Երևանի պետական համալսարանի Իջևանի մասնաճյուղ

Կայացավ միջոցառում՝ «ՕԼԳ» առաջին կուրսի ուսանողների մասնակցությամբ

1. գլխավոր

 2019թ. դեկտեմբերի 13-ին «Օտար լեզու և գրականություն» մասնագիտության առաջին կուրսի ուսանողների մասնակցությամբ կայացավ «Անգլերեն լեզվի դատավարությունը» խորագրով ինտերակտիվ միջոցառում, որը կազմակերպել էր Անգլերեն լեզվի և գրականության ամբիոնի դասախոս Շ.Գրիգորյանը:

Ներկա էին Հումանիտար գիտությունների ֆակուլտետի վարչական և պրոֆեսորադասախոսական անձնակազմի ներկայացուցիչներ, Անգլերեն լեզվի և գրականության ամբիոնի անդամները:

Միջոցառման նպատակն էր ընդգծել և հիմնավորել անգլերենի՝ որպես հաղորդակցման համընդհանուր միջոցի կարևորությունը:

Մեղադրող կողմերն էին ֆրանսերենը, գերմաներենը, ռուսերենը, չինարենը և իսպաներենը:

Դիմելով վերոնշյալ լեզուների մասնագետների օգնությանը՝ ուսանողները կարճ ժամանակում սովորել էին տվյալ լեզվի գեղեցկությունն ընդգծող բանաստեղծություններ, գրական-գեղարվեստական երկերից հատվածներ,   ասույթներ, երգեր, որոնք ներկայացրին միջոցառման ընթացքում:

Մեղադրող յուրաքանչյուր կողմ փորձեց ապացուցել իր լեզվի՝ միջազգային դառնալու հնարավորությունները:

Գնահատվեց յուրաքանչյուր լեզվի գեղեցկությունը, ինքնատիպությունը, կարևորությունը, յուրաքանչյուրին շնորհվեց բնութագրող տիտղոս:

Դատավարության արդյունքում անգլերենի միջազգային լեզու լինելն արդարացվեց:

Բոլոր լուսանկարեները տե´ս Պատկերասրահում:

Կայացավ «Հայ քնարերգության երաժշտական գույները» խորագրով գրական-երաժշտական ցերեկույթ՝ նվիրված ԵՊՀ ԻՄ-ի 25-ամյակին

1. գլխավոր

 2019թ. դեկտեմբերի 12-ին ԵՊՀ ԻՄ-ի 25-ամյակին նվիրված միջոցառումների շրջանակներում մասնաճյուղում կայացավ «Հայ  քնարերգության  երաժշտական գույները» խորագրով գրական-երաժշտական ցերեկույթ, որը կազմակերպել էր Հայոց լեզվի և գրականության ամբիոնի դոցենտ, բ.գ.թ. Ա.Սարհատյանը:

Միջոցառման  նպատակն  էր ներկայացնել հայ քնարերգության անվանի դեմքերի՝ Սայաթ-Նովայի, Կոմիտասի, Տերյանի ու Իսահակյանի, Ս.Կապուտիկյանի ու Հովհ. Շիրազի, Հ.Սահյանի, Սևակի ու Սարյանի, նաև արևմտահայ անվանի բանաստեղծ Դևի քնարերգության ու նրանց՝ երգի վերածված հանրահայտ մի քանի ստեղծագործություններ:

Գեղարվեստական հնչեղություն ու ժամանակագրական հաջորդականություն ունեցող սցենարի հիման վրա իրար էին հաջորդում ու մեկընդմիջվում պոեզիան ու երաժշտությունը՝ սկսած Գողթան երգերից մինչև Սայաթ-Նովա ու Սահյան:

Միջոցառմանը մասնակցում էին «Հայոց լեզու և գրականություն» մասնագիտության առաջին, երրորդ ու չորրորդ կուրսի ուսանողուհիները, որոնց կատարմամբ քնարական հուզիչ բանաստեղծությունները, մեներգերն ու խմբերգերը մեծ տպավորություն գործեցին հանդիսատես-ունկնդիրների վրա:

Առանձնապես տպավորիչ էին Աստղիկ Ղազարյանի «Նավզիկե», Անուշ Խաչատրյանի «Կգամ», Նունե Վարդումյանի  «Ղողանջ հարցման», Գոհար Մկրտումյանի «Թե աչքերս քեզ որոնեն» բանաստեղծությունների հուզիչ կատարումները:

Ունկնդիրներին մեծ բավականություն պատճառեցին Մանե Մատինյանի, Լիանա Յարալյանի, Նինա Հարությունյանի երաժշտական կատարումները, Գուրգեն Դալյանի ձայնակցությամբ և կիթառի նվագակցությամբ՝ «Բինգյոլը», «Մարտիկի երգը», «Դու նորից եկել ես» երգերն ու այլ  խմբերգեր:

Մեծ քնարերգուների կողքին չէր մոռացվել ամենամեծ երգահանը՝ ժողովուրդը, որի ստեղծած երգերի մի գողտրիկ  փունջ ևս  ներկայացվեց մեծ ոգևորությամբ: Գրական-երաժշտական կատարումները եզրափակվեցին «Հայաստան» երգով, որին ձայնակցեց ողջ դահլիճը:

Միջոցառման մասնակիցներն իրենց ազդեցիկ կատարումներով ևս մեկ անգամ ընդգծեցին այն գաղափարը, որ հայ քնարերգությունը մեր ժողովրդի անցած ճանապարհի, նրա խիզախումների ու հերոսական պայքարի, դաժան տառապանքների ու լուսավոր երազանքների էպիկական ու քնարական   արտացոլանքն է: Հույզերի բոլոր գույներն ու երանգները կան հայ գրականության մեջ, որոնք դարձել են չմոռացվող բանաստեղծություններ, հուզաթաթավ մեղեդիներ, երգ ու  երաժշտական բազմաժանր անգնահատելի արժեքներ:

Վերջում ելույթ ունեցան Հայոց լեզվի և գրականության ամբիոնի դոցենտ, բ.գ.թ. Ա.Հասանյանը, Տավուշի թեմի Սբ. Մակարավանքի հոգևոր հովիվ ’Տեր Արշավիր քահանա Ասատրյանը՝ արտահայտելով իրենց հիացմունքն ու գոհունակությունը բարձր մակարդակով կազմակերպված միջոցառման վերաբերյալ, շնորհակալություն հայտնելով մասնակիցներին ու կազմակերպչին՝ տիկին Աիդա Սարհատյանին:

«Հայ քնարերգության երաժշտական գույները» խորագրով գրական-երաժշտական ցերեկույթն ավարտվեց Արշավիր քահանա Ասատրյանի օրհնության խոսքով ու աղոթքով:

Բոլոր լուսանկարները տե‘ս Պատկերասրահում:

«Թուրքական ապրանքների վաճառքը պետք է արգելվի» թեմայով բանավեճում հաղթեց «Ալֆա» թիմը

1. գլխավոր

 2019թ. դեկտեմբերի 12-ին ԵՊՀ Իջևանի մասնաճյուղում կայացավ բանավեճի առաջնության 1/2 եզրափակչի առաջին խաղը, որին մասնակցում էին «Ալֆա» և «Օմեգա» թիմերը:

Խաղի դատավորներն էին ՈՒԳԸ փոխնախագահ Շիրակ Գասպարյանը (գլխավոր դատավոր), Տնտեսագիտության ֆակուլտետի ՈՒԽ նախագահ Լուիզա Մադաթյանը, Հայոց պատմության և հասարակագիտության ամբիոնի դոցենտ Հովսեփ Մովսեսյանը:

Բանավեճը «Թուրքական ապրանքների վաճառքը պետք է արգելվի» թեմայով էր:

Ինչպես որոշվել էր խաղից 10 օր առաջ կայացած վիճակահանությամբ, կողմ դիրքորոշմամբ հանդես եկավ «Օմեգա» թիմը, իսկ դեմ դիրքորոշմամբ՝  «Ալֆա» թիմը:

Երկու թիմերն էլ ցուցադրեցին հանդիսատեսի համար հետաքրքիր խաղ: 

 Լարված ու համառ պայքարից հետո 70-53 հաշվով հաղթեց «Ալֆա» թիմը:

Շնորհավորում ենք հաղթող թիմին՝ եզրափակչում մաղթելով հաջողություն, իսկ «Օմեգա» թիմին շնորհակալություն մասնակցելու և իրենց խաղով բանավեճի առաջնությունը գեղեցկացնելու համար:

Կայացավ տնօրենության հերթական նիստը

Դեկտ.-ի 11-ի տնօր. նիստի նկար2019թ. դեկտեմբերի 11-ին ԵՊՀ Իջևանի մասնաճյուղում կայացավ տնօրենության հերթական նիստը՝ Ա. Հ. Մակարյանի նախագահությամբ:

Տնօրենության նիստում քննարկվեցին ԵՊՀ ԻՄ-ի հեռակա ուսուցման համակարգի մի քանի ուսանողների հեռացմանը, «Ընդհանուր մանկավարժություն» մասնագիտության «Դպրոցական մանկավարժություն և մեթոդիկա» մագիստրոսական կրթական ծրագրի լիցենզիային վերաբերող, գիտահետազոտական կենտրոն ստեղծելու և մի քանի ընթացիկ հարցեր:

Մասնավորապես նշվեց, որ հեռակա ուսուցման համակարգի 3 ուսանող չի մասնակցել 2019-2020 ուստարվա առաջին կիսամյակի դասերին, և ԵՊՀ ԻՄ-ի  ներքին կարգապահական կանոնների 62-րդ կետի 4-րդ ենթակետի համաձայն՝ նրանք ենթակա են հեռացման, իսկ 1 ուսանող տարկետման ժամկետը լրանալուց հետո ուսանողական իրավունքները վերականգնելու դիմում չի ներկայացրել և դարձյալ ենթակա է հեռացման: Որոշվեց հեռակա ուսուցման համակարգի 4 ուսանողին հեռացնել մասնաճյուղից:

Հաջորդ հարցի վերաբերյալ նշվեց, որ ԵՊՀ ԻՄ-ի գիտական խորհրդի որոշմամբ՝ Մանկավարժության և հոգեբանության ամբիոնի և Ուսումնամեթոդական վարչության կողմից կազմվել է «Ընդհանուր մանկավարժություն» մասնագիտության «Դպրոցական մանկավարժություն և մեթոդիկա» մագիստրոսական կրթական ծրագրի լիցենզիա ստանալու փաթեթը: Այդ համատեքստում նշվեց, որ  2020թ. նախատեսվում է կատարել կառուցվածքային որոշ փոփոխություններ, ստեղծել փոքր գիտահետազոտական կենտրոն, որին տրվեց հավանություն:

Որոշվեց համապատասխան փաթեթը ներկայացնել Երևանի պետական համալսարան:

Ընթացիկ հարցերից էր ԵՊՀ ԻՄ-ի՝ 2020թ. ընդունելության տեղերի և ուսման վարձավճարների հարցը: Որոշվեց ընդունելության տեղերը թողնել անփոփոխ, 5 մասնագիտական կրթական ծրագրերի («Ֆինանսներ (ըստ ոլորտի)», «ԻԿՄ», «ԱԼԳ», «ՖԼԳ», «ՏՄՄ») համար կատարել ուսման վարձավճարների փոփոխություն՝ հաշվի առնելով Ուսումնամեթոդական վարչության կողմից իրականացված համեմատական վերլուծությունները:

ՈՒՍԱՆՈՂԱԿԱՆ ՌԵԿՏՈՐԱՏ 2019

a. 42

 2019թ. դեկտեմբերի 11-ին ԵՊՀ Իջևանի մասնաճյուղի ուսանողական խորհրդի և տնօրենության համագործակցությամբ, ուսանողի տոնի առթիվ տեղի ունեցավ ուսանողական ռեկտորատ, որը հաջորդեց նոյեմբերի 29-ին կայացած պիլոտային ռեկտորատին:

Ռեկտորատի ընթացքում համալսարանը ղեկավարեցին ուսանողները, ովքեր փոխարինեցին ԵՊՀ ԻՄ-ի աշխատակիցներին՝ վարչական, պրոֆեսորադասախոսական և ուսումնաօժանդակ անձնակազմի ներկայացուցիչներին:

Այն ուներ երկու հիմնական նպատակ. առաջինը` ուսանողներին ծանոթացնել համալսարանի կառուցվածքին, երկրորդը` ուսանողներին բուհի խնդիրներին այլ դիտանկյունից նայելու հնարավորություն տալ:

Ռեկտորատի մասնակցության առցանց հայտադիմումը լրացրել էին ութսունմեկ ուսանող` բոլոր ֆակուլտետներից և բոլոր կուրսերից: Հայտադիմումը լրացրած բոլոր ուսանողներին հնարավորություն է տրվել մասնակցել ռեկտորատին:

Օրվա ընթացքում պաշտոնավարող ուսանողներն իրենց պարտականությունների շրջանականերում իրականացրին`

  • դասապրոցեսի կազմակերպում,
  • մասնաճյուղի ներքին կարգապահության պահպանում,
  • ուսանողների կողմից դասախոսությունների վարում,
  • դասալսումների կազմակերպում,
  • նիստերի ու խորհրդակցությունների հրավիրում:

Թիմն աշխատում էր մեծ ոգևորությամբ և պատասխանատվությամբ:

Օրն ամփոփվեց եզրափակիչ նիստով, որին մասնակցեցին ԵՊՀ ԻՄ-ի տնօրենի պաշտոնակատար Ա. Հ. Մակարյանը և ռեկտորատի անդամները:

Նիստի ընթացքում ռեկտորատի մասնակիցները ներկայացրին իրենց կատարած աշխատանքները, ստացած տպավորությունները:

Ծրագիրը, հետաքրքիր լինելուց բացի, շատ օգտակար էր. այն նպաստեց, որ ուսանողները մոտիկից ծանոթանան բուհի կառավարմանը, նրա վարչական և պրոֆեսորադասախոսական անձնակազմի՝ որքան պատվաբեր, նույնքան էլ պատասխանատու և պարտավորեցնող աշխատանքին:

Բոլոր լուսանկարները տե´ս Պատկերասրահում: