2016թ. հունվարի 8-25-ը ԵՊՀ ԻՄ-ի կիրառական արվեստի ֆակուլտետում կայացան 2015-2016 ուստարվա I կիսամյակի եզրափակիչ գնահատմամբ և հանրագումարային քննությունները:

Կիրառական արվեստի ֆակուլտետի դեկան Ա.Մարգարյանն, ամփոփելով քննությունների արդյունքները, նշեց, քննաշրջանը կազմակերպվել է սահմանված կարգով, ըստ նախապես հաստատված ժամանակացույցների: Ֆակուլտետում իրականացվել են քննություններ 31 դասընթացներից,  մասնակցել է 88 ուսանող:

Հատկանշական է, որ ֆակուլտետում անցկացված մասնագիտական բոլոր քննությունների արդյունքները ձևավորվել են ամբիոնների կողմից հաստատված քննական հանձնաժողովների մասնակցությամբ:

«Իր անցկացման ձևով այս տարի ուշագրավ և հետաքրքրական էր հատկապես «Դիզայն» մասնագիտության երկրորդ կուրսում «Աշխատանք նյութի վրա-3» դասընթացի քննությունը, որի ժամանակ ուսանողները ներկայացան կիսամյակի ընթացքում իրենց իսկ ձեռքով պատրաստված երեքական հագուստներով»,- ընդգծեց պարոն Մարգարյանը»:   

Հարցազրույցի ընթացքում Կիրառական արվեստի ֆակուլտետի դասախոսները նշեցին, որ քննություններն անցկացվել են պատշաճ կարգով և օբյեկտիվորեն, ուսանողների կողմից բողոքներ չեն եղել:

Նրանք շեշտեցին, որ քննությունների ընթացքում գործում էր ազատ մրցակցության սկզբունքը. վճարովի ուսուցման համակարգում սովորող ուսանողների մի մասը քննաշրջանի ընթացքում շատ լավ հանդես եկավ և ցուցաբերեց բարձր առաջադիմություն, որը բավականին ողջունելի է:

Թեև ուսանողների ընդհանուր պատրաստվածության մակարդակը   նորմալ էր, սակայն դասավանդողներն առանձնացրին այն հանգամանքը, որ բարձր կուրսերի ուսանողներն իրենց աշխատանքներում պետք է ավելի մեծ ուշադրություն դարձնեն ստեղծագործական մտքի, անհատականության դրսևորմանը՝ նմանակումը հասցնելով նվազագույնի:

2016թ. հունվարի 21-26-ին Հումանիտար գիտությունների ֆակուլտետում կայացան կուրսային աշխատանքների պաշտպանություններ:

Հունվարի 21-ին տեղի ունեցավ «Հայոց լեզու և գրականություն» մասնագիտության երրորդ կուրսի ուսանողների կուրսային աշխատանքների պաշտպանությունը, որի հանձնաժողովի կազմում ընդգրկված էին Հայոց լեզվի և գրականության ամբիոնի վարիչ, բ.գ.թ., դոցենտ Վ.Ավագյանը, ամբիոնի դոցենտ, բ.գ.թ. Ա.Սարհատյանը, ասիստենտ, բ.գ.թ. Կ.Պողոսյանը:

Հունվարի 25-ին կայացավ «Հայոց լեզու և գրականություն» մասնագիտության չորրորդ կուրսի ուսանողների կուրսային աշխատանքների պաշտպանությունը, որի հանձնաժողովի կազմում ընդգրկված էին Հայոց լեզվի և գրականության ամբիոնի վարիչ, բ.գ.թ., դոցենտ Վ.Ավագյանը, ամբիոնի ասիստենտներ, բան. գիտ. թեկնածուներ Ա.Հասանյանը և Վ.Աղաբաբյանը:

Հունվարի 26-ին կայացան «Անգլերեն լեզու և գրականություն»,  «Ֆրանսերեն լեզու և գրականություն» մասնագիտությունների չորրորդ կուրսերի ուսանողների կուրսային աշխատանքների պաշտպանությունները, որոնց հանձնաժողովների կազմերում ընդգրկված էին Օտար լեզուների ամբիոնի վարիչ, բ.գ.թ., դոցենտ Ք.Հարությունյանը, Հայոց լեզվի և գրականության ամբիոնի վարիչ, բ.գ.թ., դոցենտ Վ.Ավագյանը, նույն ամբիոնի ասիստենտ, բ.գ.թ. Ա.Հասանյանը, դասախոս Ա.Ադամյանը:

Բոլոր պաշտպանությունների ժամանակ տեսական մտքերը հիմնավորվում էին գործնական համապատասխան մեջբերումներով, գեղարվեստական հյութեղ օրինակներով:

Ուսանողների բանավոր խոսքը հիմնակնում անկաշկանդ էր, միայն թե որոշ ուսանողներ երբեմն դժվարանում էին սահուն ու տրամաբանված խոսք կառուցել, որի ուղղությամբ անհրաժեշտ է ավելի հետևողական լինել:

«Հայոց լեզու և գրականություն» մասնագիտության երրորդ կուրսի կուրսային աշխատանքների պաշտպանության հանձնաժողովի անդամ Ա.Սարհատյանը հարցազրույցի ընթացքում նշեց, որ այս տարի կուրսի 18 ուսանողներն էլ ներկայացրել էին գրեթե անթերի աշխատանքներ, որոնք համապատասխանում էին կուրսային աշխատանքներին ներկայացվող պահանջներին՝ թեմայի արդիականություն, բովանդակության և թեմայի համապատասխանություն, նպատակի և խնդիրների ներկայացում ու հիմնավորում, «հարցի պատմություն» և այլն:

«Աշխատանքները ներկայացված էին բարեխղճորեն, դրանց մեջ նկատելի էին ղեկավարների՝ ուսանողներին ինքնուրույն գիտական որոնումների մղելու հետևողական ջանքերը: Արդյունքում գրեթե բոլոր աշխատանքներն ունեին կանոնիկ կառուցվածք, արժեքավոր հղումներ, – ընդգծեց տիկին Սարհատյանը: – Որոշ աշխատանքներ էլ աչքի էին ընկնում իրենց ինքնատիպությամբ»:

Հանձնաժողովների անդամ Վ.Ավագյանը հատկանշեց, որ բարձր էր հատկապես  «Հայոց լեզու և գրականություն» մասնագիտության չորրորդ կուրսի ուսանողների կուրսային աշխատանքների պաշտպանության ընդհանուր մակարդակը: Նշեց, որ ուսանողների մասը դրսևորել էր նկատելի ինքնուրույնություն, և միայն մեկ-երկու ուսանողներ էին, որ դուրս չէին եկել տեսական գրականության շրջանակից: Պարոն Ավագյանն ամփոփեց, որ կուրսային աշխատանքների պաշտպանությունը կարևոր նախափորձ է ավարտական աշխատանքների պաշտպանության ժամանակ լավ հանդես գալու համար:

2015թ. հունվարի 23-ին ԵՊՀ ԻՄ-ի գիտական խորհրդին կից որակի կառավարման մշտական հանձնաժողովի նախագահ Ա.Մակարյանը հանդիպեց ֆակուլտետներում որակի կառավարման մշտական հանձնաժողովի լիազոր-ներկայացուցիչների հետ:

Հանդիպման ընթացքում քննարկվեցին ֆակուլտետներում որակի ներքին ապահովմանն ուղղված մի շարք խնդիրներ:

Ա.Մակարյանը մատնանշեց, որ լիազոր-ներկայացուցիչների աշխատանքի նպատակն է այնպիսի գործունեության կազմակերպումը, որն ուղղված է կառուցվածքային ստորաբաժանումներում կրթական, գիտական և նորարարական գործունեության որակի ապահովմանը:

 Ներկայացվեցին կառուցվածքային ստորաբաժանումներում աշխատանքների արդյունավետ կազմակերպման համար ձևավորված  որակի կառավարման հանձախմբերի աշխատանքները, որակի ներքին ապահովման համակարգի բարելավմանն ուղղած միջոցառումները, աշխատանքների ընթացքում ի հայտ եկող դժվարությունները և դրանք հաղթահարելու միջոցները:

Վերջում հանդիպման մասնակիցների միջև տեղի ունեցավ ակտիվ քննարկում:

 2016թ. հունվարի 21-25-ը ԵՊՀ Իջևանի մասնաճյուղում կայացան ֆակուլտետների (Բնական, Հումանիտար գիտությունների, Տնտեսագիտության, Կիրառական արվեստի) գիտական խորհուրդների ընդլայնված նիստեր, որոնց մասնակցում էին տնօրենը, ֆակուլտետների պրոֆեսորադասախոսական և վարչական անձնակազմի ներկայացուցիչները:

Հունվարի 21-ին տեղի ունեցավ Բնական գիտությունների ֆակուլտետի գիտական խորհրդի ընդլայնված նիստը, հունվարի 22-ին կայացան Հումանիտար գիտությունների և  Տնտեսագիտության ֆակուլտետների նիստերը, 25-ին՝ Կիրառական արվեստի ֆակուլտետի նիստը:

Ընդլայնված նիստերում քննարկվեցին մի շարք հարցեր, որոնք վերաբերում էին ԵՊՀ ԻՄ-ի՝ 2016-2020թթ. զարգացման ռազմավարական ծրագրի և նրա  իրականացման ժամանակացույց-պլանի նախագծին:

Տնօրենի կողմից նշվեց, որ հիմք է ընդունվել ԵՊՀ-ի ռազմավարական ծրագիրը, հաշվի են առնվել նախորդ ծրագրի բացթողումները և տարածաշրջանի ժողովրդագրական պատկերը:

Ներկայացվեց, որ մասնաճյուղն իր նոր ռազմավարությամբ պլանավորում է իր ուսումնագիտական նոր գործունեությունը՝ նպատակ ունենալով տրամադրել աշխատաշուկայի արդի պահանջներին համահունչ, կառուցվածքային և բովանդակային վերափոխված կրթական  ծրագրեր, ընդլայնել դասախոսական կազմի և ուսանողների ներգրավվածությունը հետազոտական աշխատանքներում, խթանել հասարակայնության հետ կապերն ու բարձրացնել սոցիալական պատասխանատվությունը, զարգացնել ու արդիականացնել ուսումնագիտական գործընթացի իրականացման համար անհրաժեշտ լսարանային, լաբորատոր և գրադարանային պայմանները և այլն:

Ս.Առաքելյանը հանձնարարեց, որ ֆակուլտետներում իրականացվեն նոր ռազմավարական ծրագրի և նրա պլան-ժամանակացույցի քննարկումներ և ներկայացվեն իրատեսական առաջարկություններ:

Որպես ռազմավարական ծրագրի առաջին քայլ՝ նիստերում առանձնահատուկ շեշտվեց, որ ամբիոններում անհրաժեշտ է ընդլայնել գիտական և հետազոտական աշխատանքների ծավալը՝ դրանցում ներգրավելով նաև ուսանողներին, ավելացնել գիտական հոդվածների քանակը, հրատարակել ուսումնական և ուսումնամեթոդական ձեռնարկներ: Ի դեպ, տնօրենի կողմից շեշտվեց, որ այդ աշխատանքների իրականացման, մասնավորապես՝ մեթոդական ձեռնարկների հրատարակման գործում մասնաճյուղի ղեկավարությունը կցուցաբերի իր օժանդակությունը:

 Նշվեց, որ ուսումնական  գործընթացի արդյունավետ իրականացման հարցում մեծ դեր ունեն դասընթացներիի փաթեթները, և պետք է ավելի հետևողական լինել ուսանողներին դրանց մեջ ներգրավելու ուղղությամբ: