ԵՊՀ ԻՄ-ի նիստերի դահլիճում կայացավ գրող Հովհաննես Ներզեթյանի գրական դիմանկարի և ստեղծագործությունների շուրջ բանախոսություն-քննարկում: Հովհաննես Ներզեթյանը ստեղծագործում է դեռևս խորհրդային տարիներից և ընթերցողի սեղանին է դրել «Սամվել», «Արտավազդ և Կլեոպատրա» դրամաները, «Մարդկության սկիզբը և վերջը մի անհատի կյանքն է. «ԵՍ»» աֆորիզմների ժողովածուն և մի շարք այլ ստեղծագործություններ:

Բացման խոսքով հանդես եկավ ԵՊՀ ԻՄ-ի գրադարանի վարիչ Վ.Պողոսյանը` ընդգծելով. «Այսօրվա միջոցառման առանցքը Հովհաննես Ներզեթյանի գրական դիմանկարն է, վերջինիս ստեղծագործությունների` դրամատիկական ժանրից մինչև բազմաթիվ աֆորիզմների արժևորումը, որը կփորձենք ամբողջացնել դասախոսների և ուսանողների համակարծության կամ տարակարծության միջոցով»:

Գրողի ստեղծագործական ուղին ներկայացրեց ԵՊՀ ԻՄ-ի ընդհանուր մաթեմատիկայի և բնագիտության ամբիոնի դոցենտ, ֆ.մ.գ.թ. Սերգեյ Ազարյանը՝ շեշտելով, որ մեծ է Հովհաննես Ներզեթյան անհատի և գրողի ազդեցությունը իր՝ որպես մասնագետի, գրողի հայացքների, ազգային և համամարդկային արժեքների ընկալումների ձևավորման վրա:

Հաջորդիվ հանդես եկավ բանասեր, լրագրող Վարդան Բաղդասարյանը, ով իր խոսքում նշեց, որ ժամանակակից գրողը պետք է բազմաչափ խորությամբ` զգացական և համամարդկային դիտանկյուններից, մոտենա այժմեական խնդիրներին, և Ներզեթյանի ստեղծագործությունները, նրանցում արտահայտված համամարդկային գաղափարներն այդ ճանապարհի ուղեկից և խորհրդատու կարող են լինել:

Ներզեթյանի ստեղծագործությունների գրականագիտական վերլուծությամբ հանդես եկան ԵՊՀ ԻՄ-ի «Հայոց լեզու և գրականություն» մասնագիտության երրորդ կուրսի ուսանողուհիներ Անուշ Աղաջանյանն ու Ռոզա Բաղրամյանը: Ըստ Ա.Աղաջանյանի՝ հեղինակն իր ստեղծագործություններում կարևորում է նպատակասլացությունը, հոգու արիությունը, մտքի ճկունությունը, բնավորության կայունությունը, հորդորում ապրել առանց նախանձի, քանզի այն պարտվածների, թուլակամների գործն է: Ըստ Ռ.Բաղրամյանի՝ «Սամվել»-ի  սյուժեն ընդհանուր առմամբ հասկանալի է ընթերցողին, միևնույն ժամանակ դժվարընթեռնելի է: Խոսքի վերամբարձությունը հնարավորություն չի տալիս միանգամից ընկալել ու զգալ ասվածը:

Ներզեթյանի ստեղծագործությունների գրականագիտական արժեքին անդրադարձավ ԵՊՀ հայ բանասիրության ֆակուլտետի հայ գրականության պատմության ամբիոնի վարիչ, բ.գ.դ., պրոֆեսոր Սամվել Մուրադյանը: Խոսելով դրամատիկական ժանրում հեղինակի ներդրման, գրական ստեղագործությունների առանձնահատկությունների մասին` պրոֆեսոր Ս.Մուրադյանը նշեց. «Ներզեթյանին հաջողվել է ընթերցողի  առջև բարձրացնել հանրահայտ  պատմավիպական հերոսների այլընտրանքային կերպարներ իրադարձությունների և գործողությունների ռիթմիկ, համընթաց համամասնությամբ, հյութեղ հայերենով և հետաքրքիր երկխոսություններով»: Անդրադառնալով հեղինակի աֆորիզմներին` պրոֆեսոր Մուրադյանը նշեց, որ գրքեր կան, որ դառնում են կյանքի ուղեկից, խորհրդատու, սակայն գրքել էլ կան, որ ինչպես ծնվում են, այնպես էլ մահանում ու մոռացվում:  Հովհաննես Ներզեթյանի այդ գիրքը պատկանում է առաջինների թվին: Այն ոչ թե տարբեր տեղերից հավաքած և խմբավորած աֆորիզմների շտեմարան է, այլ արտահայտում է հեղինակի միտքն ու խոսքը՝ հակիրճ ու դիպուկ:

Ելույթ ունեցավ նաև գրքի հեղինակը, ով շնորհակալություն հայտնեց ներկաներին ջերմ խոսքերի համար, ընդհանուր գծերով անդրադարձավ իր անցած ստեղծագործական ուղուն՝ հայացք նետելով և համառոտ մեկնաբանելով իր  ստեղծագործությունները:

Հանդիպման վերջում հանդես եկավ ԵՊՀ ԻՄ-ի տնօրենի պաշտոնակատար Ա․Մակարյանը՝ շնորհակալություն հայտնելով Հ․Ներզեթյանին և հյուրերին՝ բովանդակային խոսքի և գրքերի ներկայացման համար: Իր խոսքում Ա․Մակարյանը շեշտեց. «Մեր ժամանակների ուսանողը հաճախ կարոտ է գրական երկերի, պատմական կերպարների նոր մեկնությանը և հեղինակների հետ շփումներին, ուստի սա սպասված հանդիպում էր: Հետագայում կփորձենք ավելի սերտացնել գրող-ընթերցող շփումը: Շնորհակալ եմ մեր ուսանողներին՝ իրենց գնահատականների, ազնիվ և համարձակ տեսակետների համար, կարևորենք ազատ և անկախ գիտական խոսքը, որ հետագայում կնպաստի ուսանողների քննադատական մտքի ձևավորմանը»:

 Իջևանի թիվ 5 հիմնական դպրոցի 9-րդ դասարանների աշակերտները 2023թ. ապրիլի 21-ին  հյուրընկալվեցին ԵՊՀ Իջևանի մասնաճյուղում: Աշակերտներին ուղեկցում էին Տնտեսագիտության ֆակուլտետի դեկանի պաշտոնակատար Ա․Մարգարյանը, Պրակտիկայի կազմակերպման և շահակիցների հետ համագործակցության բաժնի վարիչ Լ.Բեգինյանը և Իջևանի թիվ 5 հիմնական  դպրոցի Մասնագիտական կողմնորոշման խմբակի աշխատակից Ա.Գալստյանը:

Նման այցելությունները տարածաշրջանի դպրոցների հետ համագործակցության մասն են կազմում և նպատակ ունեն մոտիվացնելու դպրոցականներին և շարժելու նրանց հետաքրքրությունը կրթության և գիտության նկատմամբ, բարձրացնելու իրազեկվածությունը ԵՊՀ Իջևանի մասնաճյուղի գործունեության, մասնագիտությունների և իրականացվող գործընթացների վերաբերյալ, օգնելու աշակերտներին կողմնորոշվել մասնագիտության ընտրության հարցում:

Այցի ընթացքում աշակերտները հնարավորություն ունեցան մոտիկից ծանոթանալու Տնտեսագիտության ֆակուլտետի գործուն­եությանը, ուսանո­ղների առօրյային:

«Ֆինանսներ» կրթական ծրագրի I կուրսում դպրոցականները մասնակցեցին տ.գ.թ., դոցենտ Հ․Մարգարյանի կողմից անցկացվող տնտեսագիտության տեսության առարկայի դասին: Նույն կրթական ծրագրի III կուրսում աշակերտները մասնակցեցին դասախոս Ա․Ասոյանի կողմից անցկացվող «Մակրոտնտեսագիտություն» դասընթացի դասին, ինչպես նաև բ․գ․թ․, ասիստենտ Ռ․Հարությունյանի և դասախոս Ա․Պարոնյանի կողմից իրականացվող «Մասնագիտական անգլերեն» առարկայի դասին:

Շրջայցի վերջում դպրոցականներն արտահայտվեցին, որ շատ տպավորված են մասնաճյուղի գործունեությամբ, համալսարանական կյանքով, և ցանկություն հայտնեցին ևս մեկ անգամ այցելելու համալսարան և մասնակցելու այլ դասերի:

 ԵՊՀ ԻՄ-ի «Զբոսաշրջություն» մասնագիտության 2-րդ (առկա) և 3-րդ (հեռակա) կուրսերի ուսանողները ուսումնական պրակտիկայի ղեկավարների՝ Տուրիզմի կառավարման և մշակութաբանության ամբիոնի ասիստենտ, մ.գ.թ. Հ.Ազիզյանի և դասախոս Ս.Սաֆարյանի գլխավորությամբ ս.թ. ապրիլի 19-ին ուսումնական պրակտիկա իրականացրին Իջևան-Պարզ լիճ-Գոշ-Իջևան երթուղով:

Պրակտիկայի ընթացքում ղեկավարները ներկայացրին Տավուշի մարզը որպես զբոսաշրջային դեստինացիա (ուղևորության նպատակակետ), մասնավորապես` «Դիլիջան» ազգային պարկը, որը Տավուշի մարզի զբոսաշրջային մեծ ներուժ պարունակող օբյեկտ է: Շեշտվեց, որ «Դիլիջան» ազգային պարկի տարածքը Հայաստանի եզակի անկյուններից է, որն առանձնանում է հարուստ ու յուրօրինակ կենսաբազմազանությամբ: Ազգային պարկը ներառում է ինչպես բնական, այնպես էլ մարդածին բարձրարժեք ռեսուրսներ: Այդտեղով  անցնում է Տրանսկովկասյան արահետը, որը միավորում է  միջազգային կազմակերպություններին և կառույցներին՝ դրանով ճանաչելի դարձնելով Անդրկովկասի ու Հայկական լեռնաշխարհի բնական պայմանները, պատմական, մշակութային արժեքները և նպաստելով բնաշխարհի պահպանմանն ու  զբոսաշրջության զարգացմանը:

Արահետի մի հատվածին ուսանողները ծանոթացան քայլարշավի միջոցով՝ Պարզ լիճ-Գոշ ուղղությամբ: Դա համալիր երթուղի է, որում ընդգրկված են արժեքավոր բնական և պատմամշակութային օբյեկտներ: Քայլարշավը նպատակ ուներ ծանոթացնել ուսանողներին տարածքում կողմնորոշման եղանակներին:

Պրակտիկայի ընթացքում ուսանողները ներկայացրին աշխատանքային պլան-հանձնարարականի համաձայն իրենց նախապատրաստած տեղեկությունները երթուղու, «Դիլիջան» ազգային պարկի և Դիլիջան խոշորացված համայնքում առկա հյուրանոցառեստորանային համալիրների, զբոսաշրջային ենթակառուցվածների մասին:

Ուսանողները նաև ծանոթացան շրջակա լեռնագրական միավորներին, էկոզբոսաշրջային երթուղիներին, բնական և պատմամշակութային հուշարձաններին, տարածքում գտնվող և Կարմիր գրքում գրանցված բույսերի էնդեմիկ տեսակներին: Պրակտիկանտները գնահատեցին դրանց ընդգրկվածությունը զբոսաշրջային փաթեթներում:

Ուսումնական պրակտիկան շարունակվում է, և ծրագրով նախատեսված երթուղիների իրականացման ընթացքում գնալով կխորանան ուսանողների գործնական գիտելիքները և հմտությունները:

 ԵՊՀ Իջևանի մասնաճյուղում ս.թ. ապրիլի 18-ին տեղի ունեցավ ճանաչողական հանդիպում՝ «Մունետիկ» մշակութային հասարակական կազմակերպության ներկայացուցիչների և բուհի ուսանողների մասնակցությամբ:

Հանդիպման նպատակը «Մեկ հայրենիք, մեկ նպատակ» հայրենաճանաչողական ծրագրի մասին իրազեկելը և ցանկացող ուսանողներին ծրագրում ընդգրկելն էր:

Հանդիպում-քննարկման սկզբում «Մունետիկ» ՀԿ կազմակերպչական թիմի անդամներ Հ.Համբարձումյանը և Տ.Համբարձումյանը ուսանողներին մանրամասն ներկայացրին «Մունետիկ»-ի հիմնադրման պատմությունն ու անցած ուղին, «Մեկ հայրենիք, մեկ նպատակ» հայրենաճանաչողական ծրագրի նպատակն ու խնդիրները, նկարագրեցին ծրագրի մասնակից դառնալու պայմանները:

Ներկայացվեց, որ «Մեկ հայրենիք, մեկ նպատակ» ծրագիրն անցկացվելու է Իջևանում, և վերջում կազմակերպվելու է ծրագրի ընթացքում մասնակիցների իրականացրած աշխատանքներից (գեղանկար, գոբելեն, վիտրաժ և այլ ժանրերի գործեր) կազմված գեղեցիկ ցուցահանդես դարձյալ Իջևանում:

Հանդիպումը կայացավ շատ ջերմ և անկաշկանդ մթնլորտում, ուսանողներն ու ներկա դասախոսները կարողացան ստանալ իրենց հետաքրքրող բոլոր հարցերի պատասխանները:

Վերջում ուսանողներին իր խոսքն ուղղեց նաև ԵՊՀ ԻՄ-ի կիրառական արվեստի ֆակուլտետի դեկանի պաշտոնակատար Վ.Աղաբաբյանը՝ ընդգծելով ծրագրի հետաքրքիր և կարևոր լինելու հանգամանքը:

«Մունետիկ» հասարակական կազմակերպության նախաձռնող խումբը մեծ շնորհակալություն հայտնեց ԵՊՀ Իջևանի մասնաճյուղի ղեկավարությանը և անձնակազմին՝ ի դեմս մասնաճյուղի տնօրենի պաշտոնակատար պարոն Ա.Մակարյանի և Կիրառական արվեստի ֆակուլտետի դեկանի պաշտոնակատար Վ.Աղաբաբյանի՝ համագործակցության և տվյալ հանդիպումը բարձր մակարդակով կազմակերպելու համար: