2018թ. ապրիլի 5-ին ԵՊՀ Իջևանի մասնաճյուղում կայացավ «Վերհիշելով Քառօրյա պատերազմը» խորագրով հուշ-ցերեկույթը, որը կազմակերպել էին Կիրառական արվեստի ֆակուլտետի ուսանողական գիտական ընկերությունը և «Դիզայն» մասնագիտության երկրորդ կուրսի ուսանողներ Նոնա Բեկնազարյանն ու Հովհաննես Եգանյանը։

Հուշ-ցերեկույթին ներկա էին Կիրառական արվեստի ֆակուլտետի դեկան Ա.Մարգարյանը, տարբեր ֆակուլտետների ուսանողներ։

Ներկաները մեկ րոպե լռությամբ հոտնկայս հարգանքի տուրք մատուցեցին քաջ մարտիկներին, ովքեր իրենց արյան գնով պաշտպանեցին մեր հայրենիքը։

«Դիզայն» մասնագիտության երկրորդ կուրսի ուսանողուհիներ Նոնա Բեկնազարյանը և Կարինե Ալավերդյանը հանդես եկան Քառօրյա պատերազմի մասին տեղեկատվությամբ՝ ներկայացնելով պատերազմի սկիզբը, պատճառները և մեղավորներին։

Ելույթներն ուղեկցվեցին տեսանյութերով, որոնցում ներկայացվեցին մարտական գործողությունների վերաբերյալ մանրամասներ։

Այնուհետև ցուցադրվեց Արցախյան պատերազմի ժամանակ անմահացած քաջերի մասին տեսանյութ։

Ներկայացվեց, որ ԵՊՀ Իջևանի մասնաճյուղում հիմա էլ սովորում են Քառօրյա պատերազմին մասնակցած ուսանողներ:

Ելույթ ունեցավ Կիրառական արվեստի ֆակուլտետի դեկան Ալեքսան Մարգարյանը՝ շնորհակալություն հայտնելով հուշ-ցերեկույթի կազմակերպիչներին, ընդգծելով նմանատիպ նախաձեռնությունների կարևորությունը։

Հուշ-ցերեկույթի վերջում ցուցադրվեց քառօրյա հերոսամարտին վերաբերող «Կյանք ու կռիվ 2» գեղարվեստական ֆիլմը:

2018թ. մարտի 31-ին ԵՊՀ ԻՄ-ում տեղի ունեցավ ակադեմիական ազնվության վերաբերյալ քննարկում, որը կազմակերպել էին Մասնագիտական կրթության որակի ապահովման (ՄԿՈԱ) բաժինը և ուսանողական կառույցները:

Քննարկումը վարեց տնօրենի խորհրդական Անուշավան Մակարյանը:

Ներկա էին ՄԿՈԱ բաժնի վարիչ Մարիետա Ճաղարյանը, տնօրենի օգնական Նաթելլա Գրիգորյանը, ֆակուլտետների դեկաններ Նելլի Խուդավերդյանը և Ալեքսան Մարգարյանը, հասարակայնության հետ կապերի և մամուլի պատասխանատուն, դասախոսներ, կուրսերի ավագներ և ուսանողական կառույցների ներկայացուցիչներ:

Ա.Մակարյանը ներկայացրեց, որ բավականին ժամանակ մասնաճյուղում պլանավորվում էր կազմակերպել նմանատիպ քննարկում, որի նպատակն է հասկանալ կրթօջախում տիրող իրավիճակը և քայլեր ձեռնարկել այն բարելավելու ուղղությամբ:

Նա հակիրճ անդրադարձավ մեր հասարակության արժեհամակարգին, ազնվության և մասնավորապես ակադեմիական ազնվության վերաբերյալ ընկալումներին, կոչ արեց ակտիվորեն մասնակցել քննարկմանը:

Մասնաճյուղի ՈՒԳԸ համակարգող, ՈՒԳՊՎ բաժնի ավագ դիսպետչեր Սլավիկ Ալավերդյանը ներկայացրեց ակադեմիական ազնվության վերաբերյալ մարտի 25-ից 30-ը անցկացված անանուն առցանց հարցման արդյունքները, որի նպատակն էր պարզել ուսանողների իրազեկվածությունը և վերաբերմունքը կրթօջախում ակադեմիական ազնվության վերաբերյալ: Հարցմանը մասնակցել են տարբեր ֆակուլտետների 38 ուսանողներ, որոնց 18 տոկոսը նշել է, որ ԵՊՀ ԻՄ-ի Ակադեմիական ազնվության կանոնակարգին ծանոթ է ամբողջությամբ, իսկ 40 տոկոսը՝ մասամբ: Հարցվածները որպես իրազեկման աղբյուր նշել են մասնաճյուղի կայքը (24%), ուսանողական խորհուրդը (18%), դասախոսներին (18%), կուրսի ավագին (10%), համակուրսեցիներին (8%) և միայն 3 տոկոսը` դեկանին:

Արդյունքների համաձայն` մասնաճյուղում ակադեմիական ազնվության ներկա մակարդակից ուսանողները գոհ են միջին չափով:

Հարցման մասնակիցների 39 տոկոսը խոստովանել է, որ խախտել են նշված կանոնակարգը և նրանց միայն 13 տոկոսն է նշել, որ տվյալ ժամանակահատվածում ստացած օգուտը երկարաժամկետ պլանում կարող է վնասակար լինել:

Հարցման մասնակիցները նշել են ակադեմիական ազնվության մակարդակի բաձրացմանը խոչընդոտող հետևյալ հանգամանքները՝

1. Անտարբերությունը սեփական աշխատանքի հանդեպ:
2. Ուսանողների անգրագիտությունը:
3. Ակտիվությունը:
4. Դասախոսների կողմնապահությունը:
5. Ուսանողի չգիտակցելը, թե ինչի համար է վճարում բուհին:
6. Հարցաշարերերի հարցերի բազմաքանակ լինելը:
7. Ռոտացիան, ամեն գնով անվճար լինելու ձգտումը:
8. Գնահատականի, այլ ոչ գիտելիքի համար պայքարելը:
9. Իրավունքների և պարտականությունների ոչ լիարժեք իմացությունը:
10. Ծուլությունը:
11. Սխալ աշխարհայացքը:
12. Դասախոսակենտրոն ուսուցումը:

Ուսանողներն իրենց պատասխաններում նշել էին նաև, թե ինչ են ակնկալում դասախոսներից, գնահատումից և մասնաճյուղից.

1. Գնահատելիս չկենտրոնանալ նախորդ գնահատականների վրա:
2. Արդար գնահատական:
3. Ուժեղ հսկողություն, որ չարտագրեն:
4. Անաչառություն:
5. Մասնագիտական և մանկավարժականան կրթության բարձր մակարդակ:
6. Խնդրանքից հետո գնահատական չբարձրացնել:
7. Ընկերություն:
8. Խստապահանջություն:
9. Միջազգային ստանդարտներին համապատասխան կրթություն:
10. Գործնական գիտելիքներ, որոնք կնպաստեն վերլուծական և քննադատական մտածողությունների զարգացմանը:
11. Ճանաչողություն:

Ծավալվեց հարցման արդյունքների շուրջ բուռն քննարկում: Ուսանողներն ու դասախոսները ներկայացրին հարցերի վերաբերյալ իրենց տեսակետները, փորձեցին վերլուծել արդյունքները:

Առավել մեծ ուշադրություն հրավիրվեց արտագրությունների խնդրի վրա, որոնց պատճառով, ըստ մասնաճյուղի ներքին կարգապահական կանոնների, ուսանողը հեռացվում է կրթօջախից:

Այնուհետև ընդհանուր գծերով ներկայացվեց Ակադեմիական ազնվության կանոնակարգը, որին կարելի է ծանոթանալ այստեղ՝ http://ijevan.ysu.am/wp-content/uploads/2011/08/appendix-13-10.pdf:

Որոշվեց քննարկված հարցերի և կանոնակարգի պահանջների մասին լրացուցիչ կերպով տեղեկացնել ուսանողներին և խստորեն վերահսկել ընթացիկ քննությունների և ստուգումների ընթացքը:

2018թ. մարտի 31-ին Տավուշի մարզային գրադարանի տնօրեն Անահիտ Ղուկասյանի հրավերով և ԵՊՀ ԻՄ-ի ֆրանսերեն լեզվի և գրականության ամբիոնի դասախոս Սվետա Օհանյանի նախաձեռնությամբ Տավուշի մարզային գրադարանում կայացավ Ֆրանկոֆոնիայի միջազգային օրվան նվիրված միջոցառում:

Այն վարեցին «Օտար լեզու և գրականություն» մասնագիտության 1-ին կուրսի ուսանողները, ովքեր հանդես եկան ֆրանկոֆոնիային նվիրված ելույթներով և պրեզենտացիաներով:

Միջոցառման ընթացքում ուսանողները ներկայացրին ֆրանկոֆոնիայի դերն ու նշանակությունը ամբողջ աշխարհում:

Մասնավորապես նշվեց, որ ֆրանկոֆոնիայի միջազգային կազմակերպությունը հիմնվել է 1970 թվականին: Կազմակերպությունն ընդգրկում է 57 լիիրավ, 3 ասոցացված և 20 դիտորդի կարգավիճակ ունեցող պետություն, որոնցից 32-ում ֆրանսերենն ունի պաշտոնական լեզվի կամ 2-րդ  պաշտոնական լեզվի կարգավիճակ: ՖՄԿ-ում ընդգրկված երկրների բնակչության ընդհանուր թիվը կազմում է 890 միլիոն, որից 220 միլիոնը ֆրանկոֆոններ են:

Ներկայացվեց նաև, որ 2004 թվականին Ռագադուգուի  (Բուրկինա Ֆասո) գագաթնաժողովում Հայաստանը ձեռք է բերել ՖՄԿ-ում դիտորդի կարգավիճակ, իսկ 2008թ. հոկտեմբերին Քվեբեկ-Կանադայի գագաթնաժողովում դարձել է ՖՄԿ ասոցացված անդամ, իսկ 2012 թվականի հոկտեմբերի 13, 14-ին Կինշասայում կայացած ֆրանկոֆոնիայի գագաթնաժողովին Հայաստանը միաձայն կերպով դարձել է ֆրանկոֆոնիայի միջազգային կազմակերպության 54-րդ լիիրավ անդամ պետությունը: 

Այնուհետև ուսանողները ֆրանսերենը ներկայացրին որպես սիրո լեզու, հանդես եկան բանաստեղծություններով և երգերով:

Միջոցառման վերջում շնորհակալական խոսք ասաց Սպասարկման բաժնի վարիչ Կարինե Քեռյանը:

2018թ. մարտի 30-ին ԵՊՀ Իջևանի մասնաճյուղում կայացավ Մայրության և գեղեցկության տոնին նվիրված գրական-երաժշտական միջոցառում (ռուսերեն), որը կազմակերպել էր Ռուսաց լեզվի և գրականության սեկցիայի դասախոս Սվետլանա Եղիազարյանը:

Միջոցառմանը ներկա էին բուհի վարչական և պրոֆեսորադասախոսական անձնակազմի ներկայացուցիչներ, մասնակցում էին տարբեր մասնագիտությունների առաջին և երկրորդ կուրսերի ուսանողներ:

Մասնակից ուսանողները հանդես եկան մորը նվիրված երախտագիտության խոսքերով, սրտահույզ բանաստեղծություններով, վարակիչ ու հուզառատ երգերով:

Մայրության և գեղեցկության տոնին նվիրված միջոցառման ընթացքում ընդգծվեց մոր կերպարը որպես հայրենիքի խտացում, մարդկային կյանքի ակունք, անսահման սիրո մարմնացում:

Արժևորվեց տղամարդու և կնոջ դաշնությունը՝ որպես լիարժեք երջանկության նախապայման:

Ռուսաց լեզվով կազմակերպված գեղեցիկ միջոցառումը ներկաներին պարգևեց գեղագիտական հաճույք, գարնանային տրամադրություն և համակեց բարոյադաստիարակչական լիցքերով:

2018թ. մարտի 28-ին ԵՊՀ Իջևանի մասնաճյուղ էին այցելել «Դասավանդի՛ր, Հայաստան» ծրագրի հավաքագրման համակարգող Տաթևիկ Հովհաննիսյանը և հավաքագրման մասնագետ, ԵՊՀ ԻՄ-ի շրջանավարտ Քնարիկ Մանուկյանը:

Հանդիպումը կազմակերպել էին «Դասավանդի՛ր, Հայաստան» կրթական հիմնադրամն ու ԵՊՀ  ԻՄ-ի շրջանավարտների և կարիերայի կենտրոնը:  

Ներկա էին մասնաճյուղի շրջանավարտների և արտաքին շահակիցների հետ տարվող աշխատանքների համակարգող Արփինե Եգանյանը, ՈՒԳԸ համակարգող Սլավիկ Ալավերդյանը, 3-րդ և 4-րդ կուրսերի ուսանողներ:

Քնարիկ Մանուկյանը ներկայացրեց  ծրագրի առաքելությունը, մանրամասները, դիմելու կարգը, այնուհետև ծրագրի ներկայացուցիչները պատասխանեցին մասնակիցներին հետաքրքրող հարցերին։

Հանդիպման սկզբում նշվեց, որ շատ գյուղերում ուսուցիչների պակաս կա, ինչի հետևանքով ոչ մասնագետը դասավանդում է մի քանի առարկա կամ տևական ժամանակ աշակերտները չեն ունենում որևէ առարկայի ուսուցիչ:

«Դասավանդի՛ր, Հայաստան»-ի առաքելությունն է բարելավել Հայաստանի բոլոր երեխաների կրթության որակը՝ ներգրավելով և որպես ուսուցիչներ վերապատրաստելով համալսարանների շրջանավարտների, ապա 2 տարով նրանց գործուղելով Հայաստանի մարզային դպրոցներ, որտեղ կա տվյալ մասնագիտությամբ ուսուցչի կարիք։

Ծրագրի մասնակիցներն անդամակցում են Երկամյա առաջնորդության զարգացման ծրագրին, որի ընթացքում ձեռք են բերում աշակերտների նվաճումներն ու առաջնորդության ջիղը դասարանում բարելավելու գիտելիքներ, հմտություններ և նոր աշխարհայացք` միաժամանակ իրականացնելով համայնքային զարգացման նախաձեռնություններ:

Ծրագրի առանձնահատկությունն այն է, որ դիմելու համար մանկավարժի որակավորում ունենալը պարտադիր չէ, միայն հարկավոր է դասավանդելու և Հայաստանի զարգացմանը նպաստելու ցանկություն, մյուս խնդիրները, ինչպիսիք են՝ վերապատրաստումը, աշխատանքի տեղավորումը մարզային դպրոցներում, վարձատրությունը, կլուծի ծրագիրը։

Ծրագրին կարող է դիմել 2018թ. հուլիսի դրությամբ բակալավրի կրթական աստիճան ունեցող ցանկացած ոք, այդ թվում` հանրակրթական դպրոցներում դասավանդվող առարկաներին մոտ մասնագիտություն ունեցող անձը:

Ծրագրի մասնակիցները ստանում են.

1. Մասնագիտական աճի հնարավորություն (գործընկեր կազմակերպություններում մասնագիտական և մշակութային զարգացման հնարավորություններ, վերապատրաստող մասնագետի շարունակական աջակցություն),
2. Դրամական աջակցություն (աշխատավարձ և կրթաթոշակ),
3. Մանկավարժի որակավորում (դասավանդման վկայականի կամ մանկավարժության մագիստրոսի աստիճանի ձեռքբերման համար ուսումնական վարձի վճարում),
4. Առաջնորդական հմտությունների զարգացման հնարավորություն,
5. Կարիերայի զարգացման հնարավորություն («Դասավանդի՛ր, Հայաստան» և «Կրթություն բոլորի համար» ծրագրերի շրջանավարտի կարգավիճակ),
6. Գաղափարակից մարդկանց հետ կապերի հաստատում,
7. Նորարար մտքերը և նախագծերն իրականացնելու հարթակ,
8. Մարզային համայնքների զարգացմանը նպաստելու հնարավորություն:

Դիմելու վերջնաժամկետը ապրիլի 30-ն է:

Մայիսի ընթացքում տեղի կունենան հանդիպումներ երկրորդ փուլ անցած դիմորդների հետ, որոնցից հետո կընտրվեն ծրագրի մասնակիցները, ովքեր կմասնակցեն ամառային ինստիտուտին և այն հաջողությամբ ավարտելուց հետո 2018թ. սեպտեմբերի   1-ից աշխատանքի կանցնեն դպրոցներում:

Պատասխանելով ուսանողների հարցերին՝ Տաթևիկ Հովհաննիսյանը նշեց, որ մասնակիցները ծրագրի ընթացքում պետք է բնակվեն իրենց դասավանդման համայնքներում, իրականացնեն լրացուցիչ պարապմունքներ աշակերտների հետ և աջակցեն նաև համայնքի զարգացմանը: Ուսանողների այն հարցին, թե  արդյոք մասնակիցները պիտի դասավանդեն ոչ իրենց մարզում, ծրագրի ներկայացուցիչները նշեցին, որ նման պահանջ չկա, համայնքի ընտրությունը կախված է դպրոցում տվյալ մասնագետի պահանջարկից և համաձայնեցվում է մասնակիցների հետ:

Նշվեց, որ այժմ «Դասավանդի՛ր, Հայաստան»-ը ներկայացված է Հայաստանի 6 մարզի 52 գործընկեր դպրոցում: Ծրագիրն ունի մասնակիցների երեք սերունդ, որոնցից առաջինը՝ 14 մասնակիցներ, արդեն ավարտել են երկամյա ծրագիրը և գտել են իրենց մասնագիտական ուղին ՀՀ առաջատար կազմակերպություններում, իսկ երկրորդ և երրորդ սերնդի մասնակիցները 71-ն են, որոնք աշխատում են շուրջ 5000 երեխայի հետ:

«Դասավանդի՛ր, Հայաստան»-ն անկախ ծրագիր է, որը համագործակցում է ՀՀ կառավարության, մարզպետարանների, դպրոցների, համալսարանների, տեղական և արտասահմանյան կազմակերպությունների և անհատների հետ: Մոդելը, որի հիման վրա ստեղծվել է ծրագիրը, 25 տարվա պատմություն ունի։ Այն սոցիալական փոփոխության հասնելու հաջողված ծրագիր է, որը կիրառվել է աշխարհի շուրջ 46 երկրում, որոնք համախմբվել են “Teach For All” միջազգային ցանցի ներքո:

Հանդիպման վերջում ելույթ ունեցավ ՈՒԳԸ համակարգող Սլավիկ Ալավերդյանը, մասնաճյուղի ղեկավարության և ուսանողության անունից շնորհակալություն հայտնեց այցելության համար:

Նա նշեց, որ ինքը 2015թ. եղել է ծրագրի առաջին դիմորդներից, հետևում է ծրագրի մասնակիցների գործունեությանը և համոզվել է նրանց օգտակարության, երեխաներին ոգեշնչելու մեջ: Ս.Ալավերդյանը ևս ուսանողներին կոչ արեց անպայման դիմել ծրագրին, օգտագործել եզակի հնարավորությունը, ինչպես նաև ծրագրի մասին պատմել ընկերներին:

Ծրագրին դիմելու համար անհրաժեշտ է լրացնել առցանց հայտադիմումը՝ անցնելով հետևյալ հղումով՝ https://arm.teachforarmenia.org/2018-form-arm:

   Հայտադիմումների և ընդունելության հետ կապված հարցերի դեպքում կարելի է զանգահարել Հավաքագրման համակարգող Տաթևիկ Հովհաննիսյանին՝ (041)530154 հեռախոսահամարով կամ գրել tatev.hovhannisyan@teachforarmenia.org էլեկտրոնային հասցեին:

Ծրագրի մասին հավելյալ տեղեկություններ ստանալու համար կարելի է այցելել պաշտոնական կայք՝ http://www.teachforarmenia.org/:

Ծրագրի մասնակիցների հաջողությունների մասին կարելի է կարդալ՝ անցնելով հետևյալ հղումով՝ http://www.mediamax.am/am/news/tfa/: