2016թ. նոյեմբերի 7-ին ԵՊՀ Իջևանի մասնաճյուղում կայացավ բազկամարտի մասնաճյուղային առաջնությունը, որի պատվավոր հյուրն էր բազկամարտի Եվրոպայի և աշխարհի չեմպիոն, մեր հայրենակից Արմեն Չապուխյանը:

Առաջնության մրցավարն էր Գեղարքունիքի մարզի բազկամարտի ֆեդերացիայի նախագահ, սպորտի վարպետ, միջազգային կարգի մրցավար Ջանիբեկ Ղազարյանը:

Բացման խոսքով հանդես եկավ ԵՊՀ ԻՄ-ի տնօրեն Ս.Ա.Առաքելյանը՝ ողջունելով բոլոր մասնակիցներին, պատվավոր հյուրերին, նշելով, որ մեզ համար մեծ պատիվ է բազկամարտի Եվրոպայի և աշխարհի չեմպիոն մեր հայրենակցի ներկայությամբ մասնաճյուղում առաջնության անցկացումը,  բազկամարտիկներին մաղթեց հաջողություններ, հաղթանակ ուժեղագույնին:

Խաղերն ընթացան երեք (65, 80, 90 կգ) քաշային կարգով:   

65 կգ քաշային կարգում առաջին տեղը գրավեց հեռակա ուսուցման համակարգի «Քարտեզագրություն և կադաստրային գործ» մասնագիտության I կուրսի ուսանող Հայկ Ղազարյանը, երկրորդ տեղը՝ հեռակա ուսուցման «Բնապահպանություն և բնօգտագործում» մասնագիտության I կուրսի ուսանող Արտակ Ասիրյանը, երրորդ տեղը զբաղեցրեց առկա ուսուցման համակարգի «Ինֆորմատիկա և կիրառական մաթեմատիկա» մասնագիտության I կուրսի ուսանող Օգսեն Մեհրաբյանը:

80 կգ քաշային կարգում  առաջին տեղը գրավեց հեռակա ուսուցման «Տնտեսագիտության տեսություն» մասնագիտության I կուրսի ուսանող Մհեր Եգանյանը, երկրորդ տեղը՝ հեռակա ուսուցման նույն մասնագիտության I կուրսի ուսանող Մաքսիմ Հախվերդյանը, երրորդ տեղը զբաղեցրեց հեռակա ուսուցման «Բնապահպանություն և բնօգտագործում» մասնագիտության I կուրսի ուսանող Սպարտակ Վարդումյանը:

90 կգ քաշային կարգում  առաջին տեղը գրավեց հեռակա ուսուցման «Սերվիս» մասնագիտության II կուրսի ուսանող Էրիկ Մանուչարյանը, երկրորդ տեղը՝  առկա ուսուցման «Մանկավարժություն և հոգեբանություն» մասնագիտության III կուրսի ուսանող Ալբերտ Զուրաբյանը, երրորդ տեղը զբաղեցրեց հեռակա ուսուցման «Տնտեսագիտության տեսություն» մասնագիտության I կուրսի ուսանող Սամվել Օրդինյանը:

Հաղթողին տնօրենության կողմից նախատեսված հուշանվերը հանձնեց աշխարհի և Եվրոպայի չեմպիոն Արմեն Չապուխյանը:

Տնօրեն Ս.Առաքելյանն էլ Ա. Չապուխյանին նվիրեց Կիրառական արվեստի ֆակուլտետի ուսանողների աշխատանքներից մեկը:

Առաջնությունից հետո միջազգային կարգի մրցավար Ջանիբեկ Ղազարյանը մեր մարզիկներին տվեց կարևոր ցուցումներ:

Բազկամարտի մասնաճյուղային առաջնության հաղթողները ս.թ. նոյեմբերի 17-ին՝ Ուսանողության միջազգային օրվա կապակցությամբ, կմասնակցեն Երևանում կայանալիք բազկամարտի առաջնությանը:

Մեր տղաներին մաղթում ենք հաջողություն և չեմպիոնական տիտղոս:  

2016թ. նոյեմբերի 7-ին Հումանիտար գիտությունների ֆակուլտետում տեղի ունեցավ «Հոգեբանամանկավարժական շտկման ուղղությունները» թեմայով տեսագործնական բաց դաս, որը վարեց Մանկավարժության և հոգեբանության ամբիոնի դասախոս Էդիտա Սիմոնյանը:

Բաց դասին ներկա էին ԵՊՀ ԻՄ-ի տնօրեն Ս. Ա. Առաքելյանը, Մանկավարժության և հոգեբանության ամբիոնի վարիչը, դասախոսներ և ուսանողներ:

Նախ դասախոսը ներկայացրեց դասի թեման, նպատակը և խնդիրները:
Ապա ուսանողները համապատասախան շնորհանդեսների ուղեկցությամբ ներկայացրին «Ավազաթերապիա», «Նկարչաթերապիա», «Երաժշտաթերապիա», «Հեքիաթաթերապիա» թեմաներով զեկուցումներ:

Նշվեց, որ նկարչաթերապիայի նպատակն է նպաստել երեխաների մտածողության, երևակայության, ուշադրության, ստեղծագործական և ճանաչողական հմտությունների զարգացմանը, հնարավորություն տալ անձին ոչ վերբալ (ոչ խոսքային) ճանապարհով ինքնադրսևորվելու, ինքնակարգավորվելու, ինքնաբացահայտվելու, դուրս բերելու ներքին հուզական կուտակումներն ու լարվածությունը:

Ընդգծվեց, որ ավազաթերապիան նպաստում է անհատականացման գործընթացին, ազատում է ներքին զգացմունքներից, ակտիվացնում է հիշողությունը, կապ է ստեղծում անգիտակցականի և գիտակցականի, ներքինի և արտաքինի, հոգևորի և ֆիզիկականի միջև, զարգացնում է երեխայի ստեղծագործական ընդունակությունները, տարածական, մաթեմատիկական մտածողությունը, վերացնում է վախերը, անհանգստությունները, բացասական հույզերը:

Մատնանշվեցին երաժշտաթերապիայի հիմնական խնդիրները՝ սեփական մարմնի գիտակցումը, տարածության մեջ կողմնորոշումը, սեփական գործողությունների կառավարումը, հավասարակշռության պահպանումը, շփման զարգացումը, սթրեսային վիճակի թուլացումը, մտավոր և սոցիալական ունակությունների զարգացումը: Առանձնացվեցին երաժշտաթերապիայի միջոցով հոգեբանական շտկման հիմնական մեխանիզմները՝ կատարսիսը (հուզական լիցքաթափում), սեփական ապրումների գիտակցման թեթևացումը, կյանքի խնդիրների հետ առերեսումը, հուզական արտահայտվածության նոր միջոցների ձեռքբերումը:

Հատկանշվեց, որ հեքիաթաթերապիան կիրառվում է կրթության մեջ, անձի զարգացման ու թրեյնինգների անցկացման նպատակով, ինչպես նաև հանդես է գալիս որպես հոգեթերապիայի հզոր միջոց: Հեքիաթաթերապիան նպաստում է երեխաների երևակայության, ստեղծագործական մտքի զարգացմանը, խնդիրներ լուծելու, որոշումներ կայացնելու մեխանիզմների ձևավորմանը: Հեքիաթների, ասացվածքների և լեգենդների միջոցով երեխայի մեջ սերմանվում են բարոյական չափանիշները, կանոնները, կյանքի անհրաժեշտ փորձը:

Դասի ընթացքում կիրառվեցին մի քանի գործնական վարժություններ և տեխնիկաներ՝ ուսանողների տեսական գիտելիքները գործնականորեն ամրապնդելու նպատակով:

Տեղի ունեցավ ակտիվ քննարկում, արծարծված հարցերի շուրջ կարծիքների փոխանակություն:

Բաց դասի վերջում ելույթ ունեցավ ԵՊՀ ԻՄ-ի տնօրեն Ս. Ա. Առաքելյանը՝ ողջունելով Մանկավարժության և հոգեբանության ամբիոնի կողմից կազմակերպված՝ այս ուստարվա առաջին բաց դասը, նրա մասնակիցներին, ընդգծելով ուսումնական գործընթացում նման նախաձեռնությունների կարևորությունը, ակնկալելով, որ դրանք մասնաճյուղում կկրեն համատարած և շարունակական բնույթ:

2016թ. նոյեմբերի 4-ին ԵՊՀ ԻՄ-ի բնական գիտությունների ֆակուլտետում տեղի ունեցավ ինտելեկտուալ խաղ, որը կազմակերպել էր ֆակուլտետի ուսանողական գիտական ընկերությունը:

Ներկա էին Բնական գիտությունների ֆակուլտետի դեկանը, Ընդհանուր մաթեմատիկայի և բնագիտության ամբիոնի վարիչը, պրոֆեսորադասախոսական անձնակազմի ներկայացուցիչներ:  

Ինտելեկտուալ խաղին մասնակցում էր չորս թիմ, որոնց անուններն ընտրված էին իրենց մասնագիտական ոլորտից՝ «Պասկալ» (ԻԿՄ I), «Մետրիկա» (ԻԿՄ II), «Վեկտոր» (ԻԿՄ II) և «Գլոբուս» (ՔԿԳ II):

Նախ՝ ներկայացվեցին խաղի կանոնները, ապա թիմերին առաջադրվեց «Աշխարհ և մարդիկ» թեմայով տրամաբանական և ճանաչողական բնույթի 20 հարց:

Խաղի ընթացքում տեղի ունեցավ բուռն քննարկում. թիմերը հայտնում էին իրենց կարծիքները, առաջադրված հարցերին տալիս այլ պատասխաններ:

Ֆակուլտետային ինտելեկտուալ խաղում հաղթող ճանաչվեց  «Վեկտոր» (ԻԿՄ II) թիմը:

2016թ. նոյեմբերի 4-ին ԵՊՀ ԻՄ-ի հումանիտար գիտությունների ֆակուլտետում կայացավ Ուսումնամեթոդական վարչության պետ Ա.Դավթյանի ու «Անգլերեն լեզու և գրականություն» մասնագիտության կրթական ծրագրի պատասխանատու Ա.Սիմոնյանի հանդիպումը «Անգլերեն լեզու և գրականություն» մասնագիտության 2-րդ կուրսի ուսանողների հետ:

Հանդիպման ընթացքում քննարկվեցին կրթական ծրագրի կառուցվածքային և բովանդակային, ուսանողներին հուզող ընթացիկ ծրագրային մի շարք հարցեր, որոնք հիմնականում վերաբերում էին առարկաների թեմատիկային, լսարանում դրանց իրականացաման աստիճանին, հաջորդ կիսամյակներում անցկացվելիք դասընթացների ցանկին, գնահատման մեխանիզմներին ու չափորոշիչներին, կուրսային և ավարտական աշխատանքենրի թեմաների ընտրության սկզբունքին, մասնագետի նկարագրին և աշխատանքի հետագա հնարավորություններին:

Նախ՝ Ուսումնամեթոդական վարչության պետը և տվյալ մասնագիտության կրթական ծրագրի պատասխանատուն ուսանողներին ներկայացրին կրթական ծրագրի ընդհանուր կառուցվածքը:  Ապա պատասխանեցին ուսանողների հղած հարցերին: