2017թ. դեկտեմբերի 7-ին  Հումանիտար գիտությունների ֆակուլտետում կայացավ «Երկրաշարժ» գեղարվեստական ֆիլմի ցուցադրություն-քննարկումը, որը կազմակերպվել էր մասնաճյուղի ՈՒԳԸ-ի և ՈՒԽ-ի համատեղ ջանքերով։

Ֆիլմի ցուցադրությունից առաջ զեկուցումով հանդես եկավ Հումանիտար գիտությունների ֆակուլտետի ՈՒԳԸ նախագահի տեղակալ Շիրակ Գասպարյանը:

Նա ներկայացրեց աղետալի երկրաշարժի մասին տեղեկություններ (երկրաշարժի տևողությունը, ուժգնությունը, մարդկային ու նյութական կորուստները և այլն)։

Ներկաները մեծ հուզմունքով դիտեցին ֆիլմը` վերապրելով Սպիտակի երկրաշարժի ողբերգական և ծանր օրերը:

«Երկրաշարժ» գեղարվեստական ֆիլմի ցուցադրությանը հաջորդեց քննարկում, թե ինչպես ճիշտ պաշտպանվել երկրաշարժից, ինչ անել երկրաշարժի ժամանակ և դրանից հետո՝ մարդկանց նյութական, մարդկային և բարոյահոգեբանական կորուստները նվազագույնի հասցնելու համար:

 2017թ. դեկտեմբերի 5-ին ԵՊՀ ԻՄ-ի հումանիտար գիտությունների ֆակուլտետի  «Պատ­մություն» մասնագիտության առաջին և երկրորդ կուրսերի ուսանողները՝ դասախոս Լ.Բեգինյանի ղեկավարությամբ, այցելեցին Դիլիջանի երկրագիտական թանգարան և Թուֆենկյան «Հին Դիլիջան» համալիր:

Այցելությունները նպատակ ունեին ամրապնդել ուսանողների` բրոնզեդարյան արհեստների վերաբերյալ ձեռք բերած գիտելիքները, ընդլայնել ուսանողների պատկերա­ցումները բրոնզեդարյան մարդու, նրա կենցաղի, մշակույթի, հոգևոր ընկալումների վերաբերյալ (ծիսական անոթներ, դամբարանային նյութ), բարձրացնել տարածաշրջանի բրոնզեդարյան ուսումնա­սիրութ­յունների ճանա­չողությունը:

Թուֆենկյան «Հին Դիլիջան» համալիրի արհեստանոցում ուսանողներն իրենց տեսական գիտելիքները լրացրին գործնական կարողություններով:

Նրանք նախ ծանոթացան բրուտի (կավագործի) աշխատանքային գործիքներին, ապա կավի առանձնա­հատկություններին, կավախմորի շաղախմանը, կավե իրերի պատրաստմանը: 

Ականատես լինելով բրուտագործի յուրօրինակ աշխատելաոճին՝ ուսանողները սեփական փորձով ծանոթացան կավե իրերի պատրաստման սկզբունքներին:

2017թ. դեկտեմբերի 4-ին ԵՊՀ Իջևանի մասնաճյուղում կայացավ Ուսանողական խորհրդի ներկայացուցիչների, կուրսերի ավագների հետ տնօրեն Սամվել Առաքելյանի հերթական հանդիպումը:

Հանդիպման ընթացքում քննարկվեցին ուսանողների կարգապահության ու առաջադիմության, նրանց ինքնուրույն աշխատելու ունակությունների ու գործնական հմտությունների զարգացման, 2017-2018 ուստարվա առաջին կիսամյակի երկրորդ ընթացիկ քննաշրջանին նախապատրաստվելու, քննական գործընթացին ՈՒԽ-ի որևէ ներկայացուցչի և տվյալ կուրսի ավագի մասնակցության վերաբերյալ մի շարք հարցեր:

Տնօրենը նշեց, որ օրեր առաջ բոլոր ֆակուլտետների վարչական և պրոֆեսորադասախոսական անձնակազմերի ներկայացուցիչների հետ անցկացված հանդիպումների ընթացքում շեշտվել է, որ նրանք հետևողական լինեն ուսանողների ինքնուրույն աշխատանքների, նրանց տրվող հանձնարարությունների իրականացման, առաջիկա քննությունների պատշաճ կազմակերպման և անցկացման հարցերում, որպեսզի ուսանողների ստացած գնահատականներն անաչառ կերպով արտացոլեն նրանց գիտելիքները:

Միևնույն ժամանակ պարոն Առաքելյանը ուսանողներին կոչ արեց, որ նրանք էլ սեփական գիտելիքները գնահատելիս սուբյեկտիվության մեջ դրսևորեն հնարավորինս օբյեկտիվ մոտեցում, լավ նախապատրաստվեն քննություններին, տքնաջան աշխատեն՝ ցանկալի արդյունքի հասնելու համար:

2017թ. դեկտեմբերի 1-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը մասնագիտությունների կրթական ծրագրերի պատասխանատուների հետ:

Հանդիպման ընթացքում քննարկվեցին կրթական ծրագրերի վերամշակման աշխատանքային խմբերի իրականացրած աշխատանքներին վերաբերող մի շարք հարցեր:

Մասնավորապես նշվեց, որ ԵՊՀ ռեկտորի՝ 2017թ. հոկտեբերի 4-ի թիվ 172 §12 հրամանի և ԵՊՀ ԻՄ-ի՝ 2016-2020թթ. զարգացման ռազմավարական ծրագրի «Որակյալ կրթություն» նպատակի 1.1. խնդրի 3-րդ կետի իրականացման նպատակով ստեղծվել է ԵՊՀ ԻՄ-ի՝ 2018-2019 ուսումնական տարվա  կրթական ծրագրերի վերամշակումն արտոնող հանձնաժողով և համապատասխան կրթական ծրագրերը վերամշակող աշխատանքային խմբեր:

ՄԿԾ-ների պատասխանատուները ներկայացրին, որ ժամանակացույցին համապատասխան կազմվել են աշխատանքային պլաններ, որոնցում հստակ նշված են կատարվելիք աշխատանքները, ժամկետները և պատասխանատուները:

Նշվեց, որ արդեն Մասնագիտական կրթության որակի ապահովման (ՄԿՈԱ) բաժնին են ներկայացվել կրթական ծրագրերի առաջարկի հայտերը:

Տնօրենի առաջարկով մասնագիտությունների կրթական ծրագրերի պատասխանատուները բարձրաձայնեցին ծրագրերի վերամշակման հետ կապված որոշ խնդիրների մասին և ներկայացրին դրանց հնարավոր լուծումները: