2018թ. հոկտեմբերի 15-ին ԵՊՀ Իջևանի մասնաճյուղում տեղի ունեցավ «Առաջնորդություն» դասընթացի առաջին հանդիպումը, որը նախաձեռնել էր «Քմյունիթի սենթր ֆոր դիվելոփմենթ» տարածաշրջանային համագործակցության ՀԿ-ն։

Ներկա էին ԵՊՀ ԻՄ-ի երեք տասնյակ աշխատակիցներ և ուսանողներ:

Դասընթացը անգլերենով վարեց ԱՄՆ-ի Խաղաղության կորպուսի «Համայնքի և երիտասարդության զարգացում» ծրագրի աշխատակից, ուսուցիչ, մարզիչ և դասընթացավար Ուիլյամ Ջոզեֆ (Ջոդի) Դոշերը, իսկ ԵՊՀ ԻՄ-ի աշխատակից Մարիետա Սարգսյանը ապահովեց սինխրոն (համաժամանակյա) թարգմանություն:

Ողջույնի խոսքով հանդես եկավ հասարակական կազմակերպության նախագահ Հասմիկ Ազիբեկյանը: Նա ներկայացրեց դասընթացավարին, շեշտեց, որ երիտասարդները ապագայի առաջնորդներն են, և նրանց համար շատ կարևոր է նմանատիպ ծրագրերին մասնակցությունը:

Ջոդի Դոշերը նշեց, որ ունի 35 տարվա փորձ ուսուցչության և առաջնորդության ոլորտներում, դեռ մանկուց է առնչվել առաջնորդությանը՝ ներգրավված լինելով իր քոլեջի, եկեղեցու և այլ կազմակերպությունների աշխատանքներում, աշխատելով տարբեր ոլորտներում՝ սկսած ռեստորանային բիզնեսից մինչև ԱՄՆ-ի նախագահի նախընտրական քարոզարշավ:

Նրա համար առաջնորդության կարևոր մաս է կազմում գիտելիքը:

Նա խոսեց Թվիթթերի տարածվածության և ազդեցիկության մասին, մասնակիցներին տվեց առաջադրանք մտածել Թվիթթերի հաշվի հետաքրքիր անվանում, հասցե և կայք, որով նրանք կիսվեցին րոպեներ անց:

Այնուհետև դասընթացավարը խոսեց մարդկանց հասկացողության տարբերությունների մասին, բերեց օրինակներ և նշեց, որ առաջնորդի կարևոր հատկանիշներից  է անծանոթների հանդեպ հոգատարությունը:

Գործելիս նա առաջնորդվում է հետևյալ քայլերով.

• լինել տեղում,
• ընտրել վերաբերմունքը երևույթների նկատմամբ,
• որևէ մեկի օրը լավը դարձնել,
• զվարճանալ:

Նա առաջնորդի կարևոր հատկանիշներից համարեց նաև ոլորտի փոփոխությունը:

Խոսելով Մարտին Լյութեր Քինգի մասին՝ նա շեշտեց քրիստոնեական արժեքների քարոզը և խոսքի ու արարքների համապատասխանությունը:

Ջ.Դոշերը ընթացքում անդրադարձավ նաև մեդիա-գործիքներին, նշեց, որ առաջնորդները փնտրում են հնարավորություն և կիրառում են հմտությունները:

Այնուհետև նա բերեց անցյալի և ներկայի մի շարք առաջնորդների օրինակներ (Նելսոն Մանդելա, Մարտին Լյութեր Քինգ, Բարակ Օբամա, Նիկոլ Փաշինյան, Ռոբերտ Քենեդի, Հռոմի պապ, Դալայ Լամա, Չէ Գևարա, Դոնալդ Թրամփ, Դաք Փրեսքոթ, Կոմիտաս, Եղիշե Չարենց, Հենրիխ Մխիթարյան), նշեց նրանց բնորոշ հատկանիշները, ներկայացրեց նրանց կատարած կարևոր քայլերը:

Ի մի բերելով ներկայացված կերպարներին բնորոշ գծերը՝ պարոն Դոշերը որպես առաջնորդի կարևոր հատկանիշներ առանձնացրեց բանակցելու կարողությունը, ուժը իմաստուն կերպով օգտագործելը և այլոց ոգեշնչելը, հզորացնելը:

Դասընթացի երկրորդ հանդիպումը տեղի կունանա ս.թ. հոկտեմբերի 22-ին:

 2018թ. հոկտեմբերի 10-12-ին ՀՀ Կոտայքի մարզի Արզական գյուղում գտնվող «Արթուրս Աղվերան Ռեզորթ» հյուրանոցում տեղի ունեցավ Տավուշի և Գեղարքունիքի մարզերի 30 երիտասարդների համար նախատեսված «Անձի զարգացման համընդհանուր հմտություններ» դասընթացաշարի առաջին փուլը, որին մասնակցում էին նաև ԵՊՀ ԻՄ-ի աշխատակից Սլավիկ Ալավերդյանը, ուսանողներ Հրանտ Ղարագյոզյանը և Դավիթ Գասպարյանը, շրջանավարտներ Լիլիթ Ոսկանյանը, Անահիտ Աթոյանը, Աղավնի Ղազարյանը, Լուսինե Ամիրյանը և Շուշան Խառատյանը:

Դասընթացաշարն իրականացվում է «ՕքսԵՋեն» հիմնադրամի և «Սեյվ դը չիլդրեն ինթերնեշնլ» կազմակերպության հայաստանյան ներկայացուցչության կողմից, Եվրոպական միության ֆինանսավորմամբ, «ԵՄ-ն հանուն երիտասարդության՝ հմտություններ ապագայի համար»  տարածաշրջանային ծրագրի շրջանակներում: Ըստ խմբերի՝ դասընթացին մասնակցում են ընդհանուր առմամբ 16-30 տարեկան 300 երիտասարդներ՝ ՀՀ բոլոր մարզերից և Երևանից:

Երեք օրվա ընթացքում մասնակիցները ոչ միայն ստացան գիտելիքներ ինքնաներկայացման, թիմերի կառուցման, հաղորդակցման և կազմակերպչական հմտությունների վերաբերյալ, այլև ձեռք բերեցին նոր ընկերներ և անցկացրին հետաքրքիր ժամանց:

Սեմինարները վարեցին վկայագրված կառավարման խորհրդատու, Հայաստանի ամերիկյան համալսարանի և մի շարք կազմակերպությունների դասընթացավար Արտակ Ալոյանը և Հայաստանի ամերիկյան համալսարանի շարունակական կրթության բաժնի տնօրեն, տնտեսագիտական գիտությունների թեկնածու Սերգեյ Թանթուշյանը, իսկ կազմակերպչական հարցերով զբաղվում էր «ՕքսԵՋեն» հիմնադրամի աշխատակից Գևորգ Բաբայանը:

Առաջին օրը մասնակիցները կատարեցին սեփական ուժերի SWOT վերլուծություն, ծանոթացան թիմերի ստեղծման գործընթացի փուլերին, կոնֆլիկտների լուծման ոճերին, բաժանվեցին թիմերի և կատարեցին առաջադրանք՝ ներկայացնելով խմբին և թիմին բնորոշ հատկանիշները:

Այնուհետև Սերգեյ Թանթուշյանը ներկայացրեց զգացական ընկալման խնդիրները, այն գործոնները, որոնք ազդում են շրջապատի (իրականության) ընկալման վրա և հաճախ հանդիպող իմացաբանական սխալները՝ ընտրողական ընկալում, պիտակավորում, համեմատում, պրոյեկտում, կարծրատիպային մտածելակերպ:

Օրվա վերջում սկսվեց և հաջորդ օրն առավոտյան շարունակվեց վերբալ և ոչ վերբալ հաղորդակցության վերաբերյալ սեմինարը: Մասնակիցները սովորեցին 7  «ազդեցիկ» բառերը, ծանոթացան մարմնի շարժումների լեզվին և դրանց մշակութային տարբերություններին, մարդկանց 3 տիպերին (նայող, լսող, շոշափող) և նրանց համոզելու նրբություններին:

Երկրորդ օրը դասընթացը շարունակեց Արտակ Ալոյանը՝ ներկայացնելով հաղորդակցման հմտությունները, արդյունավետ լսելու և համոզիչ խոսքի մեթոդները: Նա մասնավորապես նշեց, որ խոսքը համոզիչ դարձնելու համար անհրաժեշտ է բերել փաստեր և օրինակներ, հղում կատարել հեղինակավոր անձնանց կամ աղբյուրների, կատարել կանխատեսումներ և հերքել հակառակ տեսակետը:

Ստացած գիտելիքները մասնակիցները տեղում կիրառեցին՝ փորձելով հիմնավորել անհավանական թվացող գաղափարներ:

Այնուհետև սեմինարավարները խոսեցին անձի բրենդավորման, CV կազմելու և արդյունավետ գրավոր հաղորդակցության մասին:

Մասնակիցները կրկին բաժանվեցին թիմերի և պատրաստեցին CV-ներ, ապա գնահատեցին այլ թիմերի CV-ների որակը:

Ս.Թանթոշյանը ներկայացրեց էլեկտրոնային փոստի այնպիսի կառուցվածք, որի դեպքում նամակագրի ասելիքը կընդունվի հասցեատիրոջ կողմից և այն հարցը, ինչի համար գրվել է նամակը, կունենա դրական հանգուցալուծում: Մասնակիցները կատարեցին ինքնուրույն առաջադրանք՝ գրելով տրված խնդրի վերաբերյալ էլեկտրոնային նամակ:

Երրորդ օրը Ա.Ալոյանը ռեսուրսների արդյունավետ կառավարման վերաբերյալ ներկայացրեց նպատակի հստակեցման SMART գործիքը, ժամանակի կառավարման Էյզենհաուերի մատրիցան և այլ գործիքներ:

Մասնակցիները նաև ծանոթացան աշխատանքի հարցազրույցին մասնակցելուն նախապատրաստվելու սկզբունքներին, գործատուների կողմից գնահատվող անձնական հատկանիշներին, տպավորություն թողնելու նրբություններին, հաճախ տրվող հարցերին, աշխատանքային (գործնական) էթիկային, որոշումների կայացման քայլերին: Այս փուլումն նրանք քննարկեցին աշխատանքային իրավիճակներ և առաջարկեցին դրանց լուծման մի քանի այլընտրանքներ:

Վերջում մասնակիցներին ներկայացվեցին ոչ ֆորմալ ուսումնառության արդյունք հանդիսացող 8 ունակությունները.

1. գրագիտություն,
2. օտար լեզուների իմացություն/բազմալեզվություն,
3. մաթեմատիկական, գիտության, տեխնոլոգիական և ինժեներական ունակություն,
4. թվային ունակություն,
5. անձնային, սոցիալական և «սովորել, թե ինչպես սովորել» ունակություն,
6. ակտիվ քաղաքացիական դիրքորոշում և տարբեր մակարդակների հասարակական գործընթացներում մասնակցելու ունակություն,
7. ձեռներեցություն,
8. մշակութային տեղեկացվածության/իրազեկվածության և արտահայտչամիջոցներին տիրապետելու ունակություն:

Ամբողջ դասընթացն ընթացավ ակտիվ քննարկումների մթնոլորտում:

Դասընթացաշարի երկրորդ փուլը տեղի կունենա ս.թ. նոյեմբերին:

2018թ. հոկտեմբերի 9-11-ին Ֆրանկոֆոնիայի գագաթնաժողովի շրջանակներում Երևանի Ազատության հրապարակում պաշտոնապես բացված Ֆրանկոֆոնիայի ավանում Տավուշի մարզը ներկայացրին ԵՊՀ Իջևանի մասնաճյուղի կիրառական արվեստի ֆակուլտետի դեկորատիվ-կիրառական արվեստի և դիզայնի ամբիոնի ասիստենտներ, ՀՀ նկարիչների միության անդամներ Անուշ և Դոնարա Չիբուխչյանները՝ իրենց յուրօրինակ աշխատանքներով:

Ֆրանկոֆոնիայի ավանն իր հարկի տակ էր միավորել միջազգային կազմակերպության անդամ շուրջ 30 պետությունների: Գագաթնաժողովի շրջանակներում բացված Ֆրանկոֆոնիայի ավանում Հայաստանի տաղավարը ներկայացնում էր տասը մարզերի և Արցախի մշակույթը, պատմությունը, բարիքները: Տաղավարը պատրաստվել է Զբոսաշրջության պետական կոմիտեի, ՀՀ տարածքային կառավարման և զարգացման նախարարության, Արցախի և ՀՀ 10 մարզպետարանների համատեղ ուժերով և աջակցությամբ:

Յուրաքանչյուր մարզից տաղավարում ներկայացված էին գրաֆիկական պատկերներ՝ դրանց մասին կարճ և հետաքրքիր տեղեկատվությամբ: Կային նաև տվյալ մարզին բնորոշ, էթնիկ մշակութային ցուցանմուշներ: Արմավիրի մարզից ներկայացված էին չրերը, Տավուշի մարզից՝ էթնիկ պատշգամբներից հատվածներ, Շիրակի մարզից՝ Ավետիք Իսահակյանի օրորոցը, իսկ Արարատի մարզը ներկայացված էր Արարատյան դաշտի բերք ու բարիքներով:

Տաղավարում ներկայացված էր նաև գորգագործություն, խաչքարագործություն և այլն: Տավուշի մարզը ներկայացրին ԵՊՀ ԻՄ-ի դեկորատիվ-կիրառական արվեստի և դիզայնի ամբիոնի ասիստենտներ, ՀՀ ՆՄ անդամներ Անուշ և Դոնարա Չիբուխչյանները՝ ասեղնագործ գոտիներով, գլխարկներով, քսակներով և հելունագործ յուրատեսակ ու գունեղ ժանյակներով:

Վարպետները հյուրերին ներկայացրին հայկական մշակույթն ու ժառանգությունը՝ անցկացնելով ժանեկագործության և մաքոքագործության վարպետաց դասեր: Այցելուները հիացած էին և տպավորված Տավուշի մարզի տաղավարով:

2018թ. հոկտեմբերի 7-11-ին ԵՊՀ Իջևանի մասնաճյուղի գրադարանի վարիչ Վլադիմիր Պողոսյանը մասնակցեց Ռուսաստանի Դաշնության Ղրիմի Ինքնավար Հանրապետությունում կազմակերպված՝ ԱՊՀ և Արևելյան Եվրոպայի երկրների երիտասարդ հասարակական գործիչների ու ռուսաց լեզու և գրականություն դասավանդողների գիտաճանաչողական միջազգային աշխատաժողովին։

Այցը կազմակերպված էր Ռոսսոտրուդնիչեստվոյի «Նոր սերունդ»  ծրագրի շրջանակներում, ընդգրկված էին մասնակիցներ Հայաստանից, Մոլդովայից, Տաջիկստանից, Ուզբեկստանից, Աբխազիայից, Բուլղարիայից և Լեհաստանից (http://rs.gov.ru/ru/news/35690?category_id=9 )։  

Հիմնական նպատակը, որ իրենց առջև դրել էին պատվիրակությունների ներկայացուցիչները, ուղիղ կապեր հաստատելն էր Ղրիմի բազմաէթնիկ բնակչության հետ, տարածաշրջանի պետական և հասարակական կազմակերպությունների գործունեությանը ծանոթանալը։

Այցի շրջանակներում ծրագրի մասնակիցները հանդիպեցին Ղրիմի Հանրապետության Պետական խորհրդի նախագահ Վլադիմիր Կոստանտինովի հետ (http://crimea.gov.ru/news/08_10_2018_1), Ղրիմի Հանրապետության կրթության նախարար Նատալյա Գոնչարովայի և Ղրիմի Ֆեդերալ համալսարանի սլավոնական բանասիրության և ժուռնալիստիկայի ֆակուլտետի դասախոսական և ուսանողական կազմի հետ։ 

Այցելության շրջանակներում ծրագրի մասնակիցները հանդիպեցին Յալթայի քաղաքապետի տեղակալ Ելենա Պերեվերզովայի հետ (https://yalta.rk.gov.ru/ru/article/show/11029 ), այնուհետև այցելեցին մանկական միջազգային կենտրոն «Արտեկ», ծանոթացան մանկական կենտրոնի գործունեությանը, ուսումնական ծրագրերի և մանկապատանեկան կազմի հետ տարվող աշխատանքներին։

2018թ. հոկտեմբերի 10-ին Տավուշի տարածաշրջանային պետական քոլեջում կայացավ «Միջին մասնագիտական կրթություն և աշխատաշուկա, հանրակրություն և մասնագիտական կողմնորոշում. հիմնախնդիրներ և լուծման ուղիներ» թեմայով մարզային ֆորում, որն իրականացրեց «Գործընկերություն և ուսուցում» (ԳՈՒՄ ՀԿ) հասարակական կազմակերպությունը՝ ի դեմս ՀԿ գործադիր տնօրեն Արտաշես Տոռոզյանի:

Ֆորումին ներկա էին քոլեջի տնօրենը, «Երիտասարդ Տավուշ» ԵՀԿ-ի նախագահը, «Պրոգրես» ՀԿ-ի նախագահը, տարածքային զբաղվածության կենտրոնի տնօրենը և աշխատակիցներ, դպրոցի տնօրեններ, ուսուցիչներ, քոլեջի ուսանողներ և այլ ներկայացուցիչներ:

Մարզային ֆորումին մասնակցում էին նաև ԵՊՀ Իջևանի մասնաճյուղի ուսանողներ և աշխատակիցներ, մասնավորապես՝ տնօրենի խորհրդական Արման Եգանյանը, շրջանավարտների և արտաքին շահակիցների հետ տարվող աշխատանքների համակարգող Էրինե Ղարայանը, Մարդկային ռեսուրսների կառավարման բաժնի աշխատակից Նարա Ղազարյանը:

Ֆորումի նպատակն էր մարզի ուսումնական հաստատությունների ներկայացուցիչների հետ քննարկել միջին մասնագիտական կրթության, աշխատաշուկայի, հանրակրթության ոլորտում մասնագիտական կողմնորոշման հիմնախնդիրները և ստանալ լուծմանն ուղղված առաջարկություններ:  

Մարզային ֆորումի ժամանակ անցկացվեց խմբային խաղ-քննարկում, որի ընթացքում յուրաքանչյուր հաստատություն պետք է ներկայացներ աշխատաշուկայում ամենաշատ հանդիպող 5 հիմնախնդիրները:

ԵՊՀ ԻՄ-ի աշխատակիցների և ուսանողների առաջարկությունների համատեղ քննարկման շնորհիվ մատնանշվեցին ամենահաճախ հանդիպող 5 հիմնախնդիրները՝

1. աշխատատեղի բացակայություն,
2. ուսումնական պրակտիկան փորձ չհամարելը,
3. ուսուցանվող թեմաների արդիականություն,
4. ինքնազարգացման խնդիր,
5. ոչ ճիշտ մասնագիտական կողմնորոշում: