2017թ. նոյեմբերի 16-ին ԵՊՀ Իջևանի մասնաճյուղում կայացավ Ուսանողների միջազգային օրվան նվիրված գրական-երաժշական միջոցառում, որը նախաձեռնել և կազմակերպել էր մասնաճյուղի ուսանողական խորհուրդը:

Ներկա էին ԵՊՀ ԻՄ-ի վարչական և պրոֆեսորադասախոսական անձնակազմի ներկայացուցիչներ, առկա և հեռակա ուսուցման համակարգերի ուսանողներ, հյուրեր:

Միջոցառումը բացվեց մասնակիցների՝ ուսանողությանն ուղղված շնորհավորական խոսքով ու բարեմաղթանքներով. «Մենք թևակոխել ենք մի նոր դարաշրջան, երբ օր օրի փոփոխվող համաշխարհային մարտահրավերներին կարող ենք դիմագրավել միայն արդիական գիտելիքներով: Թե ինչպիսին կլինի ՀՀ-ն տարիներ անց, պայմանավորված է ներկայիս ուսանողության ձգտումներով, երազանքներով ու հաստատակամությամբ: Հասարակության երիտասարդ մտավոր ներուժն այն գրավականն է, որն ապահովում է ինչպես պետության հզորությունը, այնպես էլ յուրաքանչյուր քաղաքացու բարեկեցությունը: Ուստի ջերմորեն շնորհավորում ենք մեր ուսանող ընկերներին,  ցանկանում անսպառ եռանդ, հաստատուն կամք, ուսման մեջ հաջողություններ և նպատակների իրականացում»:

Ուսանողների միջազգային օրվա կապակցությամբ շնորհավորական ուղերձով հանդես եկավ ԵՊՀ Իջևանի մասնաճյուղի տնօրեն Սամվել Առաքելյանը՝ սրտանց շնորհավորելով նրանց տոնը, մաղթելով, որ ուսանողական տարիները նրանց համար դառնան հարուստ գիտելիքների ձեռքբերման ու անմոռաց հիշողություններով լի տարիներ, որ նրանք չունենան չիրականացած երազանքներ, այլ ունենան դժվարությունները հաղթահարելու անկոտրում կամք ու արևոտ նպատակներ: Տնօրենն իր խոսքում ընդգծեց, որ ուսանողամետ մեր բուհում ամեն ինչ արվել ու արվում է, որ ուսանողները լիարժեք պայմաններում անցկացնեն իրենց ուսումնառությունը և դառնան այն պահանջված մասնագետները, ովքեր բարձր կպահեն ԵՊՀ-ի անունն ու հեղինակությունը:

Այնուհետև ուսանողների տոնը շնորհավորեց մասնաճյուղի ՈՒԽ-ի նախագահ Իսկուհի Շաղբաթյանը՝ մասնավորապես նշելով. «Սիրելի՛ համալսարանականներ, 
այսօր ողջ աշխարհը տոնում է Ուսանողի միջազգային օրը, օր, որը ստիպում է մեզ վերաիմաստավորել մեր կյանքի ամենակարևոր, պատասխանատու և անհոգ փուլերից մեկը։ Հպարտորեն եմ բարձրաձայնում, որ մեր բուհում արվել և արվում է ամեն ինչ, որ ուսանողն իրեն զգա լիարժեք, երջանիկ ու կրթված: Մեզ մոտ լսելի է ուսանողի ձայնը, իսկ նման բուհի ուսանող լինելն առաջին հերթին պատիվ է, արժանապատվություն, որին պետք է յուրաքանչյուրս մոտենանք մեծագույն պատասխանատվությամբ, լինենք խելացի, բարեկիրթ, նպատակամետ ու համառ, ունենանք նվիրական երազանքներ, իսկ Ուսանողական խորհուրդն ինչպես միշտ կմնա լավագույն հարթակը ինքնադրսևորվելու, զարգանալու և ինքնակազմակերպվել սովորելու համար: Շնորհավո՛ր ձեր տոնը, սիրելի ուսանողներ»:

Ապա ներկայացվեց տոնի պատմությունը, թե ինչպես 1939թ. հոկտեմբերի 28-ին Պրահայի ուսանողները և դասախոսները դուրս էին եկել ցույցի՝ նշելու Չեխոսլովակիայի կազմավորման տարեդարձը։ Ֆաշիստ զավթիչների կողմից ցույցը դաժանաբար ճնշվեց, որի ժամանակ սպանվեց ուսանող Յան Օպլետալը։ Յանի թաղման օրը՝ նոյեմբերի 15-ը, նույնպես վերածվեց բողոքի մեծ ցույցի, որի ժամանակ տասնյակ ցուցարարներ ձերբակալվեցին։ Նոյեմբերի 17-ի վաղ առավոտյան ֆաշիստական ուժերը շրջափակեցին ուսանողական հանրակացարանները, ձերբակալվեց ավելի քան 1200 ուսանող։

Ուսանողական շարժման 9 ակտիվիստներ գնդակահարվեցին։ Հիտլերի հրամանով Չեխոսլովակիայի բոլոր բարձրագույն ուսումնական հաստատությունները փակվեցին մինչև պատերազմի ավարտը։ Հետագայում արդեն Ուսանողների համաշխարհային կոնգրեսը նոյեմբերի 17-ը հռչակեց որպես Ուսանողների միջազգային օր։

Միջոցառումը շարունակվեց մասնաճյուղի շնորհալի ուսանողների երաժշտական ու պարային գեղեցիկ կատարումներով:

Տոնական դահլիճում մերթ թևածեց սիրո քնքուշ մեղեդին, ու բեմի վրա ալիքվեց նաիրյան հեզաճկուն պարը, մերթ թնդաց ազգային-հայրենասիրական խրոխտ երգն, ու բոլորվեց շուրջպարը:

2017թ. նոյեմբերի 15-ին ԵՊՀ ԻՄ-ի «Ինֆորմատիկա և կիրառական մաթեմատիկա»  մասնագիտության 2-րդ կուրսում կայացավ բաց դաս, որը վարեց Անգլերեն լեզվի և գրականության ամբիոնի դասախոս, ՄԿԾ-ի պատասխանատու Աստղիկ Սիմոնյանը:

Ուսանողները անգլերենով ներկայացրին խնդիրների լուծումներ, ցուցադրեցին բանաձևերի դուրսբերման եղանակներ, ծրագրերի կոդավորման շնորհանդեսներ:

Բաց դասին իրենց աշխատանքներով հանդես եկան Վարդուհի Մեհրաբյանը, Վազգեն Փայտյանը, Գերասիմ Ալավերդյանը և Լևոն Սարուխանյանը:

Վարդուհի Մեհրաբյանը անգլերենով ապացուցեց X+Y+XY=1 հավասարումը՝ ներկայացնելով բոլոր հերթական քայլերը:

Հաջորդիվ Վազգեն Փայտյանը ներկայացրեց քառակուսի հավասարումից դիսկրիմինանտ և արմատներ գտնելու եղանակը (How to Find the Discriminant and the Roots in a Quadratic Polynomial):

Երրորդ թեման Էրատոսթենեսի մաղի (Sieve of Eratosthenes) միջոցով պարզ թվերը գտնելու մեթոդն էր, որը ներկայացրեց Գերասիմ Ալավերդյանը:

Լևոն Սարուխանյանը ներկայացրեց էկոլոգիական խնդրի լուծումը:

«ԻԿՄ»  մասնագիտության 2-րդ կուրսում սա անգլերեն լեզվով առաջին մասնագիտական միջոցառումն էր:

 2017թ. նոյեմբերի 14-ին ԵՊՀ Իջևանի մասնաճյուղում կայացավ «Գրքասեր» (“Booklovers”) ակումբի քննարկումը` Ֆ. Ս. Ֆիցջերալդի «Բենջամին Բաթոնի առեղծվածային պատմությունը» (“The Curious Case of Benjamin Button”) պատմվածքի շուրջ:

Քննարկումը վարում էր «Անգլերեն լեզու և գրականություն» մասնագիտության կրթական ծրագրի պատասխանատու Ա.Սիմոնյանը, մասնակցում էին Խաղաղության կորպուսի կամավոր դասախոս Քոլման Հեսլերը և ուսանողներ:

«Գրքասեր» ակումբի հերթական քննարկման ընթացքում կարծիքներ փոխանակվեցին Ֆիցջերալդի ոճային փոփոխության և պատմվածքի թեմայի գրավչության վերաբերյալ:

Զուգահեռներ անցկացվեցին ժամանակակից հասարակության և 1960-80-ականների Բալթիմորի միջև` մասնավորապես շեշտելով, որ փոքր բնակավայրերում հասարակական կարծիքից կախվածությունը միշտ էլ մեծ տեղ է զբաղեցրել  մարդու կյանքում:

Ընդգծվեց պատմվածքում արտահայտված արդիական մեկ այլ գաղափար՝ կապված յուրաքանչյուր տարիքում համապատասխան վարքագիծ և արտաքին ունենալու հետ:

Ներկայացվեց, որ Բենջամինը, լինելով բոլորից տարբեր, մերժված է հասարակության և իր ընտանիքի անդամների կողմից, ովքեր, իրականությունը որպես այդպիսին ընդունելու փոխարեն, մերժում են այն` տեղիք տալով ծիծաղաշարժ և գրոտեսկային իրավիճակների: