2016-17 ուստարվա առաջին կիսամյակում ԵՊՀ ԻՄ-ի տնտեսագիտության ֆակուլտետի «Սերվիս» մասնագիտության ուսանողները «Տավուշի  տուրիզմի  զարգացման գործակալություն» ՀԿ-ի մյուս կամավորների  հետ ակտիվորեն մասնակցեցին «Տավուշի բերք ու բարիքի» անդրանիկ փառատոնի նախապատրաստական աշխատանքներին:

Փառատոնը,  որ կայացավ 2016թ. սեպտեմբերի 24-ին Դիլիջանի  Գետափ ռեստորանահյուրանոցային համալիրում, աննախադեպ էր իր տեսակով, մասնակիցների թվով և ծրագով:

Այն ընդգրկում էր արտադրողներ ոչ միայն Տավուշից, այլև Հայաստանի այլ մարզերից, ազգային երաժշտական ծրագիր, համտեսներ, նվերներ, խաղարկություններ:

«Գիտելիքը  կորցնում է ուժը, երբ չես  կարողանում դա կիրառել». առաջնորդվելով այս նշանաբանով՝ «Սերվիս» մասնագիտության ուսանողները փառատոնի նախապատրաստական փուլում և  անցկացման   ողջ ընթացքում կիրառեցին իրենց տեսական գիտելիքները, ձեռք բերեցին մեծ փորձ ու  հմտություններ նմանատիպ  միջոցառումների  անցկացման, մարզում զբոսաշրջության  կազմակերպման ոլորտում:

2016թ. հոկտեմբերի 7-ին ԵՊՀ Իջևանի մասնաճյուղում կայացավ բադմինթոնի բաց առաջնություն, որին մասնակցում էին ԵՊՀ ԻՄ-ի, Իջևանի մարզադպրոցի տարբեր տարիքային խմբերի սաներ:

Բադմինթոնի առաջնությունն անցկացվեց շրջանաձև կարգով, երկու տարիքային (7-10 և 12-18) ենթախմբերով:

Փոքրիկների ենթախմբում աղջիկներից առաջին տեղը գրավեց Ռուզաննա Սարուխանյանը (թիվ 1 հիմն. դպրոց), երկրորդ տեղը՝ Մերի Ալեքսանյանը (թիվ 5 հիմն. դպրոց), երրորդ տեղը՝ Մերի Ղալումյանը (թիվ 3 հիմն. դպրոց):

Տղաներից մրցանակային տեղեր զբաղեցրին թիվ 1 հիմնական դրպրոցի սաները. առաջին տեղը գրավեց Արշավիր Թադևոսյանը, երկրորդ տեղը՝ Սեյրան Սիմոնյանը և երրորդ տեղը՝ Դավիթ Բալինյանը:

12-18 տարիքային ենթախմբում աղջիկներից հաղթեց «Անգլերեն լեզու և գրականություն» մասնագիտության երկրորդ կուրսի ուսանողուհի Էմիլիա Փայտյանը:

Տղաներից հաղթեց նույն մասնագիտության երրորդ կուրսի ուսանող Հրաչ Ներսիսյանը:

Հաղթողները տնօրենության կողմից պարգևատրվեցին հուշանվերներով:

Բաց առաջնության հաղթողները ս.թ. հոկտեմբերի 13-15-ը Երևանում կմասնակցեն բադմինթոնի ՀՀ մեծահասակների առաջնությանը:  

2016թ. հոկտեմբերի 5-ին՝ Ուսուցչի օրվա կապակցությամբ, ԵՊՀ Իջևանի մասնաճյուղում կայացավ տոնական միջոցառում, որը կազմակերպել էր կրթական ծրագրերի գծով տնօրենի խորհրդական, մանկ. գիտ. թեկն., դոցենտ Վ. Բրուտյանը:

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչները, ուսանողներ, հյուրեր, հատուկ հրավիրված էին մասնաճյուղում նոր ներդրված «Տարրական մանկավարժություն և մեթոդիկա» մասնագիտության ուսանողներին դասավանդած դասվարները:      

Բացման խոսքով հանդես եկավ պարոն Բրուտյանը՝ Ուսուցչի օրվա առթիվ շնորհավորելով  բոլոր ուսուցիչներին, մանկավարժներին, կրթության ոլորտի ներկայացուցիչներին, հղելով նրանց մեծարանքի ու երախտագիտության խոսքեր, ընդգծելով նրանց անգնահատելի դերն ու ավանդը սերունդների կյանքում, նրանց ամենօրյա տքնաջան, որքան պատվաբեր, նույնքան էլ պատասխանատու աշխատանքը:

Ուսուցիչներին ողջույնի, շնորհավորանքի և երախտիքի խոսք ասաց ԵՊՀ ԻՄ-ի տնօրեն Ս. Ա. Առաքելյանը՝ մասնավորապես նշելով. «Անգնահատելի է ուսուցչի դերը հասարակության մեջ: Մեր ամբողջ բազմադարյա պատմության ընթացքում ուսուցիչը միշտ էլ առանձնակի հարգանք ու սեր է ունեցել: Ամենանվիրյալ, ամենահայրենասեր մարդկանց մենք կոչել ենք «Ուսուցիչ» անունով: Մենք պիտի առանձնահատուկ մեծարանք, պատկառանք, սեր ունենանք ուսուցչի և զինվորի նկատմամբ. նրանք են պետության  հզորացման գլխավոր գրավականները»:

Մասնաճյուղն իր համար սաներ պատրաստած հարգարժան դասվարերին պատվեց ջերմ խոսքերով ու շնորհակալագրերով, իսկ նորաթուխ ուսանողներն իրենց առաջին, սիրելի ուսուցիչներին՝ ծաղիկներով, անկեղծ, սրտաբուխ բանաստեղծություններով ու երգերով:

Ուսուցչի տոնին  բանաստեղծության ու երաժշտության լեզվով իրենց անապական, մաքուր սրտի խոսքն ասացին նաև դպրության ուղին նոր բռնած շնորհալի փոքրիկները:

Ելույթ ունեցան և ուսուցիչները՝ խորին երախտագիտությամբ ու ակնածանքով դեպի իրենց կրթած ու դաստիարակած մանկավարժները և մեծ սիրով ու պատասխանատվությամբ դեպի իրենց սաները:

Իր հուզիչ ու ազդեցիկ խոսքն ասաց վաստակավոր մանկավարժ, մասնաճյուղի փորձառու դասախոս, բ.գ.թ., դոցենտ Աիդա Սարհատյանը:

Ուսուցիչների տոնը շնորհավորեց նաև Վանաձորից հրավիրված “Xtime” խումբը:

Այնուհետև «Տարրական մանկավարժություն և մեթոդիկա» մասնագիտության առաջին կուրսի ուսանողներին հանդիսավոր կերպով հանձնվեցին նրանց ստուգման գրքույկները:

Վերջում տնօրենը շնորհակալություն հայտնեց պարոն Բրուտյանին՝ բարձր մակարդակով կազմակերպված միջոցառում իրականացնելու, մասնաճյուղում կրթության ոլորտի ներկայացուցիչների դերը արժևորելու բարեպատեհ հնարավորություն ստեղծելու համար:

Միջոցառումից հետո նիստերի դահլիճում տեղի ունեցավ տնօրեն Ս. Ա. Առաքելյանի հանդիպումը մասնաճյուղ հրավիրված տարրական դասարանների դասվարների հետ:

Հանդիպման ընթացքում քննարկվեցին տարրական կրթությանը, մանկավարժությանը, դպրոցում և բուհում առկա մի շարք խնդիրներին վերաբերող հարցեր:

Ուսուցիչների կողմից արվեցին առաջարկներ հենց վաղ հասակից աշակերտներին մասնագիտական ճիշտ կողմնորոշում տալու, աշխատաշուկայի պահանջներին համապատասխան մասնագիտություն ընտրելու  վերաբերյալ:

Վ.Բրուտյանը ուսուցիչներին հայտնեց իր աջակցությունը տարակարգ ստանալու համար ուսումնամեթոդական հոդված պատրաստելու և տպագրելու գործում:

Հանդիպման վերջում ԵՊՀ ԻՄ-ի ղեկավարության անունից տնօրենը փոքրիկ անակնկալ մատուցեց գիտելիքի ու դպրության երախտավոր սերմնացաններին, ևս մեկ անգամ բարձրաձայնեց նրանց հանդեպ ջերմ սիրո ու անմնացորդ վստահության մասին, իրենց ազգանվեր ու մարդանվեր գործում նրանց մաղթեց ոգու կորով, անսասան հավատ, արժանվույնս գնահատված լինելու բավականություն:

 

Ուսուցչի մեծարանքը որքան  հաճելի, նույնքան էլ պարտավորեցնող է, քանզի  նրա վրա է դրված  հայ տեսակի շարունակության ապահովման  և զորացման պատասխանատվությունը: Կրթության միջոցով է, որ մենք պետք է  հասնենք  մեր  ազգային իղձերի և նպատակների իրականացմանը: 

ԵՊՀ ԻՄ-ի կիրառական արվեստի ֆակուլտետում  ընթանում են 2016-17 ուստարվա առաջին կիսամյակի ուսումնական պլաններով և առարկայական ծրագրերով նախատեսված արտալսարանային պարապմունքներ (դաս-պլեներներ)՝ ֆակուլտետի բոլոր ուսանողների մասնակցությամբ:

Պլեներներն անցկացվում են «Գծանկար», «Գունանկար» առարկաներից, «Աշոտ Երկաթ»-ի, Քարի լճի, Իջևանի դենդրոպարկի տարածքում և քաղաքի այլ գեղատեսիլ վայրերում:

Դաս-պլեներների անցկացման հիմնական նպատակն է բնության գրկում զարգացնել ուսանողների գործնական հմտություններն ու կարողությունները, չէ՞ որ արվեստը մարդու միջոցով արտահայտվող բնության ձայնն է. որքան մարդ հարազատ մնա իր մեջ ապրող բնությանը, այնքան համոզիչ ու հուզիչ կլինի նրա արվեստը:

Հերթական պլեները տեղի ունեցավ ֆակուլտետի «Կիրառական արվեստ» և «Դիզայն» մասնագիտությունների 3-րդ, «Կիրառական արվեստ» մասնագիտության   4-րդ կուրսերի ուսանողների մասնակցությամբ ու Գծանկարի, գունանկարի և քանդակի ամբիոնի դոցենտ, ՀՆՄ վարչության անդամ Հ.Ասատրյանի ղեկավարությամբ: 

Այս անգամ ուսանողները դասախոսի խորհրդով ընտրել էին իջևանյան գողտրիկ բնության՝ իրենց հոգեհարազատ տեղանքներ «Աշոտ Երկաթ»-ին հարակից տարածքում:

«Պլեները,- ինչպես նշում է պարոն Ասատրյանը,- ուսանողների մեջ զարգացնում է գույնի և գծի արագ ընկալումը, հնարավորություն է տալիս իմպրեսիոնիստների նման կտավին հանձնել անմիջական տպավորությունների, լույսի խաղերի հարստությունը, ծառայում է երևույթների էության մեջ թափանցելու, կյանքի ընթացքը, շարժման ներքին ուժերը բացահայտելու նպատակին»: