2016թ. սեպտեմբերի 16-ին ԵՊՀ Իջևանի մասնաճյուղի տնօրեն Ս.Ա. Առաքելյանը հանդիպեց մասնաճյուղի ուսանողական խորհրդի ներկայացուցիչների՝ ՈՒԽ-ի նախագահի, կառույցի ֆակուլտետային ներկայացուցիչների, կուրսերի ավագների հետ: 

Հանդիպմանը մասնակցում էին Ուսումնամեթոդական վարչության պետ Ա.Դավթյանը, ֆակուլտետների դեկանները, տնօրենի օգնականը, հասարակայնության հետ կապերի և մամուլի պատասխանատուն:

Հանդիպման ընթացքում քննարկվեցին 2016-2017 ուստարվա երկրորդ կիսամյակին վերաբերող ուսումնական, կազմակերպչական, կարգապահական և այլ բնույթի հարցեր:

Ուսանողական խորհրդի նախագահը առաջին կուրսեցիներին ծանոթացրեց ՈՒԽ-ի ֆակուլտետների ներկայացուցիչների, հանձնաժողովների նախագահների հետ, ներկայացրեց իրենց աշխատանքային ծրագիրը, խնդիրները, ուսանողներին իրենց աշխատանքներում ներգրավելու ուղիները:

Տնօրենը ուսանողներին հորդորեց լինել ակտիվ, ուսումնատենչ, նպատակասլաց, կազմակերպել ու մասնակցել ուսումնագիտական միջոցառումների, տարաբնույթ մրցույթների:

Առաջին կուրսերի ավագներին  ներկայացվեցին այն հիմնական խնդիրները, որոնց անհրաժեշտ է ուշադրություն դարձնել (օրինակ՝ հետևողական լինել անվանական կրթաթոշակների հարցում և այլն): 

Ուսանողները վարչական անձնակազմի ներկայացուցիչներից ստացան իրենց հետաքրքրող հարցերի պատասխանները:

2016թ. սեպտեմբերի 7-ին ԵՊՀ Իջևանի մասնաճյուղում կայացավ հերթական հանդիպումը մասնագիտության կրթական ծրագրերի ղեկավարների հետ:

Հանդիպման ընթացքում քննարկվեցին բուհում նոր ներդրված մասնագիտության կրթական ծրագրի (ՄԿԾ) ղեկա­վարի ինստի­տուտին վերաբերող մի շարք հարցեր:

Ընդգծվեց, որ նորաստեղծ ինստիտուտի միջոցով ընդհանուր առմամբ ակնկալվում է կատարել որակավորումների ազգային շրջանակին համապատասխան կրթական ծրագրերի մշակում և իրականացում, մասնագիտության պահանջվածության հիմնավորում, դասավանդման և ուսումնառության մեթոդների նորացում, գնահատման համակարգի վերանայում, կադրային, նյութատեխնիկական և ուսումնամեթոդական ապահովվածության գնահատում, ծրագրի մշտադիտարկում, գնահատում, վերանայում և այլն:

Հանդիպման ընթացքում որոշվեց, որ առաջիկայում մասնագիտության կրթական ծրագրերը համակարգող մարմնի միջոցով  կմշակվի համապատասխան աշխատակարգ, կհստակեցվեն կրթական ծրագրի ղեկավարների գործառույթները, կատարվելիք աշխատանքները:

2016թ. սեպտեմբերի 1-ին` Գիտելիքի և դպրության օրը, «ԵՊՀ» հիմնադրամի Իջևանի մասնաճյուղում մեկնարկեց նոր` 2016-2017 ուսումնական տարին:

Նոր ուսումնական տարում ԵՊՀ Իջևանի մասնաճյուղն իր հարկի տակ ընդունեց 195 առաջին կուրսեցիների, որոնց համար Ուսանողական խորհուրդը կազմակերպել էր տոնական միջոցառում:

Ներկա էին ԵՊՀ ԻՄ-ի տնօրեն Սամվել Առաքելյանը, վարչական և պրոֆեսորադասախոսական անձնակազմի ներկայացուցիչները, Իջևանի զորամասի հրամանատարական անձնակազմի ներկայացուցիչներ և նվագախումբը, ուսանողներ, ծնողներ, հյուրեր:

Միջոցառումը բացվեց Հայր Սամվել Մխիթարյանի օրհնության խոսք ու աղոթքով և Իջևանի զորամասի նվագախմբի կատարմամբ հնչող ՀՀ օրհներգով:

Ապա Գիտելիքի և դպրության օրվա կապակցությամբ համալսարանականներին շնորհավորեց ԵՊՀ ԻՄ-ի տնօրեն Ս. Ա. Առաքելյանը, նորեկներին՝ առաջին կուրսեցիներին, մաղթեց հաջողություններ, որ ի կատար ածվեն ուսման հետ կապված բոլոր սպասելիքները, նրանց պատգամեց յուրացնել և պահպանել մասնաճյուղում ձևավորված լավագույն ավանդույթները,  դառնալ հասարակությանը պիտանի մարդիկ և հայրենիքի արժանավոր զավակներ: Պարոն Առաքելյանը, դիմելով մասնաճյուղի ուսանողներին, շեշտեց, որ, ի տարբերություն հանրապետության այլ բուհերի, մասնաճյուղն ունի հատուկ կարգավիճակ. «Գտնվելով սահմանամերձ գոտում՝ սահմանը մեզ համար դարձել է ապրելակերպ, ձեր ուսանող կարգավիճակին գումարվում է սահմանում ապրող հերոս երիտասարդի կարգավիճակը»:

Ուսանողներին և դասախոսներին նոր ուսումնական տարվա կապակցությամբ շնորհավորեց և բարեմաղթանքի խոսքեր հղեց Իջևանի զորամասի հրամանատարի տեղակալ, փոխգնդապետ Հ.Սահակյանը՝ մասնավորապես նշելով, որ ԵՊՀ ԻՄ-ը միշտ էլ լույսի առաքման աղբյուր է եղել ՀՀ-ում, որ ուսանողներով է պայմանավորված, թե ինչպիսին կլինի մեր հասարակությունը, մեր բանակը և մեր ընտանիքները, համոզմունք արտահայտեց, որ ԵՊՀ ԻՄ-ի ուսանողները լինելու են լավագույն մարդիկ, մեր ապագան, մեր սերուցքը:

Առաջին կուրսեցիներին բարի գալուստ մաղթեց մասնաճյուղի ուսանողական խորհրդի նախագահ Իսկուհի Շաղբաթյանը, նրանց կոչ արեց լինել համառ, նպատակասլաց, ուսումնատենչ, արժանավոր ուսանող:

Գիտելիքի բանալին «Պատմություն» մասնագիտության չորրորդ կուրսի ուսանող Հրանտ Ղազումյանը հանձնեց առաջին կուրսեցի, մասնաճյուղի այս տարվա լավագույն դիմորդ Աստղիկ Ղազարյանին, որից հետո տեղի ունեցավ առաջին կուրսեցիների երդման հանդիսավոր արարողությունը:

Նրանք երդվեցին արժանի լինել Երևանի պետական համալսարանի Իջևանի մասնաճյուղի ուսանող լինելու բարձր կոչմանը, լինել օրինավոր քաղաքացիներ, նպաստել երկրի պետականության զարգացմանը:

Տոնական միջոցառումը շարունակվեց ԵՊՀ ԻՄ-ի շնորհալի ուսանողների երգ ու պարով, ասմունքով, Իջևանի զորամասի երաժշտախմբի գեղեցիկ նվագակցությամբ:

Խաչատուր Աբովյանի՝ «Քանի լեզու գիտես, այնքան մարդ ես» հայտնի ասույթն այսօր առավել քան արդիական է: Գաղտնիք չէ նաև, որ մասնագիտական հաջողություններ գրանցելու համար առնվազն մեկ օտար լեզվի իմացությունը պարտադիր է: ArmScoop-ն առանձնացրել և ներկայացնում է օտար լեզուներ սովորելու համար լավագույն 5 անվճար առցանց հարթակները: Դրանցից յուրաքանչյուրն ունի ուսուցման իր մեթոդաբանությունն ու առանձնահատկությունները: Գտե՛ք Ձեզ հարմար հարթակը և սկսեք ուսումնասիրել առաջարկվող լեզուներից ցանկացածը:

Memrise

Օտար լեզու յուրացնելիս՝ վաղ թե ուշ առաջ է գալիս բառերն ու արտահայտությունները հնարավորինս լավ հիշելու խնդիրը: Memrise-ն այս առումով յուրահատուկ հարթակ է, որն օգտագործում է հիշողության հետ աշխատելու ամենից առաջադեմ տեխնոլոգիաները, որպեսզի օգտատերերը տեղեկությունը յուրացնեն ավելի արդյունավետ և արագ:

Memrise հարթակն ունի ևս մեկ առանձնահատկություն. Այստեղ կարելի է ընտրել ոչ միայն 100-ից ավել հասանելի լեզուներից մեկը, այլև` այլ դասընթացներ ամենատարբեր ոլորտներից, որոնց թիվն անցնում է 6000-ը: Կայքը գործում է անվճար: Գործում է ինչպես համակարգչի, այնպես էլ`  Android OS և IOS օպերացիոն համակարգերում:

Ուսանելու հասանելի լեզուներն են՝ 100-ից ավել լեզու, ներառյալ իսպաներեն, ֆրանսերեն, գերմաներեն, պորտուգալերեն, չինարեն, ճապոներեն, կորեերեն, իտալերեն, հոլանդերեն, շվեդերեն, ռուսերեն, արաբերեն և այլն:

Busuu.com

Busuu.com օտար լեզուներ սովորելու հարթակը ստեղծել են 2 երիտասարդ, որոնք վարժ խոսում են 3 լեզվով և սովորում են չորորդը: Հեղինակների խոսքերով նրանց նպատակն էր ստեղծել լեզուներ սովորելու այլընտրանքային տարբերակ, որը հետաքրքիր է և դյուրին: Կայքից օգտվող յուրաքանչյուր անդամ ոչ միայն սովորեղ է, այլ նաև ուսուցիչ, որն օգնում է օտարներին յուրացնել իր լեզուն: Կայքի հիմնական բովանդակությունն անվճար է, սակայն գոյություն ունի նաև պրեմիում կարգավիճակ, որն ամսական արժե 5,41€: Գործում է ինչպես համակարգչի, այնպես էլ` Android OS և IOS օպերացիոն համակարգերում:

Ուսանելու հասանելի լեզուներն են՝ իսպաներեն, ֆրանսերեն, գերմաներեն, իտալերեն, ռուսերեն, պորտուգալերեն, լեհերեն, թուրքերեն, արաբերեն, ճապոներեն, չինարեն և անգլերեն:

LinguaLeo

LinguaLeo կայքը հիմնված է լեզու սովորելու խաղային մեթոդի վրա: Առկա է տեսանյութերի, ձայնագրությունների և տեքստային նյութերի մեծ բազա: Գրանցումից հետո օգտատերը պետք է ինքնուրույն ընտրի լեզվի իր մակարդակը և ժամանակը, որը նա պատրաստ է տրամադրել կայքում ամեն օր անցկացնելու և լեզուն ուսանելու համար: Այս տվյալների հիման վրա ստեղծվում է զարգացման աղյուսակ, որն անուղղակիորեն ցույց է տալիս վարժությունների արդյունավետությունը: Կայքը գործում է անվճար հիմունքներով, այնուամենայնիվ, «ոսկե կարգավիճակ» ձեռք բերելն ու ավելի լայն հնարավորություններից օգտվելն արժե 4,99$ երեք ամսվա համար և11,49$` ամբողջ տարվա համար: Գործում է ինչպես համակարգչի, այնպես էլ` Android OS և IOS օպերացիոն համակարգերում:

Ուսանելու հասանելի լեզուն՝ անգլերենն է:

DuoLingo 

DuoLingo անվճար ծրագիր է, որը հնարավորություն է տալիս օգտատերերին սովորել մի շարք օտար լեզուներ։ Ծրագիրն անվճար է,հնարավորություն է տալիս հանձնել արտոնագրված թեստեր (արդեն վճարովի է)։ Գործում է ինչպես համակարգչի, այնպես էլ` Android OSև IOS օպերացիոն համակարգերում: Duolingo կայքի արդյունավետությունը հիմնված է վիճակագրությունների վերլուծության վրա:

Ուսանելու հասանելի լեզուներն են՝ անգլերեն, ֆրանսերեն, գերմաներեն, իսպաներեն, իտալերեն, պորտուգալերեն, հոլանդերեն, իռլանդերեն, դանիերեն, շվեդերեն, ռուսերեն, լեհերեն, թուրքերեն, նորվեգերեն, եբրայերեն, ուկրաիներեն, ուելսերեն, վիետնամերեն:

Poliglot

Դմիտրիյ Պետրովը ռուս պոլիգլոտ է, համաժամանակյա թարգմանիչ: Նա համոզված է, որ յուրաքանչյուր լեզու սովորելու համար բավարար է 2 շաբաթ: 16 ժամում կարելի է սովորել լեզվի հիմունքները, աշխատել արտասանության վրա և սովորել ճիշտ գրել: Իր մեթոդը նա փորձարկել է հարյուրավոր մարդկանց հետ և արդյունքներն ավելի քան տպավորիչ են: Դմիտրիյ Պետրովն իր կայքում առաջարկում է տեսանյութերի միջոցով 16 ժամում սովորել հասանելի լեզուներից մեկը՝ միանգամայն անվճար:

Ուսանելու հասանելի լեզուներն են՝ անգլերեն, գերմաներեն, իսպաներեն, չինարեն, իտալերեն, ֆրանսերեն, պորտուգալերեն և հինդի:

Աղբյուրը՝ http://armscoop.com

Ընթերցասերներին հաճախ հանդիպող խնդիրներից մեկը թվայնացված գրքերի, հատկապես մասնագիտական գրականության ազատ (անվճար ներբեռնելի) հասանելիության սահմանափակությունն է: Համացանցում առկա են հարյուրավոր առցանց գրադարաններ ու շտեմարաններ, որոնցից լիարժեք օգտվելը, սակայն, պահանջում է հավելյալ գումար։ Բարեբախտաբար գոյություն ունեն նաև այնպիսի առցանց հարթակներ, որոնց հիմնադիրները հավատում են, որ թվային գրականությունը պետք է հասանելի լինի բոլորին՝ անկախ ֆինանսական հնարավորություններից: ArmScoop-ը ներկայացնում է 7 առցանց հարթակ, որտեղից հնարավոր է անվճար ներբեռնել գրքեր ու գիտական հոդվածներ։

Առցանց գիտական պաշարների բաց, ուղղակի և անվճար հասանելիություն ապահովող ամենամեծ երկու նախաձեռնությունների՝Sci-Hub և Library Genesis հարթակների և դրանցից օգտվելու եղանակների մասին կարդացեք այստեղ։

Internet Archive

Internet Archive թվային գրադարանը էլեկտրոնային գրականության աշխարհի խոշորագույն հարթակներից է, գործում է 1996 թվականից: Բացի բազմալեզու և բազմաժանր գրականության թվայնացման ու անվճար հանրայնացման հարթակ լինելուց այն նաև համացանցային կայքէջերի արխիվացման ամենամեծ ռեսուրսն է (ավելի քան 500 միլիարդ կայքէջ՝ 2016 թ․ հունիսի դրությամբ)։ Առաջնորդվելով «ամբողջական գիտելիքի համընդհանուր հասանելիություն» նշանաբանով՝ նախագիծը համագործակցում է տարբեր առաջատար համալսարնների, կրթական, գիտական ու մշակութային կենտրոնների հետ և օգտվողներին հնարավորություն տալիս օգտվելու շարունակ համալրվող տարբեր պաշարներից՝ էլեկտրոնային ազատ գրադարան (ավելի քան 10 միլիոն միավոր գրականություն), տեսանյութերի, նկարների, աուդիոգրքերի և այլ օգտակար նյութերի հավաքածուներ։ Գործում է Archive.org կայքում։ 

Open Library

Open Library բաց առցանց գրադարանը Internet Archive-ի շրջանակներում ստեղծված նախագծերից է, գործում է 2006 թվականից։ Առաջնորդվելով «մեկ առցանց էջ՝ երբևէ հրատարակված յուրաքանչյուր գրքից» սկզբունքով՝ նախագծի հեղինակները ստեղծել են մի հարթակ, որտեղ հնարավոր է ըստ արդեն գոյություն ունեցող դասակարգումների ավելացնել գրքեր, խմբագրել (ինչպես Վիքիպեդիայում) գրացանկը կամ գրքերի մասին տեղեկությունը։ Շարունակ համալրվող բազմամիլիոնանոց թվային պաշարներից հնարավոր է օգտվել հիմնականում երկու եղանակով՝ որոշակի ժամկետում փոխ առնել (կայքում գրանցվելուց հետո) ու կարդալ և երկրորդ՝ բաց հասանելիությամբ անվճար կարդալ և ներբեռնել ավելի քան 1,8 միլիոն միավոր ընդգրկող շտեմարանից։ 

Project Gutenburg

Project Gutenburg-ը ամենահին էլեկտրոնային գրադարանն է, ստեղծվել է դեռևս 1971 թվականին։ Ներկայում ընդգրկում է եվրոպական տարբեր լեզուներով (հիմնականում անգլերեն, ֆրանսերեն, գերմաներեն) և տարբեր ոլորտների առնչվող ավելի քան 50.000 գիրք՝ առցանց կարդալու կամ ներբեռնելու հնարավորությամբ:  Գրանցվելու անհրաժեշտություն չկա:

DigiLibraries.com

Այս հարթակն առաջարկում է ամենատարբեր ժանրի և ճաշակի բազմաթիվ գրքեր՝ անվճար ներբեռնելու հնարավորությամբ: Կայքի ձախ սյունակում անհրաժեշտ է ընտրել համապատասխան ոլորտը, և անհրաժեշտ գիրքը ներբեռնել հարմար ձևաչափով։ Կայքը պարբերաբար ավելացնում է թվային գրքերի իր պաշարը:

Twirpx.com

Twirpx.com կայքը ռուսալեզու առցանց շտեմարան է, որտեղ հնարավոր է գտնել ամենատարբեր ոլորտներին առնչվող գրքեր, գիտական հոդվածներ և այլ աշխատություններ: Անհրաժեշտ է միայն գրանցվել կայքում, որից հետո կայքը շնորհում է 100 միավոր: Յուրաքանչյուր ներբեռնված գիրք համարժեք է 10 միավորի, իսկ միավորները վերականգնելու համար հարկավոր է կայքում վերբեռնել որևէ գիրք կամ գիտական հոդված:

Amazon’s free kindle book selection

Բոլոր այն գրքերը, որոնց հեղինակային իրավունքի ժամկետը լրանում է, հայտնվում են այս հարթակում, որոնք հնարավոր է կարդալ անգամ առանց Kindle-ի: Բացի այդ, կարելի է գտնել նաև մեծ թվով նոր գրողների ստեղծագործություններ, որոնք հեղինակները ներկայացնում են միանգամայն անվճար օգտվելու հնարավորությամբ:

Planet eBook

Այլ հարթակների համեմատ այս կայքը չի առանձնանում իր ընտրության լայն հնարավորությամբ, սակայն այն առանձնացրել է դասական ժանրի բոլոր ժամանակների ամենահայտնի 80-ից ավել գրքեր (անգլերեն), որոնք կարելի է ներբեռնել PDF ֆայլի տեսքով:

ArmScoop-ը պարբերաբար անդրադառնում է հայկական և արտասահմանյան էլեկտրոնային գրադարաններին, որտեղից միանգամայն անվճար կարելի է ներբեռնել գրքեր, գիտական հանդեսներ, շտեմարաններ ու հավաքածուներ՝ իրենց համառոտ նկարագրություններով և համապատասխան հղումներով: ArmScoop-ի համահավաք գրադարանին կարող եք ծանոթանալ՝ այստեղ:

Աղբյուրը՝ http://armscoop.com