Երևանի պետական համալսարանի Իջևանի մասնաճյուղ

«ՏՄՄ» 3-րդ կուրսի ուսանողները մանկավարժական պասիվ պրակտիկա են անցնում Իջևանի թիվ 1 հիմնական դպրոցում

glxavor

 2019-2020 ուսումնական տարվա 1-ին կիսամյակում (սկսած սեպտեմբերի 13-ից) Իջևանի Սպարտակ Սարգսյանի անվան թիվ 1 հիմնական դպրոցում իրականացվում է Հումանիտար գիտությունների ֆակուլտետի «Տարրական մանկավարժություն և մեթոդիկա» կրթական ծրագրի 3-րդ կուրսի մանկավարժական պասիվ պրակտիկան:

Պրակտիկայի նպատակը ուսանողների մասնագիտական կոմպետենցիաների զարգացումն է, մասնագիտական և կազմակերպչական կարողությունների ձեռքբերումը կոնկրետ գործունեության ընթացքում, ինչպես նաև ուսումնական նախագծերի, ինքնուրույն հետազոտական աշխատանքների համար ուսումնական ռեսուրսների հավաքագրումն ու ընդհանրացումը:

Մանկավարժական  պրակտիկայի ընթացքում պրակտիկանտների խնդիրը դասապրոցեսներն  ավելի  արդյունավետ  իրականացնելու միջոցների բացահայտումն է: 

Ուսանողները սովորում են գնահատել դասապրոցեսում հնարավոր կոնֆլիկտային իրավիճակները, վերհանել աշակերտների ուսումնառության ընթացքում առաջացող դժվարությունները, փորձում են իրենց յուրացրած մանկավարժական մեթոդները կիրառել գործնական խնդիրների լուծման ժամանակ:

Դպրոց գնալուց առաջ և պրակտիկայի ընթացքում  ուսանողները  հանդիպումներ  են ունեցել Մասնագիտական կողմնորոշման և պրակտիկայի կազմակերպման բաժնի վարիչ Լ.Բեգինյանի, Մանկավարժության և հոգեբանության ամբիոնի դասախոսներ, պրակտիկայի ղեկավար-պատասխանատու Վ.Մելիքսեթյանի, պրակտիկայի մանկավարժ-խորհրդատու Լ.Հարությունյանի և   պրակտիկայի հոգեբան Ա.Քամալյանի հետ:

Պրակտիկայի ընթացքում ուսանողները մասնակցում են բոլոր դասերին, գրում դասապլան, մեկնաբանում ուսուցչի կատարած մեթոդական հնարները: Բանիմաց և հմուտ դասվարներն իրենց փորձը ներկայացնում են ուսանողներին, նրանց նախապատրաստում դաս վարելուն:

Ուսանողները պրակտիկայի շրջանակներում նաև հանդիպել են դպրոցի  ուսումնական գծով փոխտնօրենի հետ: Դասավանդողի երկարամյա փորձ ունեցող մանկավարժը, զրուցելով պրակտիկանտների հետ, խոսել է դասավանդման գործընթացում առկա խնդիրների, ներկայիս աշակերտին հուզող հարցերի, ինչպես ուսումնառության, այնպես էլ հոգեբանական անհրաժեշտ մեթոդական բաղկացուցիչների մասին:

Պրակտիկայի  ընթացքում  ուսանողները  ձեռք են բերում դասը վարելու  մեթոդների, միջոցների, տեխնոլոգիաների վերաբերյալ գիտելիքներ, որոնք  մանկավարժական  հետագա  առաջնթացի  ու  կատարելագործման հնարավորություն  կտան:

Բոլոր լուսանկարները տե´ս Պատկերասրահում:

 

Կայացավ կանանց և աղջիկների՝ շախմատի մասնաճյուղային առաջնությունը

1.գլխավոր 2019թ. նոյեմբերի 14-ին ԵՊՀ ԻՄ-ի գրադարանում տեղի ունեցավ կանանց և աղջիկների՝ շախմատի մասնաճյուղային առաջնությունը, որին մասնակցեցին տարբեր մասնագիտությունների 6 ուսանողուհիներ:

Այն կազմակերպվել էր Ուսանողական գիտական ընկերության կողմից, մրցավարներն էին ՈՒԳԸ անդամ, «ԻԿՄ» 4-րդ կուրսի ուսանող Գերասիմ Ալավերդյանը և «ԻԿՄ» 3-րդ կուրսի ուսանող Արայիկ Շահնազարյանը:

Առաջնությունն ընթացավ շրջանաձև մրցակարգով (5 տուր):

«ՏՄՄ» 3-րդ կուրսի ուսանողուհի Հասմիկ Ալիխանյանը զբաղեցրեց 3-րդ հորիզոնականը:

2-րդ հորիզոնականը զբաղեցրեց «ՏՄՄ» 2-րդ կուրսի ուսանողուհի Զինա Ոսկանյանը:

Մրցաշարում հաղթեց «ԻԿՄ» 4-րդ կուրսի ուսանողուհի Սյուզաննա Միրզոյանը՝  ցուցաբերելով բացարձակ արդյունք (5 հաղթանակ):

Մրցանակային տեղեր զբաղեցնողները պարգևատրվեցին պատվոգրերով, իսկ կազմակերպիչները՝ շնորհակալագրերով:

Կանանց և աղջիկների՝ շախմատի մասնաճյուղային առաջնության փոխանցիկ գավաթը մնաց  Ս.Միրզոյանի մոտ:

Պարգևները հանձնեցին  Ա.Շահնազարյանը և Գ.Ալավերդյանը:

Բոլոր լուսանկարները տե´ս Պատկերասրահում:

Կայացավ «Համատեղի՛ր ուսումդ աշխատանքի հետ» խորագրով դաս-քննարկում

1. գլխավոր

 2019թ. նոյեմբերի 13-ին ԵՊՀ Իջևանի մասնաճյուղ այցելեցին «Ռոսգոսստրախ Արմենիա» ԱՓԲԸ Իջևանի մասնաճյուղի ներկայացուցիչները՝ մասնաճյուղի տնօրեն Գրիգոր Թամրազյանը, Անձնակազմի հավաքագրման բաժնի ղեկավար Լուսինե Գևորգյանը, վաճառքների մարզային պատասխանատուներ Դավիթ Ջավախյանը և Հովհաննես Գասպարյանը:

Այցելության նպատակն էր ԵՊՀ ԻՄ-ի ուսանողների համար «Համատեղի՛ր ուսումդ աշխատանքի հետ» խորագրով դաս-քննարկում անցկացնելը:

Քննարկմանը մասնակցում էին ԵՊՀ ԻՄ-ի ուսանողներ, շրջանավարտներ և աշխատակիցեր:

«Ռոսգոսստրախ Արմենիա» ԱՓԲԸ գործունեությունը մարզերում ընդլայնելու ծրագրի շրջանակներում ընկերության ներկայացուցիչները ուսանողներին ծանոթացրին իրենց կողմից առաջարկվող հնարավորություններին, թե ինչպես սովորելուն զուգընթաց աշխատանքային փորձ, համապատասխան գիտելիքներ ձեռք բերել և գումար վաստակել:

Դաս-քննարկման ընթացքում ուսանողներին մասնավորապես ներկայացվեցին ընկերության պատմությունը, առաքելությունը, այժմյան գործունեությունը, երիտասարդական նախագծերը («ՌՈՍԳՈՍՍՏՐԱԽ» անվանական կրթաթոշակ, մրցույթ ուսանողների համար, վարպետաց դասեր, ուսումնական պրակտիկա և ստաժավորում, «Ապագայի գործակալ» նախագիծը):

Ուսանողներին ծանոթացրին ապահովագրական խորհրդատուի գործառույթներին, ներկայացրին կարիերայի աճի հնարավորությունները (գրասենյակային վաճառքի մենեջեր, գործակալական խմբի ղեկավար, մասնաճյուղի տնօրեն, Վաճառքի ստորաբաժանման ղեկավար, այլ հաստիքներ), մարզում իրենց կողմից առաջարկվող թափուր հաստիքները (գործակալական խմբի համակարգող /Նոյեմբերյան, Բերդ/, վթարային մասնագետ /Նոյեմբերյան/, ապահովագրական խորհրդատու /Իջևան, Նոյեմբերյան, Բերդ, Դիլիջան/):

Այնուհետև քննարկման մասնակիցներն ընկերության ներկայացուցիչներից ստացան իրենց հետաքրքրող հարցերի պատասխանները, ուսանողները լրացրին ապահովագրական խորհրդատուի հարցաթերթ:

«ՀԼԳ» կրթական ծրագրի առկա ուսուցման III կուրսի ուսանողներն այցելեցին Գյումրու պատմամշակութային վայրեր ու տուն-թանգարաններ

glxavor

2019թ. նոյեմբերի 12-ին ԵՊՀ ԻՄ-ի «Հայոց լեզու և գրականություն» կրթական ծրագրի առկա ուսուցման III կուրսի ուսանողները 2019-2020 ուստարվա ուսումնական պլանով նախատեսված արտադրական պրակտիկայի շրջանակներում այցելեցին Գյումրու պատմամշակութային վայրեր ու մի քանի տուն-թանգարաններ: Պրակտիկայի ղեկավարն էր բ.գ.թ., դոցենտ Վ.Աղաբաբյանը:

Արտադրական պրակտիկայի հիմնական նպատակն է գործնական աշխատանքների հիման վրա ուսանողների տեսական գիտելիքների ամրապնդումը, իրենց մասնագիտության բնագավառում գործնական հմտությունների ու կարողությունների, ինքնուրույն մասնագիտական փորձի ձեռքբերումը:

Ուսանողներն այցելեցին մի շարք տուն-թանգարաններ: Գյումրու Հովհաննես Շիրազի տուն-թանգարանում ուսանողները բացահայտեցին մայրասեր գրողի կյանքի հետաքրքիր, ինչ-որ տեղ` հումորով լի դրվագները: Ավետիք Իսահակյանի տուն-թանգարանում մասնավորապես ներկայացվեցին Վարպետի անձնական իրերը, անցյալ դարասկզբի հայ օջախին բնորոշ կենցաղային գծերն ու տան կահավորանքի առանձնահատկությունները:

Ուսանողներն ամրապնդեցին իրենց գիտելիքները՝ վերհիշելով գրողների կյանքը, գրական և հասարակական գործունեությունը` չբավարարվելով միայն գրական հանճարների բացահայտումով: Գյումրեցի տաղանդների բացահայտումը շարունակվեց հաջորդ` դերասան Մհեր Մկրտչյանի տուն-թանգարանում, որտեղ ներկայացվեց շնորհաշատ դերասանի անձնական կյանքի պատմությունը, ֆիլմերում և թատրոնում կերտված դերերի մասին հետաքրքիր փաստեր: Այցելությունը Գյումրի եզրափակվեց փոքրիկ զբոսանքով, որի ընթացքում ուսանողները տեսան քաղաքի հին ու նոր կառույցները, ֆիլմերից հայտնի բակերն ու պատշգամբները:

Կայացավ պրակտիկայի ղեկավարների հետ տնօրենի հանդիպումը

1. գլխավոր

 2019թ. նոյեմբերի 9-ին ԵՊՀ Իջևանի մասնաճյուղում կայացավ պրակտիկայի ղեկավարների հետ մասնաճյուղի տնօրենի պաշտոնակատար Ա.Մակարյանի հանդիպումը, որին ներկա էին դեկանները, Հեռակա ուսուցման բաժնի վարիչը, ամբիոնների վարիչներ, կրթական ծրագրերի ղեկավարներ:

Այն կազմակերպվել էր Մասնագիտական կողմնորոշման և պրակտիկայի կազմակերպման բաժնի կողմից և նպատակ ուներ քննարկելու պրակտիկաների արդյունավետ կազմակերպմանը և իրականացմանը վերաբերող հարցեր:

Հանդիպման ընթացքում վերհանվեցին 2019-2020 ուսումնական տարվա պրակտիկաների ընթացքին, հիմնական ուղղություններին, ԵՊՀ ԻՄ-ի և համապատասխան կազմակեր­պություն-ձեռնարկությունների միջև կնքված պայմանագրերին, պրակտիկաների ծրագրերով նախատեսվող աշխա­տանքներին, պրակտիկանտների առջև դրվող պահանջներին, պրակտիկաների միջոցով կրթական ծրագրերի վերջնարդյունքների ապահովմանը վերաբերող խնդիրներ:

Ելնելով պրակտիկայի տեսակներից և տվյալ մասնագիտության կրթական ծրագրի առանձնահատկություններից՝ ղեկավարները ներկայացրին իրենց ծրագրերը՝ անդրադառնալով նպատակներին, խնդիրներին, գործողություններին՝ ուղղված առարկայական դասընթացներից ստացած գիտելիքների ամրապնդմանը և խորացմանը, կրթական ծրագրերում նշված անհրաժեշտ գործնական հմտությունների և կարողությունների ձեռքբերմանը:

Քննարկումների ընթացքում պարոն Ա.Մակարյանը ներկայացրեց պրակտիկաների վերաբերյալ իր մոտեցումները, հստակեցվեցին պրակտիկաների կազմակերպման ուղղությամբ կատարվելիք աշխա­տանք­ները, Հեռակա ուսուցման բաժնի վարիչ Մ.Զուրաբյանը հանդես եկավ պրակտիկայի խնդիրներին համալիր լուծումներ տալու առաջարկով: