2016թ. հոկտեմբերի 22-ին ԵՊՀ Իջևանի մասնաճյուղում կայացավ Հումանիտար գիտությունների ֆակուլտետի մանկավարժության և հոգեբանության  ամբիոնի ընդլայնված նիստ՝ մասնաճյուղի տնօրեն Ս.Ա.Առաքելյանի նախագահությամբ:

Ընդլայնված նիստին մասնակցում էին ամբիոնի անդամները՝ ամբիոնի վարիչի ԺՊ, մ.գ.թ., ասիստենտ Լ.Հարությունյանի գլխավորությամբ, հրավիրված էին «Մանկավարժություն և հոգեբանություն» մասնագիտության I-IV կուրսերի ավագները:

Նիստի ընթացքում քննարկվեցին 2016-2017 ուստարվա 1-ին կիսամյակի 1-ին ընթացիկ քննությունների թեստերի հաստատմանը, ամբիոնի դասախոսների գիտաուսումնական ու մեթոդական գործունեությանը,  Գործնական հոգեբանության ակումբի ստեղծմանը, ստեղծագործական աշխատանքների՝ Էսսեների մրցույթի կազմակերպմանը վերաբերող և մի քանի ընթացիկ հարցեր:

Առաջին հարցի կապակցությամբ մասնավորապես նշվեց, որ ուսումնառության գործընթացն առավել արդյունավետ իրականացնելու նպատակով անհրաժեշտ է քննությունների թեստերն ու հարցաշարերը պարբերաբար վերանայել համապատասխան մասնագետների կողմից, դրանք հարստացնել տրամաբանական լուծում պահանջող հարցերով: Այդ մեխանիզմով կարելի է բացառել   արտագրություններն ու հուշումները, ուսանողների իմացությունը հասցնել ավելի բարձր մակարդակի:

Նիստի ընթացքում հաստատվեցին ընթացիկ քննությունների թեստերը:

Ամբիոնի դասախոսների գիտաուսումնական ու մեթոդական գործունեության հարցի վերաբերյալ առաջարկեցին հոդվածների տպագրության հետ կապված նշանակել պատասխանատու, ով կվերահսկի հոդվածների կազմման և տպագրման գործընթացը: Տնօրենը և ամբիոնի վարիչը դասախոսներին քաջալերեցին, որ առավել ակտիվություն ցուցաբերեն գիտական զեկուցումներով հանդես գալու, հոդվածներ տպագրելու հարցում: 

Մյուս հարցի հետ կապված՝ ամբիոնի վարիչը և դասախոսները հիմնավորեցին Գործնական հոգեբանության ակումբի ստեղծման անհրաժեշտությունը, ներկայացրին նպատակը, խնդիրները: Նշվեց, որ ակումբի ստեղծման նպատակն է զարգացնել ուսանողների կառուցողական շփման ունակությունները՝ կյանքի զանազան իրավիճակներ քննարկելու, անհատական խորհրդատվություններ տալու, հոգեբանական վարժություններ, թրեյնինգներ, կլոր սեղաններ, հոգեբանական թեմաներով ազատ բանավեճեր կազմակերպելու միջոցով:

Որոշվեց ստեղծել Գործնական հոգեբանության ակումբ, կազմել և ներկայացնել ակումբի գործունեության պլան-ծրագիրը:

Հաջորդ հարցի առթիվ որոշվեց կազմակերպել ստեղծագործական աշխատանքների՝ էսսեների մրցույթ, որին մասնակից դարձնել նաև այլ ֆակուլտետների ուսանողներին:

Ամփոփելով նիստը՝ տնօրենը ամբիոնի դասախոսներին հորդորեց լինել առավել ակտիվ, ամբիոնում ստեղծել ուսանողակենտրոն միջավայր, որտեղ աշխատելը ուսանողների և դասախոսների համար կլինի հաճելի, օգտակար և հետաքրքիր, հավելեց, որ ամբիոնի աշխատանքները բարելավելու, ուսումնական գործընթացը առավել ճիշտ կազմակերպելու գործում կպահանջվի ամբիոնի անձնակազմի բարեխիղճ մասնակցությունը:

2016թ. հոկտեմբերի 17-29-ը ԵՊՀ Իջևանի մասնաճյուղում (առկա ուսուցման համակարգում) իրականացվում են 2016-2017 ուuումնական տարվա առաջին կիսամյակի I ընթացիկ քննություններն ու ստուգումները:

ԵՊՀ ԻՄ-ի ուսումնամեթոդական վարչության պետ Արկադի Դավթյանը շեշտեց, որ քննաշրջանն անցկացվում է պատշաճ կարգով, ըստ 2016-2017 ուստարվա հաստատված ժամանակացույցի, քննություններին մասնակցում են 667 ուսանողներ:

Ընթացիկ քննությունների և ստուգումների հարցաշարերը, սահմանված կարգի համաձայն, նախապես տրամադրվում են ուսանողներին: Յուրաքանչյուր քննությունից կամ ստուգումից հետո ուսանողների հետ իրականացվում է քննարկում:

Քննական գործընթացի թափանցիկությունն ու հրապարակայնությունն ապահովելու նպատակով քննությունների արդյունքները փակցվում են ֆակուլտետների ցուցատախտակներին և տեղադրվում են մասնաճյուղի պաշտոնական կայքէջում:

Քննությունների արդյունքները քննարկվում են ֆակուլտետներում ու համապատասխան ամբիոններում:

2016թ. հոկտեմբերի 13-15-ը Երևանում կայացավ բադմինթոնի` Հայաստանի Հանրապետության մեծահասակների առաջնություն, որին մասնակցում էին տարբեր մարզերից 100 մարզիկ-մարզուհիներ:

Իջևանից մասնակցում էին 8 մարզիկ-մարզուհիներ:

ԵՊՀ Իջևանի մասնաճյուղից լավ հանդես եկավ «Անգլերեն լեզու և գրականություն» մասնագիտության երրորդ կուրսի ուսանող Հրաչ Ներսիսյանը:

Զուգախաղերում ընկերակցելով Հովնան Խաչատրյանին (Գյումրի)՝ Հրաչ Ներսիսյանը գրավեց երկրորդ տեղը:

Բադմինթոնի ֆեդերացիայի կողմից հաղթողներն արժանացան մեդալի, պատվոգրի և դրամական պարգևի:

Հաղթող (առաջին տեղ գրաված) զույգը Իսպանիայում կմասնակցի 2016թ. աշխարհի առաջնությանը:

2016թ. հոկտեմբերի 1-ից 14-ը ԵՊՀ ԻՄ-ի մինչհամալսարանական կրթության և պրակտիկայի կազմակերպման (ՄԿՊԿ) բաժինը հանդիպումներ է կազմակերպել Իջևանի տարածաշրջանի մի շարք դպրոցներում (Իջևանի ավագ, Իջևանի վարժարան, Վազաշենի, Այգեհովտի, Կայանի, Ազատամուտի, Խաշթառակի, Աչաջրի, Սարիգյուղի, Սևքարի, Ն.Ծաղկավանի, Գանձաքարի, Գետահովտի միջնակարգ դպրոցներ): 

Հանդիպումների նպատակն էր աշակերտներին տալ մասնագիտական կողմնորոշում, ԵՊՀ ԻՄ-ում գործող մասնագիտությունների վերաբերյալ տեղեկատվություն, ամրապնդել դպրոց-համալսարան կապը:

Հանդիպումներին մասնակցում էին մասնաճյուղի տնօրեն Ս.Առաքելյանը, ՄԿՊԿ բաժնի վարիչ Վ.Աղաբաբյանը, դպրոցների տնօրեններ, դասախոսներ, ուսուցիչներ:

Մասնաճյուղի տնօրեն Ս.Առաքելյանը նախ ողջունեց աշակերտներին, ընդգծեց մասնագիտությունների ճիշտ ընտրության կարևորությունը մարդու կյանքում, ներկայացրեց ԵՊՀ Իջևանի մասնաճյուղի՝ 2016-2017 ուստարվա բակալավրի կրթական ծրագրով մասնագիտությունները, անդրադարձավ դրանց առանձնահատկություններին և աշխատաշուկայում ունեցած պահանջարկին: 

Նա նշեց, որ, հաշվի առնելով մասնագետների, արտաքին շահակիցների, մարզի կրթության ոլորտի պատասխանատուների կարծիքները տարածաշրջանի աշխատաշուկայում մասնագիտությունների ունեցած պահանջարկի վերաբերյալ, իրականացվել են մի շարք փոփոխություններ:

Մասնավորապես՝ «Պատմություն» մասնագիտության մեջ Ընդհանուր պատմության (գր.) կամ Օտար լեզվի (գր.)  քննությունները մրցութայինից դարձել են ոչ մրցութային, «Անգլերեն լեզու և գրականություն», «Ֆրանսերեն լեզու և գրականություն» մասնագիտություններում ոչ մրցութային է դարձել «Հայոց լեզու և գրականություն» (գր.) մրցութային առարկան: «Դիզայն» մասնագիտության ընդունելության քննություններից հանվել է «Գունանկար» առարկան:

2016-2017 ուստարվա բակալավրի կրթական ծրագրով ավելացվել են «Ֆինանսներ», «Սոցիալական աշխատանք», «Զբոսաշրջություն» մասնագիտությունները:

Հանվել են «Համակարգչային գրաֆիկա», «Տնտեսագիտություն», «Հոգեբանություն» մասնագիտությունների կրթական ծրագրերը:

Յուրաքանչյուր մասնագիտության համար ներկայացվեց ընդունելության քննությունների ցանկը: Ընդգծվեց, որ 2016-2017 ուստարվա համար ԵՊՀ Իջևանի մասնաճյուղում կատարվել են օտար լեզուների հետ կապված փոփոխություններ («Անգլերեն լեզու և գրականություն» մասնագիտության ուսանողները հավասար ժամաքանակով կանցնեն ֆրանսերեն և հակառակը), որոնց արդյունքում մասնաճյուղը կտա 2 օտար լեզվի համահավասար իմացությամբ շրջանավարտներ:

Քննարկվեցին ընդունելության քննությունների, շտեմարանների, օլիմպիադաների անցկացման և բաց դռների օրերի հետ կապված մի շարք հարցեր:

Հանդիպումներն ընթացան հարց ու պատասխանով: Աշակերտներին հետաքրքրեցին կրթական գործընթացին, ուսման վարձաչափերին, հատկապես սահմանամերձ բնակավայրերի ուսանողների համար նախատեսված զեղչերին ու արտոնություններին, ընդունելության քննությունների մեկ և երկու աստղանիշով առարկաների ընտրությանը վերաբերող տարբեր հարցեր:

Մասնակիցները գոհունակություն արտահայտեցին մասնաճյուղի նման նախաձեռնության համար` ակնկալելով, որ համագործակցությունը կլինի շարունակական: