Երևանի պետական համալսարանի Իջևանի մասնաճյուղ

ԱՄԷ այցելած ՀՀ 14 լավագույն ուսանողների թվում էր ԵՊՀ ԻՄ-ի ուսանող Գերասիմ Ալավերդյանը

3․ Խալիֆա համալսարան2

   2020թ. փետրվարի 3-6-ը կայացավ բարձր տեխնոլոգիաների և հարակից այլ մասնագիտությունների գծով ՀՀ 14 լավագույն ուսանողների այցը Արաբական Միացյալ Էմիրություններ:

2019թ. դեկտեմբերին Հայաստանում Արաբական Միացյալ Էմիրությունների (ԱՄԷ) դեսպանատունը կազմակերպել էր ԱՄԷ Ազգային օրվա՝ Էմիրությունների միավորման 48-ամյակի կապակցությամբ մեծ ընդունելություն, որի ժամանակ տեղի էր ունեցել ՀՀ լավագույն ուսանողների պարգևատրման արարողությունը: Պարգևատրվել էին ՀՀ պետական բուհերի 14 ուսանողներ, այդ թվում՝ ԵՊՀ Իջևանի մասնաճյուղի բնական գիտությունների ֆակուլտետի «Ինֆորմատիկա և կիրառական մաթեմատիկա» մասնագիտության 4-րդ կուրսի ուսանող Գերասիմ Ալավերդյանը: Որպես մրցանակ նախատեսված էր եռօրյա այցելություն ԱՄԷ (http://ijevan.ysu.am/25-12-2019-2/):

Այցելության շրջանակներում ուսանողները օթևանեցին ԱՄԷ մայրաքաղաք Աբու Դաբիում, այցելեցին ԱՄԷ լավագույն համալսարաններից մեկը՝ Գիտության և տեխնոլոգիայի Խալիֆա համալսարան (“Khalifa University of Science and Technology”), Շեյխ Զայեդի մզկիթ, մասնակցեցին «Իսլամի դրամները» ցուցահանդեսին, ծանոթացան քաղաքի այլ տեսարժան վայրերին:

Եղան նաև Մասդար քաղաքում, որտեղ այցելեցին Մուհամեդ բին Զայեդի անվան արհեստական բանականության համալսարան (“Mohamed bin Zayed University of Artificial Intelligence”) և “Eedama” գիտահետազոտական կենտրոն:

Ուսանողներին ներկայացվեցին գիտության և տեխնոլոգիաների ոլորտում ԱՄԷ առաջավոր փորձը, տարբեր խնդիրների ուղղությամբ նորարարական լուծումները (օրինակ՝ ավիատիեզերական, առողջապահական հետազոտություններ, առանց վարորդի մեքենաներ, օդափոխության աշտարակ, ճարտարապետական գոհարներ):

Վերջում տեղի ունեցավ հանդիպում ԱՄԷ-ում ՀՀ արտակարգ և լիազոր դեսպան Մհեր Մկրտումյան հետ:

ՀՈԳԱԲԱՐՁՈՒՆԵՐԻ ԽՈՐՀՈՒՐԴԸ ՀԱՅՏԱՐԱՐՈՒՄ Է ՄՐՑՈՒՅԹ ԵՊՀ ԻՋԵՎԱՆԻ ՄԱՍՆԱՃՅՈՒՂԻ ՏՆՕՐԵՆԻ ԹԱՓՈՒՐ ՊԱՇՏՈՆԻ ՀԱՄԱՐ

EPH IM

   Հոգաբարձուների խորհրդի որոշմամբ` մրցույթն անցկացվելու է մարտի 16-ին: Դրան կարող են մասնակցել առնվազն թեկնածուի գիտական աստիճան և դոցենտի գիտական կոչում ունեցող անձինք:

Մրցույթին մասնակցելու համար դիմումները պետք է  ներկայացնել 2020 թ. փետրվարի 5-29-ը` ժամը 16:00-18:00 (բացի շաբաթ, կիրակի և հանգստյան օրերից), «Երևանի պետական համալսարան» հիմնադրամի հո­գա­բար­ձուների խորհրդի քարտուղար Գրիգոր Հայրապետյանին առձեռն կամ փոստով (հասցեն՝ ՀՀ, ք. Երևան, 0025, Ալեք Մանուկյան 1, ԵՊՀ, Կենտրոնական մասնաշենք, թիվ 508 աշխատասենյակ):

Տնօրենի թափուր պաշտոնի մրցույթին մասնակցելու համար անհրաժեշտ ներկայացվող փաստաթղթերին կարող եք ծանոթանալ այստեղ:

Որպես մասնաճյուղի կառավարիչ՝ տնօրենը պետք է նպաստի ԵՊՀ ԻՄ-ի 4 ֆակուլտետների դասավանդման, գիտահետազոտական աշխատանքի և ուսանողների սպասարկման ոլորտներում գերազանցության շարունակական ներդրմանը, ԵՊՀ-ի մյուս ֆակուլտետների հետ, ինչպես նաև  մարզի ուսումնական հաստատությունների հետ համագործակցությանը:

Աշխատելով ԵՊՀ-ի աշխատակազմի հետ՝ նա պետք է ապահովի ուսանողների հաջողությունների խթանումը, աջակցի ԵՊՀ ԻՄ-ի ֆակուլտետների և աշխատակազմի կառավարմանը, ապահովի մասնաճյուղի ֆինանսական, մարդկային և նյութական ռեսուրսների պատասխանատու շահագործումը:

Կայացավ տնօրենության հերթական նիստը

Տնօր. նիստի նկարը

   2020թ. փետրվարի 6-ին ԵՊՀ Իջևանի մասնաճյուղում կայացավ տնօրենության հերթական նիստը՝ Ա. Հ. Մակարյանի նախագահությամբ:

Տնօրենության նիստում քննարկվեցին 2019-2020 ուստարվա 2-րդ կիսամյակի նախապատրաստական աշխատանքներին, 1-ին կիսամյակի լուծարքային շրջանի անցկացմանը, ՀՀ ՊՆ կողմից հատկացվող անվանական կրթաթոշակի («Վազգեն Սարգսյան», «Մոնթե Մելքոնյան») տրամադրմանը վերաբերող և մի քանի ընթացիկ հարցեր:

2019-2020 ուստարվա 2-րդ կիսամյակի նախապատրաստական աշխատանքների վերաբերյալ Ուսումնամեթոդական վարչության պետ Ա.Դավթյանը նշեց, որ նախորդ նիստին ֆակուլտետների դեկաններին հանձնարարվել էր դասացուցակները կազմել այնպես, որ երկուշաբթի օրը լինի ոչ աշխատանքային, քանի որ Երևանից եկող պրոֆեսորադասախոսական կազմի մեծ մասին ավելի հարմար է դասերն իրականացնել շաբաթ օրերին: Այժմ դասացուցակները պատրաստվել և ստուգվել են ՈՒՄՎ կողմից՝ ըստ աշխատանքային ուսումնական պլանների և պրոֆեսորադասախոսական կազմի անհատական բեռնվածության: Պարոն Դավթյանը հավելեց, որ մասնաճյուղը լիովին պատրաստ է սկսելու երկրորդ կիսամյակի ուսումնական պարապմուքները:

Դեկաններին հանձնարարվեց պրոֆեսորադասախոսական կազմին ևս մեկ անգամ տեղեկացնել տրանսպորտի ժամանակացույցի մասին, ֆակուլտետներում սահմանել հերթապահություն՝ դասապրոցեսը պատշաճ կազմակերպելու նպատակով և կազմված գրաֆիկները ներկայացնել տնօրենին:

2019-2020 ուստարվա 2-րդ կիսամյակի նախապատրաստական աշխատանքները որոշվեց գնահատել բավարար և կազմել հրամանի նախագիծ երկուշաբթին ոչ աշխատանքային հայտարարելու մասին, ստեղծել հերթապահություն իրականացնելու համար նախատեսված գրաֆիկ, ՈՒՄՎ-ին և դեկաններին հանձնարարվեց հետևողական լինել երկրորդ կիսամյակի ուսումնական պարապմունքների իրականացման գործում:

2019-2020 ուստարվա 1-ին կիսամյակի 1-ին լուծարքային շրջանը կազմակերպելու վերաբերյալ նշվեց, որ ըստ գրաֆիկի՝ առկա ուսուցման 1-ին լուծարքային շրջանը նախատեսված է իրականացնել ս.թ. փետրվարի 6-15-ը, 2-րդ լուծարքային շրջանը՝ փետրվարի 20-29-ը, հեռակա ուսուցման 1-ին լուծարքային շրջանը կտևի ս.թ. մարտի 6-14-ը, 2-րդ լուծարքային շրջանը՝ մարտի 20-28-ը:

Ա.Դավթյանը նշեց, որ լուծարքային շրջանն իրականացվում է ըստ նախատեսված ժամանակացույցի, տրված են առարկայական հանձնաժողովների հրամանները, ընթացքը վերահսկվում է Ուսումնամեթոդական վարչության կողմից:

Որոշվեց ֆակուլտետների դեկաններին հանձնարարել հետևողական լինել լուծարքային շրջանի անցկացման, ՈՒՄՎ-ին՝ վերահսկման գործում, այն պարտադիր իրականացնել հրամանագրված հանձնաժողովներով:

Հաջորդ հարցի վերաբերյալ նշվեց, որ ՀՀ ՊՆ կողմից հատկացվող «Վազգեն Սարգսյան» և «Մոնթե Մելքոնյան» անվանական կրթաթոշակների համար հայտ էին ներկայացրել 3 ֆակուլտետներ՝ Հումանիտար գիտությունների, Տնտեսագիտության և Բնական գիտությունների:

Առաջարկված թեկնածություններից «Վազգեն Սարգսյան» անվանական կրթաթոշակի համար, առաջադիմությունից ելնելով, ընտրվեց Բնական գիտությունների ֆակուլտետի «Քարտեզագրություն և կադաստրային գործ» մասնագիտության 3-րդ կուրսի ուսանող Տիգրան Սերյոժայի Գասպարյանը:

«Մոնթե Մելքոնյան» անվանական կրթաթոշակի համար ընտրվեց Տնտեսագիտություն ֆակուլտետի «Ֆինանսներ» մասնագիտության 3-րդ կուրսի ուսանողուհի Լուիզա Վարդանի Մադաթյանը:

Որոշվեց նախապատրաստել համապատասխան գրություն և ուղարկել ՀՀ պաշտպանության նախարարություն:

Ընթացիկ հարցերից էին ուսանողների իրավունքների վերականգնմանը, ԵՊՀ ԻՄ-ի ինստիտուցիոնալ կարողությունների հերթական ինքնավերլուծությանը, մասնաճյուղի՝ 2019-20 ուստարվա գույքագրմանը վերաբերող հարցերը:

Առաջին ընթացիկ հարցի վերաբերյալ Ա.Դավթյանը ներկայացրեց, որ Հեռակա ուսուցման համակարգի 2 ուսանողներ դիմել են իրենց ուսանողական իրավունքները վերականգնելու համար, իսկ առկա ուսուցման 1 ուսանող դիմել է առկա վճարովի համակարգից տեղափոխվելու հեռակա ուսուցման համակարգ: Նա նշեց, որ Ուսումնամեթոդական վարչության կողմից ստուգվել է ուսանողների ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին (17.12.2018, N 1676 -Ն), և դրանք բավարարում են վերոնշյալ կարգի III մասի կետերին:

Երկրորդ ընթացիկ հարցի կապակցությամբ ՄԿՈԱ բաժնի վարիչ Մ.Ճաղարյանը նշեց, որ ԵՊՀ ԻՄ-ի ինստիտուցիոնալ կարողությունների ինքնավերլուծության հերթական զեկույցի պատրաստումն ընթացքի մեջ է. ինքնավերլուծության 10 չափանիշները 50 և ավելի %-ով պատրաստ են, 2 չափանիշ գրեթե ավարտված են (Չափանիշ V. Պրոֆեսորադասախոսական և ուսումնաօժանդակ կազմ, Չափանիշ VIII. Հասարակական պատասխանատվություն): Ինքնավերլուծություն իրականացնող աշխատանքային խմբերի ղեկավարներին հանձնարարվել է իրենց չափանիշները մինչև փետրվարի 15-ը ավարտուն տեսքի բերել և ներկայացնել ՄԿՈԱ բաժին:

Երրորդ ընթացիկ հարցի վերաբերյալ Վ.Եգանյանը նշեց, որ 2019-2020 ուստարվա գույքագրման աշխատանքները մոտ 60%-ով իրականացվել են (հյուրանոցային համալիր, մարզադահլիճ, վարչական մասնաշենք, Հումանիտար գիտությունների ֆակուլտետ, Տնտեսագիտության ֆակուլտետ):

Մասնաճյուղում կայացավ Տավուշի մարզում ԳՏՏԿ առաջին շրջանավարտների ավարտական միջոցառումը

DSC_4487

2020թ. փետրվարի 1-ին ԵՊՀ Իջևանի մասնաճյուղում կայացավ Տավուշի մարզում Գյումրիի տեղեկատվական տեխնոլոգիաների կենտրոնի առաջին շրջանավարտների ավարտական միջոցառումը։

Միջոցառմանը ներկա էին Տավուշի մարզպետ Հայկ Չոբանյանը, ԵՊՀ ԻՄ-ի տնօրենի պաշտոնակատար Անուշավան Մակարյանը, ԳՏՏԿ գործադիր տնօրեն Ամալյա Եղոյանը, Բարձր տեխնոլոգիաների արդյունաբերության նախարարության հատուկ նախագծերի ղեկավար Վիկտորյա Պողոսյանը, Գյումրիի տեխնոլոգիական կենտրոնի ծրագրերի ղեկավար Բելլա Հարությունյանը, Վանաձորի տեխնոլոգիական կենտրոնի մենեջեր Պատվական Հախինյանը, Տավուշի մարզպետարանի կրթության, մշակույթի և սպորտի վարչության պետ Մանե Ղազումյանը, այլ պաշտոնյաներ, դասախոսներ, ուսանողներ, ծնողներ, հյուրեր, ԶԼՄ-ների ներկայացուցիչներ, քաղաքացիներ:

Ողջույնի խոսքով հանդես եկավ ԳՏՏԿ տնօրեն, «Ձեռնարկությունների ինկուբատոր» հիմնադրամի՝ մարզերում տեխնոլոգիաների զարգացման ծրագրի ղեկավար Ամալյա Եղոյանը՝ նշելով, որ այս տարի առաջին շրջանավարտների համար կմեկնարկեն ինտերնշիփեր, որոնց շրջանակում ծրագրի շրջանավարտները կհամագործակցեն ՏՏ և ճարտարագիտության ոլորտի լավագույն մասնագետների ու ընկերությունների հետ, այդ թվում՝ հեռահար եղանակով, ինչպես նաև Տավուշում շուտով կտրվի նոր՝ «Համակարգչային ճարտարագիտություն» ծրագրի մեկնարկը։

Այնուհետև Վեբ, Ջավա և iOS ծրագրավորման խմբերի շրջանավարտները ներկայացրին իրենց նախագծերը։ Հարց ու պատասխանի միջոցով ամփոփվեց այդ փուլը։

Շրջանավարտներին իրենց կատարումներով շնորհավորեցին ԵՊՀ ԻՄ-ի ուսանողուհի Մանե Մատինյանը և M dance studio-ն (գեղարվեստական ղեկավար՝ Մերի Չիբուխչյան

Տավուշի մարզպետ Հայկ Չոբանյանը շնորհավորեց մարզում ԳՏՏԿ առաջին շրջանավարտներին և հիմնադրման 15-ամյակի առթիվ ԳՏՏԿ-ին՝ նշելով․ «Ծրագրավորումն ամենամտավոր և ինտելեկտուալ մասնագիտություններից և աշխարհի ամենաբարեկեցիկ աշխատանքներից մեկն է։ Սիրելի՛ շրջանավարտներ, մենք մեծ ճանապարհ ունենք ձեզ հետ անցնելու։ Ուզում եմ, որ սիրեք ձեր մասնագիտությունը, կայանաք ձեր մասնագիտության մեջ և համարձակություն ունենաք ոչ միայն աշխատելու, այլև ստեղծելու ձեր ձեռնարկությունները։ Մենք ամեն ինչ պետք է անենք, որ Իջևանը և Տավուշը դառնան տեխնոլոգիական հանգրվաններ»։

ԵՊՀ ԻՄ-ի տօրենի պաշտոնակատար Անուշավան Մակարյանը, շնորհավորելով շրջանավարտներին և ողջունելով ծրագիրը, նշեց, որ համալսարանը պատրաստ է տրամադրել համապատասխան ռեսուրսներ, բարելավել անհրաժեշտ պայմանները՝ ծրագրին լավ ընթացք ապահովելու նպատակով:

Միջոցառման երկրորդ փուլում շրջանավարտներին հանձնվեցին ավարտական վկայականներ։

Գյումրիի տեղեկատվական տեխնոլոգիաների կենտրոնի կողմից շնորհակալագրեր ստացան ԵՊՀ ԻՄ-ի տնօրենի պաշտոնակատար Անուշավան Մակարյանը, մասնաճյուղի տնօրենի նախկին պաշտոնակատար Արտակ Ցուցուլյանը, Տավուշի մարզպետ Հայկ Չոբանյանը, Տավուշում ԳՏՏԿ դասախոսները։

ԵՊՀ ԻՄ-ի տնօրենի պաշտոնակատար Անուշավան Մակարյանը մասնաճյուղի անունից շնորհակալագիր հանձնեց ԳՏՏԿ գործադիր տնօրեն Ամալյա Եղոյանին՝ մասնաճյուղի գործունեությանը մեծապես աջակցելու համար։

Տավուշի մարզպետ Հայկ Չոբանյանը ևս Ամալյա Եղոյանին հանձնեց շնորհակալագիր՝ ԳՏՏԿ-ի կողմից մարզում տեխնոլոգիական ոլորտի հատուկ մասնագիտացված կրթական ծրագրերը հաջողությամբ իրականացնելու համար։

Նշենք նաև, որ 2019թ. ՀՀ 4 մարզերի 250 երիտասարդներ մուտք են գործել ՏՏ ոլորտ՝ «Գյումրիի տեղեկատվական տեխնոլոգիաների կենտրոն» գիտակրթական հիմնադրամի (ԳՏՏԿ) կողմից իրականացվող տեխնոլոգիական ոլորտի հատուկ մասնագիտացված կրթական ծրագրերին մասնակցելու շնորհիվ:

Տավուշի, Վայոց Ձորի, Լոռու և Արագածոտնի մարզերի երիտասարդները կարճ ժամանակում սովորել են ծրագրավորման տարբեր լեզուներ՝ իրենց տեղը գտնելով տեխնոլոգիական ոլորտում, որը Հայաստանում հռչակված է որպես տնտեսության գերակա ճյուղ:

Տավուշի մարզում ծրագրի առաջին փուլին դիմել է 120 դիմորդ: Ընտրված 70 ուսանողից ծրագիրը հաջողությամբ ավարտել է 30 ուսանող:

Բոլոր լուսանկարները տե՛ս Պատկերասրահում:

ԵՊՀ հոգաբարձուների խորհրդի նիստում հաստատվել են ԵՊՀ ռեկտորի և Իջևանի մասնաճյուղի տնօրենի թափուր պաշտոնների մրցույթների անցկացման օրերը

hogabardzumneri nist

2020թ. հունվարի 31-ին օրակարգային 6 հարցով տեղի է ունեցել ԵՊՀ հոգաբարձուների խորհրդի նիստը, որի ընթացքում հաստատվել են ԵՊՀ ռեկտորի, ինչպես նաև Իջևանի մասնաճյուղի տնօրենի թափուր պաշտոնների մրցույթների անցկացման օրերը:

Նիստի սկզբում Հոգաբարձուների խորհրդի նախագահ Գևորգ Մուրադյանն առաջարկեց օրակարգում ներառել Իջևանի մասնաճյուղի  կանոնադրության մեջ փոփոխություններ կատարելու հարցը՝ պատճառաբանելով, որ ՊՈԱԿ-ից հիմնադրամ անցնելիս կանոնադրությունը և կանոնակարգը չեն համաձայնեցվել: Առաջարկն ընդունվեց ՀԽ անդամների կողմից, որից հետո հաստատվեց նիստի օրակարգը:

Առաջին հարցի՝ «Երևանի պետական համալսարան» հիմնադրամի ռեկտորի ընտրության կանոնակարգի հաստատմանն անցնելով՝ Գևորգ Մուրադյանը հիշեցրեց, որ դեռևս նախորդ նիստին ձևավորվել էր հանձնախումբ, որն ուսումնասիրել է կանոնակարգը և ներկայացրել եզրակացություն: Բացի դրանից՝ ՀԽ նախագահի փոխանցմամբ, հարցը քննարկվել է նաև իրավաբանների հետ:

Նրա տեղեկացմամբ, կանոնակարգում կան դրույթներ, որոնք փոփոխելու առաջարկություններ են ներկայացվել, սակայն դրանք հաստատված են կանոնադրությամբ, որն ավելի բարձր իրավաբանական ուժ ունի և հաստատվում է  կառավարության կողմից. «Ըստ այդմ՝ բովանդակային մեծ փոփոխություններ չեն արվել»:

Ներկայացնելով առաջարկվող փոփոխությունները՝ Գևորգ Մուրադյանն ասաց, որ կանոնակարգի 2.2 կետում հանվել են թերթերի անունները՝ փոխարենը նշելով, որ առնվազն հինգ լրատվամիջոցներով պետք է հրապարակվի հայտարարությունը: Նա փաստեց, որ պահպանվել է 40 օր առաջ հրապարակելու դրույթը, բայց այն տրամաբանությամբ, որ դա նվազագույն ժամկետն է:

«Ավելացվել է այն կետը, որ Հայաստանում գործող գիտակրթական հիմնարկների մեծամասնությանն ուղարկվելու է հայտարարությունը: Հանվել է աշխատանքային գրքույկից քաղվածքի ներկայացումը, ինքնակենսագրության մեջ ավելացվել է ռեզյումեն: Հանվել է նաև վերջին աշխատանքային վայրից բնութագրի ներկայացման պահանջը, ինչն առնվազն պատշաճ չէ»,- ասաց Գևորգ Մուրադյանը:

Առաջարկվում է նաև փոփոխել կանոնակարգի 2.5 կետը, որի համաձայն՝ ԵՊՀ ռեկտորի թափուր պաշտոնի բաց մրցույթին մասնակցելու համար փաստաթղթերի հանձնումը պետք է ավարտվի մրցույթի անցկացումից ոչ թե 10, այլ 15 օր առաջ: Բացի դրանից՝ առաջարկվում է հանել 3.2 կետով սահմանվող այն դրույթը, թե ԵՊՀ ռեկտոր կարող է առաջադրվել առնվազն 3 տարվա ղեկավար աշխատանքային փորձ ունեցող մարդը, քանի որ կանոնադրության մեջ նման պահանջ չկա: ՀԽ անդամներին ներկայացված առաջարկվող բոլոր փոփոխությունները հաստատվեցին խորհրդի կողմից:

Անդրադառնալով օրակարգային հաջորդ հարցին՝ Գևորգ Մուրադյանն առաջարկեց ԵՊՀ ռեկտորի թափուր պաշտոնի մրցույթի անցկացման օր հաստատել մարտի 27-ը, որպեսզի նախքան հայտարարություն հրապարակելը լուծվեն տեխնիկական բոլոր հարցերը:

ԵՊՀ պետության և իրավունքի տեսության ու պատմության ամբիոնի վարիչ Արթուր Վաղարշյանն առաջարկեց մեկ շաբաթ շուտ անցկացնել մրցույթը՝ հիմնավորելով, որ ապրիլի 1-ին կառավարության որոշմամբ ավարտվում են ՀԽ-ի լիազորությունները, իսկ մարտի 27-ին անցկացնելու դեպքում հնարավոր է, որ թեկնածուները շատ լինեն, և գործընթացը երկարի: ՀԽ-ի անդամները որոշեցին մրցույթն անցկացնել մարտի 23-ին:

Օրակարգային հաջորդ հարցը վերաբերում էր Իջևանի մասնաճյուղի  կանոնադրության մեջ փոփոխություններ կատարելուն: Գևորգ Մուրադյանն ասաց, որ առաջարկվում է կանոնադրության 30-րդ կետում ավելացնել 3 տարվա ղեկավարման փորձ ունենալու պահանջը, ինչը քննարկման ժամանակ որոշվեց չընդունել:

Ըստ այդմ՝ օրակարգային հաջորդ հարցի շրջանակում որոշվեց «Երևանի պետական համալսարան» հիմնադրամի Իջևանի մասնաճյուղի տնօրենի ընտրության կանոնակարգը համապատասխանեցնել կանոնադրությանը:

Նիստի ընթացքում քննարկվեց Իջևանի մասնաճյուղի տնօրենի թափուր պաշտոնի մրցույթի անցկացման օրը. որոշվեց այն անցկացնել մարտի 16-ին:

Անցնելով օրակարգային վերջին հարցին՝ Գևորգ Մուրադյանն անդրադարձավ 2019 թ. աուդիտի պայմանների հաստատմանը և նշեց, որ տեխնիկական վրիպակ կա, որը պետք է հանել: Հոգաբարձուների խորհուրդը հաստատեց փոփոխության առաջարկությունը և քննարկեց առաջիկայում աուդիտի արդյունավետ անցկացման կազմակերպումը: