Երևանի պետական համալսարանի Իջևանի մասնաճյուղ

ԵՊՀ ԻՄ-ի գրադարանի վարիչը մասնակցեց «Նորարար գրադարաններ 2019» աշխատաժողովին

1. գլխավոր

 2019թ. սեպտեմբերի 23-25-ին Ծաղկաձորի «Ալպինա» հյուրանոցում կայացավ «Նորարար գրադարաններ 2019» աշխատաժողովը, որին մասնակցում էին ՀՀ քաղաքային և մարզային, հանրային և համալսարանական գրադարանների աշխատողներ, այդ թվում՝ ԵՊՀ ԻՄ-ի գրադարանի վարիչ Վլադիմիր Պողոսյանը:

Նախ մասնակիցներին ողջունեց Հայաստանում ԱՄՆ դեսպանության ամերիկյան կենտրոնի տնօրեն Ներսես Հայրապետյանը։ Նա նշեց, որ դեսպանությունը մեծ պատրաստակամությամբ է հովանավորել այս միջոցառումը, որը կնպաստի գրադարաններում նոր ծրագրեր ներդնելուն, նորարար տեխնոլոգիաներով գրադարանային առօրյան հագեցնելուն և գրավիչ դարձնելուն։

 «Գուգլի ամպային տեխնոլոգիաները գրադարանավարի առօրյա աշխատանքում», «Սմարթ գրադարանի ձևավորում Ամազոնի տեխնոլոգիական լուծումներով» թեմաների շրջանակներում բանախոս Ավետիկ Պետրոսյանն ընդգծեց, որ ժամանակակից գրադարանների վերաձևման և նորարար գաղափարների իրացման համար անհրաժեշտ է հետևել տեխնոլոգիական զարգացման միտումներին, և գրադարանների փոխակերպումն այդ ճանապարհին ուղղակի բացառում է այլընտրանքը։

«Օնլայն համայնքների հետ աշխատանք, մոդերացիա», «Կայքերի ու սոցցանցային օգտահաշիվների անվտանգություն», «Լուսանկարչության հիմունքներ» թեմաների շրջանակներում բանախոս Արթուր Պապյանը նշեց, որ ժամանակակից գրադարանն առանց սոցհարթակների և էլեկտրոնային լուծումների չի կարող բավարարել  մերօրյա ընթերցողի պահանջները, և գրադարանային հանրույթը պետք է օգտագործի հնարավորությունները՝ սոցիալական հարթակներում նոր ընթերցող գտնելու և գրադարանը գրավիչ դարձնելու համար։

«Հայաստանի գիտատեղեկատվական հանգույցը գործունեության մեջ։ Ձեռքբերումներ և խնդիրներ», «Digital Humanities. Ներածություն», «Տվյալների շտեմարանների կառուցման սկզբունքները (փոքր գրադարանի օրինակով)» թեմաների շրջանակներում բանախոսներ Տիգրան Զարգարյանն ու Հովհաննես Կիզողյանն անդրադարձան Հայաստանի գրադարանային համայնքի խնդիրներին ու մատենավարման տեխնոլոգիական նորագույն լուծումներին։

Աշխատաժողովի վերջին օրը մասնակցիները ԱՄՆ դեսպանության հասարակայնության հետ կապերի բաժնի վարիչ Լիա Միլլերի հետ ունեցան հանդիպում, որի ընթացքում քննարկեցին Հայաստանի գրադարանների զարգացման ուղիներն ու միտումները։

ԵՊՀ ԻՄ-ի գրադարանի վարիչ Վլադիմիր Պողոսյանն իր ելույթում աշխատաժողովի մասնակիցիներին ներկայացրեց ԵՊՀ Իջևանի մասնաճյուղի գրադարանի նորարար ձեռքբերումները, ԵՊՀ ԻՄ-ի էլեկտրոնային գրադարանի կառուցվածքը, նպատակները, բաց և մատչելի էլեկտրոնային համակարգը, ինչպես նաև էլեկտրոնային գրականությունից օգտվելու հնարավորություններն ու վիճակագրությունը։ Վ.Պողոսյանը նշեց, որ այս աշխատաժողովը հնարավորություն է ընձեռում ոչ միայն ծանոթանալ ՀՀ գրադարանային միջավայրի խնդիրներին, այլև կանխատեսել զարգացման միտումներ, որոնցում գրադարանային յուրաքանչյուր աշխատակցի դրակատարումը գերակա է։

Կայացավ «Ամենախելացին» ուսանողական ինտելեկտուալ խաղը՝ նվիրված ԵՊՀ ԻՄ-ի հիմնադրման 25-ամյակին

0-02-04-1b6e2abbe6508428c1af853d27eb9904963ab24140b03da9f249595921d2998e_7e9c5cf 2019թ. սեպտեմբերի 24-ին ԵՊՀ ԻՄ-ի ՈՒԳԸ նախաձեռնությամբ կայացավ ԵՊՀ ԻՄ-ի հիմնադրման 25-ամյակին նվիրված «Ամենախելացին» ուսանողական ինտելեկտուալ խաղը, որին մասնակցում էր 9 ուսանող՝ մասնաճյուղի բոլոր ֆակուլտետներից։

Խաղը վարեց «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանողուհի Լիանա Ներսիսյանը։

Ինտելեկտուալ խաղի առաջին փուլն անցկացվեց բջջային հատուկ հավելվածի՝ Quizizz-ի օգնությամբ, տրվեց ընդհանուր զարգացվածությունն ստուգող 10 հարց, ընդ որում՝ մասնակիցները լրացուցիչ միավորներ վաստակեցին նաև հարցերին արագ պատասխանելու համար։ Առավելագույն միավոր հավաքած 5 ուսանողները հնարավորություն ստացան խաղը շարունակել երկրորդ փուլում։

Երկրորդ և երրորդ փուլերի համար «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանող Արայիկ Շահնազարյանը HTML, CSS և JavaScript լեզուների միջոցով ստեղծել էր համակարգչային հատուկ ծրագիր, որը խաղի 2-րդ և 3-րդ փուլերը հնարավորինս մոտեցնում էր հեռուստախաղի ձևաչափին։

Երկրորդ փուլում մասնակիցները 10 թեմաներից ընտրեցին երկուական թեմա, այնուհետև փորձեցին պատասխանել իրենց ընտրած թեմայի հարցերին 1 րոպեի ընթացքում։ Լարված մրցակցության պայմաններում 2-րդ փուլը հաղթահարեցին «Պատմություն» մասնագիտության 4-րդ կուրսի ուսանողներ Մհեր Ղալումյանը և Շիրակ Գասպարյանը, «Զբոսաշրջություն» մասնագիտության 1-ին կուրսի ուսանող Թինա Թամրազյանը։

Թեժ պայքար ծավալվեց նաև 3-րդ փուլում։ Մասնակիցները պետք է պատասխանեին իրենց կողմից նախապես ընտրված թեմայի հարցերին։

Առավելագույն միավորներ վաստակելով՝ «Ամենախելացին» խաղի հաղթող ճանաչվեց Թինա Թամրազյանը, ով պարգևատրվեց մեդալով, հուշանվերով, պատվոգրով և գրադարանի կողմից նվիրաբերված գրքով։

Պատվոգրերով և գրքերով պարգևատրվեցին նաև Շիրակ Գասպարյանը և Մհեր Ղալումյանը, ովքեր զբաղեցրին համապատասխանաբար 2-րդ և 3-րդ հորիզոնականները։

Խաղի մյուս 6 մասնակիցներին հանձնվեցին հավաստագրեր, իսկ խաղի կայացմանն օժանդակելու համար շնորհակալագրեր տրվեցին ԵՊՀ ԻՄ-ի գրադարանին, ուսանողներ Լիանա Ներսիսյանին, Արգիշտի Մարգարյանին, Արայիկ Շահնազարյանին։

Բոլոր լուսանկարները տե՛ս Պատկերասրահում:

Խաղաղության ծառատունկ՝ նվիրված ԵՊՀ-ի 100-ամյակին և ԵՊՀ ԻՄ-ի 25-ամյակին

1. Գլխավոր

 ԵՊՀ Իջևանի մասնաճյուղի և Եկեղեցիների համաշխարհային խորհրդի հայաստանյան Կլոր սեղան հիմնադրամի համատեղ ջանքերով 2018-19 ուստարվա II կիսամյակում ԵՊՀ ԻՄ-ում իրականացվել էր «Հակամարտությունների փոխակերպում» խորագրով հնգօրյա դասընթացը, որին մասնակցել էին ԵՊՀ ԻՄ-ի տարբեր մասնագիտությունների երկու տասնյակ ուսանողներ: Դասընթացի տեսական մասը վարել է ԵՊՀ ԻՄ-ի գրադարանի վարիչ Վլադիմիր Պողոսյանը, իսկ գործնական մասը՝ ԵՊՀ ԻՄ-ի շրջանավարտների և արտաքին շահակիցների հետ տարվող աշխատանքների համակարգող Էրինե Ղարայանը։

Դասընթացի վերջում նախատեսված էր իրականացնել երկու փոքրածավալ դրամաշնորհային նախագիծ, որոնցից մեկը «Խաղաղության ծառատունկն էր»:

Սեպտեմբերին ԵՊՀ ԻՄ-ի բակում ծրագրի մասնակիցները տնկեցին փշատերև ծառեր, իսկ վերջում տեղի ունեցավ քննարկում՝ «Սահմանամերձ շրջանի երիտասարդները հանուն խաղաղության» թեմայով:

Քննարկման ընթացքում մասնակիցները վերհանեցին սահմանամերձ համայքների երիտասարդների հիմնախնդիրները, առաջարկեցին երիտասարդական միջավայրի բարելավման իրենց տեսլականը: Որպես առանցքային խնդիր դիտարկվեց անվտանգության ապահովման և սահմանամերձ համայքներում բնակչության կենսամակարդակի բարելավման ուղղությամբ  պետական և համայնքային քաղաքականությունը:

2019թ. հոկտեմբերին նախատեսված է իրականացնել «Հակամարտությունների փոխակերպում» խորագրով հնգօրյա երկրորդ դասընթացը, որին կարող են մասնակցել 18-25 տարեկան երիտասարդները:

ԵՊՀ ԻՄ-ի կիրառական արվեստի ֆակուլտետի ուսանողների համար Աննա Ատոյանն անցկացրեց վարպետաց դաս

1. Գլխավոր

 2019թ. սեպտեմբերի 23-ին «Տավուշն աշխարհի աչքերով» միջազգային նկարչական սիմպոզիումի շրջանակներում Ուկրաինայից ժամանած հայ նկարչուհի Աննա Ատոյանը ԵՊՀ ԻՄ-ի կիրառական արվեստի ֆակուլտետի ուսանողների համար անցկացրեց վարպետաց դաս՝ նվիրված բատիկին (կտորը գունավորելու ձեռքի տեխնիկա՝ ռեզերվի կիրառմամբ)։

Վարպետաց դասին ներկա էին «Տավուշն աշխարհի աչքերով» միջազգային սիմպոզիումի գլխավոր համակարգող, ՀՆՄ Տավուշի մասնաճյուղի ղեկավար, գեղանկարչուհի Արմինե Թումանյանը, սիմպոզիումի նկարիչներ, ԵՊՀ ԻՄ-ի կիրառական արվեստի ֆակուլտետի վարչական և պրոֆեսորադասախոսական անձնակազմի անդամներ, ուսանողներ, հյուրեր:

Նկարչուհին դասի ընթացքում ուսանողներին փոխանցեց իր կիրառած տեխնիկայի վերաբերյալ տեսական գիտելիքներ և գործնական հմտություններ:

Մասնավորապես ներկայացվեց, որ բատիկ (batik) բառը ինդոնեզերենից թարգմանաբար նշանակում է մոմի կաթիլ: Բատիկի տեխնոլոգիան հին ժամանակներից կիրառվել է Ինդոնեզիայի և Հնդկաստանի ժողովուրդների կողմից, Եվրոպայում այն սկսել են կիրառել 20-րդ դարից: Կան բատիկի մի քանի տեսակներ` տաք, սառը և ազատ զարդանկար, որոնք տարբերվում են կտորի ռեզերվացման եղանակով:

Աննա Ատոյանը կիրառեց տաք բատիկի տեխնիկան, որի դեպքում որպես ռեզերվ օգտագործվում են մոմանյութեր: Եղանակը կոչվում է տաք բատիկ, քանի որ մոմանյութը կիրառվում է տաք, հալված վիճակում: Մոմանյութով ծածկված մասերը չեն ներծծում ներկը և սահմանափակում են դրա տարածումը:

Վարպետաց դասի ընթացքում Ատոյանը ոչ միայն պատասխանեց ուսանողների ու դասախոսների հարցերին, այլև նրանց ներգրավեց նկարի ստեղծման գործընթացում:

Բոլոր լուսանկարները տե՛ս Պատկերասրահում:

 

Տավուշի մարզպետարանի, «ՊիկսԱրտ» ընկերության և ԵՊՀ ԻՄ-ի համագործակցությամբ բուհի մերձակա տարածքում իրականացվեցին բարեկարգման աշխատանքներ

DSCF8241 2019թ. սեպտեմբերի 22-ին ՀՀ Տավուշի մարզպետարանի նախաձեռնությամբ, Հայաստանի տեղեկատվական տեխնոլոգիաների ոլորտի «ՊիկսԱրտ» (“PicsArt”) ընկերության և ԵՊՀ Իջևանի մասնաճյուղի համատեղ ջանքերով ԵՊՀ ԻՄ-ի մերձակա տարածքում իրականացվեցին բարեկարգման աշխատանքներ:

Նախաձեռնությանը մասնակցում էին Տավուշի մարզպետ պարոն Հ.Չոբանյանը, ԵՊՀ ԻՄ-ի տնօրենի պաշտոնակատար Ա. Հ. Մակարյանը,  մարզպետարանի և բուհի աշխատակիցներ, ուսանողներ, «ՊիկսԱրտ» ընկերության կամավորական խմբի 25 անդամներ:

Մասնակիցները մաքրման և բարեկարգման աշխատանքներ իրականացրին մասնաճյուղի մերձակա տարածքում՝ Երիտասարադական 3 փողոցի գետափնյա ճանապարհի երկայնքով:

 Կատարվեց կամրջից կամուրջ հատվածի մետաղական պարսպի մաքրում և ներկում, փողոցի երկայնքով տեղադրված լուսատուների վերականգնում՝ լամպերի տեղադրում:

Նախաձեռնության մասին կարող եք տեղեկանալ նաև ՀՀ Տավուշի մարզպետարանի պաշտոնական կայքէջում:

Բոլոր լուսանկարները տե՛ս Պատկերասրահում: