ մասնաճյուղի տնօրեն Ս.Առաքելյանի հետ հանդիպում, որին մասնակցեցին Տնտեսագիտության ֆակուլտետի դեկան Ն.Խուդավերդյանը և  պատվիրակության ղեկավար Տ.Լիսիցինան:

Հանդիպման ընթացքում կողմերը ներկայացրին կրթական և գիտամշակութային գործունեություն իրականացնող երկու համալսարանների առաքելությունները, հիմնական խնդիրները, գործող ֆակուլտետներն ու մասնագիտությունները, ապա քննարկելով համագործակցության պայմանագրի դրույթները՝ ստորագրեցին այն:

 Այնուհետև Տնտեսագիտության ֆակուլտետի դեկան Ն.Խուդավերդյանի հետ ձեռքբերված պայմանավորվածության համաձայն՝ պատվիրակության անդամները ֆակուլտետի «Սերվիս» մասնագիտության ուսանողների հետ ունեցան սեմինար-քննարկում, որի ընթացքում տիկին Լիսիցինան շնորհանդեսի ուղեկցությամբ ուսանողներին ներկայացրեց Գժելի պետական համալսարանի վերաբերյալ ընդհանուր տեղեկատվություն, իրենց բուհում գործող ֆակուլտետները, մասնագիտությունները, տարատեսակ խմբակները (պարի, սպորտի, ժամանցի և այլն), բակալավրական, մագիստրոսական և ասպիրանտական ուսուցման պայմանները, վճարովի և անվճար ուսուցման հնարավորությունները և այլն:

Ուսանողներն ուղղեցին իրենց հետաքրքող հարցերը և ստացան լիարժեք պատասխաններ:

 Ապա տեղի ունեցավ հանդիպում Կիրառական արվեստի ֆակուլտետում, որտեղ ֆակուլտետի դեկան Ա.Մարգարյանը և պրոֆեսորադասախոսական անձնակազմի ներկայացուցիչները Ռուսաստանից ժամանած հյուրերին ներկայացրին ֆակուլտետի ամբիոնները (Դեկորատիվ-կիրառական արվեստի և դիզայնի, Գծանկարի, գունանկարի և քանդակի), մասնագիտությունները («Կիրառական արվեստ», «Դիզայն») և արվեստանոցները (գծանկարի և գունանկարի, տեքստիլի, դիզայնի, խեցեգործության, քանդակի և այլն):

Արվեստանոցներում հյուրերը տեղում ականատես եղան աշխատանքների ստեղծագործական պրոցեսին, դրանց ստեղծման տեխնիկային: Նրանք մեծապես տպավորվեցին ֆակուլտետի ուսանողների և շրջանավարտների բազմաժանր (գոբելեն, գեղանկար, վիտրաժային նկարչություն, փայտի գեղարվեստական մշակում, բոլորաքանդակ, բատիկա, ասեղնագործություն և այլն) ստեղծագործություններով, որոնց մի մասը ցուցադրված էր ֆակուլտետում, իսկ մյուս մասը՝ Իջևանի քաղաքային պատկերասրահում:

Կիրառական արվեստի ֆակուլտետի ուսանողների համար պատվիրակության անդամ, ՌԴ վաստակավոր նկարիչ Իրինա Կորշունովան տվեց վարպետության դաս:

Նախ՝ շնորհանդեսի ուղեկցությամբ  տեսականորեն ներկայացրեց Գժելում թողարկվող կերամիկական արտադրության պատմությունը, ուսանողներին ծանոթացրեց իրենց համալսարանում դրա ստեղծման, մշակման տեխնիկային, իրենց կողմից ստեղծված և արտադրության մեջ դրված զարդանախշերին:

Այնուհետև այդ նախշերից մեկը վարպետ ձեռքով վրձնեց ներկաների համար՝ արժանանալով բոլորի հիացմունքին:

Վարպետության դասից հետո մասնաճյուղի աշխատակիցները հյուրերին ուղեկցեցին Իջևանի քաղաքային պատկերասրահ՝ նրանց ծանոթացնելով մասնաճյուղի դասախոսների և ուսանողների՝ այնտեղ ցուցադրված աշխատանքներին:

Ապա ԳՊՀ-ի պատվիրակության ներկայացուցիչներն այցելեցին Իջևանում տեղադրված` Հայոց ցեղասպության զոհերի հիշատակին նվիրված հուշահամալիր, ծաղիկներ դրեցին հուշարձանին, եղան Իջևանի պատմաերկրագիտական թանգարանում,  ծանոթացան ցուցանմուշների հետ, նրանց գրավեցին հատկապես թանգարանում պահվող բրոնզեդարյան մի շարք բացառիկ նմուշներ: 

Գժելի պետական համալսարանի ներկայացուցիչները ԵՊՀ Իջևանի մասնաճյուղից հեռացան ջերմ տպավորություններով, հույզերով, համագործակցության ծրագրերի նախագծերով և ԵՊՀ ԻՄ-ի ներկայացուցիչների պատասխան այցի սպասումով: