ՀՀ ԿԳՄՍՆ գիտության կոմիտեն կազմակերպում է գիտական և գիտատեխնիկական գործունեության պայմանագրային (թեմատիկ) ֆինանսավորման նպատակով գիտական թեմաների հայտերի ընտրության «Ասպիրանտների և երիտասարդ հայցորդների հետազոտությունների աջակցության ծրագիր-2022» մրցույթ:

Մրցույթին կարող են մասնակցել 1987թ. հունվարի 1-ից հետո ծնված ասպիրանտներն ու հայցորդները՝ գիտական ղեկավարների հետ համատեղ (մասնակիցների տարիքային շեմը կարող է ավելանալ զինված ուժերում ծառայած լինելու դեպքում՝ 2 տարով, երեխայի խնամքի արձակուրդի դեպքում՝ յուրաքանչյուր երեխայի համար 1 տարով):

Մրցույթին մասնակցող ասպիրանտը կարող է դիմել գիտության բոլոր բնագավառների մասնագիտություններով, իսկ հայցորդը՝ «Բնական գիտություններ», «Ճարտարագիտություն և տեխնոլոգիա», «Բժշկական գիտություններ» և «Գյուղատնտեսական գիտություններ» բնագավառների մասնագիտություններով։

Մրցույթն անցկացվում է 36, 24 և 12 ամիս տևողությամբ երեք ենթածրագրով: Երկրորդ և երրորդ ենթածրագրերին դիմելու դեպքում պահանջվում է անգլերենի իմացության որոշակի մակարդակ, երրորդ ենթածրագրի դեպքում՝ նաև ազդեցության  գործակից (ԱԳ) ունեցող ամսագրերում կամ միջազգային գիտատեղեկատվական շտեմարաններում գիտական  հոդվածների առկայություն: ԱԳ ունեցող գիտական ամսագրում հոդված ունենալու պահանջը ներկայացվում է նաև գիտական ղեկավարին:

Թեմայի 12-ամսյա ֆինանսավորման առավելագույն ծավալը 3 միլիոն 200 հազար ՀՀ դրամ է, որի շրջանակներում ասպիրանտների ու հայցորդների աշխատանքի ամսական վարձատրության չափը սահմանված է մինչև 150 հազար ՀՀ դրամ, իսկ գիտական ղեկավարի վարձատրության չափը՝ 12 ամսվա կտրվածքով՝ մինչև 600 հազար ՀՀ դրամ: Մնացած գումարը կարող է ուղղվել գիտական սարքավորումների, հետազոտությունների ընթացքում օգտագործվող նյութերի ձեռքբերմանը կամ արտերկրում գիտական միջոցառումներին մասնակցությանը:

Առաջին և երկրորդ ենթածրագրերի յուրաքանչյուր փուլի ավարտից հետո (12 ամիսը լրանալուց հետո) ծրագրի շահառուն պետք է ներկայացնի ընթացիկ hաշվետվություն, որի հիման վրա որոշվելու է թեմայի ֆինանսավորումը շարունակելու նպատակահարմարությունը։

Մրցույթին մասնակցելու հայտ ներկայացվում է առցանց ռեժիմով՝ Գիտության կոմիտեի մրցույթների հայտերի և հաշվետվությունների ընդունման համակարգով (https://grants.scs.am), մինչև 2022թ. օգոստոսի 5-ը ներառյալ (հայտի ուղարկման հնարավորությունը կարգելափակվի Երևանի ժամանակով ժամը 18:00-ին): Պահանջվող փաստաթղթերի առձեռն ներկայացման վերջնաժամկետը 2022թ. օգոստոսի 12-ն է:

Մրցույթի վերաբերյալ լրացուցիչ տեղեկություններ և խորհրդատվություն կարելի է ստանալ ՀՀ ԿԳՄՍՆ գիտության կոմիտեի գիտական գործունեության կազմակերպման վարչությունից՝ զանգահարելով 010-21-01-40 (*113, *116) կամ տեխնիկական հարցերով` 010-210-140 (*108):

Մրցույթի հրավերի փաթեթը

Աղբյուրը՝ http://scs.am/:   

 Երևանի պետական համալսարանը ՀՀ-ում ԱՄՆ դեսպանատան կողմից ֆինանսավորվող «Ամերիկյան հետազոտություններ» (American Studies) դրամաշնորհային ծրագրի շրջանակներում հայտարարում է ամերիկագիտության բնագավառին վերաբերող հետազոտական աշխատանքների մրցույթ. մասնավորապես, խրախուսվում են ԱՄՆ ժամանակակից հասարակական- քաղաքական իրողություններին, տնտեսությանը և բիզնեսին, քաղաքացիական հասարակությանը, միջազգային և տարածաշրջանային հարթություններում ԱՄՆ ներգրավվածությանն ու դերակատարությանը, ամերիկյան հոգևոր-մշակութային կյանքին, ինչպես նաև ԱՄՆ պատմության առանձին դրվագներին վերաբերող հետազոտություններ:

Մրցույթի նպատակներն են՝

• Ընդլայնել և հարստացնել ամերիկագիտական հետազոտությունների գիտահետազոտական ներուժը,
• Խրախուսել ամերիկագիտության բնագավառում ակադեմիական և կիրառական բնույթի հետազոտությունների իրականացումը:

Մրցույթին մասնակցելու համար հրավիրվում են ամերիկագիտության կամ հարակից ակադեմիական գիտակարգերի բնագավառում գիտահետազոտական հետաքրքրություններ և փորձ ունեցող հետազոտողներ:

Հաղթող ճանաչված հայտերի նախատեսվող ֆինանսական աջակցությունը` մինչև 3500 ԱՄՆ դոլարին համարժեք ՀՀ դրամ:

Մրցույթի մասնակիցներին ներկայացվող պահանջներն են`

• առնվազն երեք տարվա գիտահետազոտական փորձառություն,
• գիտական աստիճան հասարակական գիտությունների ոլորտում,
• միջազգային ակադեմիական հետազոտական փորձառությունը կդիտվի որպես առավելություն,
• հետազոտական խմբի կողմից հայտ ներկայացվելու դեպքում առաջնահերթությունը կտրվի երիտասարդ  գիտաշխատողների ներգրավվածությամբ հետազոտական նախագծերին:

Մրցույթին մասնակցելու համար անհրաժեշտ է ներկայացնել`

• ինքնակենսագրական (CV),
• գիտական հետաքրքրությունների     շրջանակի      (Statement      of      Interests) նկարագրություն՝ 3-5 էջի սահմանում,
• հետազոտական առաջարկ (Research Proposal)` առավելագույնը 1500 բառի սահմաններում`առաջարկված թեմատիկաներից որևէ մեկի շրջանակում,
• բյուջե (նախագիծ):

Մրցույթի մասնակիցներն իրենց դիմումները կարող են ներկայացնել ԵՊՀ միջազգային համագործակցության վարչություն կամ ուղարկել էլեկտրոնային տարբերակով՝ «Ամերիկյան   հետազոտություններ»   ծրագրի   ղեկավար, պրոֆ. Ալ. Մարգարովին՝ amarkarov@ysu.am, «Ամերիկյան հետազոտություններ» ծրագրի համակարգող, ԵՊՀ ամերիկյան հետազոտությունների կենտրոնի տնօրեն, դոցենտ Վ.Ագլյանին՝ aglyan@gmail.com:

Մրցույթի մասնակիցների դիմումների ընդունման վերջնաժամկետն է 2022թ. ապրիլի 29-ը:

ԵՊՀ-ի՝ ակադեմիկոս Հրանտ Թամրազյանի անվան հայ գրականության պատմության ամբիոնը և ԵՊՀ ԻՄ-ի հայոց լեզվի և գրականության ամբիոնը համատեղ կազմակերպում են հայագիտական միջազգային գիտաժողով՝ նվիրված 20-րդ դարի գրական, հասարակական ու մշակութային նշանավոր գործիչ Արշակ Չոպանյանի ծննդյան 150-ամյակին:

Գիտաժողովը նպատակ ունի մեկ անգամ ևս գնահատելու բազմաբեղուն անվանի գիտնականին և բացահայտելու նրա վաստակը ինչպես հայ միջնադարյան գրականության ուսումնասիրության, այնպես էլ առհասարակ հայագիտության տարբեր ոլորտների զարգացման գործում, վերստին արժևորելու մեծ մտավորականի նվիրական կերպարը հայ մշակույթի տարածման, քարոզչության, ինչպես նաև հայությանը օտար ժողովուրդների մշակույթը ներկայացնելու ասպարեզում:

Գիտաժողովի նիստերը տեղի են ունենալու 2022թ. հոկտեմբերին Իջևանում՝ ԵՊՀ Իջևանի մասնաճյուղում: Զեկուցումները պետք է վերաբերեն հայ մշակույթի երախտավորի ազգային-հասարակական գործունեությանը, գեղարվեստական գործերին, թարգմանչական աշխատանքներին, գիտական, մասնավորապես՝ բանասիրական և գրաքննադատական ուսումնասիրություններին:

Գիտաժողովի աշխատանքային լեզուներն են հայերենը, ռուսերենը, ֆրանսերենը, անգլերենը:

Արտասահմանցի մասնակիցներն իրենց զեկուցումները կարող են ներկայացնել առցանց՝ ZOOM հարթակում:

Հայերեն զեկուցումների վերնագրերը, նկարագրականները (շուրջ 250 բառ) և մասնակցության հայտերը անհրաժեշտ է մինչև 2022 թվականի հունիսի 15-ը ուղարկել  Երևանի պետական համալսարանի՝ ակադեմիկոս Հրանտ Թամրազյանի անվան հայ գրականության պատմության ամբիոնի վարիչ, բան. գիտ. դոկտոր, պրոֆեսոր Ալբերտ Մակարյանին  (էլ. հասցեն՝ al.makaryan58@yandex.ru) կամ ԵՊՀ ԻՄ-ի հայոց լեզվի և գրականության ամբիոնի վարիչի պաշտոնակատար, բան. գիտ. թեկնածու, դոցենտ Վաչագան Ավագյանին (էլ. հասցեն՝ avagyan.vachik@yandex.ru):

Հայտերի ստացումից հետո ընդգրկված մասնակիցներին մանրամասները կտեղեկացվեն մինչև սեպտեմբերի 10-ը:

Գիտաժողովի կազմակերպիչների կողմից ընտրված զեկուցումները հոդվածի տեսքով նախատեսվում է տպագրել առանձին ժողովածուով:

Մասնակցության հայտի ձև

Գիտաժողովի կազմկոմիտե

Հրավերի բացիկ 

 «Երևանի պետական համալսարան» հիմնադրամի Իջևանի մասնաճյուղը գիտական և գիտատեխնիկական գործունեության պայմանագրային (թեմատիկ) ֆինանսավորման նպատակով կազմակերպում է Տավուշի մարզի զարգացման ուղղությամբ գիտական թեմաների հայտերի ներբուհական մրցույթ:

Մրցույթին կարող են ներկայացվել կոլեկտիվ կամ անհատական հայտեր, որոնք պատրաստվել են ԵՊՀ ԻՄ-ի հաստիքային աշխատակիցների կողմից` պայմանով, որ ղեկավարը և նախագծի ենթադրվող բոլոր կատարողների առնվազն 50 տոկոսը ԵՊՀ ԻՄ-ի աշխատակիցներ կամ ուսանողներ են:

Մրցույթին մասնակցելու հայտը սոսնձված և ստորագրված ծրարով ներկայացվում է ԵՊՀ ԻՄ գիտական քարտուղարին աշխատանքային օրերին՝ ժամը 9:00-12:00-ը կամ փոստով՝ մինչև 2022թ. ­­­­­­­­­­­­­­­­­­­­­ապրիլի 15-ը ներառյալ:  

Մրցույթի հրավերի ամբողջական փաթեթը հասանելի է հետևյալ հղումով: 

Ուշադրություն. խնդրում ենք հայտերը լրացնելիս նախօրոք ծանոթանալ հրավերի պայմաններին՝  հաշվի առնելով, որ թերի կամ ոչ լիարժեք փաստաթղթեր պարունակող, ինչպես նաև սահմանված ժամկետից ուշ ներկայացված հայտերը չեն դիտարկվելու: