2016թ. մարտի 19-ին Իջևանի թիվ 1 հիմնական դպրոցում անցկացվեց շախմատի մրցաշար, որը կազմակերպել էր Տավուշի մարզի միջազգային հայրենակցական միավորումը` միավորման նախագահ Սերգեյ Բարսեղյանի գլխավորությամբ:

Տավուշի մարզում առաջին անգամ անցկացվող շախմատի՝ հիմնարկ-ձեռնարկությունների թիմային մրցաշարին մասնակցում էին նաև ԵՊՀ Իջևանի մասնաճյուղի սաները՝ «Ինֆորմատիկա և Կիրառական մաթեմատիկա» մասնագիտության 1-ին կուրսի ուսանող Գիգուշ Մկրտչյանը, «Տնտեսագիտության տեսություն» մասնագիտության 2-րդ կուրսի ուսանող Արման Հարությունյանը, նույն մասնագիտության 4-րդ կուրսի ուսանող, ՈՒԽ-ի նախագահ Ռազմիկ Հովսեփյանը, «Անգլերեն լեզու և գրականություն» մասնագիտության 2-րդ կուրսի ուսանող Հայկ Դանիելյանը:       

Մասնակից 5 թիմերից լավագույն արդյունք ցուցաբերեց Նոյեմբերյանի ՀԷՑ-ը, 2-րդ տեղը գրավեց Հայ առաքելական եկեղեցու Տավուշի թեմի Նոյեմբերյանի համայնքը, 3-րդ տեղը զբաղեցրեց Տավուշի մարզպետարանը:

Առաջին տեղ գրաված թիմը պարգևատրվեց գավաթով, իսկ մրցանակային տեղեր գրաված շախմատիստները` համապատասխան մեդալներով ու դիպլոմներով:

ԵՊՀ Իջևանի մասնաճյուղի շախմատիստները, մրցաշարի կազմակերպիչների հավաստմամբ, ցուցադրեցին բավականին հետաքրքիր ու դիտարժան խաղ՝ զբաղեցնելով 4-րդ հորիզոնականը:

2016թ. մարտի 18-ին ԵՊՀ Իջևանի մասնաճյուղի տնօրեն Ս.Առաքելյանը հանդիպում ունեցավ Հումանիտար գիտությունների ֆակուլտետի վարչական և պրոֆեսորադասախոսական անձնակազմի ներկայացուցիչների հետ:

Հանդիպման ընթացքում քննարկվեցին ուսումնական գործընթացին վերաբերող մի շարք հարցեր, որոնք մասնավորապես առնչվում էին առաջիկայում դասախոսների որակավորման բարձրացման դասընթացների կազմակերպմանը, դասամատյանների հետ տարվող աշխատանքներին, ամբիոնների գործավարությանը, սեմինար և գործնական պարապմունքների անցկացմանը, ուսանողների ինքնուրույնության ու գործնական հմտությունների զարգացմանը և այլն:

Ֆակուլտետի դասախոսները տնօրենին ներկայացրին իրենց առաջարկները, տվեցին իրենց հուզող հարցերը, կատարվեցին պարզաբանումներ:

2016թ. մարտի 17-ին ԵՊՀ Իջևանի մասնաճյուղի մարզադահլիճում տեղի ունեցավ Կանանց տոնին նվիրված սպորտլանդիայի մասնաճյուղային առաջնություն:

Առաջնությանը մասնակցում էր յոթ թիմ («Տնտեսագիտության տեսություն»-I, «Կիրառական արվեստ» I և III, «Հայոց լեզու և գրականություն»-I, «Պատմություն»-I, «Ֆրանսերեն լեզու և գրականություն»-I, «Անգլերեն լեզու և գրականություն»-II):   

Սպորտլանդիան անցկացվեց օլիմպիական ձևով (պարտվողը դուրս էր մնում հետագա մրցակցությունից):

Խաղային ձևերն էին օձաձև անցում, վազք ցատկապարանով և մարմնամարզական օղակներով: 

Եզրափակիչ դուրս եկան «Կիրառական արվեստ»-III, «Անգլերեն լեզու և գրականություն»-II թիմերը:  

Հաղթեց «Կիրառական արվեստ» մասնագիտության III կուրսի ուսանողներից (Անի Խաչատրյան, Թեհմինե Ղազարյան, Անի Մխիթարյան, Մերի Կիրակոսյան) կազմված թիմը:  

Հաղթողները տնօրենության կողմից պարգևատրվեցին հուշանվերներով:

2016թ. մարտի 15-ին Կիրառական արվեստի ֆակուլտետում կայացավ ավարտական աշխատանքների էսքիզների (նախագծերի) հաստատման գործընթացը, որին ներկա էին մասնաճյուղի տնօրեն Ս.Առաքելյանը, ֆակուլտետի դեկան Ա.Մարգարյանը, գեղխորհրդի անդամները, ավարտական աշխատանքները ղեկավարող դասախոսները, հասարակայնության հետ կապերի և մամուլի պատասխանատուն:

Ավարտական կուրսի 31 ուսանողները ֆակուլտետի գեղխորհրդի անդամներին ներկայացրին իրենց աշխատանքների էսքիզները, բացատրեցին դրանց իրականացման ընթացքը:

Նախագծված աշխատանքները բազմաժանր էին՝ գոբելեն, մետաքսանկար, գեղանկար, հարթաքանդակ, կերամիկական ու մետաղական աշխատանքներ և այլն:

 Ուսանողները ստացան աշխատանքների հետ կապված անհրաժեշտ ցուցումներ, բացթողումները լրացնելու վերաբերյալ արժեքավոր դիտողություններ:

  Դիտարկումները հիմնականում վերաբերում էին էսքիզների ճշգրտմանը, որոշ կառուցվածքային, բովանդակային, թեմատիկ խնդիրների, իրականացման ընթացքի հետ կապված ինչ-ինչ տեխնիկական նրբությունների:

Օրինակ, նշվեց, որ աշխատանքների գեղարվեստական արժեքը կարելի է մեծացնել որոշ տարրեր առաջին պլան մղելու, զարդանախշեր ընդգծելու, շրջանակով, համապատասխան ֆոնով ապահովելու և այլ միջոցներով:

ԵՊՀ ԻՄ-ի տնօրեն Ս.Առաքելյանը հավաստեց, որ մասնաճյուղի ղեկավարության կողմից ուսանողները կստանան անհրաժեշտ աջակցություն՝ աշխատանքները լիարժեք և պատշաճ մակարդակով իրականացնելու համար: