2018թ. նոյեմբերի 2-ին ԵՊՀ Իջևանի մասնաճյուղ այցելեցին ՀՀ կենտրոնական բանկի ներկայացուցիչները՝ ՀՀ ԿԲ-ի նախագահի տեղակալ Ներսես Երիցյանը, ՀՀ ԿԲ-ի Դիլիջանի ուսումնահետազոտական կենտրոնի ղեկավար Արմեն Նուրբեկյանը, ղեկավարի օգնական Սյուզան Մկրտչյանը, ՀՀ ԿԲ-ի դրամավարկային և ֆինանսական վիճակագրության բաժնի պետ Արթուր Ղալթախչյանը, տնտեսական հետազոտությունների վարչության տնտեսագետ Գևորգ Մինասյանը և ուրիշներ:
Այցելության նպատակն էր ԵՊՀ ԻՄ-ի «Տնտեսագիտության տեսություն», «Տնտեսագիտություն», «Ֆինանսներ» մասնագիտությունների առկա և հեռակա ուսուցման համակարգերի ուսանողների համար անցկացնել «Կենտրոնական բանկի խնդիրները տնտեսական զարգացման համատեքստում» թեմայով սեմինար-քննարկում:
Հանդիպմանը ներկա էին ՀՀ ԿԲ-ի ներկայացուցիչները, ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, գլխավոր հաշվապահ Մ.Մխիթարյանը, Տնտեսագիտության ֆակուլտետի դեկանի պաշտոնակատար Գ.Ավետիսյանը, «Ֆինանսներ» կրթական ծրագրի պատասխանատու Ա.Սարիբեկյանը, արտադրական պրակտիկայի ղեկավար Ա.Ալեքսանյանը, դասախոսներ Ա.Եգանյանը, Մ.Աթաբեկյանը և Հ.Հայրապետյանը, Տնտեսագիտության ֆակուլտետի նշված մասնագիտությունների տարբեր կուրսերի ուսանողներ:
Սեմինար-քննարկումը վարեց ՀՀ ԿԲ-ի նախագահի տեղակալ Ներսես Երիցյանը, ով ներկայացրեց սեմինարի հիմնական խնդիրները՝ համաշխարհային ֆինանսական ճգնաժամից հետո պարադիգմի փոփոխությունը, գների կայունությունը, ֆինանսական կայունությունը, ֆինանսական շուկաները որպես կայունության պայման, ԿԲ-ի քաղաքականությունների արդյունքները և հետազոտական օրակարգը:
Նախ ներկայացվեց 2008-2009 համաշխարհային ֆինանսատնտեսական ճգնաժամի հետևանքների մասին, ինչը կենտրոնական բանկերին ստիպեց վերանայել և փոխել իրենց կողմից իրականացվող քաղաքականությունը. եթե մինչև ճգնաժամը ՀՀ կենտրոնական բանկի հիմնական քաղաքականությունը գնաճի նպատակադրումն էր, ապա ճգնաժամից հետո քաղաքականությունն ուղղվեց դեպի գների և ֆինանսական կայունության ապահովումը: Ընդգծվեց, որ այսօր ցածր գնաճը հետևողական դրամավարկային քաղաքականության արդյունք է։
Քննարկվեց ՀՀ ԿԲ-ի դրամավարկային քաղաքականության էությունը, որի գլխավոր նպատակը սահմանվեց որպես բիզնես ցիկլի հարթում՝ պոտենցիալ ՀՆԱ-ից փաստացի ՀՆԱ-ի շեղումների նվազեցում։
Առանձնահատուկ շեշտվեց ֆինանսական կայունության կարևորության մասին, որը մինչև ճգնաժամը հաշվի չէր առնվում։ Սակայն վերջինիս հետևանքները հանգեցրին նրան, որ ՀՀ ԿԲ-ն սկսեց վարել մակրոպրուդենցիալ քաղաքականություն, որի նպատակը ֆինանսական ցիկլի հարթումն է՝ պոտենցիալ ՀՆԱ-ից ֆինանսական ցիկլի շեղումների նվազեցում։
Սեմինար-քննարկման ընթացքում ուսանողները և քննարկման մասնակիցները պարոն Երիցյանին ուղղեցին իրենց հետաքրքրող հարցերը և ստացան սպառիչ պատասխաններ:
«Կենտրոնական բանկի խնդիրները տնտեսական զարգացման համատեքստում» թեմայով սեմինար-քննարկումն ամփոփելով՝ Ներսես Երիցյանը նշեց, որ դրամավարկային և մակրոպրուդենցիալ քաղաքականությունների համագործակցության վերաբերյալ հարցերն ունեն լուրջ հետազոտության կարիք, ուստի ԿԲ-ի Դիլիջանի ուսումնահետազոտական կենտրոնը համագործակցում է մի շարք կենտրոնական բանկերի և միջազգային կառույցների հետ ձևավորված հետազոտական օրակարգի շուրջ։
Վերջում ՀՀ ԿԲ-ի նախագահի տեղակալը ԵՊՀ ԻՄ-ի ուսանողներին խորհուրդ տվեց ակտիվորեն մասնակցել կրթաթոշակային ծրագրերի, մասնավորապես՝ ՀՀ ԿԲ-ի կողմից հայտարարվող Իսահակ Իսահակյանի անվան կրթաթոշակի մրցույթին, համագործակցելով ՀՀ ԿԲ-ի Դիլիջանի ուսումնահետազոտական կենտրոնի հետ՝ իրականացնել հետազոտական տարաբնույթ աշխատանքներ:

2018թ. հոկտեմբերի 29-ից նոյեմբերի 3-ը ԵՊՀ Իջևանի մասնաճյուղում (առկա ուսուցման համակարգում) ընթանում են 2018-2019 ուստարվա առաջին կիսամյակի I ընթացիկ քննություններն ու ստուգումները:

ԵՊՀ ԻՄ-ի ուսումնամեթոդական վարչության պետ Ա.Դավթյանի հավաստմամբ՝ քննաշրջանն անցկացվում է համաձայն սահմանված կարգի (Բակալավրի կրթական ծրագրով ուսումնական գործընթացի կազմակերպման կարգի)՝ նախատեսված կիսամյակի 9-րդ շաբաթում, որի ընթացքում ուսանողներն ազատված են ուսումնական պարապմունքներից:

Ըստ սահմանված կարգի` ընթացիկ քննությունների և ստուգումների հարցաշարերը նախապես տրամադրվում են ուսանողներին:

Այս տարի ընթացիկ քննությունների տոմսերը, թեստերը և տարբերակները ստորագրվել, կնքվել, ծրարավորվել և պահպանվել են դեկանների մոտ:

Գրավոր քննություններն ու ստուգումներն այս տարի հիմնականում անցկացվում են տեսախցիկներով կահավորված լսարաններում (№38, №39, №56, №57):

Բանավոր և թեստային ձևով անցկացված քննությունները գնահատվում են անմիջապես տեղում (լսարանում), իսկ գրավոր քննությունները 7 օրվա ընթացքում ստուգվում են դասախոսի կողմից և քննարկվում ուսանողների հետ:

Քննական գործընթացի թափանցիկությունն ու հրապարակայնությունն ապահովելու նպատակով քննությունների արդյունքները տեղադրվում են ԵՊՀ ԻՄ-ի պաշտոնական կայքէջում:

Ընթացիկ քննությունների և ստուգումների արդյունքները քննարկվում են ֆակուլտետների գիտական  խորհուրդների և ամբիոնների նիստերում:

 2018թ. հոկտեմբերի 27-ին «Վրաստանի և Ադրբեջանի պատմություն» դասընթացի շրջանակներում ԵՊՀ ԻՄ-ի «Պատմություն» մասնագիտության 4-րդ կուրսի ուսանողները՝ իրենց դասախոսներ, Հայոց պատմության և հասարակագիտության ամբիոնի ասիստենտ, պ.գ.թ. Ա.Հովհաննիսյանի և նույն ամբիոնի դոցենտ, ք.գ.թ. Հ.Մովսեսյանի ուղեկցությամբ, ճանաչողական այց կատարեցին Հայաստանի հյուսիսային հարևան Վրաստանի Հանրապետություն:

Համալսարանականների խումբը նախ այցելեց վրաց ժողովրդի հոգևոր կենտրոն՝ Մցխեթայում գտվող Սվետիցխոելի, որն ամենամեծն է Վրաստանում պահպանված պատմական կառույցների ցանկում։ Դարեր շարունակ այն համարվել է Վրաստանի քրիստոնեական կենտրոնը։ Դեռ 4-րդ դարում քրիստոնեական թագավոր Միրիան Երրորդը առաքյալ Նունեի խորհրդով կառուցել է առաջին փայտե եկեղեցին Վրաստանում, որը չի պահպանվել։ Մայրին ծառայել է որպես տաճարի սյուներից մեկը, նշանակվել է այն տեղը, որտեղ թաղված են եղել Քրիստոսի հանդերձները։

5-րդ դարի երկրորդ կեսին բարեպաշտ թագավոր Վախթանգ I Գորգասալը բազիլիկ եկեղեցու փոխարեն կառուցել է վերին կամրջակալներ, որոնք բացվել են խորհրդային հետազոտողների (Վ.Ցինցաձեի գլխավորությամբ) կողմից 1970 թվականին և թողնվել են հասարակության դիտարկմանը։ 11-րդ դարում վնասված բազիլիկի փոխարեն Վրաստանի կաթողիկոս Մելքիսեդեկ Առաջինը (1012-1030, 1039-1045) կառուցեց տաճար։ Այժմ գոյություն ունեցող քառասյուն, խաչաձև գմբեթ ունեցող եկեղեցին՝ տասներկու առաքյալների անվամբ, կառուցվել է 1010-1029 թվականներին (ճարտարապետ՝ Արսակիձե)։

Ճանապարհն անցնում էր Կուր և Արագվի գետերի հուների երկայնքով, որոնք առանձնակի շուք էին տալիս ուղևորությանը:

Հաջորդ կանգառը Թբիլիսին էր, որն առանձնանում է իր մշակույթով, ոճային բազմազանությամբ: Բարդ ու հետաքրքիր ճարտարապետական  լուծումներով կառուցված շինությունների դիմաց վեր էին խոյանում վրացական ու կովկասյան մշակույթների համադրությամբ ստեղծված կառույցները: Ուշագրավ էր Արևմուտքի մշակույթի ազդեցությունը Թբիլիսիի վրա:

Առավել քան հետաքրքրական էր վրացական խոհանոցը:

Ուսանողները տեսան Թբիլիսիի պետական համալսարանը, քայլեցին հայելապատ կամրջի վրայով, նստեցին ճոպանուղի, տեսան մայրաքաղաքի համայնապատկերը, նստեցին Քուռ գետի վրա գտնվող նավերից մեկը և հիացան Թբիլիսիի վառվռուն լույսերով:

2018թ. հոկտեմբերի 25-ին ԵՊՀ Իջևանի մասնաճյուղում կայացավ «Նախագծերի կառավարում» թեմայով ներածական դասընթացը, որը վարեց տնտեսագիտության թեկնածու (2008թ․), կառավարման որակավորված խորհրդատու, CMCE (2013թ․), Project Management Professional (2016թ․), վեց սիգմա դեղին գոտի (2016թ․), Papka.am պորտալի հիմնադիր Դավիթ Իսկանդարյանը:

Դասընթացին մասնակցում էին ԵՊՀ Իջևանի մասնաճյուղի 2 աշխատակիցներ և 40-ից ավելի ուսանողներ:

«Նախագծերի կառավարում» ներածական դասընթացի ժամանակ ներկայացվեց, թե ինչ է նախագիծը, որոնք են դրա տեսակները, ինչպես պետք է նախագծել, որպեսզի տվյալ նախագիծն ընդունելի լինի հաճախորդի կողմից:

Ցուցադրվեցին նախագծերի և արդյունքների վերաբերյալ լուսանկարներ, որոնցում սկզբում ներկայացված էին, թե ինչպես բացատրեց իր պահանջը հաճախորդը և վերջում, թե ինչ էր ուզում ստանալ հաճախորդը:  

Դասընթացավար Դավիթ Իսկանդարյանը, նշելով, որ նախագծերում լինում են ինչպես հաջողություններ, այնպես էլ ձախողումներ, ներկայացրեց նախագծերի կառավարման մեթոդները: Նա շեշտեց, որ նախագծերի կառավարումը կանխատեսում և կանխարգելում է, ոչ թե գիտակցում և արձագանքում:

Այնուհետև դասընթացավարը ներկայացրեց նախագծերի կառավարման հիմնական ոլորտները.

• Ծավալների կառավարում / Scope Management
• Ծախսերի կառավարում / Cost Management
• Որակի կառավարում / Quality Management
• Ռիսկերի կառավարում / Risk Management
• Ժամանակի կառավարում / Time Management
• Մարդկային ռեսուրսների կառավարում / Human Resources Management
• Հաղորդակցությունների կառավարում / Communications Management
• Գնումների կառավարում / Procurement Management
• Ինտեգրացիայի կառավարում / Integration Management
• Շահառուների կառավարում / Stakeholders Management:

Յուրաքանչյուր ոլորտի համար տրվեց համապատասխան սահմանում, բերվեցին օրինակներ:

«Նախագծերի կառավարում» ներածական դասընթացն անցավ ակտիվ քննարկման մթնոլորտում:

Ուսանողների հավանությանն արժանացավ և՛ դասընթացի թեման, և՛ դրա անցկացման ձևը:

Դասընթացի վերջում մասնակիցները ստացան հավաստագրեր:

Մասնակցության հավաստագրերի հանձնման լուսանկարներից տե՛ս այստեղ: