2023թ․ սեպտեմբերի 21-ին՝ այսօր, լրանում է Հայաստանի Հանրապետության անկախության 32-ամյակը:

32 տարի առաջ՝ 1991 թ. սեպտեմբերի 21-ին, ՀՀ Գերագույն խորհրդի՝ 1991 թ. մարտի 1-ի որոշմամբ Հայաստանի Հանրապետությունում անցկացվեց հանրաքվե հետևյալ հարցադրմամբ՝ «Համաձայն ե՞ք, որ Հայաստանի Հանրապետությունը լինի անկախ ժողովրդավարական պետություն, ԽՍՀՄ կազմից դուրս»: Հայ ժողովուրդը միասնաբար (99 % ձայների մեծամասնությամբ) «Այո» ասաց անկախությանը:

Հայաստանի պատմության մեջ հաստատվեց երրորդ հանրապետության շրջանը. ՀԽՍՀ-ն վերանվանվեց Հայաստանի Հանրապետություն: Որպես հանրապետության դրոշ հաստատվեց եռագույնը, այնուհետև ընդունվեց զինանշանը:

Գերագույն խորհրդի կողմից անկախության հռչակումից հետո տասնյակ պետություններ ճանաչեցին Հայաստանի Հանրապետությունը: Առաջինը Լիտվան էր, որը մինչև անկախության հռչակումը՝ դեռևս 1991 թ. օգոստոսի 14-ին, ճանաչել էր Հայաստանի Հանրապետության անկախությունը, իսկ արդեն հռչակագրի ընդունումից հետո՝ 1991 թվականի ընթացքում, ևս 47 պետություն ճանաչեց Հայաստանի Հանրապետության անկախությունը:

ԵՊՀ Իջևանի մասնաճյուղի ղեկավարության անունից շնորհավորում ենք համայն հայությանը ՀՀ անկախության 32-րդ տարեդարձի առթիվ՝ մեր ազգին և ժողովրդին մաղթելով համազգային միասնություն, դժվարությունները հաղթահարելու ուժեղ կամք և տոկունություն, խաղաղ և ստեղծագործ աշխատանք, մեր պետությանը՝ հզորացում, առաջընթաց և զարգացում… 

 ԵՊՀ Իջևանի մասնաճյուղում ս.թ․ սեպտեմբերի 14-ին տեղի ունեցավ հանդիպում տնօրենի պաշտոնակատար Ա.Մակարյանի, Հումանիտար գիտությունների ֆակուլտետի դեկանի պաշտոնակատար Կ.Պողոսյանի, «Ֆրանսերեն լեզու և գրականություն» կրթական ծրագրի ղեկավար Ա.Մարդանյանի, «Հայ-ֆրանսիական բարեկամություն և փոխանակում» միության անդամ Վ.Նուեի և Անժելա Վանեսյանի անվան ֆրանկոֆոնիայի կենտրոնի պատասխանատու Մ.Գասպարյանի մասնակցությամբ:

Հանդիպման նպատակը 2023-2024 ուստարվա համար մասնաճյուղի և միության միջև համագործակցության շարունակման համաձայնագիր ստորագրելն էր:

Տնօրենի հետ հանդիպման ընթացքում քննարկվեցին համագործակցությանը վերաբերող հարցեր, և կնքվեց համաձայնագիր, որով կողմերն ամրագրեցին իրենց պատրաստակամությունը նպաստելու մասնաճյուղում և մարզում ֆրանսերենի զարգացմանը, ֆրանկոֆոնիայի տարածմանը:

Պայմանավորվածություն ձեռք բերվեց համագործակցելու մասնավորապես հետևյալ ուղղություններով.

• 2023-2024 ուստարում «Հայ-ֆրանսիական բարեկամություն և փոխանակում» միությունը կտրամադրի կրթաթոշակ՝ ուսման վճարի փոխանցման և ֆրանսերեն ուսումնասիրող ուսանողների շրջանում ֆրանկոֆոնիայի տարածման նպատակով:
• Կրթաթոշակ ստացող ուսանողները պարտավորվում են մասնակցել Իջևանի՝ Պատրիկ Տևեճյանի անվան գյուղատնտեսական տարածաշրջանային քոլեջում տեղակայված՝ Անժելա Վանեսյանի անվան ֆրանկոֆոնիայի կենտրոնի և միջնակարգ հաստատությունների գործունեությանը ամսական 2 անգամ՝ պրն․ Ջոսեֆ Միլեների հանձնարարությամբ: Ամսական մեկ անգամ կատարված աշխատանքների մասին մանրամասն հաշվետվություն կներկայացվի կազմակերպությանը: Ուսանողները Իջևանի շրջանի բնակչությանը՝ հատկապես ծնողներին, կտեղեկացնեն ֆրանկոֆոն կենտրոնի և Պատրիկ Տևեճյանի անվան գյուղատնտեսական տարածաշրջանային քոլեջի գործունեության մասին, ակտիվորոն կմասնակցեն կազմակերպվող միջոցառումներին, հատկապես մարտ-ապրիլ ամիսներին կազմակերպվող ֆրանկոֆոնիայի օրերին:
• Ֆրանսերեն լեզվի և գրականության սեկցիայի պատասխանատու տ. Աիդա Մարդանյանը կտեղեկացնի կրթաթոշակ ստացող ուսանողների՝ դպրոցներում ծավալած գործունեության, իսկ տ․ Մերի Գասպարյանը՝ Անժելա Վանեսյանի անվան ֆրանկոֆոնիայի կենտրոնում նրանց կատարած աշխատանքների մասին:
• Համաձայնագրով կրթաթոշակները կփոխանցվեն ուսանողներին՝ ըստ իրենց կատարած աշխատանքի՝ 250-ից 500 եվրո գումարի չափով:

Պարոն Մակարյանը տիկին Նուեին խնդրեց ԵՊՀ ԻՄ-ի անձնակազմի և ուսանողների շնորհակալական խոսքը փոխանցել «Հայ-ֆրանսիական բարեկամություն և փոխանակում» միությանը և առանձնապես տիկին Պոլետ Կուտանին՝ հայրենանվեր գործունեության, մասնաճյուղի հետ երկարատև և ամուր համագործակցության համար:

2023թ. սեպտեմբերի 8-ին «Հայ-ֆրանսիական բարեկամություն և փոխանակում» միության անդամ տիկին Վերոնիկ Նուեն ԵՊՀ ԻՄ-ի «Ֆրանսերեն լեզու և գրականություն» կրթական ծրագրով վճարովի ուսուցման համակարգում սովորող տասներկու ուսանողներին հանձնեց կրթաթոշակներ:

Փարիզի Ստեֆան Մալարմեի անվան քոլեջի դասախոս Վերոնիկ Նուեն արդեն երկրորդ անգամ է մասնաճյուղում (http://ijevan.ysu.am/04-03-2023/)՝ ուսանողների համար սեպտեմբերի 5-23-ն ընկած ժամանակահատվածում ֆրանսերենի բանավոր հաղորդակցման հմտությունները զարգացնող դասընթաց վարելու նպատակով: Տիկին Նուեն ԵՊՀ Իջևանի մասնաճյուղ այցելության շրջանակներում ստանձնել էր նաև «Հայ-ֆրանսիական բարեկամություն և փոխանակում» միության կողմից մեր ուսանողներին տրվող կրթաթոշակները հանձնելու առաքելությունը:

Վ.Նուեն կրթաթոշակներ հանձնեց «Ֆրանսերեն լեզու և գրականություն» կրթական ծրագրի ուսանողներ Մալվինա Գագիկի Խաչինյանին, Անուշ Արտակի Ղալթախչյանին, Հասմիկ Նվերի Ջանինյանին, Սվետլանա Արսենի Գասպարյանին, Անահիտ Նիկոլայի Միսկարյանին, Վանուհի Ռոբերտի Մկրտչյանին, Աննա Լևոնի Շահնազարյանին, Կարինա Մհերի Սաքանյանին, Մերի Արսենի Առաքելյանին, Մարիետա Կարենի Գուլլակյանին, Դիանա Գագիկի Գուլումյանին, Սեդա Արմանի Ենգիբարյանին:

Համալսարանականներն առանձնահատուկ շնորհակալություն հայտնեցին «Հայ-ֆրանսիական բարեկամություն և փոխանակում» միության նախագահ տիկին Պոլետ Կուտանին՝ մասնաճյուղի հետ երկարատև համագործակցության, պարբերաբար կրթաթոշակներ տրամադրելու համար, ուսանողները նաև խոստացան լինել ֆրանսերենի դեսպանները Տավուշի մարզում:

ԵՊՀ Իջևանի մասնաճյուղի և «Հայ-ֆրանսիական բարեկամություն և փոխանակում» միության միջև համագործակցությունը ծավալվել է դեռևս 2012 թվականից, երբ նույն թվականի սեպտեմբերի 28-ին մասնաճյուղ այցելած միության անդամներ Պոլետ Կուտանը և Բեռնար Կուտանը ներկայացրել էին կրթության ոլորտին վերաբերող ծրագիր, որը հավանության էր արժանացել ԵՊՀ ԻՄ-ի կողմից: 2021թ․ հոկտեմբերի 2-ին էլ մասնաճյուղի և միության միջև ստորագրվել է համագործակցության համաձայնագիր, ըստ որի՝ ֆրանսիական կողմը շարունակելու է կրթաթոշակներ հանձնել ԵՊՀ ԻՄ-ի «Ֆրանսերեն լեզու և գրականություն» կրթական ծրագրի վճարովի ուսուցման համակարգի ուսանողներին, ինչպես նաև անվճար ուսուցման համակարգում սովորող այն ակտիվ ուսանողներին, ովքեր կնպաստեն մարզի դպրոցներում ֆրանկոֆոնիայի տարածմանը:

 2023թ. սեպտեմբերի 5-ից ԵՊՀ Իջևանի մասնաճյուղում նորից մեկնարկեցին պարտադիր ատեստավորման ենթակա ուսուցիչների վերապատրաստումները, որոնք կտևեն մինչև հոկտեմբերի 28-ը:

Վերապատրաստումներն իրականացվում են՝ հիմնվելով ԿԳՄՍ նախարարի՝ ԵՊՀ ԻՄ-ը որպես ատեստավորման ենթակա ուսուցչին վերապատաստող կազմակերպություն երաշխավորելու և դասընթացների ցանկը հաստատելու և ԵՊՀ ԻՄ-ի կողմից ներկայացված հերթական ատեստավորման ենթակա ուսուցիչների վերապատրաստման դասընթացի մոդուլները հաստատելու մասին հրամանների վրա: Դեռևս 2021 թվականին ՀՀ ԿԳՄՍ նախարարության երաշխավորությամբ ԵՊՀ Իջևանի մասնաճյուղը հնարավորություն էր ստացել կազմակերպելու ատեստավորման ենթակա ուսուցիչների վերապատրաստման դասընթացներ:

Վերապատրաստումների մեկնարկից առաջ ուսուցիչներին ողջունեց ԵՊՀ ԻՄ-ի տնօրենի պաշտոնակատար Անուշավան Մակարյանը՝ ընդգծելով իրականացվող վերապատրաստումների դերը ուսուցիչների մասնագիտական կարողությունների ու հմտությունների զարգացման և փորձի փոխանակման գործում, մաղթելով բարի ընթացք:

Հերթական ատեստավորման ենթակա ավելի քան հինգ տասնյակ ուսուցիչների վերապատրաստումները ԵՊՀ ԻՄ-ում իրականացվելու են բոլոր բաղադրիչներով հետևյալ մոդուլների համար.

1. տարրական դասարաններ,
2. հայոց լեզու և գրականություն,
3. պատմություն,
4. հասարակագիտություն,
5. աշխարհագրություն
6. անգլերեն,
7. ֆրանսերեն,
8. ռուսաց լեզու,
9. մաթեմատիկա:

Վերապատրաստումները նպատակ ունեն զարգացնելու ուսուցիչների՝ աշակերտակենտրոն մոտեցումներով և նորարարական մեթոդներով դասավանդման հմտությունները: Դրանք իրականացվելու են առկա եղանակով ԵՊՀ Իջևանի մասնաճյուղի, հանրապետության և մարզի առաջատար ու արհեստավարժ մասնագետների կողմից:

 2023թ. սեպտեմբերի 1-ին ԵՊՀ Իջևանի մասնաճյուղում կայացավ Գիտելիքի և դպրության օրվան նվիրված միջոցառում, որը կազմակերպել էր ԵՊՀ ԻՄ-ի ուսանողական խորհուրդը:

Միջոցառման սկզբում հնչեցին Հայաստանի Հանրապետության օրհներգը և Երևանի պետական համալսարանի հիմնը, 1 րոպե լռությամբ հարգանքի տուրք մատուցվեց Արցախյան 44-օրյա պատերազմում անմահացած մեր հայորդիների հիշատակին:

Գիտելիքի և դպրության օրվա, նոր ուսումնական տարվա մեկնարկի առթիվ ԵՊՀ Իջևանի մասնաճյուղի տնօրենի պաշտոնակատար Անուշավան Մակարյանը շնորհավորական ուղերձ հղեց բոլոր համալսարանականներին՝ բուհի ամբողջ անձնակազմին, ուսանողներին և հատկապես առաջին կուրսեցիներին (տնօրենի ուղերձը տե՛ս այստեղ): Այս տարի Մայր բուհի սահմանապահ մասնաճյուղն իր հարկի տակ ընդունել է 161 առաջին կուրսեցիների:

2023-2024 ուստարում հաճելի անակնկալ էր սպասում ԵՊՀ Իջևանի մասնաճյուղ վճարովի հիմունքներով ընդունված այն 4 դիմորդներին, ովքեր ընդունելության քննություններին հավաքել էին ամենաբարձր միավորներ:

Պարոն Մակարյանը ուսման վճարի լրիվ փոխհատուցման հավաստագրեր հանձնեց «Ֆինանսներ» մասնագիտության առաջին կուրսի ուսանողուհի Լիլիթ Աշոտի Վարդումյանին, «Դեկորատիվ-կիրառական արվեստ» մասնագիտության առաջին կուրսի ուսանողուհի Աստղիկ Գեղամի Ներկարարյանին, «Հոգեբանություն» մասնագիտության աառաջին կուրսի ուսանողուհի Սերինե Գեորգիի Պատառյանին և «Պատմություն» մասնագիտության առաջին կուրսի ուսանողուհի Մերի Հրաչյայի Բաղդասարյանին:

 Միջոցառման շրջանակներում իրականացվեց նաև «Տարվա ուսանող-2023» ամենամյա մրցույթի հաղթողների պարգևատրման արարողությունը. ԵՊՀ ԻՄ-ի «Ինֆորմատիկա և կիրառական մաթեմատիկա» մասնագիտության 4-րդ կուրսի ուսանողուհի Իննա Հրայրի Հարությունյանը պարգևատրվեց արծաթե մեդալով և հավաստագրով, իսկ «Հայոց լեզու և գրականություն» մասնագիտության 2023թ. շրջանավարտ Նարա Արմենի Մելքումյանը ստացավ հաղթողի հավակնորդի հավաստագիր:

Այնուհետև ողջույնի և շնորհավորանքի խոսքով հանդես եկավ ԵՊՀ ԻՄ-ի ուսանողական խորհրդի նախագահ Էռնեստ Խանումյանը՝ ընդգծելով. «Այս տարի Գիտելիքի և դպրության օրը տոնում ենք միասնությամբ և վճռականությամբ՝ վերստին կարևորելով ուսանողների շարունակական հզորացումը, ուսանողակենտրոն նախաձեռնությունների իրականացման անհրաժեշտությունն ու ուսանողների մասնակցությունը համալսարանական կյանքին` բոլոր դրսևորումներով»:

Ապա կայացավ առաջին կուրսեցիների երդման հանդիսավոր արարողությունը: Երդումն ընթերցեց մասնաճյուղի այս տարվա առավելագույն միավորներ հավաքած դիմորդը՝ «Ինֆորմատիկա և կիրառական մաթեմատիկա» մասնագիտության առաջին կուրսի ուսանողուհի Լուիզա Աշոտի Մելիքբեկյանը: Համալսարանականները երդվեցին արժանի լինել ԵՊՀ Իջևանի մասնաճյուղի ուսանող լինելու բարձր կոչմանը, լինել օրինավոր քաղաքացիներ, նպաստել երկրի պետականության զարգացմանը: Պահպանելով ավանդույթը՝ գիտելիքի բանալին 4-րդ կուրսի ուսանողուհի Իննա Հրայրի Հարությունյանը փոխանցեց առաջին կուրսեցի Լուիզա Աշոտի Մելիքբեկյանին:

Միջոցառման ընթացքում հնչեցին երաժշտական կատարումներ:

Տոնական միջոցառումից հետո լսարաններում մեկնարկեցին նոր՝ 2023-2024 ուսումնական տարվա դասերը: