2023 թ. դեկտեմբերի 5-ին ԵՊՀ ԻՄ հայոց պատմության և հասարակագիտության ամբիոնի պրոֆեսորադասախոսական անձնակազմի և «Պատմություն» մասնագիտության I-IV կուրսերի ուսանողների մասնակցությամբ տեղի ունեցավ պանելային քննարկում:

2012 թվականից ԵՊՀ պատմության ֆակուլտետի ուսանողական գիտական ընկերության նախաձեռնությամբ որոշվեց դեկտեմբերի 4-ը՝ հայ անվանի պատմաբան, լեզվաբան, աստվածաբան և մանկավարժ Միքայել Չամչյանի ծննդյան օրը, նշել որպես Պատմաբանի օր:

Այդ առիթով մասնաճյուղում կազմակերպված միջոցառմանը բացման խոսքով հանդես եկավ «Պատմություն» մասնագիտության 2-րդ կուրսի ուսանող Էռնեստ Խանումյանը՝ շնորհավորելով պատմաբաններին մասնագիտական տոնի առթիվ: Նա կարևորեց անցյալում մարդու գործունեությունը, աշխարհայացքները, սոցիալական կապերն ու կյանքի կազմակերպումը, որը հնարավորություն է տալիս հասկանալ այսօրվա մարտահրավերներն ու ճիշտ կազմակերպել մեր պատմության վաղվա օրը: Պատմության ուսումնասիրումը հնարավորություն է տալիս տեսնելու մարդկության զարգացման ուղին, ուսումնասիրելու մարդկության անցյալը, վերստեղծելու պետության, ժողովուրդների և անհատների կյանքի պատկերը անցյալում, ներկայում և ապագայում:

Մասնագիտական օրվան նվիրված զեկուցումներով հանդես եկան ուսանողներ Վանուհի Խուդավերդյանը և Թամարա Մկրտչյանը:

Այնուհետև ելույթ ունեցան և շնորհավորական խոսքով հանդես եկան Հայոց պատմության և հասարակագիտության ամբիոնի դասախոսները՝ պ.գ.թ., դոցենտ Նաթելլա Գրիգորյանը և Վլադիմիր Պողոսյանը: Շեշտվեց, որ պատմական գիտության գործառույթները պայմանավորված են ժամանակակից իրականության վրա պատմական փորձի և գիտելիքների ազդեցությամբ: Հենց դրանց համախմբությամբ էլ որոշվում է պատմական գիտության արժեքը, այն, թե դրա միջոցով որքանով են լուծվում հասարակության առջև ծառացած հիմնախնդիրները, որքան է դրա սոցիալական պահանջվածությունը: Իհարկե, մարդկանց կողմից իրենց անցյալով հետաքրքրվելն ամբողջապես պայմանավորված չէ միայն դրա հասարակական ազդակներով: Պատմության նկատմամբ հետաքրքրությունը կարող է պայմանավորված լինել նաև զուտ գիտականության պահանջով, անցյալի իրողությունները վեր հանելու, դրանք ճանաչելու ձգտումով, այսինքն՝ ճշմարտության բացահայտման մղումով: Անցյալի փորձն ուսումնասիրելը օգնում է իմաստավորել ներկան և կանխատեսել ապագան:

Ընդգծվեց, որ պատմական գիտելիքներն ավելի ակտիվ են թափանցում հասարակական կյանքի մեջ: Ընդլայնվում են դրանց գործունեության ոլորտները, հետազոտության օբյեկտները, դիֆերենցացումը (տարբերակումը): Դա իր հերթին հանգեցնում է պատմական գիտության գործառույթների ընդլայնմանը: Միևնույն գործառույթը տարբեր տարածաժամանակային պայմաններում կարող է ունենալ միանգամայն հակառակ դեր: Օրինակ՝ պատմության դաստիարակչական գործառույթը նացիզմի ժամանակաշրջանում օգտագործվել է սեփական նպատակների համար: Դրանից անշուշտ չի հետևում, որ պատմությունը պետքական չէ: Պարզապես դրա գործառույթները պետք է դիտարկել միասնականության մեջ՝ առաջնային համարելով գիտականությունը:

Ելույթներից հետո քննարկվեցին պատմության՝ գիտաճանաչողական, կանխատեսման, դաստիարակչական և հասարակական հիշողություն լինելու գործառույթները: 

 ԵՊՀ Իջևանի մասնաճյուղում ս.թ. դեկտեմբերի 2-ին կայացավ սեղանի թենիսի բաց առաջնություն, որին մասնակցում էին 55 մարզիկ-մարզուհիներ Տավուշի մարզից՝ Դիլիջանից, Դիլիջանի միջազգային դպրոցից, Թեղուտից, Պտղավանից, Վերին Ծաղկավանից, Պառավաքարից, Իջևանից և ԵՊՀ Իջևանի մասնաճյուղից:

Առաջնությանը բացման և ողջույնի խոսքով հանդես եկան ԵՊՀ Իջևանի մասնաճյուղի տնօրենի պաշտոնակատար Անուշավան Մակարյանը, Արտակարգ իրավիճակների, մարմնակրթության և սպորտի ամբիոնի դասախոս Վարդիթեր Պողոսյանը՝ հասարակության շրջանում առողջ ապրելակերպի ամրապնդման և սպորտի մասսայականացման գործում կարևորելով նման միջոցառումների դերն ու նշանակությունը, հաջող և դիտարժան խաղ մաղթելով մասնակիցներին և ներկաներին:

Խաղերն անցկացվեցին խմբային ձևով (9 խումբ, 6-ական խաղացող). երկու պարտություն ունեցող մարզիկը դուրս էր մնում հետագա պայքարից:

Ամեն խմբից դուրս եկավ 2-ական մարզիկ, ովքեր պայքարը շարունակեցին օլիմպիական կարգով:

Առաջնությունն ընթացավ համառ և հետաքրքիր պայքարով:

Իրենց գեղեցիկ խաղով և վարպետությամբ աչքի ընկան թեղուտցի թենիսիստները՝ հատկապես Մուշեղ Անանյանը և Ալիկ Հախվերդյանը (մարզիչ՝ Արտակ Աղաջանյան):

Տղաներից մրցանակային տեղեր գրավեցին թեղուտցի մարզիկներ Ռուբեն Բեգլարյանը (1-ին տեղ), Ալիկ Հախվերդյանը (2-րդ տեղ) և Վազգեն Մուկուչյանը (3-րդ տեղ):

Աղջիկներից 1-ին տեղը գրավեց Մարիետա Մնացականյանը (Դիլիջանի թիվ 6 դպրոցի աշակերտ), 2-րդ տեղը՝ Վարդիթեր Պողոսյանը (ԵՊՀ ԻՄ դասախոս), 3-րդ տեղը՝ Լիլիթ Քոչարյանը (ԵՊՀ ԻՄ «Զբոսաշրջություն» մասնագիտության 4-րդ կուրսի ուսանող):

Մրցանակային տեղեր գրաված մարզիկները ԵՊՀ Իջևանի մասնաճյուղի տնօրենության կողմից պարգևատրվեցին մեդալներով, պատվոգրերով և գավաթներով:

 ԵՊՀ Իջևանի մասնաճյուղի «Հոգեբանություն» մասնագիտության 3-րդ կուրսի ուսանողները Մանկավարժության և հոգեբանության ամբիոնի դասախոս Մերի Ազիզյանի հետ ս․թ․ դեկտեմբերի 2-ին այցելեցին Իջևանի պատմաերկրագիտական թանգարան:

«Էթնոհոգեբանություն» դասընթացի շրջանակներում «Հոգեբանություն» կրթական ծրագրի տվյալ կուրսի ուսանողներն ուսումնասիրում են տարբեր ազգերի հոգեկերտվածքները, կարծրատիպերը, քսենոֆոբիկ դրսևորումները, պատմական ճակատագիրը, մշակույթը, լեզունը և կրոնը: Սեմինարների, ինքնուրույն աշխատանքների միջոցով ուսանողները հոգեբանական ուսումնասիրության են ենթարկում հայկական մշակույթը, լեզունը, քրիստոնեության դերը հայ էնթոսի պահպանման և զարգացման գործում: Ըստ այդմ՝ ուսանողների և դասախոսի համար կարևոր էր նաև ծանոթանալ Տավուշում հայտնաբերված գտածոներին, տարածաշրջանի պատմության համար արժեքավոր նմուշներին:

Իջևանի պատմաերկրագիտական թանգարանում ուսանողները հնարավորություն ունեցան ծանոթանալու Տավուշում գտնված տարբեր ժամանակաշրջանների կարասներին, զինամթերքին, հողագործական իրերին, սահմանաքարերին, կենդանիներին, քարատեսակներին, գրքերին, Տավուշի մարզի նշանավոր մարդկանցից մի քանիսի անձնական իրերին, հագուստներին, գորգերին:

 2023 թ. դեկտեմբերի 1-ին ԵՊՀ Իջևանի մասնաճյուղի պրակտիկայի կազմակերպման և շահակիցների հետ համագործակցության բաժնի և Ուսանողական գիտական ընկերության նախաձեռնությամբ Իջևանի վարժարանում կայացավ «Ամենախելացին» ինտելեկտուալ խաղը, որին մասնակցեցին 10-րդ և 11-րդ դասարանների 12 աշակերտներ:

Խաղը վարեց ՈՒԳԸ նախագահ, «Ֆինանսներ» մասնագիտության 3-րդ կուրսի ուսանողուհի Անի Թիրաբյանը:

Ինտելեկտուալ խաղի առաջին փուլում տրվեց ընդհանուր զարգացվածությունն ստուգող 10 հարց: Առավելագույն միավոր հավաքած 6 աշակերտները հնարավորություն ստացան խաղը շարունակելու երկրորդ փուլում:

Երկրորդ փուլում մասնակիցները 12 թեմաներից ընտրեցին երկուական թեմա և 1 րոպեի ընթացքում պատասխանեցին իրենց ընտրած թեմայի հարցերին: Տվյալ փուլի արդյունքների համաձայն՝ հաջորդ փուլ անցան Միքայել Հարությունյանը, Տիգրան Գևորգյանը և Ռոբերտ Ապրեսյանը:

Երրորդ փուլում մասնակիցները պետք է պատասխանեին իրենց կողմից նախապես ընտրված թեմայի հարցերին: Պայքարը շատ թեժ էր:

Առավելագույն միավորներ վաստակեց և «Ամենախելացին» խաղի հաղթող ճանաչվեց Միքայել Հարությունյանը, ով պարգևատրվեց պատվոգրով և մասնաճյուղի կողմից նվիրաբերված գեղարվեստական գրքով (Նարինե Աբգարյանի «Սիմոն» վեպը):

Պատվոգրերով պարգևատրվեցին նաև Տիգրան Գևորգյանը և Ռոբերտ Ապրեսյանը, ովքեր զբաղեցրին համապատասխանաբար 2-րդ և 3-րդ հորիզոնականները:

Աշակերտները շատ տպավորված և ոգևորված էին խաղով: Երրորդ փուլ անցած աշակերտները անհամբեր սպասում են այս ուսումնական տարվա վերջում մասնաճյուղում կայանալիք եզրափակիչ փուլին, որին իրենք ևս կմասնակցեն:

ԵՊՀ Իջևանի մասնաճյուղը նման նախաձեռնությունների միջոցով ձգտում է մոտիվացնել աշակերտներին, որ ավելի լավ սովորեն, բազմակողմանիորեն  զարգանան և ձեռք բերեն հիմնարար գիտելիքներ, ինչպես նաև այս ճանապարհով ամրապնդվում է դպրոց-բուհ կապը:

 2023 թ. նոյեմբերի վերջին ամփոփվեցին ս.թ. նոյեմբերի 18-ին Ուրալի պետական համալսարանում մեկնարկած «Ռուսական տարածաշրջանները փոփոխման կենտրոնում» թեմայով միջազգային XVIII համաժողովի արդյունքները, որին մասնակցել և առաջին կարգի դիպլոմների են արժանացել մեր ուսանողները՝ ԵՊՀ ԻՄ «Ռուսաց լեզու և գրականություն» կրթական ծրագրի 3-րդ կուրսի ուսանողուհիներ Նազելի Եսայանը և Մարիամ Դարբինյանը:

Միգրացիոն գործընթացների ուսումնասիրությանն ուղղված միջազգային համաժողովում ընդգրկված էին առավելապես հայցորդներ, պրոֆեսորներ, դոկտորներ, գիտությունների թեկնածուներ և քիչ թվով ուսանողներ, որոնց մեջ էին մասնաճյուղի ուսանողները:

Միջազգային համաժողովում ԵՊՀ ԻՄ ուսանողուհիներ Նազելի Եսայանը և Մարիամ Դարբինյանը ներկայացրին «Միգրացիոն գործընթացները և միջմշակութային հաղորդակցությունը գլոբալ մարտահրավերների պայմաններում» և «Հուզական ինտելեկտը որպես ուսուցման գործընթացի անհրաժեշտ պայման» թեմաներով զեկուցումներ՝ ստանալով առաջին կարգի դիպլոմներ:

Մարիամ Դարբինյանը և Նազելի Եսայանը, մեզ հետ զրույցում անդրադառնալով համաժողովին իրենց մասնակցությանը և գրանցած հաջողություններին, խորին շնորհակալություն հայտնեցին համաժողովի կազմակերպիչներին և իրենց գիտական ղեկավար, ԵՊՀ ԻՄ օտար լեզուների ամբիոնի պրոֆեսոր, մ.գ.թ., Ռուսաստանի բնական գիտությունների ակադեմիայի (ԲԳՌԱ) պրոֆեսոր Սվետլանա Մինասյանին՝ համաժողովին մասնակցելու հրաշալի հնարավորության և դրա նախապատրաստման գործում անփոխարինելի աջակցության համար:

ԵՊՀ Իջևանի մասնաճյուղի ղեկավարության և ողջ անձնակազմի անունից սիրով շնորհավորում ենք մեր ուսանողներին՝ մաղթելով նրանց նորանոր ձեռքբերումներ ուսման մեջ և կյանքում: