2017թ. նոյեմբերի 11-ին՝ երիտասարդության և ուսանողության տոների (նոյեմբերի 10-ին նշվում է Երիտասարդության համաշխարհային օրը, իսկ նոյեմբերի 17-ին՝ Ուսանողության միջազգային տոնը) կապակցությամբ, ԵՊՀ Իջևանի մասնաճյուղում տեղի ունեցավ վոլեյբոլի ընկերական խաղ:

Խաղը կազմակերպել էր ԵՊՀ ԻՄ-ի արտակարգ իրավիճակների, մարմնակրթության և սպորտի ամբիոնը (ամբիոնի վարիչի ԺՊ Ա.Վանեսյանը, դասախոսներ Ն.Ղարիբյանը և Պ.Կարապետյանը):

Վոլեյբոլի ընկերական խաղը կայացավ Բնական գիտությունների ֆակուլտետի «Ինֆորմատիկա և կիրառական մաթեմատիկա» 1-ին և Կիրառական արվեստի ֆակուլտետի «Դիզայն» 2-րդ կուրսի ուսանողների միջև:  

Ընթացավ թեժ խաղ, որի 4 խաղափուլերն ավարտվեցին 2:2 հաշվով:

Խաղարկվեց 5-րդ խաղափուլ՝ հաղթող թիմ որոշելու համար:

Հաղթեց  «Ինֆորմատիկա և կիրառական մաթեմատիկա» մասնագիտության      1-ին կուրսի թիմը:

2017թ. նոյեմբերի 10-ին  ԵՊՀ ԻՄ-ի տնօրեն Ս. Ա. Առաքելյանը խորհրդակցություն անցկացրեց մասնաճյուղի մի խումբ վարչական աշխատակիցների հետ:

Խորհրդակցության ընթացքում քննարկվեցին մասնաճյուղի պրոֆեսորադասախոսական անձնակազմի ուսումնական բեռնվածության կատարման ընթացքին, ԵՊՀ ԻՄ-ի՝ 2017-2018 ուսումնական տարվա I կիսամյակի  1-ին ընթացիկ քննություններին և ստուգումներին վերաբերող հարցեր:

Հաշվի առնելով Ուսումնամեթոդական վարչության ուսումնասիրությունը ԵՊՀ ԻՄ-ի պրոֆեսորադասախոսական անձնակազմի ուսումնական բեռնվածության վերաբերյալ, Երևանից հրավիրված դասախոսների հաճախումների գրաֆիկն ըստ շաբաթների (համարիչ, հայտարար) և ընթացիկ քննությունների ու ստուգումների անցկացումը հայտարար շաբաթում (համաձայն ժամանակացույցի)՝ ֆակուլտետների դեկաններին հաձնարարվեց համապատասխան դասախոսների հետ քննարկել և նշանակել լրացուցիչ ուսումնական պարապմունքներ՝ նախատեսված ժամաքանակները մինչև կիսամյակի ավարտը լրացնելու նպատակով:

2017-18 ուսումնական տարվա I կիսամյակի 1-ին ընթացիկ քննություններին և ստուգումներին վերաբերող հարցի կապակցությամբ ֆակուլտետների դեկաններին հանձնարարվեց ֆակուլտետների գիտական խորհուրդների նիստերում ամփոփել քննությունների և ստուգումների արդյունքները: 

 2017թ. նոյեմբերի 8-ին ԵՊՀ Իջևանի մասնաճյուղում տեղի ունեցավ «Ինչպե՞ս ներկայացնել գիտական զեկուցում» խորագրով սեմինարը, որը նախաձեռնել էր մասնաճյուղի ուսանողական գիտական ընկերությունը (ՈՒԳԸ):

Ներկա էին տարբեր ֆակուլտետների ուսանողներ: Սեմինարը վարում էր ՈՒԳԸ համակարգող, Ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը:

Սեմինարավարը ներկայացրեց գիտական հետազոտության ընթացքը.

1. Ընտրված թեմայի այժմեականության հիմնավորում,
2. Հետազոտության նպատակի և խնդիրների սահմանում,
3. Հետազոտության օբյեկտի և առարկայի սահմանում,
4. Հետազոտության իրականացման մեթոդի (մեթոդիկայի) ընտրություն,
5. Հետազոտության գործընթացի նկարագրություն,
6. Հետազոտության արդյունքների վերլուծություն,
7. Ստացված արդյունքների գնահատում և հետևությունների ձևակերպում:

Այնուհետև տրվեցին որոշ հասկացությունների բացատրություններ, թվարկվեցին հետազոտության մեթոդներըը (դիտում, համեմատում, գիտափորձ, չափում, մոդելավորում, վերացարկում, ինդուկցիա, դեդուկցիա, վերլուծություն, համադրություն և այլն), գիտահետազոտական աշխատանքների տեսակները (ռեֆերատ, գիտական հոդված, կուրսային և ավարտական աշխատանքներ և այլն), դրանց կառուցվածքը (անվանաթերթ, բովանդակություն, ներածություն, հիմնական մաս, եզրակացություն, գրականության ցանկ, հավելվածներ):

Հանգամանորեն ներկայացվեց աղբյուրներից օգտվելու և հղումներ կատարելու կարգը և նշանակությունը.

1. Գրագողությունից խուսափում,
2. Ստուգելիության ապահովում,
3. Հարգանքի դրսևորում այլոց աշխատանքների հանդեպ,
4. Այլոց աշխատանքներով սեփական տեսակետի հիմնավորում,
5. Ուսումնասիրվող թեմային քաջածանոթություն:

Բացատրվեցին նաև համացանցում արդյունավետ որոնման նրբությունները (Google փնտրման օպերատորներ) և գիտական գրականություն պարունակող հիմնարար կայքերը:

Սեմինարի վերջում ներկայացվեցին համապատասխան ձեռնարկները, որոնցում մանրամասն շարադրված են գիտական աշխատանք կատարելու սկզբունքները, մասնավորապես՝ ԵՊՀ ՈՒԳԸ «Գիտահետազատական աշխատանք կատարելու հիմնական սկզբունքները» մեթոդական ցուցումները և Վազգեն Գաբրիելյանի «Գրավոր խոսք» ուսումնական ձեռնարկը:

«Ինչպե՞ս ներկայացնել գիտական զեկուցում» խորագրով սեմինարը բավականին հետաքրքիր էր և ուսանելի:

2017թ. նոյեմբերի 7-ին Հայոց լեզվի և գրականության ամբիոնի դոցենտ, ՄԿԾ-ի պատասխանատու, բ.գ.թ. Աիդա Սարհատյանը «Հայոց լեզու և գրականություն» դասընթացի շրջանակներում բաց դաս անցկացրեց «Անգլերեն լեզու և գրականություն» մասնագիտության առաջին կուրսում:

Դասին հրավիրված էին ԵՊՀ ԻՄ-ի տնօրեն Ս. Ա. Առաքելյանը, Հումանիտար գիտությունների ֆակուլտետի դեկան Ա.Ներսիսյանը, դասախոսներ:

Բաց դասը բավականին հետաքրքիր էր և բովանդակալից:

Նախ Ա.Սարհատյանը ներկայացրեց դասի թեման («Բառապաշարի դասակարգման սկզբունքները»), նպատակը և խնդիրները (ըստ համապատասխան հատկանիշների՝ ժամանակակից հայոց լեզվի բառապաշարի դասակարգումը. բառային հիմնական ֆոնդ և բառային կազմ, փոխառություններ, հնաբանություններ, նորաբանություններ, դիպվածային բառեր, օտարաբանություններ, ժարգոնային բառեր, տերմիններ և այլն):

Ինչպես հայոց լեզվի և գրականության յուրաքանչյուր դասի, այնպես էլ այս բաց դասի համար տիկին Սարհատյանը մշակել էր համապատասխան մեթոդներ ու ձևեր, որոնք նպաստում են թե՛ ուսանողների գիտելիքների հարստացմանն ու գիտական նյութի յուրացմանը, թե՛  նրանց աշխարհայացքի ու մտահորիզոնի զարգացմանը, թե՛ բառապաշարի հարստացմանը, ստեղծագործական մտքի ու երևակայության շարունակական ձևավորմանը, թե՛ գեղագիտական ճաշակի բարձրացմանը:

Հայտնի է, որ հայոց լեզվի ուսումնասիրությունը` հիմնված  դպրոցում ձեռք բերած գիտելիքների և լեզվական կարողությունների վրա, նպաստում է օտար լեզուների իմացության խորացմանը, օտար լեզվամտածողության ընկալմանը, մայրենի և օտար լեզուների բառապաշարային, կառուց­վածքային ընդհանրությունների ու տարբերությունների ըմբռնմանը, մայրենի լեզվի և օտար լեզուների հաղորդակցական հնարավորու­թյունների համադրմանը:

Ըստ այդմ՝ բառապաշարի շերտերի մասին դպրոցում ձեռք բերված գիտելիքները ուսանողները բաց դասի ընթացքում խորացրին ու հարստացրին իրենց արդեն ծանոթ բառարանային ու հայ դասականների ստեղծագործությունների բառապաշարի քննությանը վերաբերող ինքնուրույն հանձնարարականներով: 

Ընթերցվեցին անգլերենից հայոց լեզու անցած տասնյակ բառեր` հայերեն համարժեքներով, նորաբանությունների, հնաբանությունների,  փոխառությունների ու ժողովրդախոսակցական բառերի շերտեր:

Կարևորվեցին նաև երկու (անգլերեն և հայերեն)  լեզուների միջառարկայական ու միջմշակութային կապերն ու  փոխազդեցությունները:

Ուսանողները խմբովին կատարեցին Կոմիտասի «Կաքավիկն» ու «Հո՛վ արեք, սարեր ջան»-ը, ապա անգլիական ժողովրդական թովիչ մի սիրերգ:

Երգերի կատարմանը հաջորդեց մեծ ներշնչումով գրված ստեղծագործական շարադրությունների ընթերցումը, որոնք իրենց հուզական խորունկ լիցքերով հաճելի տպավորություն թողեցին ներկաների վրա:

Բաց դասն անցավ բուռն ու հետաքրքիր քննարկումներով, որոնց ակտիվ մասնակցություն ունեցան նաև դասին հրավիրված պարոն Առաքելյանն ու Ներսիսյանը:

Տնօրենն ու ֆակուլտետի դեկանն իրենց գոհունակությունն արտահայտեցին բարձր մակարդակով կազմակերպված, հետաքրքիր ու բովանդակալից դասի համար՝ ևս մեկ անգամ ընդգծելով մայրենի և օտար լեզուների իմացության, նրանց հաղորդակցական հնարավորու­թյունների կիրառման, միջմշակութային կապերի կարևորությունը: