2017թ. սեպտեմբերի 19-ին ԵՊՀ Իջևանի մասնաճյուղում կայացավ տնօրենության նիստ՝ Ս. Ա. Առաքելյանի նախագահությամբ:

Նիստի ընթացքում ամփոփվեց ԵՊՀ ԻՄ-ի առկա և հեռակա ուսուցման՝ 2016-2017 ուստարվա 2-րդ կիսամյակի I լուծարքային շրջանը, քննարկվեցին 2017-2018 ուստարվա 1-ին կիսամյակի I ընթացիկ քննությունների և ստուգումների նախապատրաստական աշխատանքներին, ԵՊՀ ԻՄ-ում կառուցվածքային փոփոխություններին վերաբերող և մի քանի այլ ընթացիկ հարցեր:

Առաջին հարցի վերաբերյալ մասնավորապես նշվեց, որ ԵՊՀ ԻՄ-ի առկա և հեռակա ուսուցման՝ 2016-2017 ուստարվա 2-րդ կիսամյակի I լուծարքային շրջանում առկա ուսուցման համակարգից II լուծարքային շրջան է անցել 18 ուսանող, Հեռակա ուսուցման համակարգից՝ 212 ուսանող: Ներկայացվեց, որ II լուծարքային շրջանը կավարտվի ս.թ. սեպտեմբերի 23-ին:

Ֆակուլտետների դեկաններին հանձնարարվեց ԵՊՀ ռեկտորատի՝ ս.թ. սեպտեմբերի 14-ի որոշման (I լուծարքային շրջանը հանձնելուց հետո 21 և ավելի կրեդիտ պարտք ունեցող ուսանողներին հեռացնել համալսարանից) մասին իրազեկել ուսանողներին և այն մասնաճյուղում կիրառել 2017-2018 ուստարվա 1-ին կիսամյակից:

Մյուս հարցի կապակցությամբ Ուսումնամեթոդական վարչությանը հանձնարարվեց մինչև ս.թ. հոկտեմբերի 6-ը ներկայացնել 2017-2018 ուստարվա 1-ին կիսամյակի I ընթացիկ քննությունների և ստուգումների ժամանակացույցները:

Տնօրենության նիստի ընթացքում ներկայացվեցին նաև ԵՊՀ ԻՄ-ում Գիտակազմակերպական  բաժին ստեղծելու, Անձնակազմի կառավարման բաժինը Մարդկային ռեսուրսների կառավարման և վերապատրաստման բաժին վերակազմավորելու,  վարչատնտեսական վարչությունը լուծարելու վերաբերյալ կառուցվածքային փոփոխությունները:

2017թ. սեպտեմբերի 11-ին ԵՊՀ Իջևանի մասնաճյուղում կայացավ տնօրենության նիստ, որը նախագահում էր Ս. Ա. Առաքելյանը:

Նիստի ընթացքում քննարկվեցին ԵՊՀ ԻՄ-ի աշխատակազմի հրամանագրման գործընթացին, մասնաճյուղի՝ 2018թ. ընդունելության մասնագիտություննների ցանկին վերաբերող և մի քանի ընթացիկ հարցեր:

Առաջին հարցի կապակցությամբ Անձնակազմի կառավարման բաժնին հանձնարարվեց մինչև շաբաթվա վերջը ավարտին հասցնել ԵՊՀ ԻՄ-ի դասախոսական, վարչական, ուսումնաօժանդակ և տնտեսական անձնակազմի հրամանագրման գործընթացը: 

Քննարկելով 2018թ. ընդունելության մասնագիտություննների ցանկը,  ելնելով տարածաշրջանում դրանց եղած պահանջարկից, աշխատաշուկայի պահանջներից՝   առաջակվեցին «Դիզայն» (Կիրառական արվեստի ֆակուլտետ), «Ինֆորմատիկա» (Բնական գիտությունների ֆակուլտետ), «Ֆինանսներ», «Զբոսաշրջություն» (Տնտեսագիտության ֆակուլտետ), «Տարրական մանկավարժություն և մեթոդիկա», «Պատմություն», «Հայոց լեզու և գրականություն», «Անգլերեն լեզու և գրականություն», «Ֆրանսերեն լեզու և գրականություն» (Հումանիտար գիտությունների ֆակուլտետ) մասնագիտությունները:

2017թ. օգոստոսի 22-ին ԵՊՀ Իջևանի մասնաճյուղում տեղի ունեցավ տնօրենության նիստ՝ Ս. Ա. Առաքելյանի նախագահությամբ:

Նիստում քննարկվեցին 2017-2018 ուսումնական տարվա նախապատրաստական աշխատանքներին (ժամատախտակին, դասատախտակներին, աշխատանքային պլաններին, ամբիոնային ծանրաբեռնվածությանը, առարկայական փաթեթներին) վերաբերող և մի քանի ընթացիկ հարցեր:

Կարևորվեցին բուհի կադրային, նյութատեխնիկական և ուսումնամեթոդական ապահովվածության խնդիրները, ընդգծվեց, որ  անհրաժեշտ է հետևողականորեն իրականացնել մասնաճյուղի որդեգրած կադրային քաղաքականությունը՝ ԵՊՀ ԻՄ-ի դասախոսական, վարչական և ուսումնաօժանդակ անձնակազմը գերազանցապես բուհի շրջանավարտներով համալրելու մասին:

Նոր ուսումնական տարվա նախապատրաստական աշխատանքներին վերաբերող հարցի կապակցությամբ որոշվեց ֆակուլտետների դեկաններին հանձնարարել, որ մինչև սեպտեմբերի 1-ը փակցված լինեն նոր ուսումնական տարվա դասատախտակները, ամբիոնների վարիչներին հանձնարարել մինչև նոր ուսումնական տարին ամբիոնների նիստերում քննարկել դասախոսների անհատական ծանրաբեռնվածության հարցը և պատշաճ կերպով նախապատրաստվել 2017-2018 ուսումնական տարվան:

2017թ. հունիսի 27-ին ԵՊՀ Իջևանի մասնաճյուղում կայացավ տնօրենության ընդլայնված նիստ, որը նախագահում էր Ս. Ա. Առաքելյանը:

Նիստին ներկա էին տնօրենության անդամները, հրավիրված էին Մանկավարժության և հոգեբանության ամբիոնի վարիչը, մասնագիտությունների կրթական ծրագրերի պատասխանատուները:    

Նիստում քննարկվեցին առաջիկայում Գիտական խորհրդի տարեվերջյան ընդլայնված նիստ հրավիրելուն, 2017-2018 ուստարվա ընդունելության ընթացքին վերաբերող և մի քանի ընթացիկ հարցեր:

Առաջին հարցի հետ կապված՝ որոշվեց հուլիսի 8-ին մասնաճյուղում անցկացնել Գիտական խորհրդի տարեվերջյան ընդլայնված նիստ՝ հետևյալ օրակարգով.

1. ԵՊՀ Իջևանի մասնաճյուղի՝ 2017թ. ամփոփիչ ատեստավորման արդյունքների ամփոփում:
2. Մասնաճյուղի՝ 2018թ. մասնագիտությունների ցանկի քննարկում:
3. Ընթացիկ հարցեր:

2017-2018 ուստարվա ընդունելության ընթացքի վերաբերյալ մասնավորապես նշվեց, որ առայժմ այս տարվա դիմորդների թիվը կազմում է 195, որը 25-ով պակաս է նախորդ տարվա դիմորդների թվից: 195 դիմորդներից 191-ը Տավուշի մարզից է, 4-ը՝ ՀՀ երեք մարզերից (Կոտայքի, Գեղարքունիքի, Լոռու) և ԼՂՀ-ից: 103-ը դիմել է Հումանիտար գիտությունների ֆակուլտետ, 45-ը՝ Բնական գիտությունների ֆակուլտետ, 24-ը՝ Տնտեսագիտության, 23-ը՝ Կիրառական արվեստի ֆակուլտետ: Մտահոգությամբ փաստվեց, որ այս տարի ընդունելության քննությունների նվազագույն շեմը չհաղթահարած դիմորդների թիվը գերազանցում է նախորդ տարվան:

Որոշվեց 2017-2018 ուստարվա ընդունելության ընթացքը համարել բավարար:

Ընթացիկ հարցերից հատկանշական է ԵՊՀ ԻՄ-ի աշխատակիցների արձակուրդ մեկնելու մասին հարցը:

Այդ կապակցությամբ որոշվեց, որ ԵՊՀ ԻՄ-ի պրոֆեսորադասախոսական անձնակազմի արձակուրդը կտևի ս.թ. հուլիսի 14-ից մինչև օգոստոսի 23-ը, վարչական և ուսումնաօժանդակ անձնակազմինը՝ հուլիսի 24-ից մինչև օգոստոսի 21-ը:

2017թ. մայիսի 24-ին ԵՊՀ Իջևանի մասնաճյուղում տեղի ունեցավ տնօրենության ընդլայնված նիստ՝ Ս. Ա. Առաքելյանի նախագահությամբ:

Նիստին ներկա էին տնօրենության անդամները, հրավիրված էին Մանկավարժության և հոգեբանության ամբիոնի վարիչը, մասնագիտությունների կրթական ծրագրերի պատասխանատուները:    

Տնօրենության ընդլայնված նիստում քննարկվեցին 2016-2017 ուսումնական տարվա երկրորդ կիսամյակի քննաշրջանի նախապատրաստական աշխատանքներին, 2017-2018 ուստարվա ամբիոնային ծանրաբեռնվածությանը, ուսումնական պլանների նախապատրաստական աշխատանքներին վերաբերող մի շարք հարցեր:

Առաջին հարցի կապակցությամբ որոշվեց 2016-2017 ուսումնական տարվա երկրորդ կիսամյակի քննաշրջանը սկսել 2017թ. հունիսի 5-ից և ավարտել մինչև հուլիսի 17-ը:

Հանձնարարվեց ֆակուլտետների դեկաններին, ամբիոնների վարիչներին, կրթական ծրագրերի պատասխանատուներին ձեռնարկել անհրաժեշտ միջոցառումներ՝ 2016-2017 ուստարվա երկրորդ կիսամյակի քննաշրջանը կազմակերպված և պատշաճ մակարդակով անցկացնելու համար: Հետևողական լինեն, որ քննության արդյունքները ամփոփվեն լսարաններում՝ համաձայն մասնաճյուղում գործող կանոնակարգի:

Քննաշրջանի կազմակերպման և անցկացման պատասխանատու նշանակվեց Ուսումնամեթոդական վարչության պետ Ա.Դավթյանը:

2017-2018 ուստարվա ամբիոնային ծանրաբեռնվածության, ուսումնական պլանների հետ կապված՝ որոշվեց հանձնարարել ֆակուլտետների դեկաններին և ամբիոնների վարիչներին մեկ ամսվա ընթացքում (մինչև դասախոսների արձակուրդ մեկնելը) ավարտին հասցնել ամբիոնային ծանրաբեռնվածության, անհատական պլանների կազմումը, ավարտական ու կուրսային աշխատանքների բաշխումը և ապահովել ամբիոններում բոլոր առարկայական ծրագրերի փաթեթները:

Ամբիոնների վարիչներին հանձնարարվեց մինչև նոր ուսումնական տարվա սկիզբը ամբիոնների նիստերում քննարկել անհատական ծանրաբեռնվածությունների հարցը: