Երևանի պետական համալսարանի Իջևանի մասնաճյուղ

Հուլիսի 5-ը Հայաստանի Հանրապետության Սահմանադրության նաև պետական խորհրդանշանների օրն է

 e431d118d315cc3f468816e9ec2e3649

 1991թ. ՀՀ անկախության վերականգնմամբ անխուսափելի դարձավ Սահմանադրության ընդունումը։ Նոր Սահմանադրությունն ընդունվեց 1995թ. հուլիսի 5-ին համաժողովրդական հանրաքվեով։ ՀՀ Սահմանադրությունը Հայաստանի իրավական համակարգի հիմքն է՝ երկրի հիմնական օրենքը, որին պետք է համապատասխանեն մյուս բոլոր օրենքներն ու իրավական ակտերը: Սահմանադրության ընդունումից հետո հուլիսի 5-ը դարձավ պետական տոն՝ Սահմանադրության օր։ 

Սահմանադրությունն ամրագրեց Հայաստանի Հանրապետության բնույթը՝ որպես ինքնիշխան, ժողովրդավարական, իրավական և սոցիալական պետության, հռչակեց մարդու և քաղաքացու հիմնական իրավունքներն ու ազատությունները, սահմանեց հանրապետության կառավարման ձևը՝ հիմնված օրենսդիր, գործադիր և դատական իշխանությունների տարանջատման սկզբունքի վրա: 2001թ. Հայաստանի Հանրապետության անդամակցությունը Եվրոպայի խորհրդին անհրաժեշտություն առաջացրեց որոշակի փոփոխություններ մտցնելու Սահմանադրությունում։ Սակայն 2003թ. հանրաքվեի դրված սահմանադրական փոփոխությունների նախագիծը չընդունվեց։

2005-ին և 2015-ին համաժողովրդական հանրաքվեով Սահմանադրության մեջ կատարվեցին փոփոխություններ. 2005թ. փոփոխություններն ուղղված էին խորհրդարանի լիազորությունների ընդլայնմանը, 2015թ. փոփոխություններով Հայաստանի Հանրապետությունը անցում կատարեց կիսանախագահականից խորհրդարական կառավարման մոդելի։

Նշենք նաև, որ հուլիսի 5-ը ոչ աշխատանքային օր է:

 Հուլիսի 5-ին նշվում է նաև պետական խորհրդանշանների օրը:  Պետական խորհրդանշաններն են՝ դրոշը, զինանշանը և օրհներգը: Հայաստանի դրոշի պատմությունը սկսվում է 1918 թվականի մայիսի 28-ից, երբ ձևավորվեց Հայաստանի առաջին հանրապետությունը: Հայաստանի ազգային խորհուրդը սկսեց քննարկել պետական դրոշի հարցը: Այդ ժամանակ ՀԽՍՀ ապագա ակադեմիկոս Ստեփան Մալխասյանի ելույթից հետո՝ 1919թ. հունիսին, կարմիր-կապույտ-նարնջագույն դրոշն ընդունելու մասին որոշում կայացվեց: Կարմիրը խորհրդանշում է հայ ժողովրդի մշտական պայքարը՝ հարատևման, քրիստոնեական հավատի, Հայաստանի անկախության և ազատության համար, կապույտը՝ ապրելու կամքը խաղաղ երկնքի ներքո, նարնջագույնը՝ հայ ժողովրդի արարչական տաղանդն ու աշխատասիրությունը: Տարիներ անց՝ 1990թ. օգոստոսի 24-ին «ՀՀ պետական դրոշի մասին» օրենքով  հաստատվեց Հայաստանի Հանրապետության պետական դրոշը. այն 1919թ. եռագույնի օրինակով վերականգնված դրոշն էր` պաստառ, որը բաղկացած էր երեք, միմյանց հավասար հորիզոնական շերտերից` կարմիր, կապույտ և նարնջագույն (ծիրանագույն):

Ինչպես դրոշը, այնպես էլ Առաջին հանրապետության զինանշանը «ՀՀ պետական զինանշանի մասին» օրենքով դարձավ արդեն Հայաստանի Հանրապետության զինանշանը: Հեղինակներն են ճարտարապետ Ալեքսանդր Թամանյանը և նկարիչ Հակոբ Կոջոյանը: Զինանշանի կենտրոնում՝ վահանի վրա, պատկերված են Արարատ լեռը՝ Նոյյան տապանով և պատմական Հայաստանի 4 թագավորությունների՝ Բագրատունիների, Արշակունիների, Արտաշեսյանների, Ռուբինյանների զինանշանները: Վահանը պահում են արծիվը և առյուծը, իսկ վահանից ներքև պատկերված են սուր, ճյուղ, հասկերի խուրձ, շղթա ու ժապավեն:

Պետական օրհներգը հանդիսավոր երաժշտական ստեղծագործություն է: Հայաստանի Հանրապետության Գերագույն խորհրդի՝ 1991թ. հունիսի 1-ի որոշմամբ, որպես երկրի օրհներգ ընդունվել է Հայաստանի առաջին հանրապետության օրհներգը` «Մեր հայրենիք»:  «ՀՀ պետական օրհներգի մասին» ՀՀ օրենքով 2006 թվականին այն դարձավ Հայաստանի Հանրապետության օրհներգը: Խոսքերի հեղինակը  Միքայել Նալբանդյանն է, երաժշտությունը՝ Բարսեղ Կանաչյանը:

Պետական օրհներգը պարտադիր հնչում է պաշտոնական հանդիսությունների ժամանակ պետական դրոշը բարձրացնելիս, նորընտիր նախագահի երդման արարողության, Ազգային ժողովի նստաշրջանների, հանրապետությունում անցկացվող զորահանդեսների,  միջազգային և համապետական մարզական մրցումների պաշտոնական բացման ու փակման, միջազգային մրցաշարերում մրցանակային տեղեր զբաղեցրած մարզիկներին պարգևների հանձնման հանդիսավոր արարողությունների ժամանակ, ինչպես նաև օրենքով սահմանված այլ դեպքերում:

Կայացավ տնօրենության ընդլայնված նիստ

DSCN9278

 2019թ. հուլիսի 4-ին ԵՊՀ Իջևանի մասնաճյուղում Ա. Վ. Ցուցուլյանի նախագահությամբ կայացավ տնօրենության ընդլայնված նիստ, որին մասնակցում էին տնօրենության անդամները և բուհի աշխատակիցները:

Ընդլայնված նիստում քննարկվեցին ԵՊՀ ԻՄ-ի՝ 2019թ. (01.01.2019-01.07.2019)  եկամուտների և ծախսերի նախահաշվի (բյուջե) կատարողականին վերաբերող և մի քանի ընթացիկ հարցեր:

Մասնաճյուղի՝ 2019թ. եկամուտների և ծախսերի նախահաշվի (բյուջե) կատարողականի մասին զեկուցեց ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը:

Նա մասնավորապես նշեց, որ 2019թ. հունվարից մինչև հուլիսի 1-ն ընկած ժամանակահատվածում ԵՊՀ ԻՄ-ի դրամական միջոցների մուտքերը կազմել են 258 մլն 166 հազար ՀՀ դրամ, որի 71%-ը գոյացել է ուսման վարձավճարներից, 15.84 %-ը՝ պետական ֆինանսավորումից:

Ընթացիկ ծախսերի  85%-ն ուղղվել է աշխատանքի վարձատրությանը և դրան հավասարեցված վճարումներին: Ուսանողներին տրամադրվող կրթաթոշակների ընդհանուր գումարը կազմել է մասնաճյուղի ծախսերի 2,4%-ը, կոմունալ վճարումները՝ 3,3 %-ը:

Պարոն Ցուցուլյանն անդրադարձավ ուսումնական և արտադրական պրակտիկաների կազմակերպման  և ֆինանսավորման, տարբեր վարչական ստորաբաժանումների համար նախատեսված բյուջետային ծախսերին՝ ստորաբաժանումների ղեկավարներին առաջարկելով տարեսկզբին ներկայացնել մյուս տարվա համար նախատեսվող ծրագրերի անհրաժեշտ ֆինանսական ծախսերը:

Տնօրենի պաշտոնակատարը նշեց նաև, որ ոչ տեղացի դասախոսների ուղևորափոխադրման հաճախականության ավելացմանը զուգընթաց մեծացել են գործուղումների ծախսերը:

Խոսելով տարվա ձեռքբերումների մասին՝ Ա. Վ. Ցուցուլյանն աշխատակիցներին շնորհակալություն հայտնեց համատեղ աշխատանքի համար, իսկ դասախոսական անձնակազմի ներկայացուցիչներին, հաշվի առնելով, որ հուլիսի 8-ից նրանք անցնում են հերթական արձակուրդի, մաղթեց արդյունավետ հանգիստ: 

Տեղի ունեցավ Տավուշի մարզի հանրակրթական դպրոցներից «ԵՊՀ օլիմպիադա 2019»-ում մրցանակների արժանացած աշակերտների պարգևատրման հանդիսավոր արարողությունը

DSCN9208

 2019թ. հունիսի 28-ին ԵՊՀ Իջևանի մասնաճյուղում տեղի ունեցավ Տավուշի մարզի հանրակրթական դպրոցներից «ԵՊՀ օլիմպիադա 2019»-ում մրցանակների արժանացած աշակերտների պարգևատրման հանդիսավոր արարողությունը:

Պարգևատրմանը մասնակցում էին ԵՊՀ ԻՄ-ի տնօրենի պաշտոնակատար, ֆ.մ.գ.թ., դոցենտ Արտակ Ցուցուլյանը, Մասնագիտական կողմնորոշման և պրակտիկայի կազմակերպման բաժնի վարիչ, պ.գ.թ., ասիստենտ Լիաննա Բեգինյանը, նույն բաժնի տեսուչ Սլավիկ Ալավերդյանը, օլիմպիադայի մրցանակակիրներ, հարազատներ, դասախոսներ, ուսանողներ:

Ա. Վ. Ցուցուլյանը շնորհավորեց մրցանակակիրներին, մաղթեց հաջողություններ, խորհուրդ տվեց հետագայում ևս մասնակցել տարբեր մրցույթների, ուժերը փորձել տարբեր ասպարեզներում:

Այնուհետև Ս.Ալավերդյանը ներկայացրեց, որ ԵՊՀ-ի կողմից կազմակերպվող ամենամյա օլիմպիադային այս տարի Տավուշի մարզից մասնակցել են 235 աշակերտներ, որոնցից 27-ը անցել է 2-րդ փուլ: Նրանցից 2-ը արժանացել է 3-րդ կարգի դիպլոմի, 18-ը՝ գովասանագրի: Դիպլոմների հանձումը տեղի է ունեցել ԵՊՀ-ում, իսկ գովասանագրերի հանձնման առթիվ կազմակերպվել էր այս մրցանակաբաշխությունը:

Գովասանագրերից բացի՝ մրցանակակիրները ստացան ԵՊՀ-ի հրատարակած գրքեր:

Տնօրենի պաշտոնակատարը հանձնեց պարգևները, ևս մեկ անգամ շնորհավորեց մրցանակակիրներին, ինչպես նաև հաջողություն մաղթեց դեռևս ներբուհական և կենտրոնացված քննություն ունեցող դիմորդներին:

«Հաշվետար» դասընթացի 5 ակտիվ մասնակիցներին հանդիսավոր կերպով հանձնվեցին հավաստագրեր

DSCN8243

 2019թ. հունիսի 28-ին ԵՊՀ Իջևանի մասնաճյուղում հանդիսավոր կերպով հավաստագրեր հանձնվեցին Ընդհանուր տնտեսագիտության ամբիոնի կողմից կազմակերպված «Հաշվետար» դասընթացի 5 ակտիվ մասնակիցներին:

«Հաշվետար» դասընթացը մեկնարկել էր ապրիլի 15-ին և նպատակ ուներ մասնակիցներին ուսուցանել հաշվապահության նախնական գիտելիքներ և հմտություններ:

Դասընթացի կազմակերպմանն աջակցել է «Իջևանի ՀՀԳ» ՍՊԸ հաշվապահական ընկերությունը, որի հետ ԵՊՀ ԻՄ-ը ուսանողների ներուժի և աշխատաշուկայում նրանց մրցունակության բարձրացման նպատակով 2019թ. մայիսի 7-ին կնքել է համագործակցության հուշագիր: Ըստ այդմ՝ ընկերությունը պատրաստակամ է օժանդակել ԵՊՀ ԻՄ-ին՝ հուշագրի շրջանակներում իրականացվող ծրագրերում իրականացնել մասնաճյուղի ուսանողների վերապատրաստում և նրանց ներառել իրենց կադրային բազայում:

«Հաշվետար» դասընթացը վարում էին Ընդհանուր տնտեսագիտության ամբիոնի դոցենտ, տ.գ.թ. Գայանե Ավետիսյանը, նույն ամբիոնի դասախոսներ Արփինե Եգանյանը և Մարիետտա Աթաբեկյանը: Դասընթացին մասնակցում էին ԵՊՀ ԻՄ-ի ուսանողներ և շրջանավարտներ:

Մասնակիցները դասընթացի ժամանակ ստացան նախնական տեսական գիտելիքներ հաշվապահությունից, այնուհետև ծանոթացան «Հայկական ծրագրեր»-ին և «E-Invoicing» ծրագրին: Նրանք հնարավորություն ունեցան լուծել գործնական խնդիրներ և անմիջապես կիրառել իրենց ստացան գիտելիքները ծրագրերում:

Դասընթացի վերջում մասնակիցներն այցելեցին Իջևանում գործող հաշվապահական «Իջևանի ՀՀԳ» ՍՊԸ, որտեղ ծանոթացան ընկերության գործունեությանը, գործնական հաշվապահության և հարկային հաշվառման սկզբունքներին:

Հունիսի 28-ին՝ հավաստագրերի հանդիսավոր հանձնման ժամանակ, ելույթ ունեցավ ԵՊՀ ԻՄ-ի տնօրենի պաշտոնակատար Ա.Վ. Ցուցուլյանը՝ ողջունելով դասընթացի կազմակերպիչներին ու մասնակիցներին, կարևորելով մասնաճյուղում նման դասընթացների իրականացումը: Նա հույս հայտնեց, որ դասընթացը կունենա շարունակական բնույթ, և մեր ուսանողներից շատերը դեռ կկարողանան գործնական հաշվապահություն սովորել վերոնշյալ հուշագրի շրջանակներում:

Այնուհետև պարոն Ցուցուլյանը շնորհավորեց և դասընթացի հինգ ակտիվ մասնակիցներին հանձնեց հավաստագրերը:

ՀԵՀ-ի կողմից հրապարակված՝ ուսման վարձավճարների փոխհատուցում ստացած ուսանողների ցանկում ընդգրկված են ԵՊՀ ԻՄ-ի 11 ուսանողներ

ՀԵՀ

 ՀԵՀ-ը հրապարակել է ՀՀ կառավարության՝ 2018թ. դեկտեմբերի 13-ի թիվ 1464-Ն որոշման հիման վրա 2016 թվականի ապրիլի 2-6-ն ընկած ժամանակահատվածում ՀՀ զինված ուժերում մարտական հերթապահություն իրականացրած կամ մարտական գործողություններին մասնակցած առկա և հեռակա ուսուցմամբ բակալավրի և մագիստրոսի կրթական ծրագրում ընդգրկված ուսանողների, ըստ առաջադիմության, մասնակի՝ 20 տոկոսի չափով զեղչ և ՀՀ մասնակցությամբ հիմնված ԲՈՒՀ-երի անվճար համակարգում չընդգրկված երկու և ավելի անչափահաս երեխա ունեցող առկա ուսուցմամաբ բակալավրի կրթական ծրագրում ընդգրկված ուսանողների ուսման վարձավճարների ամբողջությամբ՝ բուհի կողմից փոխհատուցվող գումարի և ուսման վարձավճարի տարբերության չափով փոխհատուցում ստացած ուսանողների ցանկը ըստ ԲՈՒՀերի

Հրապարակված ցանկում ընդգրկված են ԵՊՀ ԻՄ-ի 11 ուսանողներ.

  1. Գարիկ Գագիկի Մելիքբեկյան
  2. Նարեկ Արտակի Փայտյան
  3. Գևորգ Հայկի Ադամյան
  4. Արամ Գոռի Ենգիբարյան
  5. Վաչե Արտակի Առաքելյան
  6. Նորայր Մհերի Դավթյան
  7. Հայկ Գրիգորի Թուրաջյան
  8. Տիգրան Վալոդի Թիրաբյան
  9. Հրանտ Հրահատի Եգանյան
  10. Կարեն Աշոտի Դովլաթբեկյան
  11. Լուսինե Ֆելիոսի Եգանյան: