ԵՊՀ Իջևանի մասնաճյուղում տեղի ունեցավ տնօրենության նիստ՝ Ա. Հ. Մակարյանի նախագահությամբ: Նիստում քննարկվեցին 2023-2024 ուստարվա 1-ին կիսամյակում դասապրոցեսին ուսանողների մասնակցությանը, հերթական ատեստավորման ենթակա ուսուցիչների վերապատրաստման դասընթացների կազմակերպմանը և արդյունքներին, մինչև 12 կրեդիտ կուտակած ակադեմիական պարտքերի վերահանձնման գործընթացի կազմակերպման ընթացքին, հանրակրթական դպրոցներից ԵՊՀ ԻՄ դիմած դիմորդներին (2021 թ., 2022 թ., 2023 թ.), նախորդ տնօրենության նիստի որոշումների կատարողականին վերաբերող հարցեր:

Առաջին հարցի մասին նշվեց, որ նախորդ ուստարվա համեմատությամբ այս ուստարվա 1-ին կիսամյակում դասապրոցեսին ուսանողների մասնակցության ընդհանուր վիճակն ավելի լավ է: Կան բացակայությունների թույլատրելի սահմանը հատած ուսանողներ, որոնց հետ կազմակերպվել են հանդիպումներ, և բարելավման ուղղությամբ իրականացվել են խորհրդատվական ու բացատրական աշխատանքներ: 

Հերթական ատեստավորման ենթակա ուսուցիչների վերապատրաստման դասընթացների կազմակերպման և արդյունքների վերաբերյալ նշվեց, որ վերապատրաստող մասնագետների և վերապատրաստված ուսուցիչների արտահայտած կարծիքներն ու տեսակետները փաստում են գոհացուցիչ արդյունքների մասին: Ս.թ. սեպտեմբերի 5-ից  հոկտեմբերի 28-ը ԵՊՀ ԻՄ-ում կազմակերպվել և իրականցվել են Տավուշի և Գեղարքունիքի  մարզի  19  դպրոցների 48 ուսուցիչների համար վերապատրաստումներ: Նախ կազմվել և ԿԳՄՍ նախարարության հաստատմանն են ներկայացվել «Հերթական ատեստավորման ենթակա ուսուցիչների վերապատրաստման դասընթացի մոդուլը», դասընթացի ժամանակացույցը և վերապատրաստվող ուսուցիչների տվյալները: ԵՊՀ ԻՄ-ը պայմանագիր է կնքել Տավուշի և Գեղարքունիքի  մարզի  19  դպրոցի հետ:

Համաձայն հաստատված ժամանակացույցի՝ իրականացվել են վերապատրաստումները՝ 110 ժամ ընդհանուր տևողությամբ, հետևյալ մոդուլներից՝ Հանրակրթության բնագավառի օրենսդրություն, Տեղեկատվական հաղորդակցության տեխնոլոգիաներ, Տարիքային հոգեբանություն, Համընդհանուր ներառում, Գնահատում, Դիրքորոշում և արժեք, Առարկայի դասավանդման մեթոդիկա, Հետազոտական աշխատանքներ կատարելու սկզբունքներ:

Վերապատրաստումներն իրականացրել են 8 դասընթացավարներ,  որոնցից 6-ը մասնաճյուղի աշխատակիցներն են, իսկ երկուսի հետ կնքվել է աշխատանքային պայմանագիր՝ դասընթացների ժամանակահատվածի համար:

Ուսուցիչների հետազոտական աշխատանքների էլեկտրոնային տարբերակները մուտքագրվել են Հայկական կրթական միջավայրի Պաշարների շտեմարան, թղթային տարբերակները հանձնվել են Արխիվ: Վերապատրաստման յուրաքանչյուր խմբի համար վարվել են առաջին թղթային մատյաններ: 2023 թ. հոկտեմբերի 31-ին նախարարություն է ուղարկվել ԵՊՀ Իջևանի մասնաճյուղի կողմից իրականացված վերապատրաստման դասընթացի վերաբերյալ հաշվետվություն, իսկ նոյեմբերի 1-ին վերապատրաստված ուսուցիչներին տրվեն են վկայականները:

Հաջորդ հարցի մասին նշվեց, որ 2023-2024 ուստարվա 1-ին կիսամյակում եղել է մինչև 12 կրեդիտ ակադեմիական պարտքեր կուտակած 19 ուսանող, որից 2-ը՝ Հումանիտար գիտությունների ֆակուլտետից (առկա), 10-ը՝ Բնական գիտությունների ֆակուլտետից (առկա՝ 2, հեռակա՝ 8), 7-ը՝ Տնտեսագիտության ֆակուլտետից (հեռակա): Ընդ որում՝ նշված ուսանողներից 5-ը վերահանձնելու է ուսումնական պրակտիկա: Նոյեմբերի 1-7-ը դիմումների ընդունման, իսկ նոյեմբերի 21-27-ը՝ քննությունների հանձնման ժամանակաշրջանն է: Սահմանված ժամկետներում ուսանողները ներկայացրել են իրենց դիմումները՝ ակադեմիական պարտքերը մարելու համար: Ֆակուլտետների դեկանները տնօրենի հաստատմանն են ներկայացրել հանձնաժողովների կազմերը և ժամանակացույցները:

Մյուս հարցի հետ կապված՝ նշվեց, որ ԵՊՀ ԻՄ պրակտիկայի կազմակերպման և շահակիցների հետ համագործակցության (ՊԿՇՀ) բաժնի կողմից, ըստ հանրակրթական դպրոցների, կատարվել է վերջին երեք տարիներին ԵՊՀ ԻՄ դիմած դիմորդների թվի և ընդունելության մրցույթի արդյունքների համեմատական վերլուծություն, ըստ որի՝ դիմորդների հիմնական հոսքը կատարվում է Տավուշի մարզի դպրոցներից (2021 թ․ այն կազմել է ընդհանուր դիմորդների 96.28%-ը, 2022 թ․՝ 99․6%-ը, իսկ 2023 թ․՝ 99%-ը):

2021 թ․ ընդունելության ընթացքում Լոռու մարզից դիմորդ է գրանցվել միայն Մարգահովիտի միջնակարգ դպրոցից (1 դիմորդ-1 ընդունված հարաբերակցությամբ): Նույն թվականին Երևանից մասնաճյուղ է դիմել 2, ընդունվել 1 դիմորդ:

ՊԿՇՀ բաժինը յուրաքանչյուր տարի այցելություններ է իրականացնում Տավուշի մարզի գրեթե բոլոր դպրոցներ (բացառությամբ այն դպրոցների, որոնք չունեն շրջանավարտ կամ դիմորդ) և Գեղարքունիքի, Լոռու մարզերի նշված դպրոցներ, սակայն ճանաչողական այցերի և ակնարկային դասախոսությունների շրջանակում ոչ բոլոր դպրոցներն են ընդգրկվում: Ըստ այդմ՝ անհրաժեշտ է ամրապնդել մասնաճյուղի կապն այն դպրոցների հետ, որոնք գրանցում են դիմորդների համեմատաբար մեծ հոսք, ակտիվացնել կապն այն դպրոցների հետ, որոնք չեն գրանցում դիմորդների մեծ հոսք, սակայն տարածաշրջանային դիրքով և տրանսպորտի հասանելիությամբ ունեն մասնաճյուղի մատուցած կրթությունից օգտվելու ավելի մեծ հնարավորություն:

Օրակարգային վերջին հարցի շրջանակներում անդրադարձ կատարվեց նախորդ տնօրենության նիստի որոշումների կատարողականին, և արձանագրվեց, որ բոլոր որոշումներն էլ իրականացվել են:

Ընթացիկ՝ դիպլոմն անվավեր ճանաչելու և կրկնօրինակ տրամադրելու մասին հարցի կապակցությամբ նշվեց, որ ԵՊՀ Իջևանի մասնաճյուղի՝ 2020 թ. 1 շրջանավարտ դիմել է իր դիպլոմի կրկնօրինակը տրամադրելու համար: Հիմք ընդունելով «ԵՊՀ-ի կողմից լրացուցիչ ծառայությունների մատուցման և փաստաթղթերի տրամադրման վարձաչափերի և ժամկետների մասին», ինչպես նաև «ԵՊՀ-ի դիպլոմի կրկնօրինակը տալու կարգը հաստատելու մասին» ԵՊՀ ռեկտորի հրամանները՝ որոշվեց անվավեր ճանաչել ԵՊՀ ԻՄ շրջանավարտի նախկին դիպլոմը և թույլատրել տրամադրել կրկնօրինակը:

ԵՊՀ Իջևանի մասնաճյուղում ս.թ. հոկտեմբերի 27-ին տեղի ունեցավ տնօրենության նիստ՝ Ա. Հ. Մակարյանի նախագահությամբ:

Նիստում քննարկվեցին առկա ուսուցման՝ 2023-2024 ուստարվա 1-ին կիսամյակի 1-ին ընթացիկ ստուգումների և քննությունների, հեռակա ուսուցման բակալավրի և մագիստրատուրայի 1-ին կիսամյակի ուսումնական պարապմունքների նախապատրաստական աշխատանքներին, ԵՊՀ ԻՄ աշխատակիցների և ուսանողների՝ 2022-2023 ուստարում հարցումների միջոցով վերհանված խնդիրներին և կարիքներին վերաբերող օրակարգային հարցերը: Բնական գիտությունների ֆակուլտետի՝ 2022-2023 ուստարվա գործունեության վերաբերյալ հաշվետվության ներկայացման հարցը հետաձգվեց՝ պայմանավորված ԵՊՀ գիտական խորհրդի՝ 2023թ. հոկտեմբերի 26-ի նիստում հաշվետվությունների նոր ձևաչափի ներկայացմամբ և մասնաճյուղում դրա ներդրմամբ:

Տնօրենության նիստում քննարկվեցին նաև ուսանողների ուսանողական իրավունքների վերականգնման, Լեռնային Ղարաբաղից բռնի տեղահանված ուսանողներին ԵՊՀ ԻՄ ընդունելու և հետագա ուսումնառությունը շարունակելու վերաբերյալ ընթացիկ հարցերը:

Առաջին հարցի մասին նշվեց, որ առկա ուսուցման՝ 2023-2024 ուստարվա 1-ին կիսամյակի 1-ին ընթացիկ ստուգումների և քննությունների համար իրականացվել են անհրաժեշտ նախապատրաստական աշխատանքներ:

Ժամանակացույցի համաձայն՝ քննաշրջանը մեկնարկել է ս.թ. հոկտեմբերի 27-ին և կտևի մինչև նոյեմբերի 4-ը: Ֆակուլտետների դեկանները ամբիոններում քննարկումներից հետո Ուսումնամեթոդական վարչություն են ներկայացրել ընթացիկ ստուգումների և քննությունների կազմակերպման ժամանակացույցները, դրանք տեղադրվել են պաշտոնական կայքէջում, և դրանց մասին իրազեկվել են դասախոսները և ուսանողները: Ֆակուլտետներին տրամադրվել են քննությունների համար նախատեսված տետրերը, կատարվել են նախապատրաստական այլ աշխատանքներ:

Քննաշրջանն ընթանում է սահմանված կարգով, Ոսումնամեթոդական վարչությունը, դեկանները և գործընթացի բոլոր պատասխանատուները հետևողական են դրա պատշաճ կազմակերպման և իրականացման գործում, առաջին օրվա դրությամբ խնդիրներ և խախտումներ չեն արձանագրվել:

Հաջորդիվ ներկայացվեց, որ հեռակա ուսուցման բակալավրի և մագիստրատուրայի՝ 2023-2024 ուստարվա 1-ին կիսամյակի ուսումնական պարապմունքները սկսելու համար նույնպես իրականացվել են նախապատրաստական անհրաժեշտ աշխատանքներ: Հեռակա ուսուցման բակալավրի 2-5-րդ կուրսերի ուսումնական պարապմունքները կմեկնարկեն ս.թ. նոյեմբերի 1-ից, մագիստրատուրայինը՝ նոյեմբերի 14-ից: Քանի որ 2023-2024 ուստարվա բակալավրի հեռակա ուսուցման ընդունելության քննությունները դեռևս ընթացքի մեջ են, և առաջին կուրսեր չեն ձևավորվել, ուստի Ուսումնամեթոդական վարչության պետի կողմից առաջարկվեց հեռակա ուսուցման բակալավրի 1-ին կուրսերի դասերը սկսել նոյեմբերի 3-ից: Դասացուցակները բերվում են վերջնական տեսքի և սեղմ ժամկետներում՝ 2 օրվա ընթացքում, կտեղադրվեն մասնաճյուղի պաշտոնական կայքում, դրանց մասին կտեղեկացվեն դասախոսները և ուսանողները:

Մասնաճյուղի աշխատակիցների և ուսանողների՝ 2022-2023 ուստարում վերհանված խնդիրների և կարիքների վերաբերյալ նշվեց, որ Մասնագիտական կրթության որակի ապահովման բաժինը 2022-23 ուստարում տարբեր մեխանիզմներով վերհանել է բուհի աշխատակիցների և ուսանողների մի շարք կարիքներ և խնդիրներ: Դրանք հիմնականում վերաբերում են դասավանդման և ուսումառության գործընթացին, այդ թվում՝ պրակտիկաներին, գնահատման բազմագործոն համակարգին, նյութատեխնիկական և այլ ռեսուրսներին ու միջոցներին:

Մասնագիտական կրթության որակի ապահովման բաժնի կողմից այդ խնդիրները և կարիքները կխմբավորվեն ըստ պատասխանատվության և կուղարկվեն համապատասխան ստորաբաժանումներին, որպեսզի վերջիններս ներկայացնեն վերհանված խնդիրների լուծման վերաբերյալ իրենց ծրագրերը՝ համապատասխան քայլերով, ժամկետներով և ակնկալիքներով:

Առաջին ընթացիկ հարցի մասին նշվեց, որ ԵՊՀ Իջևանի մասնաճյուղի հեռակա ուսուցման համակարգի 2 նախկին ուսանողներ դիմել են իրենց ուսանողական իրավունքները վերականգնելու համար: Ուսումնամեթոդական վարչությունը ստուգել է նրանց ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին: Ըստ այդմ՝ նրանց թույլատրվում է վերականգնել իրենց ուսանողական իրավունքները:

Նիստի վերջին հարցի կապակցությամբ ներկայացվեց, որ ս.թ. հոկտեմբերի 27-ի դրությամբ ԵՊՀ ԻՄ ընդունվելու և մասնաճյուղում նույն կամ հարակից մասնագիտություններով հետագա ուսումնառությունը շարունակելու համար դիմել է Լեռնային Ղարաբաղից բռնի տեղահանված 20 ուսանող: Առարկայական տարբերությունների հանձնման I փուլը ս.թ. նոյեմբերի 1-15-ն ընկած ժամանակահատվածում է: ԵՊՀ Իջևանի մասնաճյուղում շարունակվում է Արցախից բռնի տեղահանված ուսանողների ընդունելության գործընթացը:

 2023թ. հոկտեմբերի 18-ին ԵՊՀ Իջևանի մասնաճյուղում Ա. Հ. Մակարյանի նախագահությամբ կայացավ տնօրենության նիստ՝ օրակարգային 4 և ընթացիկ 3 հարցերով:

Նիստում քննարկվեցին 2023-2024 ուստարվա 1-ին կիսամյակի հետազոտական աշխատանքների պատրաստման և գնահատման կազմակերպման ընթացքին, պրոֆեսորադասախոսական համակազմի տարակարգերի աշխատողների համար պաշտոնների անձնագրերի վերանայմանը, մասնաճյուղում 2023-2024 ուստարվա 1-ին կիսամյակում պրակտիկաների կազմակերպման ընթացքին, ավարտական աշխատանքների թեմաների հաստատման ընթացքին վերաբերող հարցեր:

Առաջին հարցի մասին նշվեց, որ 2023-2024 ուստարվա 1-ին կիսամյակում առկա ուսուցման համակարգում հետազոտական բաղադրիչ պարունակող դասընթացների թիվը 32 է, հեռակա ուսուցման համակարգում՝ 15: Հետազոտական աշխատանքների պատրաստման և գնահատման կազմակերպման ընթացքը նորմալ է, խնդիրներ չեն արձանագրվել:

Հաջորդիվ ներկայացվեց, որ վերանայվել են պրոֆեսորադասախոսական համակազմի տարակարգերի աշխատողների համար պաշտոնների անձնագրերը: Ըստ այդմ՝ հստակ ամրագրվել են դասախոսի, ասիստենտի, դոցենտի, պրոֆեսորի և ամբիոնի վարիչի պաշտոններին առաջադրվող պահանջները՝ բարձրագույն կրթություն, մասնագիտական և մանկավարժական հմտությունների տիրապետում (մասնագիտական ունակություններ, դասավանդման/մանկավարժական և հետազոտական ունակություններ), աշխատանքային պարտականություններ՝ իրենց դրույթներով հանդերձ:

Մասնաճյուղում 2023-2024 ուստարվա 1-ին կիսամյակում պրակտիկաների կազմակերպման ընթացքի վերաբերյալ նշվեց, որ հաշվետու կիսամյակում, ըստ բակալավրի և մագիստ­րատուրայի աշխատանքային ուսումնական պլանների, նախատեսված է իրականացնել 13 պրակ­տիկա, որոնցից 8-ը՝ առկա ուսուցման համակարգում (4 մանկավարժական և 4 ուսումնական), 5-ը՝ հեռակա ուսուցման համակարգում (2 մանկավարժական, 2 մասնագիտական, 1 գիտամանկավարժական): Մինչև այժմ կազմակերպվել են առկա ուսուցման պրակտիկաները, իսկ հեռակա ուսուցման պրակտիկաների անցկացման համար իրականացվում են  նախապատրաստական աշխատանքներ:

Մյուս հարցի հետ կապված՝ ներկայացվեց, որ 2023-2024 ուստարվա ավարտական աշխատանքների թեմաները ամբիոններում շտկվել և բերվել են վերջնական տեսքի, որոշ ֆակուլտետների գիտական խորհուրդների նիստերում դրանք արդեն հաստատվել են, որոշներում էլ կհաստատվեն առաջիկայում:

Ընթացիկ հարցերը վերաբերում էին ԵՊՀ ԻՄ տնօրենության՝ 2023-2024 ուստարվա աշխատանքային պլանի մեջ լրացուցիչ հարցեր ավելացնելու մասին առաջարկներին, Լեռնային Ղարաբաղից բռնի տեղահանված ուսանողներին ԵՊՀ ԻՄ ընդունելուն և հետագա ուսումնառությունը շարունակելուն, ուսանողների ուսանողական իրավունքների վերականգնմանը:

Առաջին ընթացիկ հարցի մասին նշվեց, որ տնօրենության անդամների կողմից առաջարկվել է ԵՊՀ ԻՄ տնօրենության՝ 2023-2024 ուստարվա աշխատանքային պլանում ավելացնել լրացուցիչ հարցեր: Դրանք հիմնականում վերաբերում են ուսման վարձավճարների փոխհատուցման շրջափոխման (ռոտացիայի) արդյունքներին, տնօրենության նիստերի որոշումների կատարողականին, ուսանողների վարձավճարների չափերին և զեղչերին, ԵՊՀ ԻՄ աշխատակիցների վերապատրաստման գործընթացի պլանավորմանը, պրոֆեսորադասախոսական անձնակազմի ատեստավորման գործընթացի կազմակերպմանը, e-learning համակարգում ծագած խնդիրներին, կամընտրական առարկաների դասընթացների կազմակերպման հարցերին, 2024-2025 ուստարվա  ընդունելության նախնական արդյունքներին և խնդիրներին:

Հաջորդ ընթացիկ հարցի կապակցությամբ նշվեց, որ ս.թ. հոկտեմբերի 18-ի դրությամբ ԵՊՀ ԻՄ ընդունվելու և մասնաճյուղում հետագա ուսումնառությունը շարունակելու համար դիմել է Լեռնային Ղարաբաղից բռնի տեղահանված 15 ուսանող: ԵՊՀ ԻՄ-ում շարունակվում է Արցախից բռնի տեղահանված ուսանողների ընդունելության գործընթացը: Նոյեմբերի 1-ից առարկայական տարբերությունների հանձնման I փուլն է:

Վերջին հարցի վերաբերյալ նշվեց, որ ԵՊՀ Իջևանի մասնաճյուղի հեռակա ուսուցման համակարգի 14 նախկին ուսանողներ դիմել են իրենց ուսանողական իրավունքները վերականգնելու համար: Ուսումնամեթոդական վարչության կողմից ստուգվել է նրանց ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին, որի համաձայն՝ նրանց թույլատրվում է վերականգնել իրենց ուսանողական իրավունքները:

 2023թ. օգոստոսի 31-ին ԵՊՀ Իջևանի մասնաճյուղում Ա. Հ. Մակարյանի նախագահությամբ կայացավ տնօրենության նիստ՝ օրակարգային 4 և ընթացիկ 1 հարցերով:

Նիստում քննարկվեցին ԵՊՀ ԻՄ-ի տնօրենության տարեկան աշխատանքային պլանի հաստատմանը, նոր՝ 2023-2024 ուսումնական տարվա նախապատրաստական աշխատանքներին, 2022-2023 ուստարվա 2-րդ կիսամյակի բակալավրի առկա և բակալավրի ու մագիստրատուրայի հեռակա ուսուցման 2-րդ կիսամյակի քննաշրջանի ամփոփմանը (լուծարքային շրջանը ներառյալ), 2023-2024 ուստարվա 2-րդ կիսամյակի անվանական կրթաթոշակների (Վազգեն Սարգսյան, Մոնթե Մելքոնյան) տրամադրմանը վերաբերող հարցեր:

ԵՊՀ ԻՄ-ի տնօրենության տարեկան աշխատանքային պլանում նախանշված էին 2023-2024 ուստարվա ուսումնական գործընթացի կազմակերպման հետ կապված հիմնական աշխատանքները՝ իրենց պատասխանատուներով, ժամկետներով, համագործակցող ստորաբաժանումներով: Ժամկետների փոփոխության առնչությամբ տնօրենության անդամների կողմից կատարվեցին որոշ առաջարկություններ:

Որոշվեց հաստատել ԵՊՀ ԻՄ-ի տնօրենության տարեկան աշխատանքային պլանը՝ առաջարկված փոփոխություններով հանդերձ:

2023-2024 ուսումնական տարվա նախապատրաստական աշխատանքների վերաբերյալ ներկայացվեց, որ իրականացվել են դասացուցակների, դասամատյանների, ըստ կուրսերի ու խմբերի՝ լսարանային ֆոնդի բաշխման և այլնի հետ կապված անհրաժեշտ աշխատանքները: Հաստատված դասացուցակները տեղադրվել են ԵՊՀ ԻՄ-ի պաշտոնական կայքէջում: Այդ կապակցությամբ տնօրենը նաև դեկաններին հանձնարարեց հետևողական լինել, որ դասացուցակները գործավարների կողմից ուղարկված լինեն դասախոսների էլեկտրոնային հասցեներին: Նշվեց, որ մասնաճյուղը լիովին պատրաստ է նոր ուսումնական տարվան:

2022-2023 ուստարվա 2-րդ կիսամյակի բակալավրի առկա և բակալավրի ու մագիստրատուրայի հեռակա ուսուցման 2-րդ կիսամյակի քննաշրջանի ամփոփման (լուծարքային շրջանը ներառյալ) մասին նշվեց, որ 2022-2023 ուստարվա 2-րդ կիսամյակի քննաշրջանին մասնակցել են առկա ուսուցման 506 և հեռակա ուսուցման 402 ուսանողներ (ավարտական կուրսերը չհաշված): Քննաշրջանի արդյունքների համաձայն՝ մասնաճյուղից հեռացվում է 4 ուսանող (առկա ուսուցման համակարգի 1 և հեռակա ուսուցման 3): Ակադեմիական պարտքեր է կուտակել 21 ուսանող (2-ը՝ առկա, 19-ը՝ հեռակա ուսուցմամբ սովորող):

Ըստ քննաշրջանի արդյունքների՝ դասընթացը կրկնող ուսանողներ չունենք:

2023-2024 ուստարվա 2-րդ կիսամյակի անվանական կրթաթոշակների (Վազգեն Սարգսյան, Մոնթե Մելքոնյան) տրամադրման հարցի հետ կապված՝ «Մոնթե Մելքոնյան» անվանական կրթաթոշակի համար Հումանիտար գիտությունների ֆակուլտետի կողմից առաջարկվեց «Ռուսաց լեզու և գրականություն» կրթական ծրագրի 4-րդ կուրսի ուսանողուհի Արփինե Վահեի Վանեսյանի թեկնածությունը, իսկ «Վազգեն Սարգսյան» անվանական կրթաթոշակի համար Տնտեսագիտության ֆակուլտետի կողմից ներկայացվեց «Զբոսաշրջություն» կրթական ծրագրի 4-րդ կուրսի ուսանողուհի Մալվինա Հովհաննեսի Վարդապետյանի թեկնածությունը:

Առաջարկված թեկնածությունները հավանության արժանացան տնօրենության անդամների կողմից:

Ընթացիկ հարցը վերաբերում էր 1 ուսանողի ուսանողական իրավունքները վերականգնելուն: Նշվեց, որ Ուսումնամեթոդական վարչության կողմից ստուգվել է ուսանողի ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին, որի համաձայն՝ նրան թույլատրվում է վերականգնել իր ուսանողական իրավունքները:

Վերջում ԵՊՀ ԻՄ-ի տնօրենի պաշտոնակատար Ա.Մակարյանը շնորհավորեց նոր ուսումնական տարվա մեկնարկի առթիվ և բոլորին մաղթեց բարեհաջող ուսումնական գործընթաց:

 ԵՊՀ Իջևանի մասնաճյուղում կայացավ տնօրենության նիստ՝ Ա. Հ. Մակարյանի նախագահությամբ: Նախքան օրակարգային հարցերին անցնելը պարոն Մակարյանն անդրադարձավ ս.թ. հուլիսի 12-ին մասնաճյուղում կայացած դիպլոմների հանձնման արարողությանը, շնորհակալություն հայտնեց այն անձանց, ովքեր ներդրում են ունեցել միջոցառումը բարձր մակարդակով կազմակերպելու և իրականացնելու գործում: Նա նշեց, որ ԵՊՀ ռեկտոր Հ.Հովհաննիսյանը, ԵՊՀ ռեկտորի աշխատակազմի ղեկավար Դ.Հովհաննիսյանը, Տավուշի մարզպետ Հ.Ղալումյանը ևս իրենց գոհունակությունն են հայտնել միջոցառումը բարձր մակարդակով անցկացնելու և բանիմաց ու խելացի ուսանողներ կրթելու համար:

Ա.Մակարյանը հավելեց, որ առաջիկայում ԵՊՀ-ի հոգաբարձուների խորհուրդը կհաստատի ԵՊՀ ԻՄ-ի նոր կանոնադրությունը: Նա տնօրենության անդամներին ներկայացրեց նաև ԵՊՀ ԻՄ-ի եկամուտների և ծախսերի նախահաշվի մեջ փոփոխություն կատարելու գործընթացի մասին՝ պայմանավորված Բնական գիտությունների և Կիրառական արվեստի ֆակուլտետների տանիքի վերանորոգմամբ:

Նիստում քննարկվեցին ամբիոնային և անհատական բեռնվածությունների բաշխման ընթացքին, ԵՊՀ ԻՄ-ի 6 ամսվա՝ 2023թ. հունվարից հուլիս ընկած ժամանակահատվածի նախահաշվի կատարողականին, Գնումների, մատակարարման և պահեստավորման բաժնի՝ 2022-2023 ուստարվա գործունեության հաշվետվությանը, ԵՊՀ ԻՄ-ում ստացած կրթությունից շրջանավարտների բավարարվածության հարցման արդյունքում վերհանված խնդիրներին, 2022-2023 ուստարվա 2-րդ կիսամյակի առկա և հեռակա ուսուցման 1-ին լուծարքային շրջանի արդյունքների ամփոփմանը վերաբերող հարցեր:

Առաջին հարցի վերաբերյալ զեկուցեցին ֆակուլտետների դեկանները և Ուսումնամեթոդական վարչության պետ Ա.Դավթյանը՝ նշելով, որ ամբիոնային և անհատական բեռնվածությունների բաշխման գործընթացը մեծ մասամբ իրականացված է, կան որոշ խնդիրներ՝ կապված առանձին դասախոսների զբաղվածության, նրանց գիտական հետաքրքրությունների և ուսումնական փորձի վրա հիմնված դասաբաշխման, երկու կիսամյակների, առկա և հեռակա բեռնվածությունների միջև հավասար հարաբերակցության ապահովման հետ:

Տնօրենը ֆակուլտետների դեկաններին և Ուսումնամեթոդական վարչության պետին հանձնարարեց սեղմ ժամկետներում կատարել բոլոր շտկումներն ու ճշգրտումները, ավարտին հասցնել ամբիոնային և անհատական բեռնվածությունների բաշխման գործընթացը և մինչև դասախոսների արձակուրդից վերադառնալը պատրաստել նոր ուսումնական տարվա 1-ին կիսամյակի դասացուցակները:

Երկրորդ հարցի մասին զեկուցեց գլխավոր հաշվապահ Մ.Մխիթարյանը՝ ներկայացնելով ԵՊՀ ԻՄ-ի՝ 2023թ. հունվարից հուլիս ընկած ժամանակահատվածի նախահաշվի կատարողականը: Նշվեց, որ այն դեֆիցիտային է, այսինքն՝ մուտքերն ավելի քիչ են, քան ելքերը: Մուտքերը (եկամուտները) կազմում են 256.588,9 մլն. ՀՀ դրամ, որի 77%-ը ուսման վճարներն են՝ 138.041,8 մլն. ՀՀ դրամ: Ելքերը (ծախսերը) կազմում են 278.331,1 մլն. ՀՀ դրամ: Ծախսերի ամենամեծ հոդվածն է «Աշխատանքի վարձատրությանն ուղղվող միջոցներ և դրան հավասարեցված վճարումների ծախսեր»-ը, որոնք կազմում են ծախսերի 75%-ը՝ 208.268,1 մլն. ՀՀ դրամ: Ներկայացնելով 6 ամսվա ընթացքում իրականացված ծախսերը՝ զեկուցողը շեշտեց, որ ամենամեծ գնումը եղել է մասնաճյուղի համար տրանսպորտի ձեռքբերումը: Նախատեսվում է 2023 թվականի նախահաշվում կատարել փոփոխություն հիմնանորոգման ծախսերի գծով:

Նիստում Գնումների, մատակարարման և պահեստավորման բաժնի՝ 2022-2023 ուստարվա գործունեության հաշվետվությունը ներկայացրեց բաժնի մասնագետ Ա.Պողոսյանը: Զեկուցողը մասնավորապես նշեց, որ Գնումների, մատակարարման և պահեստավորման բաժինը 2022-2023 ուստարվա ընթացքում ապրանքների, աշխատանքների և ծառայությունների ձեռքբերման համար գնանշման հարցմամբ կազմակերպվել է 3 մրցույթ, էլեկտրոնային աճուրդով՝  12 մրցույթ, մեկ անձից գնման ձևով՝ 162 համագործակցություն:

Այս ընթացքում կնքվել է 43 պայմանագիր՝ ապրանքների, աշխատանքների և ծառայությունների գծով:

Գնանշման հարցմամբ կայացած մրցույթներին մասնակցել է 3 կազմակերպություն, որոնցից 2-ի հետ կնքվել են պայմանագրեր: Էլեկտրոնային աճուրդով կայացած մրցույթներին մասնակցած 25 կազմակերպությունից 23-ի հետ կնքվել են պայմանագրեր:

Ըստ գնումների գործընթացի կազմակերպման կարգի՝ մեկ անձից գնման ձևով կազմակերպված 162 ընթացակարգից 18 կազմակերպության հետ կնքվել է պայմանագիր, իսկ 144-ը կատարվել է հաշիվ ապրանքագրերի հիման վրա: Ձեռք բերված բոլոր ապրանքատեսակները մուտքագրվել են պահեստ:

ԵՊՀ ԻՄ-ում ստացած կրթությունից շրջանավարտների բավարարվածության հարցման արդյունքում վերհանված խնդիրների վերաբերյալ զեկուցեց Մասնագիտական կրթության որակի ապահովման բաժնի վարիչ Մ.Ճաղարյանը: Նա ներկայացրեց 2023թ. մայիսին իրենց բաժնի կողմից իրականացված Մասնաճյուղում ստացած կրթությունից 2023թ․ շրջանավարտների բավարարվածության ուսումնասիրության հարցման արդյունքների հիման վրա վերհանված խնդիրները՝ ըստ ուղղությունների և կրթական ծրագրերի: Զեկուցողը նշեց, որ հարցումն իրականացվել է առցանց՝ ամփոփիչ ատեստավորման քննությունից հետո: 2022-23 ուստարում մասնաճյուղն առկա ուսուցման 12 կրթական ծրագրով տվել է 129 շրջանավարտ, որոնցից հարցմանը մասնակցել է 124-ը, այսինքն՝ շրջանավարտների 96%-ը: Հարցմանը մասնակցած 124 շրջանավարտներից 39-ի (31%) միջին որակական գնահատականը եղել է 18-20, իսկ 68-ինը (55%)` 13-17: Մասնաճյուղի ընդամենը 17 շրջանավարտ է ունեցել բավարար առաջադիմություն:

2023թ. շրջանավարտները մասնաճյուղում ստացած իրենց կրթությունը գնահատել են բարձր գնահատականներով, և բոլոր կրթական ծրագրերի համար (բացառությամբ 2 կրթական ծրագրի) միջին գնահատականը բարձր է 4․4-ից:

Հարցման ընթացքում մասնաճյուղի թույլ կողմերի վերաբերյալ բաց հարցին պատասխանել է 43 շրջանավարտ: Դրանք բաժինը, դիտարկելով որպես խնդիրներ, համակարգել է ըստ մի քանի ուղղությունների: Նշված խնդիրներում ռեսուրսների առումով շեշտադրվում են շենքային պայմանները (Բնական գիտությունների և Կիրառական արվեստի ֆակուլտետներ), լսարանների անբավարար քանակը (Հումանիտար գիտությունների և Տնտեսագիտության ֆակուլտետներ), կողմնակի անձանց մուտքը մասնաճյուղի տարածք և այլն: Կան նաև պրոֆեսորադասախոսական կազմի անձնական որակներին, ուսանող-դասախոս հարաբերություններին, ոչ օբյեկտիվ  գնահատմանը վերաբերող խնդիրներ:

Բաց հարցերի պատասխաններն առանց խմբագրման ուղարկվել են ֆակուլտետներ, որպեսզի ֆակուլտետներն ըստ կրթական ծրագրերի, հասցեական կարողանան դիտարկել խնդիրները և լուծում տալ դրանց:

Վերջին հարցի՝ 2022-2023 ուստարվա 2-րդ կիսամյակի առկա և հեռակա ուսուցման 1-ին լուծարքային շրջանի անդյունքների ամփոփման մասին զեկուցեցին ֆակուլտետների դեկանները և Ուսումնամեթոդական վարչության պետ Ա.Դավթյանը: Մասնավորապես նշվեց, որ 2022-23 ուստարվա 2-րդ կիսամյակի առկա և հեռակա ուսուցման 1-ին լուծարքային շրջանն ավարտվել է ս.թ. հուլիսի 6-ին: Առկա ուսուցման համակարգում ակադեմիական պարտքեր է կուտակել 116-ից 33 ուսանող, հեռակա ուսուցման համակարգում՝ 245-ից 103 ուսանող: Ըստ այդմ՝ 136 ուսանող ս.թ. օգոստոսի 22-29-ն ընկած ժամանակահատվածում պետք է մասնակցի 2-րդ լուծարքային շրջանին: Այս հարցի կապակցությամբ տնօրենը ֆակուլտետների դեկաններին հանձնարարեց գործավարների միջոցով 136 ուսանողների էլեկտրոնային հասցեներին ուղարկել 2022-23 ուստարվա 2-րդ կիսամյակի առկա և հեռակա ուսուցման 2-րդ լուծարքային շրջանի ժամանակացույցները:

Իբրև ամփոփում՝ ԵՊՀ ԻՄ-ի տնօրենի պաշտոնակատար Ա.Մակարյանը արձակուրդ մեկնող աշխատակիցներին մաղթեց բարի ու արդյունավետ հանգիստ և հայտնեց, որ ԵՊՀ ԻՄ-ի ամբողջ անձնակազմը ս.թ. օգոստոսի 22-ից աշխատանքի է: