2016թ. նոյեմբերի 12-ին ԵՊՀ Իջևանի մասնաճյուղում տեղի ունեցավ «Քարտեզագրություն և կադաստրային գործ» մասնագիտության ուսանողների հետ ԵՊՀ ԻՄ-ի տնօրենի  և մասնագիտության ներկայացուցիչների հանդիպումը:

Հանդիպման նպատակն էր ուսանողներին ներկայացնել Մայր բուհի նվերը մասնաճյուղին՝ «Քարտեզագրություն և կադաստրային գործ» մասնագիտության ուսանողների համար էլեկտրոնային տախեոմետր:        

Նախ մասնաճյուղի տնօրեն Ս. Ա. Առաքելյանը հայտնեց իր խորին շնորհակալությունը ԵՊՀ-ի ռեկտոր պարոն Ա. Հ. Սիմոնյանին՝ «ՔԿԳ» մասնագիտության ուսանողների և պատասխանատուների կողմից ներկայացված խնդրանքը կատարելու՝ մասնագիտության համար այնքան անհրաժեշտ ու թանկարժեք սարքը տրամադրելու համար, ուսանողներին հորդորեց լինել առավել ակտիվ ու նպատակասլաց, ջանք ու եռանդ չխնայել լավ սովորելու, պահանջված մասնագետներ դառնալու գործում:   

Ապա Ընդհանուր մաթեմատիկայի և բնագիտության ամբիոնի ասիստենտ Սմբատ Դավթյանը ուսանողներին ներկայացրեց սարքի՝ էլեկտրոնային տախեոմետրի տեխնիկական ցուցանիշները, ավանդականի նկատմամբ առավելությունները:

«Էլեկտրոնային տախեոմետրը ժամանակակից սարքավորում է, որի միջոցով բարձր ճշտությամբ ստացվում են կետերի կոորդինատները և բարձրությունները, ինչպես նաև հնարավորություն է ստեղծվում տեղանքում որոշել ցանկացած կետի տեղադիրքը, այն ամրացնել համապատասխան սահմանանշանով, որը շատ կարևոր է կադաստրի վարման համար:  Այս սարքը համապատասխանում է միջազգային ստանդարտներին (քարտեզագրական բոլոր տվյալները ներկայացվում են թվային տեսքով), ունի ճշտության բարձր աստիճան, յուրաքանչյուր կետը չափում է կոորդինատների համար շատ բարձր արագությամբ (1-2 վայրկյանում): Տվյալները հավաստի են և կապված չեն մարդու տեսողության առանձնահատկությունների հետ, դրանք անմիջականորեն փոխանցվում են համակարգիչ, որտեղ էլ շատ արագ կազմվում է տվյալ տարածքի կադաստրային կամ տեղագրական քարտեզը»,- իր խոսքում ընդգծեց պարոն Դավթյանը:

Նշվեց, որ այս սարքի շնորհիվ մեր ուսանողները կդառնան աշխատաշուկայում առավել մրցունակ մասնագետներ:

2016թ. նոյեմբերի 10-ին ԵՊՀ ԻՄ-ի բնական գիտությունների ֆակուլտետում զեկուցում կարդաց «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանող Սարիբեկ Սարիբեկյանը:

Ներկա էին ֆակուլտետի վարչական և պրոֆեսորադասախոսական անձնակազմի ներկայացուցիչներ, ուսանողներ:

Ս.Սարիբեկյանը ընդհանուր գծերով ներկայացրեց իր գրած ծրագիրը, որը հաշվում է n չափանի քառակուսային մատրիցի դետերմինանտը (որոշիչը), mxn չափանի մատրիցի ռանգը, nxn չափանի մատրիցի հակադարձը, գտնում մատրիցի` գծորեն անկախ տողերը:

Ապա զեկուցողը ներկայացրեց ծրագրի կոդը, շնորհանդեսի միջոցով ցույց տվեց ծրագրի  աշխատանքի արդյունքները տարբեր մուտքային տվյալների համար:

Զեկուցողին առաջադրվեցին հարցեր. ծավալվեց ակտիվ քննարկում:

2016թ. նոյեմբերի 8-ին ԵՊՀ Իջևանի մասնաճյուղում կայացավ Հումանիտար գիտությունների ֆակուլտետի գիտական խորհրդի ընդլայնված նիստ, որին մասնակցում էին ֆակուլտետի գիտխորհրդի անդամները, վարչական և պրոֆեսորադասախոսական անձնակազմի ներկայացուցիչներ, ուսանողներ:

Նիստի ընթացքում քննարկվեցին 2016-17 ուստարվա կուրսային և ավարտական աշխատանքների ընթացքին վերաբերող հարցեր, ամփոփվեցին այս ուստարվա առաջին կիսամյակի առաջին ընթացիկ քննությունների և ստուգումների արդյունքները:

Առաջին հարցի վերաբերյալ Հումանիտար գիտությունների ֆակուլտետի գիտական խորհրդի նախագահ, ֆակուլտետի դեկան, պ.գ.դ., պրոֆեսոր Ա.Ներսիսյանը մասնավորապես նշեց, որ կուրսային և ավարտական  աշխատանքների կատարման ընթացքը վերահսկվում է համապատասխան ամբիոնների և ղեկավարող դասախոսների կողմից:

Ամբիոնների կողմից կազմվել է ղեկավարների հետ հանդիպումների ժամանակացույց: Ուսանողներին տրվել է կուրսային և ավարտական աշխատանքների համար անհրաժեշտ տեսական գրականության ցանկը, հստակեցվել աշխատանքի կառուցվածքը, և այժմ աշխատանքները շարադրանքի փուլում են:

Զեկուցողը նշեց, որ մասնակի բացառություններով կուրսային և ավարտական աշխատանքների կատարման ընթացքը բավարար է: Անհրաժեշտ է ուշադրության կենտրոնում ունենալ այն ուսանողներին, ովքեր դեռևս բավարար աշխատանք չեն կատարել, հանդիպել նրանց ղեկավարներին, հարկ եղած դեպքում այդ գործում ներգրավել նաև ամբիոնի այլ դասախոսների:

Ամփոփելով 2016-17 ուստարվա առաջին կիսամյակի առաջին ընթացիկ քննությունների  և ստուգումների արդյունքները՝ խորհրդի նախագահը նշեց, որ քննաշրջանը կազմակերպվել է պատշաճ կարգով, նախապես կազմված ժամանակացույցով: Ուսանողների կողմից բարձրացված խնդիրները՝ կապված հարցաշարերի հետ, ժամանակին լուծվել են, և տարաձայնություններ չեն եղել:

Ընդգծվեց, որ ընթացիկ քննությունների և ստուգումների ճիշտ կազմակերպումը ուսանողների գիտելիքների մաս-մաս ստուգման մեխանիզմի կատարելագործման գործում ունի կարևոր դերակատարություն: Այս կիսամյակի ընթացիկ քննություններն ու ստուգումները իրականացվել են տարբեր մեթոդներով: Որոշ դասախոսներ ուսանողների գիտելիքները ստուգել են հարցը ամբողջական շարադրելու մեթոդով, իսկ ոմանք՝ քննական թեստերով: Քննական թեստերի կազմման գործում կիսամյակից կիսամյակ նկատվում է մասնագիտական կատարելագործում:

Նիստը իր ելույթով եզրափակեց մասնաճյուղի տնօրեն Ս. Ա. Առաքելյանը: Նա բավարար համարեց կատարված աշխատանքները և նշեց, որ պետք է մեծ ուշադրություն դարձնել ընթացիկ քննություններին և ստուգումներին, հետևողական լինել, որ ուսանողների գնահատականնեը հնարավորինս լիարժեքորեն արտացոլեն նրանց գիտելիքները: 

2016թ. նոյեմբերի 7-ին ԵՊՀ Իջևանի մասնաճյուղում կայացավ բազկամարտի մասնաճյուղային առաջնությունը, որի պատվավոր հյուրն էր բազկամարտի Եվրոպայի և աշխարհի չեմպիոն, մեր հայրենակից Արմեն Չապուխյանը:

Առաջնության մրցավարն էր Գեղարքունիքի մարզի բազկամարտի ֆեդերացիայի նախագահ, սպորտի վարպետ, միջազգային կարգի մրցավար Ջանիբեկ Ղազարյանը:

Բացման խոսքով հանդես եկավ ԵՊՀ ԻՄ-ի տնօրեն Ս.Ա.Առաքելյանը՝ ողջունելով բոլոր մասնակիցներին, պատվավոր հյուրերին, նշելով, որ մեզ համար մեծ պատիվ է բազկամարտի Եվրոպայի և աշխարհի չեմպիոն մեր հայրենակցի ներկայությամբ մասնաճյուղում առաջնության անցկացումը,  բազկամարտիկներին մաղթեց հաջողություններ, հաղթանակ ուժեղագույնին:

Խաղերն ընթացան երեք (65, 80, 90 կգ) քաշային կարգով:   

65 կգ քաշային կարգում առաջին տեղը գրավեց հեռակա ուսուցման համակարգի «Քարտեզագրություն և կադաստրային գործ» մասնագիտության I կուրսի ուսանող Հայկ Ղազարյանը, երկրորդ տեղը՝ հեռակա ուսուցման «Բնապահպանություն և բնօգտագործում» մասնագիտության I կուրսի ուսանող Արտակ Ասիրյանը, երրորդ տեղը զբաղեցրեց առկա ուսուցման համակարգի «Ինֆորմատիկա և կիրառական մաթեմատիկա» մասնագիտության I կուրսի ուսանող Օգսեն Մեհրաբյանը:

80 կգ քաշային կարգում  առաջին տեղը գրավեց հեռակա ուսուցման «Տնտեսագիտության տեսություն» մասնագիտության I կուրսի ուսանող Մհեր Եգանյանը, երկրորդ տեղը՝ հեռակա ուսուցման նույն մասնագիտության I կուրսի ուսանող Մաքսիմ Հախվերդյանը, երրորդ տեղը զբաղեցրեց հեռակա ուսուցման «Բնապահպանություն և բնօգտագործում» մասնագիտության I կուրսի ուսանող Սպարտակ Վարդումյանը:

90 կգ քաշային կարգում  առաջին տեղը գրավեց հեռակա ուսուցման «Սերվիս» մասնագիտության II կուրսի ուսանող Էրիկ Մանուչարյանը, երկրորդ տեղը՝  առկա ուսուցման «Մանկավարժություն և հոգեբանություն» մասնագիտության III կուրսի ուսանող Ալբերտ Զուրաբյանը, երրորդ տեղը զբաղեցրեց հեռակա ուսուցման «Տնտեսագիտության տեսություն» մասնագիտության I կուրսի ուսանող Սամվել Օրդինյանը:

Հաղթողին տնօրենության կողմից նախատեսված հուշանվերը հանձնեց աշխարհի և Եվրոպայի չեմպիոն Արմեն Չապուխյանը:

Տնօրեն Ս.Առաքելյանն էլ Ա. Չապուխյանին նվիրեց Կիրառական արվեստի ֆակուլտետի ուսանողների աշխատանքներից մեկը:

Առաջնությունից հետո միջազգային կարգի մրցավար Ջանիբեկ Ղազարյանը մեր մարզիկներին տվեց կարևոր ցուցումներ:

Բազկամարտի մասնաճյուղային առաջնության հաղթողները ս.թ. նոյեմբերի 17-ին՝ Ուսանողության միջազգային օրվա կապակցությամբ, կմասնակցեն Երևանում կայանալիք բազկամարտի առաջնությանը:

Մեր տղաներին մաղթում ենք հաջողություն և չեմպիոնական տիտղոս: