2017թ. դեկտեմբերի 1-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը մասնագիտությունների կրթական ծրագրերի պատասխանատուների հետ:

Հանդիպման ընթացքում քննարկվեցին կրթական ծրագրերի վերամշակման աշխատանքային խմբերի իրականացրած աշխատանքներին վերաբերող մի շարք հարցեր:

Մասնավորապես նշվեց, որ ԵՊՀ ռեկտորի՝ 2017թ. հոկտեբերի 4-ի թիվ 172 §12 հրամանի և ԵՊՀ ԻՄ-ի՝ 2016-2020թթ. զարգացման ռազմավարական ծրագրի «Որակյալ կրթություն» նպատակի 1.1. խնդրի 3-րդ կետի իրականացման նպատակով ստեղծվել է ԵՊՀ ԻՄ-ի՝ 2018-2019 ուսումնական տարվա  կրթական ծրագրերի վերամշակումն արտոնող հանձնաժողով և համապատասխան կրթական ծրագրերը վերամշակող աշխատանքային խմբեր:

ՄԿԾ-ների պատասխանատուները ներկայացրին, որ ժամանակացույցին համապատասխան կազմվել են աշխատանքային պլաններ, որոնցում հստակ նշված են կատարվելիք աշխատանքները, ժամկետները և պատասխանատուները:

Նշվեց, որ արդեն Մասնագիտական կրթության որակի ապահովման (ՄԿՈԱ) բաժնին են ներկայացվել կրթական ծրագրերի առաջարկի հայտերը:

Տնօրենի առաջարկով մասնագիտությունների կրթական ծրագրերի պատասխանատուները բարձրաձայնեցին ծրագրերի վերամշակման հետ կապված որոշ խնդիրների մասին և ներկայացրին դրանց հնարավոր լուծումները:

 2017թ. դեկտեմբերի 1-ին ԵՊՀ ԻՄ-ի հումանիտար գիտությունների ֆակուլտետում տեղի ունեցավ «Հայկական ծագումով ֆրանսահայերը» խորագրով միջոցառում, որը կազմակերպել էր Ֆրանսերեն լեզվի և գրականության ամբիոնը՝ ի դեմս ամբիոնի դասախոս Սվետա Օհանյանի:

Միջոցառմանը մասնակցում էին ոչ միայն «Ֆրանսերեն լեզու և գրականություն», այլև «Անգլերեն լեզու և գրականություն» մասնագիտության ուսանողներ:

«Հայկական ծագումով ֆրանսահայերը» միջոցառման նպատակն էր ուսանողներին իրազեկել ֆրանսահայ մեծերի, Ֆրանսիայում նրանց բնակություն հաստատելու, անցած ճանապարհի և մշտապես Հայաստանին օժանդակելու մասին:

Միջոցառման մասնակիցներն անդրադարձան Շ.Ազնավուրին, Մ.Լեգրանին, է.Սեգարային, Պ.Ֆիորիին, Ա.Վերնոյին, Ռ.Մելիքին, ֆրանսահայ ուրիշ մեծերի և նրանց ստեղծագործություններին:

2017թ. դեկտեմբերի 1-ին ԵՊՀ ԻՄ-ի տնտեսագիտության ֆակուլտետի ուսանողական խորհուրդը կազմակերպեց «Ինչպե՞ս գրել բիզնես ծրագիր» թեմայով միջոցառում, որը վարում էին Տնտեսագիտության ֆակուլտետի ՈՒԽ-ի նախագահ Հասմիկ Քարտաշյանը և ֆակուլտետի ՈՒԽ-ի նախագահի օգնական Արփինե Վերանյանը։

Միջոցառման նպատակն էր ուսանողներին սովորեցնել բիզնես ծրագիր գրելը:

Մասնակիցները ստացան տեղեկատվություն մարքեթինգի, մենեջմենթի, արտադրության կազմակերպման և ֆինանսական պլանավորման մասին։

Խմբային աշխատանքի միջոցով ուսանողները ներկայացրին ձեռներեցի 10 կարևորագույն հատկանիշները:

Ծավալվեց ակտիվ քննարկում, որի ընթացքում մասնակիցները պարզեցին կոնկրետ առարկայի վրա կատարված մարքեթինգային և արտադրական ծախսերը։

2017թ. նոյեմբերի 30-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը Կիրառական արվեստի ֆակուլտետի վարչական և պրոֆեսորադասախոսական անձնակազմի ներկայացուցիչների հետ:

Հանդիպման ընթացքում քննարկվեցին մի շարք հարցեր, որոնք հիմնականում վերաբերում էին ուսանողների ինքնուրույն աշխատելու ունակությունների ու գործնական հմտությունների զարգացմանը, նրանց կարգապահությանը, սեմինար և գործնական պարապմունքների արդյունավետության բարձրացմանը, 2017-2018 ուստարվա առաջին կիսամյակի քննաշրջանի (մասնավորապես՝ 2-րդ ընթացիկ քննությունների, ստուգումների և ստուգարքների) պատշաճ կազմակերպմանը:

Այդ համատեքստում կարևորվեցին ուսանողների ինքնուրույն աշխատանքների ծավալների ավելացման, նրանց տրվող հանձնարարությունների նկատմամբ դասախոսների հետևողականության խնդիրները:

Ընդգծվեց նաև, որ ֆակուլտետի վարչական և պրոֆեսորադասախոսական անձնակազմի ներկայացուցիչները հետևողական լինեն, որ ուսանողների ստացած գնահատականներն օբյեկտիվորեն արտացոլեն նրանց գիտելիքները:

2017թ. նոյեմբերի 30-ին ԵՊՀ ԻՄ-ի գրադարանում կայացավ «Սերվիս» մասնագիտության երկրորդ կուրսի ուսանողների մասնակցությամբ միջոցառում (անգլերեն), որը նախաձեռնել և կազմակերպել էր Անգլերեն լեզվի և գրականության ամբիոնը՝ ի դեմս ամբիոնի դասախոս Աստղիկ Սիմոնյանի:

Միջոցառմանը մասնակցում էին «Սերվիս» մասնագիտության երկրորդ կուրսի ուսանողներ Մարիամ Մելիքսեթյանը, Տիգրան Ղուշչյանը, Ասյա Սարգսյանը, Նարա Սարիբեկյանը, Դիանա Մկրտչյանը, Լաուրա Մելքումյանը, Նելլի Գուլինյանը, այլ կուրսերի ուսանողներ, դասախոսներ, գրադարանի վարիչը, Տնտեսագիտության ֆակուլտետի դեկանի օգնականը, կամավորներ:

Միջոցառման հիմնական նպատակը ուսանողներին որպես էքսկուրսավար դրսևորվելու հնարավորություն տալն էր:

Մասնակիցների առջև խնդիր էր դրվել ընտրել Հայաստանի Հանրապետության որևէ վայր (վանք, տաճար, եկեղեցի, քաղաք և այլն), դրա մասին անգլերենով պատրաստել պաստառներ և իրենց ընտրած վայրը պաստառների միջոցով ներկայացնել միջոցառման մասնակիցներին:

Յուրաքանչյուր ուսանողին հատկացվել էր առանձին սեղան, որի վրա նրանք ցուցադրել էին իրենց պատրաստած պաստառները:

Ուսանողները միջոցառման մասնակիցներին հանգամանորեն ներկայացրին իրենց ընտրած վայրը, նրա առանձնահատկությունները, զբոսաշրջային ներուժը:

Մարիամ Մելիքսեթյանը ներկայացրեց Գյումրին, Տիգրան Ղուշչյանը՝ Ծաղկաձորը, Ասյա Սարգսյանը՝ Իջևանը, Նարա Սարիբեկյանը՝ Գառնի-Գեղարդը, Դիանա Մկրտչյանը՝ Երևանը, Լաուրա Մելքումյանը՝ Դիլիջանը, Նելլի Գուլինյանը՝ ընդհանրապես Հայաստան աշխարհը:

Թեև ուսանողների համար սա առաջին փորձն էր, բայց նրանք պատվով իրականացրին իրենց առջև դրված խնդիրը: 

Միջոցառումն ուղեկցվեց հարցուպատասխաններով և բուռն քննարկումներով: