Մայքրոսոֆթ ինովացիոն կենտրոն Հայաստանը ՎիվաՍել-ՄՏՍ-ի հետ համատեղ կազմակերպում է Seedstars միջազգային մրցույթի տեղական փուլը, որին կարող են մասնակցել ցանկացած ոլորտում նորարարական լուծում ներկայացնող թիմերը։

«Seedstars Երևան» սթարթափների մրցույթին մասնակցելու համար անհրաժեշտ է լրացնել դիմում-հայտ այստեղ ` մուտքագրելով SSW_Yerevan_2017 կոդը։ Հայտը պետք է ուղարկել մինչև սեպտեմբերի  19-ը:

Դիմում-հայտ կարող են ներկայացնել զարգացման տարբեր փուլերում գտնվող ստարտափեր, ինչպես նաև արդեն պատրաստի պրոդուկտ առաջարկող թիմեր։

Լավագույն 12 ստարտափերը կմասնակցեն «Seedstars-Երևան» սթարթափերի տեղական փուլին, որը տեղի կունենա սեպտեմբերի 23-ին: Մրցույթի հաղթողը հնարավորություն կստանա ներկայացնելու իր պրոդուկտը Շվեցիարիայում կայանալիք Seedstars համաշխարհային մրցույթին, որի հաղթողը կստանա մինչև 1 միլիոն ԱՄՆ դոլար ֆինանսավորում:

Տարածաշրջանային հաղթողները կստանան տարբեր մրցանակներ՝ այդ թվում մենթորների, հաջողակ ձեռներեցների և այլ ներդրողների կողմից խորհրդատվություն, մասնակցություն աքսելերացիայի ծրագրերում և այլ ծառայություններ:

Seedstars World-ը սթարթափների բացառիկ մրցույթ է արագ զարգացող շուկաների և ձեռնարկատիրական էկոհամակարգերի համար։ Մրցույթի միջոցով կապ է ստեղծվում ներդրողների և նորաստեղծ ստարտափերի միջև՝ գրավելով Սիլիկոնյան հովտում և Արևմտյան Եվրոպայում գործող խոշոր ներդրողների ուշադրությունը։

Նշենք, որ նախորդ տարիների տեղական փուլի հաղթող թիմերի համար միջազգային փուլը կարևոր նշանակություն է ունեցել իրենց պրոդուկտի առաջխաղացման համար։ 2015թ․ի հաղթող SoloLearn ընկերությունը ընդգրկվել է լավագույն տասնյակում և գրավել բազմաթիվ ներդրողների ուշադրությունը, ինչից հետո թիմը կարողացել է ներգրավել մեծ ներդրումներ, իսկ ներկայումս ունի 3 միլիոնից ավել օգտատերեր։

Մրցույթի տեղական փուլի կազմակերպման հովանավորներն են ՎիվաՍել-ՄՏՍ-ը և Շվեյցարիայի դեսպանատունը Հայաստանում։

 2017թ. հուլիսի 29-ին ԵՊՀ Իջևանի մասնաճյուղի մերձակա տարածքում իրականացվեց շաբաթօրյակ` մասնաճյուղի տնօրեն Ս. Ա. Առաքելյանի և բուհի մի խումբ աշխատակիցների մասնակցությամբ:

Հայտնի է, որ ՀՀ կառավարության ղեկավար Կարեն Կարապետյանի որոշմամբ` 2017-ի ապրիլի 20-ից մեկնարկել է «Մաքուր Հայաստան» ծրագիրը, որը նպատակաուղղված է Հայաստանը իր մաքրությամբ ու կանաչապատման մշակույթով դարձնելու օրինակելի: Հանրապետական գործադիր մարմինների ղեկավարներին հանձնարարվել է 2-ամսյա ժամկետում ձեռնարկել միջոցներ ոլորտային ենթակայության տակ գտնվող տարածքների աղբահանության և սանիտարական մաքրման խնդիրները համակարգային  վերացնելու ուղղությամբ:

«Այս հավակնոտ ծրագրի իրականացման հարցում մենք ունենք ձեր աջակցության կարիքը: Կարևորում եմ ձեզնից յուրաքանչյուրի մասնակցությունը, քանի որ առանց ձեր հոգատար վերաբերմունքի` հարազատ բնակավայրի, փողոցի, բակի նկատմամբ, լավ արդյունքի հասնելը շատ բարդ կլինի»,- դիմելով իր հայրենակիցներին` նշել է ՀՀ վարչապետը:

Ողջունելով կառավարության որդեգրած` Հայաստանը բոլորի համար գրավիչ և հարմարավետ դարձնելու  քաղաքականությունը` ԵՊՀ Իջևանի մասնաճյուղի աշխատակիցները մաքրման աշխատանքներ իրականացրին Երիտասարադական 3 փողոցի գետափնյա ճանապարհի ամբողջ երկայնքով:

 2017թ. հուլիսի 3-15-ը կայացավ 2016-17 ուստարվա ուսումնական պլանով նախատեսված՝ «Համակարգչային գրաֆիկա» I, «Դիզայն» I և II կուրսերի ուսումնական պրակտիկան:

«Համակարգչային գրաֆիկա» և «Դիզայն» մասնագիտությունների I կուրսերի համատեղ պրակտիկան ղեկավարում էր Կիրառական արվեստի ֆակուլտետի ՄԿԾ-ի պատասխանատու, Դեկորատիվ-կիրառական արվեստի և դիզայնի ամբիոնի ասիստենտ, ՀՀ ՆՄ անդամ Ա.Չիբուխչյանը:

Ուսումնական պրակտիկան անցկացվել է Իջևան քաղաքի կենտրոնական զբոսայգում, դենդրոպարկում, Կիրառական արվեստի ֆակուլտետի տեքստիլ 1 արվեստանոցում և հ1 լսարանում:

Պրակտիկային մասնակցած 10 ուսանողներն ուսումնասիրել են տարատեսակ բույսերի կառուցվածքը, դրանք ճեպանկարելու  և մշակելու տարբերակները: Յուրաքանչյուր ուսանող կատարել է 20-30 ճեպանկար, որոնցից լավագույններն ընտրվել են հիմնական առաջադրանքի համար:

2-ական ընտրված բուսական աշխարհի օրինակները մշակվել են գույնով, որոնցից յուրաքանչյուրը ենթարկել է ոճավորման՝ ստիլիզացիայի (շտրիխ, կետային և կոնտուրային նկարչություն):

Ըստ բիոնիկայի հիմնական օրենքների՝ 2-3 փուլերով ուսանողներն այդ օրինակներից ստացել են կենցաղային իրեր, ինչպես նաև հագուստի տեսակներ՝ օգտագործելով ընտրված բույսերի գունային և ոճային առանձնահատկությունները:

Աշխատանքներն  իրականացվել են ազատ ոճով, որը նպաստել է պրակտիկանտ-ուսանողների՝ կոմպոզիցիոն աշխատանքների կատարման վարպետությանն ու բիոնիկայի ուսումնասիրմանը:

«Դիզայն» II կուրսի պրակտիկան ղեկավարում էր  Դեկորատիվ-կիրառական արվեստի և դիզայնի ամբիոնի ասիստենտ, ՀՀ ՆՄ անդամ Դ.Չիբուխչյանը:

Ուսումնական պրակտիկան հիմնականում անցկացվել է Իջևանի կենտրոնական զբոսայգու հարակից կիսակառույց շինությունների մոտ, իսկ վերջին 3 օրերին՝ ֆակուլտետի հ1 և հ2 լսարաններում:

Պրակտիկային մասնակցած 8 ուսանողները 10-15 ճեպանկարների միջոցով ընտրել և բացահայտել են այն ճարտարապետական կառույցները, որոնք ունեն դիզայներական միջամտության կարիք: Լավագույն օրինակի ընտրությունից հետո սկսել են մշակել փոփոխված 2 տարբերակները: Ընտրված օրինակներից էին կիսակառույց շենքեր, սրճարաններ, մշակույթի տունը, դրան հարակից կառույցը և այլն:

Կատարված փոփոխությունները վերաբերել են կառույցների միայն էքստերիերային հատվածներին: Ուսանողներն այդպիսով ձեռք են բերել պատկերացում, թե ինչպես կարելի է ձևափոխել ճարտարապետական կառույցների արտաքին տեսքերը:

Ղեկավարների խոսքով՝ ուսումնական պրակտիկաները բավականին արդյունավետ էին և հագեցած. նպաստեցին ուսանողների ստեղծագործական կարողությունների զարգացմանը, նրանց տեսական գիտելիքների գործնական ամրապնդմանը:

2017թ. հուլիսի 8-ին ԵՊՀ Իջևանի մասնաճյուղում կայացավ գիտխորհրդի` այս ուստարվա վերջին ընդլայնված նիստը, որին մասնակցում էին ԵՊՀ-ի ռեկտոր Ա. Հ. Սիմոնյանը, ԵՊՀ-ի ուսումնական աշխատանքների գծով պրոռեկտոր Ա.Գրիգորյանը, Ինֆորմատիկայի և կիրառական մաթեմատիկայի ֆակուլտետի դեկան Վ.Դումանյանը, Ռուս բանասիրության ֆակուլտետի դեկան Պ.Բալայանը, Ֆարմքիմիայի և ֆարմակագնոզիայի ամբիոնի վարիիչ, Ֆարմացիայի ինստիտուտի տնօրեն Ա.Սաղյանը, ռեկտորատի ներկայացուցիչներ, մասնաճյուղի գիտխորհրդի անդամները, վարչական անձնակազմի ներկայացուցիչներ, կրթական ծրագրերի պատասխանատուները:

Նիստը վարում էր Մայր բուհի ռեկտոր Ա.Սիմոնյանը:

Գիտական խորհրդի նիստում ամփոփվեցին ԵՊՀ ԻՄ-ի՝ 2016-2017 ուստարվա ամփոփիչ ատեստավորման արդյունքները, քննարկվեցին մասնաճյուղի՝ 2018թ. ընդունելության մասնագիտությունների ցանկին, ՄԿՈԱ բաժնի՝ 2016-2017 ուստարվա գործունեությանը, ԵՊՀ ԻՄ-ում կառուցվածքային փոփոխություններին, Գծանկարի, գունանկարի և քանդակի ամբիոնի ասիստենտ Մհեր Ստեփանյանին ԵՊՀ-ի գիտական խորհրդում դոցենտի գիտական կոչում ստանալու համար երաշխավորելուն և միջնորդելուն վերաբերող հարցեր:

Նիստի ընթացքում հաստատվեցին Գիտակազմակերպական բաժնի, ԵՊՀ ԻՄ-ի ուսանողական նպաստների, պետական և ներբուհական կրթաթոշակների հատկացման կանոնակարգերը, Միջազգային կապերի բաժնի, ԵՊՀ ԻՄ-ի արխիվի, Արտակարգ իրավիճակների, մարմնակրթության և սպորտի ամբիոնի կանոնադրությունները:

ԵՊՀ ԻՄ-ի՝ 2016-2017 ուստարվա ամփոփիչ ատեստավորման արդյունքների վերաբերյալ զեկուցումով հանդես եկավ մասնաճյուղի գիտխորհրդի նախագահ, տնօրեն Ս. Ա. Առաքելյանը: Նա մասնավորապես նշեց, որ 2017թ. մայիսի 12-ից  հունիսի 25-ը մասնաճյուղում ըստ ժամանակացույցի իրականացվել է ԵՊՀ ԻՄ-ի՝ 2016-2017 ուստարվա ամփոփիչ ատեստավորման (առկա և հեռակա) գործընթացը: Ընդհանուր առմամբ ամփոփիչ ատեստավորման հանձնաժողովների նախագահները գոհ են եղել ամփոփիչ քննություններին ուսանողների պատրաստվածության մակարդակից և ավարտական աշխատանքների պաշտպանություններից, շրջանավարտների ձեռք բերած ուսումնառության ընդհանրական արդյունքների հետագա բարելավման ուղղությամբ կատարել են համապատասխան առաջարկություններ:

Ներկայացվեց, որ 2017թ. բակալավրի կրթական ծրագրերով առկա և հեռակա ուսուցմամբ մասնաճյուղն ավարտել են 416 ուսանողներ, որոնցից 165-ը՝ առկա ուսուցմամբ (1-ը նախորդ տարիներից), 251-ը՝ հեռակա ուսուցմամբ (1-ը նախորդ տարիներից): Վերոնշյալ կրթական ծրագրերով առկա ուսուցմամբ 24 ուսանող ստացել է գերազանցության դիպլոմ: Համեմատության կարգով նշվեց, որ այս տարի առկա ուսուցմամբ բակալավրի կրթական ծրագրով գերազանցության դիպլոմ ստացող ուսանողների թիվն աճել է ≈10,8%-ով: Ընդգծվեց, որ 31 շրջանավարտներ ցանկություն են հայտնել ընդունվել մագիստրատուրա:

ԵՊՀ ԻՄ-ի՝ 2018թ. ընդունելության մասնագիտությունների հետ կապված՝ նշվեց, որ հանրապետությունում տարեցտարի նկատվում է դիմորդների թվի նվազում, ուստի անհրաժեշտ է մասնագիտությունների ընտրության ճիշտ քաղաքականություն վարել: Ներկայացվեց, որ առաջիկա տարում Կիրառական արվեստի ֆակուլտետեում ընդունելություն կատարվելու է «Դիզայն» կրթական ծրագրով, Բնական գիտությունների ֆակուլտետում՝ «Ինֆորմատիկա և կիրառական մաթեմատիկա» կրթական ծրագրով, Տնտեսագիտության ֆակուլտետում՝ «Ֆինանսներ» կրթական ծրագրով, Հումանիտար գիտությունների ֆակուլտետում՝ «Անգլերեն լեզու և գրականություն», «Տարրական մանկավարժություն և մեթոդիկա» կրթական ծրագրերով:

ՄԿՈԱ բաժնի՝ 2016-2017 ուստարվա գործունեության վերաբերյալ զեկուցումով հանդես եկավ բաժնի վարիչ Մ.Ճաղարյանը: Մասնավորապես նշվեց, որ մասնաճյուղում որակյալ ուսումնառության ապահովման ռազմավարական խնդրի իրականացման գրավականը բուհում դեռևս 2009 թվականից կայուն ներդրված որակի ներքին ապահովման համակարգն է: ԵՊՀ ԻՄ-ի որակի ներքին ապահովման կազմակերպական  կառուցվածքին համապատասխան՝ այդ գործընթացները կանոնակարգվում և իրականացվում են Մասնագիտական կրթության որակի ապահովման (ՄԿՈԱ) բաժնի կողմից՝ Որակի կառավարման հանձնաժողովի մշտական աջակցությամբ և խորհրդատվությամբ: Ընթացիկ ուստարում բաժինն առաջնորդվում է կրթության որակի բնագավառում մասնաճյուղի ընտրած  քաղաքականությամբ և բաժնի՝ 2016-17 ուստարվա աշխատանքային պլանով, որը կազմվել է համաձայն մասնաճյուղի զարգացման՝ 2016-20 ռազմավարական ծրագրի պլան-ժամանակացույցից բխող կարճաժամկետ պլանի: ՄԿՈԱ բաժնի՝ 2016-2017 ուստարվա գործունեությունը գնահատվեց լավ:

ԵՊՀ ԻՄ-ում կառուցվածքային փոփոխությունների մասին հարցի կապակցությամբ որոշվեց.

• Հավանություն տալ ԵՊՀ ԻՄ-ի անձնակազմի կառավարման բաժինը Մարդկային ռեսուրսների կառավարման բաժին վերակազմավորելու վերաբերյալ ԵՊՀ ԻՄ-ի տնօրենի առաջարկին:
• Համապատասխան առաջարկով դիմել ԵՊՀ-ի ռեկտորին:

Մյուս հարցի վերաբերյալ որոշվեց Գծանկարի, գունանկարի և քանդակի ամբիոնի ասիստենտ, ՀՀ նկարիչների միության անդամ Մհեր Ստեփանյանին մասնաճյուղի գիտխորհրդում երաշխավորել և միջնորդել ԵՊՀ-ի գիտական խորհրդին՝ նրան շնորհելու դոցենտի գիտական կոչում ու համապատասխան առաջարկով դիմելու ՀՀ ԲՈՀ:

Ամփոփելով նիստը՝ ԵՊՀ-ի ռեկտոր պարոն Արամ Սիմոնյանը բարձր գնահատեց  ԵՊՀ Իջևանի մասնաճյուղի՝ 2016-2017 ուստարվա գործունեությունը, իր գոհունակությունն արտահայտեց մասնաճյուղի ղեկավարությանը և ամբողջ անձնակազմին՝ իրենց բարեխիղճ ու պատասխանատու աշխատանքի համար, ընդգծեց Մայր բուհի կողմից մասնաճյուղի շարունակական զարգացմանն աջակցելու պատրաստակամության մասին: