2016թ. մայիսի 25-ին Կիրառական արվեստի ֆակուլտետում տեղի ունեցավ ավարտական աշխատանքների պաշտպանություն:

Ամփոփիչ ատեստավորման հանձնաժողովը գլխավորում էր ՀՀ նկարիչների միության նախագահի տեղակալ-քարտուղար, պրոֆեսոր Խաչատուր Սուրենի Ազիզյանը:

Ողջույնի խոսքով հանդես եկավ մասնաճյուղի տնօրեն Սամվել Առաքելյանը՝ մասնավորապես նշելով. «Հանձնաժողովի հարգարժա՛ն նախագահ, հարգելի՛ անդամներ, սիրելի՛ ուսանողներ, այսօր սկսում ենք Կիրառական արվեստի ֆակուլտետի չորրորդ կուրսի ավարտական աշխատանքների պաշտպանությունը: Այսօր մեզ համար տոնական օր է. ուսանողները ներկայացնելու են չորս տարվա ուսումնառության ընթացքում իրենց ստացած գիտելիքների ամփոփիչ պատկերը: Բնականաբար, մենք հետևել ենք ավարտական աշխատանքների իրականացման գործընթացին և միանշանակ կարող ենք փաստել, որ ուսանողներն  ու ղեկավարները ջանասիրաբար աշխատել են: Ինչո՞վ են առանձնահատուկ այս տարվա աշխատանքները: Եթե նախորդ տարիներին հիմնական շեշտադրումը լինում էր գոբելենների, կարպետների, այսինքն՝ տեքստիլի ուղղությամբ, ապա այս տարի ոճը բավականին փոխվել է և՛ արվեստի տարբեր ճյուղերի համադրման, և՛ վիտրաժային աշխատանքների, և՛ քանդակների առումով: Հասկանալի է, որ արվեստն այն բնագավառն է, որտեղ գրեթե անհնար է կատարելության հասնել, բայց, անկեղծ ասած, գոբելենի առումով մենք որոշակի բարձունքի հասել ենք…»:

Ամփոփելով իր ելույթը՝ տնօրենը ուսանողներին մաղթեց հաջող պաշտպանություն և խոսքը փոխանցեց Մակարավանքի հոգևոր հովիվ Հայր Սամվել Մխիթարյանին:

Հայր Սամվելը ողջունեց ավարտական աշխատանքների պաշտպանության մասնակիցներին և կատարեց աղոթք ու օրհնություն:

Ավարտական աշխատանքների թեմատիկան շատ ընդգրկուն էր:

Երեսունմեկ աշխատանքներից տասը գեղանկար էր, մեկը` գոբելեն, երեքը` բատիկա, երկուսը` խեցեգործություն, մեկը` կարպետագործություն, երեքը` վիտրաժային նկարչություն, յոթը` քանդակ, մյուսները՝ համադրական աշխատանքներ:

Արդյունքները բավականին գոհացուցիչ էին. շատ աշխատանքներ արժանացան հանձնաժողովի նախագահի և անդամների դրվատանքին:

17 ուսանողներ ստացան «գերազանց» գնահատական, 14 ուսանող` «լավ»:

Ամփոփիչ ատեստավորման հանձնաժողովի կողմից  բարձր (20 միավոր) գնահատվեցին Անուշ Աբգարյանի («Զարդանախշերի խաղ», խճանկար, ղեկավար՝ Ա.Միրզոյան), Հասմիկ Գրիգորյանի («Դեկորատիվ հայելի»՝ մետաղական շրջանակով, ղեկավար՝ Ա.Միրզոյան), Նարինե Դարբինյանի («Լույսի խորան», սրբանկարչություն, ղեկավար՝ Ք.Մխիթարյան), Ռուզան Կարապետյանի («Սասունցի Դավիթ», հարթաքանդակ, ղեկավար՝ Ս.Հովհաննիսյան), Մերի Ներսեսյանի («Դեկորատիվ թռչուն», լուսամփոփ, ղեկավար՝ Ա.Չիբուխչյան), Աննա Սարհատյանի («Գարուն», գոբելեն, ղեկավար՝ Դ.Չիբուխչյան), Մարիամ Սարհատյանի («Նատյուրմորտ», խճապատկեր, ղեկավար՝ Ա.Չիբուխչյան), Սարինե Օհանյանի («Սարիբեկ Օհանյան», գեղանկար, ղեկավար՝ Ս.Հովհաննիսյան), Մերի Օսիպովայի («Կիրառական արվեստի ֆակուլտետի պատկերանիշ», ղեկավար՝ Ա.Միրզոյան) ավարտական աշխատանքները:

19 միավորի արժանացան Սուրեն Հովսեփյանի «Պողոս Առաքյալ» հարթաքանդակը (ղեկավար՝ Ս.Հովհաննիսյան) և Լորետա Ստեփանյանի «Հաղթական երթ» ֆիգուրատիվ կոմպոզիցիան (ղեկավար՝ Հ.Ասատրյան):

18 միավոր տրվեցին Ռուբեն Բարսեղյանի «Կորցված երջանկություն» գեղանկարին (ղեկավար՝ Ա.Խաչատրյան), Գարիկ Մկրտչյանի «Եղիցի լույս» խաչքարին (ղեկավար՝ Ս.Հովհաննիսյան), Հերիքնազ Ոսկանյանի «Դեկորատիվ մրգաման» աշխատանքին (ղեկավար՝ Ա.Միրզոյան), Վարուժան Սարհատյանի «Օջախ» պաննոյին (ղեկավար՝ Դ.Պողոսյան), Էդուարդ Սիմոնյանի «Պարուհի» գեղանկարին (ղեկավար՝ Ա.Խաչատրյան):      

Ավարտական աշխատանքների պաշտպանությունն անցավ հաճելի մթնոլորտում, մասնակիցներին պատճառեց գեղագիտական մեծ հաճույք, աշխատանքների թեմատիկային համապատասխան՝ ներկայացվեցին նաև գրական-երաժշտական կատարումներ, որոնք ավելի ամբողջական դարձրին աշխատանքների ներկայացումը: 

Կիրառական արվեստի ֆակուլտետի վարչական և պրոֆեսորադասախոսական անձնակազմի ներկայացուցիչները բակալավրի որակավորում ստանալու կապակցությամբ շնորհավորեցին իրենց շրջանավարտներին` մաղթելով նրանց մասնագիտական նորանոր բարձունքներ ու հաջողություններ կյանքում:

2016թ. մայիսի 21-ին «Արմենիա»  հեռուստաընկերությամբ կայացած «Ամենախելացին» ինտելեկտուալ խաղի երրորդ եթերաշրջանի երկրորդ  կիսաեզրափակիչ փուլի հաղթող է ճանաչվել ԵՊՀ Իջևանի մասնաճյուղի բնական գիտությունների ֆակուլտետի «Քարտեզագրություն և կադաստրային գործ» մասնագիտության առաջին կուրսի ուսանողուհի Անգին Ծատուրյանը: 

Անգինի հետ ունեցած հարցազրույցում նա այսպես է արտահայտվել նախագծին իր մասնակցության վերաբերյալ.

 -Անգի՛ն, ի՞նչ է Ձեզ սովորեցրել «Ամենախելացին». և ի՞նչ դեռ կսովորեցնի:

-«Ամենախելացին» նախագիծն ինձ սովորեցրել է փորձել և չզղջալ, հավատալ սեփական գիտելիքներին և չընկճվել: Կսովորեցնի` ձգտել լինել ավելին:

 –Ի՞նչն է Ձեր բնավորության մեջ օգնում և խանգարում  այս խաղում .

-Օգնում է հուսախաբ չանելու վախը և համառությունը, իսկ խանգարում է դանդաղ մտածելը և հուզմունքը:

–Ինչպե՞ս կբնորոշեք Ձեր կյանքի այս փուլը:

–Թեև այն հագեցած էր  և հուզառատ, այնուամենայնիվ  ես  չեմ զղջացել մասնակցության համար: Ես հասկացել եմ, թե ինչ եմ ուզում, ինչպիսին եմ ուզում դառնալ և անկախ նրանից՝ կհաղթեմ, թե ոչ, ես ամեն ինչ կանեմ, որպեսզի դառնամ ավելին, քան ես կամ, իսկ հաղթանակը՝ կյանքը ցույց կտա… Թո՛ղ հաղթի նա, ով ամենաշատը կհավատա իր հաղթանակին, և ում այն ամենաշատն է պետք:

«Ամենախելացին» նախագիծն աշխարհահռչակ “SONY Pictures” ընկերության “The Brainiest” ինտելեկտուալ խաղի հայկական տարբերակն է, որը Հայաստանում իրականացնում է “Armenia TV”-ն:

 «Ամենախելացին» հեռուստանախագծի երրորդ եթերաշրջանին մասնակցել են  Հայաստանի և Արցախի բուհերում սովորող բակալավրիատի առաջին և երկրորդ կուրսերի ուսանողները:

Հայտագրման փուլն ավարտվելուց հետո ուսանողները հրավիրվել են գրավոր քննության, մասնակցել անհատական թեստի լրացմանը և 20 րոպեում պատասխանել 40 հարցի: 

Անհատական թեստի արդյունքների հիման վրա անցկացվել է բանավոր տեսանկարահանվող քաստինգ, որի ժամանակ ուսանողներն իրենց նախընտրած մեկ թեմայի շրջանակներում մեկ րոպեի ընթացքում պատասխանել են հնարավորինս շատ հարցերի:

Այս փուլերին մասնակցելուց հետո հեռուստախաղի խմբագրական և պրոդյուսերական աձնակազմը տվել է իր գնահատականը, և իրենց ունակություններով խաղի բոլոր պահանջներին բավարարած ուսանողները դարձել են «Ամենախելացին» հեռուստախաղի երրորդ եթերաշրջանի մասնակիցը:

Հարցերը և թեմաներն ուսանողներին նախապես չեն տրամադրվել, նրանք հարցերին պատասխանել են իրենց ունեցած գիտելիքներով: Ընդգրկված են եղել նաև ուսանողների ընդհանուր զարգացվածության մակարդակը բացահայտող հարցեր: 

Այս փուլի հաղթանակի առթիվ ԵՊՀ Իջևանի մասնաճյուղը սիրով շնորհավորում է իր ուսանողուհի Անգին Ծատուրյանին՝ մաղթելով նրան հաղթանակ խաղի եզրափակիչ փուլում և կյանքի բոլոր բնագավառներում: