Երևանի պետական համալսարանի Իջևանի մասնաճյուղ

ԵՊՀ ԻՄ-ում կայացավ Համազգային հայ կրթական և մշակութային միության կողմից հրատարակված գրքերի շնորհանդեսը

1. գլխավոր

 2019թ. դեկտեմբերի 20-ին ԵՊՀ ԻՄ-ի գրադարանում կայացավ Համազգային հայ կրթական և մշակութային միության կողմից հրատարակված «Լևոն Շանթ. Մարդը և գործիչը», Վարդգես Ահարոնյանի «Անդրանիկ. Մարդը և ռազմիկը», «Յովհաննէս Թումանեան. Մարդը և բանաստեղծը» գրքերի շնորհանդեսը, որը կազմակերպվել էր ԵՊՀ Իջևանի մասնաճյուղի ու Համազգային հայ կրթական և մշակութային միության երևանյան գրասենյակի համատեղ նախաձեռնությամբ:

Շնորհանդեսին բացման խոսքով հանդես եկավ ԵՊՀ ԻՄ-ի հայոց պատմության և հասարակագիտության ամբիոնի դոցենտ, պ.գ.թ. Վարդան Ալեքսանյանը՝ մասնավորապես նշելով. «Համազգային հայ կրթական և մշակութային միությունը իր հիմնադրման օրից նպաստել ու նպաստում է հայապահպանությանը հայրենիքում և հայրենիքից դուրս: Արժեհամակարգային փոփոխությունները, գլոբալիզացիայի գործընթացները դարձնում են ազգային մշակութային կապերը երկրորդային, համընդհանուր մշակութային կապերի մաս, և մեր ազգային արժեհամակարգի պահպանության, մատաղ սերնդի դաստիարակության հարցում հսկայական դերակատարում ունի Համազգայինը՝ իր հայրենանվեր  գործունեությամբ»:

Համազգային հայ կրթական և մշակութային միության գործունեության, ապագային միտված ծրագրերի մասին խոսեց երևանյան գրասենյակի ատենապետ Ռուզան Առաքելյանը: Նա իր խոսքում ընդգծեց, որ 1928 թվականին Լևոն Շանթի կողմից հիմնադրված Համազգային հայ կրթական և մշակութային միությունն այսօր էլ շարունակում է իր ակտիվ ներկայությունը հայրենիքում և սփյուռքում՝ հանձնառելով պահպանել ու զարգացնել հայ մշակույթն ու կրթական միջավայրը: 2019 թվականն իսկապես բեղուն էր երևանյան գրասենյակի համար, որովհետև տպագրվեց միաժամանակ երեք գիրք՝ «Լևոն Շանթ. Մարդը և գործիչը», Վարդգես Ահարոնյանի «Անդրանիկ. Մարդը և ռազմիկը», «Յովհաննէս Թումանեան. Մարդը և բանաստեղծը», որոնք մեծապես կնպաստեն վերոնշյալ ազգային գործիչների մասին ընթերցողների կողմից ամբողջական պատկերացման ձևավորմանը: Առանձնապես կարևորվեց Վարդգես Ահարոնյանի գրքերի վերահրատարակությունը, որովհետև մինչ այդ հրատարակությունը հայաստանյան մտավորականությունը լիատեղյակ չէր Վարդգես Ահարոնյան գրողի գրական ստեղծագործություններին ու գրչին:

«Անկախության գաղափարը Լ.Շանթի մեկնաբանմամբ» խորագրով զեկուցում կարդաց պ.գ.դ., պրոֆեսոր, Խ.Աբովյանի անվան ՀՊՄՀ-ի և ԵՊՀ ԻՄ-ի դասախոս Խաչատուր Ստեփանյանը: Բանախոսն ընդգծեց, որ Լ.Շանթի «Մեր անկախությունը» աշխատությունը հայկական հարցի լուծման տեսական հիմնավորման փայլուն օրինակ է: Ըստ Շանթի՝ անկախությունը նախ և առաջ կամքերի ընդհարում է, շահերի բախում, և այն տարբեր կերպ է շոշափվում ազգերի կողմից: Որևէ ազգի անկախությունը կարող է բխել տվյալ ազգի և այլ ազգերի շահերից, սակայն միաժամանակ կարող է նպատակահարմար չհամարվել ուրիշ ազգերի համար: Հետևաբար՝ յուրաքանչյուր ժողովուրդ կարող է խանգարել կամ նպաստել տվյալ ազգի անկախության ձեռքբերմանը: Լևոն Շանթը սխալ է համարում անկախություն ակնկալելը՝ սոսկ միջազգային ատյանների վրա հույս դնելով, միևնույն ժամանակ խելամիտ չի համարում այդ ատյանների դերն անտեսելը: «Շանթը եզրահանգում է այն ճշմարտությանը, որ մենք պետք է ի զորու լինենք տեր կանգնել մեր անկախությանը, իսկ անկախությունը ձեռք է բերվում երկարատև, համառ մաքառումների շնորհիվ, – նշեց պարոն Ստեփանյանը: – Եվ եթե մեզ չհաջողվի ձեռք բերել կամ պահպանել մեր անկախությունը, ապա մենք իրավունք չունենք ապրելու որպես ինքնուրույն ժողովուրդ»:

«Հովհաննես Թումանյան. Մարդը և բանաստեղծը» թեմայով հետաքրքիր զեկուցմամբ հանդես եկավ ԵՊՀ ԻՄ-ի հայոց լեզվի և գրականության ամբիոնի դեցենտ, բ.գ.թ. Ալիսա Հասանյանը: Սեղմ անդրադառնալով գրքի հեղինակ Վարդգես Ահարոնյանի կենսագրությանը, հասարակական-քաղաքական և ստեղծագործական ուղուն՝ բանախոսը նշեց. «Ընտանեկան միջավայրը, հոր հասարակական-քաղաքական գործունեությունը, Թիֆլիսի հայ մտավորականության հետ ունեցած մտերմությունը դեռ պատանեկան տարիներից հնարավորություն է տվել, որ հեղինակը ճանաչի մեծերին և տարբեր իրավիճակներում առնչվի նրանց հետ: Այս հիիշողությունները տարիների հեռավորությունից դարձել են հուշապատում, որոնց մեջ իր գրականագիտական ասելիքով, իսկապես խոր ու համապարփակ մեկնաբանություններով աչքի է ընկնում «Հովհ. Թումանյան. մարդը և բանաստեղծը» գիրքը»: Տիկին Հասանյանի համոզմամբ՝ Ահարոնյանի աշխատությունն ունի դաստիարակչական, ճանաչողական և դասագրքային արժեք: Հեղինակն իրադարձությունների գունեղ նկարագրություններով բացահայտում է Մեծ լոռեցու խառնվածքը, հարաբերություններն ընտանիքի ու միջավայրի հետ, առանձին գործերի վերլուծության միջոցով ներկայացնում գրական վաստակը՝ կարևորելով գեղարվեստական բովանդակությունն ու տաղանդի մեծությունը:

«Ռազմառաջնորդի կերպարը Վարդգես Ահարոնյանի մեկնությամբ» թեմայով զեկուցում կարդաց գրադարանի վարիչ, Հայոց պատմության և հասարակագիտության ամբիոնի դասախոս Վլադիմիր Պողոսյանը, ով մասնավորապես նշեց. «Յուրաքանչյուր սերունդ նախապատրաստում է իրեն բնորոշ հերոսների ծնունդը և գիտակցում ու արժևորում է նրանց գործողությունների այն համագումարը,  որոնք դիտվում են իբրև հերոսության և հերոսականության դրսևորումներ: Ավելին՝ երբ  արտաքին ու ներքին մարտահրավերների մեծացմանը զուգընթաց նվազում է դիմակայելու հավաքական կամքը, ազգերն իրենք են զգում վառ անհատականությունների ու հերոսների կարիքը: Անդրանիկը հենց այն կերպարն էր, որ ժամանակի հետ կրում էր ժամանակի շունչը, մեր հավաքական և բարոյական ներկայությունը մեկ մարդու մեջ»:

Այնուհետև ելույթ ունեցավ գրող, հրապարակախոս, կինոռեժիսոր Արտաշես Շահբազյանը: Անդրադառնալով Վ.Ահարոնյանին և նրա նորահրատարակ գրքերին՝ բանախոսը նշեց. «Վարդգես Ահարոնյանն այն սերնդի ներկայացուցիչներից էր, ովքեր աշխարհի առջև մի մեծ «մեղք» ունեցան, ինչի համար հալածվեցին, սպանվեցին՝ նաև որպես հիշողություն դատապարտվելով կորստի: Այդ «մեղքը» իրենց հայրենասիրությունն էր, հայոց պետականություն կերտելու տեսիլը: Այդ առաքելությամբ իրենք աշխարհ եկան, ստեղծեցին այս Հայաստանը և դատապարտվեցին հալածանքի, գանահարման և մոռացության: …Ճշմարտությունը կարելի է յոթ փականի տակ պահել, փոսի մեջ խորը թաղել, բայց ի վերջո չի կարելի անհետացնել, և Վ.Ահարոնյանի անվան վերադարձը հենց այդ մասին է փաստում»: Ա.Շահբազյանի խոսքով՝ Վ.Ահարոնյանի գործերը լավագույն սկզբնաղբյուր կարող են ծառայել ուսումնասիրողների համար, քանի որ դրանք ստեղծված են դեպքերի և իրադարձությունների, հայ ժողովրդի համար ողբերգական, բախտորոշ և ճակատագրական շրջափուլերի ականատեսի գրչով:

Շնորհանդեսի ժամանակ պարոն Շահբազյանի «Ես կգնամ» խորագրով վերջին ժողովածուի օրինակները նվիրվեցին ԵՊՀ ԻՄ-ի գրադարանին:

Վերջում բանախոսներն ընդգծեցին, որ համագործակցությունը կկրի շարունակական բնույթ. Համազգային հայ կրթական և մշակութային միությունը հնարավորությունների սահմաններում ԵՊՀ ԻՄ-ին կտրամադրի իր հրատարակած գրքերը, մասնաճյուղի հետ կնախաձեռնի այլ գիտական և հանրամատչելի միջոցառումներ:

Բոլոր լուսանկարները տե’ս Պատկերասրահում:

Բանավեճի ներբուհական առաջնության եզրափակիչ խաղում հաղթեց «Ալֆա» թիմը

1. գլխավոր

 2019թ. դեկտեմբերի 20-ին կայացավ Բանավեճի ներբուհական առաջնության եզրափակիչ խաղը, որը կազմակերպվել էր ԵՊՀ ԻՄ-ի ուսանողական գիտական ընկերության նախաձեռնությամբ և «Ռեֆորմ» բանավեճի ակումբի հետ համագործակցությամբ։ Որպես դատավոր խաղին ներկա էր նաև «Ռեֆորմ» բանավեճի ակումբի համակարգող Մելինե Գևորգյանը, ում միջնորդությամբ ակումբը տրամադրել էր առաջնության գավաթը, մեդալները և հավաստագրերը։

Եզրափակիչ փուլում բանավիճում էին «Ալֆա» և “Mysterious ANIs” թիմերը՝ «Տարկետման վերացումը գիտության զարգացման սպառնալիք է» թեմայով։ Թիմերը նախապես չգիտեին իրենց դիրքորոշումը, այդ իսկ պատճառով տեղում կատարվեց վիճակահանություն, որի համաձայն՝ կողմ դիրքորոշմամբ հանդես եկավ «Ալֆա»-ն, իսկ դեմ դիրքորոշմամբ՝ “Mysterious ANIs”-ը։

Խաղի դատավորներն էին ԵՊՀ ԻՄ-ի ՈՒԽ-ի նախագահ Արեն Ավետիսյանը, Կիրառական արվեստի ֆակուլտետի ՈՒԽ-ի նախագահ Իրինա Փիրումյանը, ՈՒԳԸ փոխնախագահ Շիրակ Գասպարյանը (գլխավոր դատավոր), ՈՒԳԸ նախագահ Հրանտ Ղարագյոզյանը, «Ռեֆորմ» բանավեճի ակումբի համակարգող Մելինե Գևորգյանը։

Թիմերի 1-ին խոսնակները հանդես եկան ողջույնի խոսքով, ներկայացրին բանավեճի հիմնական սահմանումներն ու հասկացությունները, տվեցին պնդումների ձևակերպումները։

Կառուցողական ելույթի ընթացքում յուրաքանչյուր թիմ բերեց սեփական դիրքորոշումից բխող երկուական պնդում, տարբեր փաստեր և օրինակներ՝ փորձելով ամրապնդել իր դիրքորոշումը։

Հարց ու պատասխան փուլում երկու թիմերը հնչեցրին տարատեսակ հարցեր, որոնք վերաբերում էին ինչպես բանավեճի բուն թեմային, այնպես էլ հակառակորդ թիմի կառուցողական ելույթին։ Խաղի 4-րդ և 5-րդ խոսնակները վերլուծեցին ամբողջ խաղը, ամրապնդեցին իրենց պնդումները և վերհանեցին բանավեճի ընթացքում տեղի ունեցած բախումները՝ հավաստիացնելով, որ հենց իրենց դիրքորոշումն է ճշմարտացի։

Թեժ և միաժամանակ հավասար պայքարում 59-60 միավորով Բանավեճի ներբուհական առաջնության հաղթող ճանաչվեց «Ալֆա» թիմը։

Խաղից հետո տեղի ունեցավ հավաստագրերի և մրցանակների հանձնման արարողությունը։ Հավաստագրերով պարգևատրվեցին առաջնությանը մասնակցած թիմերի բոլոր անդամները, 2-րդ տեղն զբաղեցրած թիմը պարգևատրվեց մեդալներով և խրախուսական նվերներով, առաջնության հաղթող թիմը ստացավ առաջնության գավաթը, մեդալներ, ինչպես նաև Yell Extreme Park-ի կողմից տրամադրված ժայռամագլցման (Via Ferrata) տոմսեր։

Սահմանված էր նաև 3 անվանակարգ։ «Հանդիսատեսի համակրանք» անվանակարգում հաղթող ճանաչվեց «Սպարտա» թիմը՝ պարգևատրվելով պատվոգրով և նվերներով։ «Լավագույն խոսնակ» անվանակարգում հաղթեց «Mysterious ANIs» թիմի 4-րդ խոսնակ Ինգա Ասլանյանը, ում հանձնվեց պատվոգիր, ինչպես նաև Էրիխ Մարիա Ռեմարկի «Երեք ընկեր» գիրքը, իսկ խաղի լավագույն դատավոր ճանաչվեց Կիրառական արվեստի ֆակուլտետի ՈՒԽ-ի նախագահ Իրինա Փիրումյանը, ով պարգևատրվեց շնորհակալագրով և նվերով։

Բանավեճի ներբուհական առաջության անցկացմանը ցուցաբերած մեծ օգնության համար շնորհակալագրով և նվերով պարգևատրվեց «Ռեֆորմ» բանավեճի ակումբի համակարգող Մելինե Գևորգյանը։ Շնորհակալագրեր տրվեցին նաև խաղի բոլոր դատավորներին և առաջնության կազմակերպմանն օժանդակած անձանց։

Բոլոր լուսանկարները տե’ս Պատկերասրահում:

ԵՊՀ ԻՄ-ը շարունակում է խորացնել բուհ-դպրոց համագործակցությունը

1. գլխավոր

 2019թ. դեկտեմբերի 19-ին ԵՊՀ ԻՄ-ի մի խումբ ներկայացուցիչներ՝ դասախոսներ և ուսանողներ, այցելեցին Իջևանի թիվ 4 հիմնական դպրոց: 

Այցելության նպատակն էր բուհ-դպրոց համագործակցության շրջանակներում Իջևանի թիվ 4 դպրոցում անցկացնել  գրական-երաժշտական միջոցառում:

ԵՊՀ ԻՄ-ի կարևոր գործառույթներից է հասարակության լայն խավերի, քաղաքի ու մարզերի դպրոցների հետ ունեցած կապերի ամրապնդումը, համալսարան-դպրոց հարաբերությունների ընդլայնումը և զարգացումը: Բուհի դասախոսական կազմը պարբերաբար լինում է մարզի դպրոցներում, ծանոթանում աշակերտներին և ուսուցիչներին հուզող ուսումնակրթական հարցերին, ներկայացնում մասնաճյուղը իր գործունեությամբ, ռազմավարական ծրագրերով և հանդես գալիս տարբեր նախաձեռնություններով:

ԵՊՀ ԻՄ-ի հայոց լեզվի և գրականության ամբիոնի վարիչ, բ.գ.թ., դոցենտ Վ.Ավագյանի և Իջևանի թիվ 4 հիմնական դպրոցի տնօրեն Ա.Խոջայանի պայմանավորվածության համաձայն՝ դեկտեմբերի 19-ին «ՀԼԳ» մասնագիտության    ուսանողները դպրոցում հանդես եկան «Հայ քնարերգության երաժշտական գույները» գեղեցիկ միջոցառմամբ: Այն կազմակերպել էր Հայոց լեզվի և գրականության ամբիոնի դոցենտ, բ.գ.թ. Ա.Սարհատյանը:

Ուսուցիչներով ու աշակերտներով լեփ-լեցուն դահլիճը բուռն ծափահարություններով դիմավորեց մեր ուսանողների հայրենաշունչ խոսքը, հուզիչ ասմունքն ու հայ քնարերգուների բանաստեղծությունների հիման վրա ստեղծված երաժշտական հոգեթով կատարումները:

Դպրոցի տնօրենը և ուսուցիչները մեծ գոհունակություն հայտնեցին տիկին Ա.Սարհատյանին և ուսանողներին՝ գեղագիտական ու ծրագրային-ուսումնական հնչեղություն ունեցող միջոցառման, իրենց պատճառած մեծ բավականության համար և անկեղծ ցանկություն հայտնեցին նրանց նորից տեսնելու իրենց հարկի տակ:

Բոլոր լուսանկարները տե’ս Պատկերասրահում:

ԵՊՀ ԻՄ-ում իրականացվեց «Խաղաղության գրադարակ» նախագիծը

1

 2019-20 ուստարվա I կիսամյակում ԵՊՀ Իջևանի մասնաճյուղի և Եկեղեցիների համաշխարհային խորհրդի հայաստանյան Կլոր սեղան հիմնադրամի համատեղ ջանքերով ԵՊՀ ԻՄ-ում իրականացվել էր «Հակամարտությունների փոխակերպում» խորագրով հնգօրյա դասընթացը, որին մասնակցել էին ԵՊՀ ԻՄ-ի տարբեր մասնագիտությունների երկու տասնյակ ուսանողներ: 

Դասընթացի տեսական մասը վարել է ԵՊՀ ԻՄ-ի գրադարանի վարիչ Վլադիմիր Պողոսյանը, իսկ գործնական մասը՝ ԵՊՀ ԻՄ-ի շրջանավարտների և արտաքին շահակիցների հետ տարվող աշխատանքների համակարգող Էրինե Ղարայանը:

Դասընթացի վերջում նախատեսված էր իրականացնել երկու փոքրածավալ դրամաշնորհային նախագիծ, որոնցից մեկը «Խաղաղության գրադարակն» էր:  Մասնաճյուղի գրադարանի գրադարակներից մեկը համալրվեց ավելի քան քսան քաղաքագիտական, խաղաղաշինական և գեղարվեստական գրքերով, որոնք նոր և ընթերցողների կողմից պահանջված հրատարակություններ են:

2019թ. դեկտեմբերի 19-ին ծրագրի ամփոփման շրջանակներում մասնակիցները քննարկեցին տվյալ և համանման այլ ծրագրերի զարգացման հեռանկարները:

Ծրագրի մասնակիցների առաջարկությամբ այն կիրականացվի նաև համալսարանական շրջանակներից դուրս՝ սահմանամերձ համայնքների երիտասարդությանը ևս հնարավորություն տալով տեղում մասնակից դառնալու ծրագրին:

 Հավելենք, որ 2020 թվականին նախատեսված են ևս երկու հնգօրյա դասընթացներ, որոնց հնարավորություն ունեն մասնակցելու 18-25 տարեկան անձինք:

ԵՊՀ ԻՄ-ում կայացավ «Ֆրանսիայի և Հայաստանի քույր քաղաքներ» խորագրով միջոցառում

3

 2019թ. դեկտեմբերի 16-ին ԵՊՀ ԻՄ-ի 25-ամյակին նվիրված միջոցառումների շրջանակներում մասնաճյուղում կայացավ «Ֆրանսիայի և Հայաստանի քույր քաղաքներ» խորագրով միջոցառում, որը կազմակերպել էր Ֆրանսերեն լեզվի և գրականության ամբիոնի դասախոս Անահիտ Հովհաննիսյանը:

Ներկա էին Հումանիտար գիտությունների ֆակուլտետի վարչական և պրոֆեսորադասախոսական անձնակազմի ներկայացուցիչներ, մասնակցում էին «Օտար լեզու և գրականություն» մասնագիտության ուսանողներ:

Միջոցառման ընթացքում ուսանողները ֆրանսերենով ներկայացրին յոթ քույր քաղաքների բարեկամության պատմությունը:

Հանգամանորեն խոսվեց Իջևան-Վալանս քույր քաղաքների բարեկամության, Վալանսի Մաեստրիս համալսարանի և ԵՊՀ Իջևանի մասնաճյուղի համագործակցության մասին:

Ուսանողները ներկայացրին Վալանսի Հայկական մշակութային կենտրոնը, որը միակն է Եվրոպայում: Նրանք հանդես եկան կենտրոնի նախագահ պարոն Նուբար Քեշիշյանին ուղղված շնորհակալական խոսքով, ում հովանավորությամբ ամեն տարի գարնանը մեր ուսանողները մասնագիտական վերապատրաստում են անցնում Վալանսի Մաեստրիս համալսարանում:

Նշվեց նաև Վալանսի Հայ բարեգործական ընդհանուր միության և նրա նախագահ Կևին Մարկարյանի աջակցության մասին:

Միջոցառումը օտար լեզուներ (մասնավորապես՝ ֆրանսերեն) ուսումնասիրող մեր ուսանողներին հնարավորություն տվեց ֆրանսերենով արտահայտելու հայ-ֆրանսիական բարեկամության կարևորությունը, ներկայացնելու վերջինիս ամուր հիմքերն ու զարգացման ընթացքը: 2